1. Kodi n’ciyani comwe cimbabwera m’makumbukidwe mwanu mukakumbukira bza Yahova?

 KODI mudayezera kale kukumbukira momwe Yahova aliri? Kodi n’ciyani comwe imwepo mumbakumbukira mukakhala mukulewalewa naye mu mpembo? Napo kuti Yahova ambawoneka lini, koma Bibliya limbafotokoza mawonekedwe yace mu njira zakusiyana-siyana. Yahova ambacemeredwa “dzuwa na cakukhotcera” ndipo ambacemeredwambo “moto omwe umbapfudza.” (Salimo 84:11; Ahebereu 12:29) Pambuyo pa Ezekiyeli kuwona masomphenya ya Mulungu, iye adalewa kuti Yahova ali ninga mwala wa safira, simbi yakuyetima na citaleza. (Ezekiyeli 1:26-28) Tikabva bzimwebzi, ifepano tingadabwe kwene-kwene ndipo nthawe zinango tingacite mantha.

2. Kodi n’ciyani comwe cimbacitisa kuti wanthu winango aleke kukhala axamwali wa Yahova?

² Pakuti ifepano timbakwanisa lini kumuwona Yahova, nthawe zinango bzingatinese kukhulupira kuti iye ambatifuna. Wanthu winango ambakumbuka kuti Yahova angawafune lini thangwe ra bzinthu bzomwe bzidawacitikira m’mbuyo. Pinango iwo alibe kukhala na pai omwe akhawafuna. Yahova ambadziwa kuti thangwe ranyi ifepano timbakumbuka tenepo. Ndipopa kuti atithandize, iye ambafotokoza momwe aliri mu Fala lace, Bibliya.

3. Thangwe ranyi tin’funika kupfunza bza lufoyi la Yahova?

³ Fala libodzi lomwe limbatithandiza kudziwa momwe Yahova aliri ni lufoyi. (1 Juwau 4:8) Yahova ni lufoyi. Ndipo bzinthu bzentse bzomwe iye ambabzicita, ambabzicita thangwe ra lufoyi. Lufoyi la Mulungu ndamphanvu kwene-kwene mwakuti iye ambalilatizambo napo kwa wanthu wale omwe ambamufuna lini. (Mateu 5:44, 45) Mu nkhani ino, tin’pfunza momwe Yahova aliri na momwe iye ambalatizira lufoyi lace. Tikapfunza bzizinji bza Mulungu wathu, ifepano tin’dzamufuna kwene-kwene.

 YAHOVA AMBATIFUNA KWENE-KWENE

4. Kodi lufoyi la Yahova likukucitisani kuti mubzibve tani? (Onani cithunzi-thunzi.)

⁴ “Yahova ngwa lufoyi likulu na wantsisi.” (Tiyago 5:11) M’Bibliya, iye ambandendemezeredwa na mai walufoyi kwene-kwene. (Zaiya 66:12, 13) Kumbukirani bza mai omwe ambasamalira bwino mwana wace. Iye ambamuikha pa cifuwa cace ndipo ambalewalewa naye mwakudeka mtima. Mwanayo akalira ayai akakhala akubva kuwawa, maiyo ambamucitira bzomwe iye akufuna. Tikakhala tikubva kuwawa, tin’funikambo kukhulupira kuti Yahova an’dzatithandiza. Nyakunemba salimo adati: “Pomwe makumbukidwe yakundiboneresa yadadzala mu mtima mwangu, mafala yanu yakunditsangalaza yadakondwesa moyo wangu.” — Salimo 94:19.

5. Kodi n’ciyani comwe Yahova ambakucitirani thangwe rakuti ambakufunani?

⁵ Yahova ngwakukhulupirika. (Salimo 103:8) Iye ambatisiya lini tikacita bzinthu bzakuphonyeka. Mtundu wa Ajirayeri ukhaphonyera Yahova mwakubwereza-bwereza; koma, iye adalatiza kuti akhawafuna mwakuwauza mafala yakuti: “Pakuti iwepo ndiwe wakufunika pa maso pangu, iwepo walemekezedwa, ndipo inepano nimbakufuna.” (Zaiya 43:4, 5) Lufoyi la Yahova liribe kucinja. Tin’funika kumbakumbukira bzimwebzi nthawe zentse. Napo tikacita bzinthu bzakuphonyeka kwene-kwene, Yahova ambatisiya lini. Tikakungula ticibwerera kwa Yahova, tin’dzazindikira kuti lufoyi lace kwa ifepano likalipo. Iye akupicira kuti ‘an’dzatilekerera na mtima wentse.’ (Zaiya 55:7) Ndipo kutilekererako kumbatibweresera “nthawe za mtsangalazo . . . kucokera kwa Yahova.” — Mabasa 3:19.

6. Kodi Zakariya 2:8 ambatipfunzisa ciyani bza Yahova?

⁶ Werengani Zakariya 2:8. Pakuti Yahova ambatifuna, iye ambacita thupo na bzinthu bzomwe bzimbaticitikira ndipo ambafunisisa kutikhotcerera. Ifepano tikapwetekeka, bzimbakhala ninga kuti apwetekeka ndiye. Ndipopa ifepano tingapembe mwakulewa mafala yakuti: “Ndikhotcerereni ninga mboni ya diso lanu.” (Salimo 17:8) Munthu ambakhotcerera kwene-kwene diso lace thangwe iro ni cinthu cakufunika kwene-kwene kwa iye. Ndipopa, Yahova akatindendemezera na mboni ya diso lace bzimbakhala ninga akulewa kuti: ‘Munthu omwe an’kucitirani cinthu cakuipa, wanthu wangumwe, iye akucita kuipa cinthu cakufunika kwene-kwene kwa inepano.’

7. Thangwe ranyi tin’funika kulimbisa cikhulupiro cathu pa lufoyi la Yahova?

⁷ Yahova akufuna kuti ifepano titsimikizire kuti iye ambafuna ali-wentse wa ifepano payekha-payekha. Tsono iye ambadziwa kuti  thangwe ra mabvuto yomwe timbagumana nayo, nthawe zinango tingakumbuke kuti iye ambatifuna lini. Ayai pinango tingakhale tikugumana na mabvuto nthawe ino yomwe yangaticitise kukumbuka kuti Yahova ambatifuna lini. Kodi n’ciyani cin’dzalimbisa cikhulupiro cathu? Comwe cin’dzalimbisa cikhulupiro cathu ndico kupfunza momwe Yahova ambalatizira lufoyi kwa Mwana wace, Jezu, kwa anyakudzozedwa na kwa ifepano tentse.

KODI YAHOVA AMBALATIZA TANI LUFOYI LACE?

8. Thangwe ranyi Jezu akhatsimikizira kuti Pai wace akhamufuna?

⁸ Pakuti Yahova na Mwana wace adakhala pabodzi magole mazinji kwene-kwene bzimwebzi bzidacitisa kuti iwo afunane kwene-kwene. Yahova adalatiza kuti ambafuna Mwana wace, Jezu, mwakulewa mafala yomwe yali pa Mateu 17:5. Yahova angadandolewa kuti: ‘Uyu ngule omwe inepano nimbakomedwa naye.’ Tsono iye akhafuna kuti ifepano tidziwe kuti iye ambafuna kwene-kwene Mwana wace, Jezu, ndipopa iye adalewa kuti: “Uyu ndiye Mwana wangu wakufunidwa.” Yahova akhakomedwa kwene-kwene na Mwana wace, Jezu, ndipo akhakomedwambo na bzomwe iye akhafuna kucita pa dziko la pantsi pano. (Aefezo 1:7) Ndipo Jezu akhakhulupira kuti Baba wacewo akhamufunadi. Lufoyi la Yahova kwa Jezu likhali la cadidi, ndipopa Jezuyo akhakwanisa kuwona bzimwebzo. Iye adalewa kazinji-kentse kuti Baba wace ambamufuna. — Juwau 3:35; 10:17; 17:24.

9. Kodi ni fala liponi lomwe limbalatiza kuti Yahova ambafuna anyakudzozedwa? Fotokozani. (Aroma 5:5)

⁹ Yahova ambalatizambo kuti ambafuna Akristau wakudzozedwa. (Werengani Aroma 5:5.) Onani fala lakuti “lidathululidwa.” Bukhu linango lidalewa kuti fala limweri lingathandauze “kukhala ninga kuti lufoyiro lidacita kuthululidwa licibwera ningati madzi ya mu mkulo.” Fala limweri likulatiza padeca kuti Yahova ambalatiza lufoyi likulu kwene-kwene kuna Akristau wakudzozedwa! Ndipo anyakudzozedwawo ambadziwa kuti “ambafunidwa na Mulungu.” (Djuda 1) Mpostolo Juwau adalatiza momwe akhabvera pomwe adanemba kuti: “Onani lufoyi likulu lomwe Baba adalilatiza kwa ifepano, mwa kutipasa mwayi wakucemeredwa wana wa Mulungu!” (1 Juwau 3:1) Kodi lufoyi la Yahova limbaimira pa anyakudzozedwawo basi? Ne, Yahova adalatiza lufoyi lace kwa ifepano tentse.

10. Kodi n’ciyani comwe cikulatiza kuti Yahova ambakufunani?

¹⁰ Kodi n’ciyani comwe cimbalatiza kuti Yahova ambatifunadi? Ni cakulombolera. Mwakutipasa cakulombolera, Yahova adalatiza kuti ambatifuna kwene-kwene kuposa momwe munthu ali-wentse angatifunire! (Juwau 3:16; Aroma 5:8) Yahova adapereka Mwana wace wakufunidwa mwakubvuma kuti iye atifere kuti pikado zathu zilekereredwe na kuti tikwanisembo kukhala axamwali wace. (1 Juwau 4:10) Tikambakumbukira bzinthu bzomwe Yahova na Jezu adaticitira, tin’dzakwanisa kuzindikira kuti iwo ambatifuna kwene-kwene. (Agalatiya 2:20) Jezu alibe kupereka cakulombolera thangwe rakuti ndibzo bzomwe Yahova akhafuna basi. Iye adacita bzimwebzi thangwe rakuti ambatifuna. Ndipo Yahova adalatizambo kuti ambatifuna mwakubvuma kupereka cinthu comwe ni cakufunika kwene-kwene kwa iye comwe ni Mwana wace, Jezu. Yahova adabvuma kuti Mwana wace abonere na kutifera.

11. Kodi tikupfunza ciyani pa Jeremiya 31:3?

¹¹ Ninga momwe tawonera, Yahova ambandobva lini ntsisi kwa wanthu, koma iye ambalatiza ntsisizo. (Werengani Jeremiya 31:3.) Iye adatibweresa m’gulu lace thangwe rakuti ambatifuna. (Ndendemezerani na Deuteronomiyo 7:7, 8.) Palibe munthu ayai cinthu comwe cingakwanise kutilekanisa na lufoyi lace. (Aroma 8:38, 39) Kodi imwepo mumbabva tani mukambakumbukira bza lufoyi limweri? Werengani Salimo 23 kuti muwone momwe lufoyi lomwe Yahova adalilatiza kwa Davide lidamucitisira kuti abve bwino na momwe imwepo mungabvembo mukambakumbukira bza lufoyi lomwe Yahova analo kuna imwepo.

 KODI LUFOYI LA YAHOVA LIMBAKUCITISANI KUTI IMWEPO MUBVE TANI?

12. Kodi mungafotokoze tani mwacigwatira mafala ya pa Salimo 23?

¹² Werengani Salimo 23:1-6. Salimo kapitulo 23 ni nyimbo yomwe imbalatiza kuti tin’funika kukhulupira lufoyi la Yahova na momwe iye ambatisamalirira. Davide, omwe adanemba salimo limweri, adafotokoza bza lufoyi lomwe likhalipo pakati pa M’busa wace Yahova na iye. Davide akhabzibva kuti akhali wakukhotcerereka pomwe akhasiya kuti Yahova atsogolere moyo wace. Davide akhadziwa kuti Yahova angadapitiriza kumufuna. Thangwe ranyi iye akhakhulupira bzimwebzi?

13. Thangwe ranyi Davide akhatsimikizira kuti Yahova angadamusamalira?

¹³ “Nin’dzasaya lini cinthu.” Davide akhabzibva kuti akhali wakukhotcerereka thangwe rakuti nthawe zentse Yahova akhamupasa bzomwe iye akhafunikira pa moyo wace. Davide akhalimbo pa uxamwali bwakulimba na Yahova. Ndipopa iye akhakhulupira kuti, bziribe basa bzomwe bzingadabwera pa moyo wace, Yahova angadapitiriza kumusamalira na kumupasa bzomwe iye akhafunikira. Cikhulupiro comwe Davide akhanaco pa lufoyi la Yahova cikhali camphanvu kwene-kwene kuposa bzinthu bzomwe iye akhakumbukira pa moyo wace. Bzimwebzi bzidamucitisa kuti akhale wakukondwa na kuti aleke kukhala na thupo. — Salimo 16:11.

14. Kodi Yahova angatisamalire tani mwalufoyi? (Onani cithunzi-thunzi.)

¹⁴ Yahova ambatisamalira mwalufoyi maka-maka tikakhala tikugumana na mabvuto pa moyo wathu. Claire, a omwe akutumikira pa Beteli kwa magole 20, adabzibva kukhala wakusaya mphanvu pomwe banja lace lidagumana na mabvuto mwakamphindiza. Pai wace adagumanidwa na matenda yakugopswa, m’bale wace adacosedwa  m’gwere ndipo famidya yace idaluza negosiyo yawo na nyumba yawo. Kodi Yahova adalatiza tani lufoyi lace kwa iwo? Claire adati: “Yahova adathandiza banja langu kukhala na bzentse bzomwe akhafunikira ntsiku zentse. Bzinthu bzomwe Yahova akhapasa banja langu ntsiku zentse ni bzinthu bzomwe inepano ndikhabzidikhirira lini! Nthawe zizinji, inepano nimbakumbukira momwe Yahova adandilatizira lufoyi. Kukumbukira bzimwebzi kudandithandiza kupitiriza kutumikira Yahova mwakukondwa pomwe ndidadzagumana na mabvuto yanango kutsogolo.”

15. Thangwe ranyi Davide adabzibva kuti akhali wakutsangalazidwa?

¹⁵ “Iye ambanditsangalaza.”  Nthawe zinango Davide akhacita thupo kwene-kwene thangwe ra mabvuto yomwe akhagumana nayo. (Salimo 18:4-6) Tsono lufoyi la Yahova na momwe iye akhamusamalirira bzikhamutsangalaza Davideyo. Yahova akhatenga xamwali waceyi acimuyendesa ku mbuto yomwe ina “mauswa yakupswipirira bwino” na “ku mbuto zakupumira za madzi mazinji.” Bzimwebzi bzikhacitisa kuti Davideyo akhale pomwe na mphanvu acipitiriza kumutumikira. — Salimo 18:28-32.

16. Kodi lufoyi la Yahova limbakutsangalazani tani?

¹⁶ Mpsibodzi-bodzimbo na ifepano ntsiku zino. Tikakhala tikugumana na mayezo pabodzi na mabvuto yakusiyana-siyana pa moyo wathu timbapitiriza kutumikira Yahova “thangwe ra lufoyi lacadidi la Yahova, pakuti ntsisi zace zimbamala lini”. (Maliro 3:22; Akolose 1:11) Onani ciratizo ca Rachel. Iye adasaya muti wakuphata pomwe bayace adamusiya ndipo adasiyambo kutumikira Yahova pa nthawe ya matenda ya COVID-19. N’ciyani comwe Yahova adamucitira? Iye adati: “Yahova adacitisa kuti inepano ndibzibve kuti nimbafunidwa. Iye adandipasa azixamwali wabwino kwene-kwene omwe akhambaceza nande, kundiphikira cakudya, kunditumizira mensaje na mavesi yabwino kwene-kwene, kuseka nande na kundikumbusa kuti Yahova akhandisamalira. Nimbatenda kwene-kwene Yahova thangwe ra kundipasa banja lauzimu limweri lomwe lina lufoyi kwene-kwene.”

17. Thangwe ranyi Davide “akhagopa lini cakuipa ciri-centse”?

¹⁷ “Inepano nin’dzagopa lini cakuipa ciri-centse, pakuti imwepo muli nande.” Davide adapulumuka kazinji-kentse m’manja mwa anyamadulanthaka wace omwe akhafuna kumupha ndipo iwo akhali wamphanvu kwene-kwene. Iye akhakwanisa kuwona kuti Yahova akhanaye pa nthawe yentseneyi ndipo bzimwebzi bzikhamucitisa kukhala wakuderekha. Ndipopa, iye adaimba kuti: “Yahova adandipulumusa pa nthawe zentse zomwe ndikhacita mantha.” (Salimo 34:4) Davide akhathawa-thawa thangwe rakuti iye akhana mantha kwene-kwene. Tsono lufoyi lomwe Yahova akhanalo kwa iye likhali la mphanvu kuposa mantha yaceyo.

18. Kodi kukhulupira kuti Yahova ambakufunani kungakuthandizeni tani mukakhala mukubva mantha?

 ¹⁸ Kodi kukhulupira kuti Yahova ambatifuna kumbatikhotcerera tani tikakhala tikugumana na mabvuto yakugopswa? Mpfumakazi inango yakucemeredwa Susi yomwe ikutumikira ninga mpainiya idafotokoza momwe iyo na bayace adabvera pomwe mwana wawo adabzipha. Iyo idati: “Ngozi yakusaya kudikhiririka ingacitise munthu kudzungulumwa ndipo ingamucitise kusaya cakucita. Tsono lufoyi la mphanvu lomwe Yahova analo kuna ifepano lidaticitisa kuti tikhale wakukhotcerereka.” Rachel, omwe tamufotokoza kale ule, adalewa kuti: “Usiku bunango pomwe mtima wangu ukhandiwawa kwene-kwene ndipo ndikhacita thupo, ndidapemba kwa Yahova mwakucita kubuula. Pa nthawe imweyo ndidabva kuti iye adadjedjeresa mtima wangu ninga momwe mai ambacitira na mwana wace ndipo ndidagona. Inepano nin’dzayebwa lini nthawe imweyire.” Mkulu munango wa gwere wakucemeredwa Tasos adamala magole manai ali m’kawoko thangwe ra kulamba kucita basa la ucikunda. Kodi iye adakwanisa tani kuwona lufoyi la Yahova na momwe Yahovayo akhamusamalirira? Iye adati: “Yahova adandisamalira pa bzentse bzomwe ndikhafunikira. Bzimwebzi bzidalimbisa cikhulupiro cangu kwa iye cakuti ningamuthembe pa bzinthu bzentse. Kuthumizira bzimwebzi, mwakuphatisa basa mzimu wace, Yahova adandicitisa kuti ndikhale wakukondwa napo kuti ndikhali pa nthawe zakunesa. Bzimwebzi bzidandilatiza kuti ndikapitiriza kuphata basa na iye, an’dzapitiriza kundilatiza kudeka mtima. Ndipopa ndidayamba kutumikira ninga mpainiya wakukhazikika pomwe ndikhali m’kawoko.”

KHALANI PA UXAMWALI NA MULUNGU WANU WANTSISI

19. (a) Kodi kudziwa kuti Yahova ambatifuna kun’dzaticitisa kuti tilewe ciyani tikakhala tikupemba? (b) Kodi ni mafala yaponi yakulewa bza lufoyi la Yahova yomwe imwepo mumbakomedwa nayo kwene-kwene? (Onani kwadru yakuti “ Mafala Yomwe Yambaticitisa Kuwona Kuti Yahova Ambatifuna.”)

¹⁹ Bzinthu bzentse bzomwe tacezerana mu nkhani ino bzalatiza kuti Yahova ni “Mulungu wa lufoyi” ndipo iye an’dzatisiya lini! (2 Akolinto 13:11) Iye ambafuna mtumiki wace ali-wentse payekha-payekha. Ndipo ifepano tina citsimikizo centse cakuti ‘tidazunguliridwa na kudeka mtima kwace komwe kumbamala lini.’ (Salimo 32:10) Tikambakumbukira kwene-kwene momwe iye ambatilatizira lufoyi lace, iye ambakhala munthu caiye kwa ifepano ndipo timbakhala pa uxamwali na iye. Tingapembe kwa iye mwakutsudzuka ticimuuza kuti tikufuna kuti iye atilatize lufoyi lace. Tingamuuze cinthu ciri-centse comwe cikuticitisa thupo na cikhulupiro centse cakuti iye an’dzatibva ndipo an’dzatithandiza. — Salimo 145:18, 19.

20. Kodi lufoyi la Yahova limbaticitisa tani kuti tikhale pa uxamwali na iye?

²⁰ Ninga momwe ifepano timbafunira kukhala pa moto pa nthawe yakudjedjera, timbafunambo kuti Yahova atilatize lufoyi. Lufoyi la Yahova ndamphanvu kwene-kwene ndipo iye ngwantsisi. Tenepo khalani wakukondwa thangwe rakuti Yahova ambakufunani. Ndipo tentse tibvume lufoyi la Yahova mwakulewa kuti: “Inepano nimbamufuna Yahova”! — Salimo 116:1.