Kodi Mukhadziwa?
Thangwe ranyi wanthu omwe akhali lini Ajirayeri akhatumikirambo ninga acikunda wa Mambo Davide?
PAKATI pa acikunda wa Mambo Davide, pakhana amuna winango omwe akhali lini Ajirayeri. Mwa ciratizo, pakhana Zeleki wa dzinza la Amoni, Uriya m’Hiti na Itima wa ku Mowabe. a (1 Nkhani 11:39, 41, 46) Ndipo acikunda winango wa Davide akhali “Akereti, Apeleti, na Agate.” (2 Samuyeli 15:18) Bzikuwoneka kuti wanthu akhakumbuka kuti Akereti na Apeleti akhali pa ubale na Afilisteu. (Ezekiyeli 25:16) Ndipo Agate adacokera ku Gate mu mzinda wa Afilisteu. — Djoswa 13:2, 3; 1 Samuyeli 6:17, 18.
Thangwe ranyi Davide adabvuma kuti amuna amwewa akhale acikunda wace? Iye akhadziwa kuti iwo akhali wakukhulupirika kwa iye na kwa Yahova. Mwa ciratizo, pakulewa bza Akereti na Apeleti, Dicionário inango idalewa kuti: “Iwo adapitiriza kukhala wakukhulupirika kwa Davide napo pomwe bzinthu bzidafika pakunesa kwene-kwene mu umambo bwace.” Kodi iwo adalatiza tani kuti akhali wakukhulupirika? Pomwe “amuna wentse” adasiya Mambo Davide acitewera “mwamuna munango wakucemeredwa Xeba,” Akereti na Apeleti adakhala wakukhulupirika kwa Davide ndipo adamuthandiza kumalisa kupanduka komwe Xeba adacita. (2 Samuyeli 20:1, 2, 7) Pa nthawe inango, Adoniya omwe akhali mwana wa Mambo Davide akhafuna kukhala mambo m’mbuto mwa Salomau. Tsono, Akereti na Apeleti adathandiza Salomau kuti akhale mambo thangwe ndiye omwe akhadasankhulidwa na Yahova. — 1 Amambo 1:24-27, 38, 39.
Munthu munango omwe adakhala wakukhulupirika kwa Davide akhali Itai, m’Gate. Itai pabodzi na acikunda wace 600 adathandiza Mambo Davide pomwe Abisalomu mwana wa Davide adapanduka acicitisa kuti wanthu apandukirembo mambo. Pakuyamba, Davide adauza Itai kuti akhafunikira lini kumenyambo nkhondoyo thangwe akhali lini m’Jirayeri. Tsono, Itai adalewa kuti: “Ndikulumbira pana Yahova Mulungu wamoyo, na pana imwe mbuya wangu mambo, kuli-kwentse komwe imwepo mun’dzayenda, inepano nin’dzayendambo ndipo ndiri wakukonzeka kufa namwe pabodzi!” — 2 Samuyeli 15:6, 18-21.
Itai akhali wakukhulupirika kwa Davide nyakusankhulidwa na Yahova
Napo kuti Akereti, Apeleti na Agate akhali lini Ajirayeri, iwo akhadziwa kuti Yahova ni Mulungu wacadidi nakuti Davide akhadasankhulidwambo na Yahovayo. Kulewa cadidi, Davide akhakomedwa kwene-kwene kukhala na amuna wakukhulupirikawa ku mbali yace!
a Lamulo la pa Deuteronomiyo 23:3-6 likhaletsa kuti Aamoni na Amowabe apite m’gwere la Ajirayeri, nakuti akhaliretu nzika ya Ajirayeri. Tsono likhaletsa lini kuti iwo atsonkhane na kukhala pabodzi na wanthu wa Mulungu. Onani Estudo Perspicaz das Escrituras, Volume 1, tsa. 112.
