NKHANI YAKUPFUNZA 3
NYIMBO 124 Kukhala Wakukhulupirika Nthawe Zense
Yahova An’dzakuthandizani pa Nthawe za Mabvuto
“Yahova an’dzacitisa kuti bzinthu bzikufambireni bwino pa nthawe ya mabvuto.” — ZAIYA 33:6.
CAKULINGA CA NKHANIYI
Bzomwe tingacite kuti tigumane phindu na thandizo la Yahova pa nthawe za kunesa.
1-2. Kodi ni mabvuto yaponi yomwe atumiki wa Yahova angagumane nayo?
BZINTHU bzakuipa bzingacinje moyo wathu kabodzi na kabodzi. Mwa ciratizo, m’bale munango wakukhulupirika wakucemeredwa Luis a adawonedwa kuti akhana matenda makulu kwene-kwene. Dotolo adamuuza kuti iye akhana ntsiku zing’ono-ng’ono kuti akhale na moyo. Monika pabodzi na bayace akhali wakutanganika pa mabasa yauzimu. Tsono, Monika adadzadziwa kuti bayace akhacita bzinthu bzakuipa mwakabise-bise kwa magole mazinji. Mpfumakazi inango yakusaya kulowodwa yakucemeredwa Olivia idauzidwa kuti icoke pa mui kwace thangwe cimphepo camphanvu cikhafuna kucitika. Pomwe iye adabwerera adazindikira kuti cimphepoco cikhadadzonga nyumba yace. Mu nthawe ing’ono-ng’ono, bzinthu pa moyo wa abale omwe tawafotokozawa bzidacinja mwakamfulumize. Kodi bzomwe bzafotokozedwabzi ndibzo bzomwe bzidakucitikiranimbo? Kodi imwepo mudagumana kale na bvuto lomwe lidacinja bzinthu pa moyo wanu kabodzi na kabodzi?
2 Napo kuti ndife atumiki wa Yahova, ifepano timbagumanambo na mabvuto yakusiyana-siyana kuphatanidzambo kuduwala ninga momwe bzimbacitikira kwa wanthu wentse. Ndipo tingagumanembo na bvuto ninga kutsutsidwa ayai kuteweredwa m’mbuyo na wale omwe ambawenga wanthu wa Mulungu. Napo kuti Yahova angatikhotcerere lini pa mabvuto yamweya, iye akupicira kuti an’dzatithandiza. (Zaiya 41:10) Na thandizo lace, tingapitirize kukhala wakukondwa, kucita bzakusankhula bzabwino na kupitiriza kukhala wakukhulupirika kwa iye napo ticigumana na mabvuto. Mu nkhani ino, tiniwona bzinthu bzinai bzomwe Yahova ambabziphatisa basa kuti atithandize pa nthawe zakunesa za pa moyo wathu. Ndipo tiniwonambo bzomwe ifepano tin’funikira kucita kuti tigumane phindu na thandizo lomwe iye ambatipasa.
YAHOVA AN’DZAKUKHOTCERERANI
3. Tikakhala kuti tikugumana na bvuto, n’ciyani comwe cingatinese kucicita?
3 Bvuto. Tikakhala tikugumana na mabvuto bzingakhale bzakunesa kuti tikumbuke bwino-bwino na kucita bzakusankhula bza nzeru. N’thangwe ranyi? Thangwe tingakhale tikubva kuwawidwa mu mtima mwathu ndipo tingakhale tikucita thupo kwene-kwene. Bzimwebzi bzingaticitise kuti tisaye bzakucita. Onani momwe mpfumakazi ziwiri zomwe tazifotokoza zire zidabvera pomwe zikhagumana na mabvuto. Olivia adalewa kuti: “Pambuyo pa cimphepo cire kudzonga nyumba yangu, ndidasaya bzakucita ndipo ndidacita thupo kwene-kwene.” Pakulewa bzomwe bayace adacita, Monika adati: “Inepano ndidasunama kwene-kwene, ndidabva kuwawidwa kwene-kwene mu mtima mwangu ndipo bzikhandinesa kucita pomwe bzinthu bwino-bwino. Bzomwe ndikhakumbuka kuti bzingadandicitikira lini ndibzo bzomwe bzidandicitikira.” Kodi Yahova ambapicira kuti an’dzatithandiza tani tikakhala kuti tina thupo?
4. Mwakubverana na Afilipi 4:6, 7, n’ciyani comwe Yahova ambatipicira?
4 Momwe Yahova an’dzatithandizira. Iye akupicira kutipasa bzomwe Bibliya limbacemera kuti ‘mtendere wa Mulungu.’ (Werengani Afilipi 4:6, 7.) Mtendere umweyu ni kugwa mpfuwa na kubva bwino komwe timbakhala nako m’makumbukidwe mwathu na mu mtima thangwe ra uxamwali bwabwino bomwe tinabo na iye. Mtendere umweyu “wanthu angaubvesese lini”, ndipo ngwabwino kwene-kwene. Mwa ciratizo, kodi imwepo mudapemba kale kwa Yahova na mtima wentse ndipo patsogolo pace mudadabwa thangwe rakuti mudakhala wakugwa mpfuwa? Penu ndibzo, dziwani kuti umweyo ni “mtendere wa Mulungu.”
5. Kodi mtendere wa Mulungu umbakhotcerera tani makumbukidwe yathu na mitima yathu?
5 Afilipi 4 vesi 7 ambalewambo kuti “mtendere umweyo” un’dzakhotcerera “mitima yanu pabodzi na makumbukidwe yanu.” Fala lomwe lidasanduliziridwa kuti “kukhotcerera” ni fala la ucikunda lomwe likhaphatisidwa basa pa kulewa bza acikunda omwe akhakhotcerera mzinda kuti uleke kupitidwa na anyamadulanthaka. Wanthu omwe akhakhala mu mzindamo akhabzibva kukhala wakukhotcerereka thangwe iwo akhadziwa kuti acikundawo akhakhotcerera mzindayo. Mwa njira ibodzi-bodziyi, mtendere wa Mulungu ukakhotcerera mtima wathu na makumbukidwe yathu timbakhala wakugwa mpfuwa thangwe timbadziwa kuti tiri wakukhotcerereka. (Salimo 4:8) Ninga Ana, napo kuti bvuto lomwe tikugumana nalo lingamale lini kabodzi na kabodzi, tingapitirize kukhala na mtendere wa mu mtima. (1 Samuyeli 1:16-18) Ndipo tikakhala wakugwa mpfuwa timbakumbuka bwino ndipo timbacita bzakusankhula bza nzeru.
Pembani mpaka mubve “mtendere wa Mulungu” akukhotcerera mtima wanu na makumbukidwe yanu (Onani ndime 4-6)
6. N’ciyani comwe tin’funika kucita kuti tigumane phindu na mtendere wa Mulungu? (Onani cithunzi-thunzi.)
6 Bzomwe tin’funika kucita. Tikakhala tikugumana na mabvuto tin’funika kukumbira Yahova kuti atithandize. Kodi tingacite tani bzimwebzi? Pembani mpaka mubve mtendere wa Mulungu. (Luka 11:9; 1 Atesalonika 5:17) Luis, omwe wafotokozedwa kale ule, adafotokoza momwe iye na mkazace, Ana, adapiririra bvuto lomwe akhagumana nalo pomwe adadziwa kuti andosala na nthawe yakucepa kuti akhale na moyo. Iye adati: “Pa nthawe ninga imweyi mpsakunesa kwene-kwene kucita bzakusankhula bzanzeru pa nkhani ya thanzi na nkhani zinango. Tsono mpembo udatithandiza kwene-kwene kubva mtendere pomwe tikhagumana na bvuto limweri.” Luis na mkazace adalewa kuti akhapemba na mtima wentse kwa Yahova mwakubwereza-bwereza acimukumbira kuti awapase mtendere na nzeru kuti akhale wakugwa mpfuwa kuti acite bzakusankhula bzabwino, ndipo iwo adakwanisa kuwona bzinthu bzimwebzo. Imwepo mukakhala mukugumana na mabvuto, pitirizani kumbapemba kwa Yahova ndipo mun’dzabva mtendere wace omwe un’dzakhotcerera mtima wanu na makumbukidwe yanu. — Aroma 12:12.
YAHOVA AN’DZAKUTHANDIZANI KUTI BZINTHU BZIKUFAMBIRENI BWINO
7. Kodi n’ciyani cingacitike tikakhala tikugumana na bvuto lakunesa?
7 Bvuto. Tikakhala tikugumana na bvuto lakunesa bzingakhale bzakunesa kubva, kukumbuka ayai kucita bzinthu bwino-bwino. Ninga momwe naviyo imbagwinyidwira na mphepo icimbayenda uku na uku, ifepanombo bzingatinese kukumbuka bwino-bwino tikakhala tikugumana na mabvuto. Ana, omwe afotokozedwa kale ule, adalewa kuti akhakumbuka bzinthu bzizinji kwene-kwene pomwe bayace, Luis, adafa. Iye adati: “Inepano ndikhabzibva kuti ndikhali candekha ndipo ndikhabzibvera ntsisi. Inepano ndikhabvambo ciya ndikambakumbukira kuti iye adafa.” Kuthumizira bzimwebzo, Ana akhabzibva kuti akhali cayekha, akhabva ciya ndipo bzikhakhala bzakumunesa kucita bzakusankhula bza nzeru bzomwe bayace akhabzicita bwino. Nthawe zinango iye akhabzibva ninga kuti akugwinyidwa-gwinyidwa na cimphepo m’nyanza. Kodi Yahova ambatithandiza tani tikambabzibva mwa njira imweyi?
8. Mwakubverana na Zaiya 33:6, n’ciyani comwe Yahova akutitsimikizira?
8 Momwe Yahova an’dzatithandizira. Iye ambatitsimikizira kuti an’dzatithandiza. (Werengani Zaiya 33:6.) Naviyo ikakhala ikugwinyidwa na mphepo iyo ingayambe kupendeka-pendeka. Kuti naviyoyo ileke kucita bzimwebzi, pana tubzinthu tomwe tumbafuthuka pantsi pa naviyoyo kuti iyo ileke kupendeka-pendekako. Tubzinthu tumwetu tumbacitisa kuti naviyoyo ileke kupendeka-pendekako ndipo tumbacitisambo kuti wanthu omwe ali mu naviyoyo akhale wakukhotcerereka. Tsono tubzinthu tumwetu tumbaphata bwino basa bzikakhala kuti naviyoyo ikufamba. Mu njira ibodzi-bodziyo, Yahova an’dzapitiriza kutithandiza pokha-pokha tikapitiriza kumutumikira mwakukhulupirika napo pa nthawe zakunesa.
Gumanani thandizo mwakuphatisa basa bzinthu bzathu bzakufufudzira (Onani ndime 8-9)
9. Kodi bzinthu bzathu bzakufufudzira bzingatithandize tani tikakhala tikugumana na mabvuto? (Onani cithunzi-thunzi.)
9 Bzomwe tin’funika kucita. Imwepo mukakhala kuti mukugumana na mabvuto, citani nyongo yakumbacita bzinthu bzauzimu. M’cadidi kuti imwepo mungakwanise lini kucita bzizinji ninga momwe mukhacitira kale-kale, tsono kumbukirani kuti Yahova ambadikhirira lini kuti ticite bzinthu bzomwe tingakwanise lini kubzicita. (Ndendemezerani Luka 21:1-4.) Ndipo khalanimbo na nthawe kuti mumbacite pfunziro lanu lapamwekha mucimbakumbukira bzomwe mukupfunzabzo. N’thangwe ranyi? Mwakuphatisa basa gulu lace, Yahova ambatikonzera nkhani na mavidiyo yomwe yambatithandiza kukhala wakugwa mpfuwa tikakhala tikugumana na mabvuto. Kuti mugumane bzomwe imwepo mukufunikira, mungaphatise basa bzinthu bzathu bzakufufudzira bzomwe bziripo m’cirewedwe canu, ninga aplikativo ya JW Library®, Índice das Publicações da Torre de Vigia na Bukhu Lakufufudzira Nkhani la Mboni za Yahova. Monika, omwe afotokozedwa kale ule, adalewa kuti adaphatisa basa bzinthu bzakufufudzira kuti agumane malango yomwe yangadamuthandiza kubzibva bwino pomwe akhagumana na mabvuto. Mwa ciratizo, iye adafufudza fala lakuti “ciya.” Nthawe zinango, iye akhafufudza fala lakuti “kukhulupirika.” Ndipo iye akhawerenga nkhanizo mpaka kubzibva bwino. Iye adati: “Pomwe ndidayamba kufufudza ndikhacita thupo kwene-kwene, tsono pomwe ndidapitiriza kuwerenga ndidabva kuti Yahova akhandikumbatira. Pomwe ndikhawerenga ndidazindikira kuti Yahova akhandibvesesa makumbukidwe yangu ndipo akhandithandiza.” Thandizo lakucokera kwa Yahovali lingakuthandizenimbo kuti mubzibve bwino mucikhala wakugwa mpfuwa. — Salimo 119:143, 144.
YAHOVA AN’DZAKUTHANDIZANI
10. Kodi tingabzibve tani pa mbuyo pa kugumana na bvuto?
10 Bvuto. Pambuyo pa kugumana na bvuto, ifepano tingakhale tiribe mphanvu. Tingakhale ninga nyakuthamanga omwe pakuyamba akhathamanga bwino-bwino, tsono tsapano akugwidoma-gwidoma. Bzingatinese kucita bwino mabasa yomwe tikhayacita ayai tingafune lini kucita basa lomwe tikhalifuna. Ninga Eliya, tingawone ninga kuti mpsakunesa kulamuka, ndipo tingandofune kugona. (1 Amambo 19:5-7) Kodi n’ciyani comwe Yahova akupicira kuti an’dzaticitira tikakhala kuti tiribe mphanvu?
11. Tikakhala tikugumana na mabvuto, n’ciyani comwe Yahova ambatipicira? (Salimo 94:18)
11 Bzomwe Yahova an’dzaticitira. Iye akutipicira kuti an’dzatithandiza. (Werengani Salimo 94:18.) Ninga momwe nyakuthamanga omwe akutazira kuthamanga bwino-bwino ambafunikira thandizo kuti amuke, ifepanombo tin’funikira thandizo kuti tipitirize kucita bzinthu bzauzimu. Pa nthawe ninga zimwezi, Yahova akutitsimikizira kuti: “Ine ndine Yahova Mulungu wako ndikukuphata boko lako lamadidi ndicikuuza kuti, ‘Leka kugopa. Inepano nin’dzakuthandiza.’” (Zaiya 41:13) Mambo Davide adakwanisa kuwona bzimwebzi. Pomwe iye akhagumana na mabvuto na kuteweredwa m’mbuyo na anyamadulanthaka wace, iye adauza Yahova kuti: “Boko lanu lamadidi lin’dzandithandiza.” (Salimo 18:35) Kodi Yahova ambatithandiza tani?
Mbabvumani thandizo la wanthu wa m’banja mwanu, axamwali wanu na akulu wa gwere (Onani ndime 11-13)
12. Kodi Yahova angaphatise basa yani kuti atilimbise tikakhala tiribe mphanvu?
12 Kazinji-kazinji Yahova ambatithandiza mwakucitisa kuti wanthu winango atithandize. Mwa ciratizo, pa nthawe inango pomwe Davide akhalibe mphanvu, xamwali wace Jonatani adamulimbikisa. (1 Samuyeli 23:16, 17) Mwa njira ibodzi-bodziyo, Yahova adasankhula Elizeu kuti athandize Eliya. (1 Amambo 19:16, 21; 2 Amambo 2:2) Ntsiku zino, Yahova angaphatise basa wanthu wa m’banja mwathu, axamwali wathu ayai akulu wa gwere kuti atithandize. Tsono, tikakhala kuti tikugumana na mabvuto tingafune kukhala kutali na wanthu winango. Tingandofune kukhala tekha-tekha. Kucita bzimwebzi n’kuphonyeka lini. N’ciyani comwe tingacite kuti titambire thandizo la Yahova?
13. Kodi n’ciyani comwe tin’funika kucita kuti tigumane phindu na thandizo la Yahova? (Onani cithunzi-thunzi.)
13 Bzomwe tin’funika kucita. Citani nyongo kuti muleke kumbakhala kwa mwekha. Tikakhala kutali na wanthu winango, kazinji-kazinji timbayamba kubzikumbukira tekha na kukumbukirambo mabvuto yomwe tikugumana nayoyo. Makumbukidwe ninga yamweya yangaticitise kuti tileke kucita bzakusankhula bzabwino. (Mimwani 18:1) N’cadidi kuti nthawe zinango tingafune kukhala tekha maka-maka tikakhala kuti tikugumana na mabvuto. Tsono tikakhala tekha-tekha nthawe ikulu tingalambe thandizo lomwe Yahova akutipasa mwakuphatisa basa wanthu wace. Na tenepo, napo kuti tiri pa nthawe yakunesa tibvume thandizo lakucokera kwa wanthu wa m’banja mwathu, axamwali wathu na akulu. Mbawonani kuti Yahova akuphatisa basa iwo kuti akuthandizeni. — Mimwani 17:17; Zaiya 32:1, 2.
YAHOVA AN’DZAKUTSANGALAZANI
14. Kodi ni mabvuto yaponi yakupasa mantha yomwe tingagumane nayo?
14 Bvuto. Nthawe zinango ifepano tingacite mantha. M’Bibliya, atumiki winango wa Yahova adalewa bza nthawe inango yomwe adacita mantha thangwe ra anyamadulanthaka wawo na mabvuto yomwe akhagumana nayo. (Salimo 18:4; 55:1, 5) Ninga momwe bzidacitikira na iwo, ifepano tingatsutsidwe ku xikola, ku basa, m’banja ayai na boma. Tingacite mantha kuti tinifa na bvuto linango la thanzi. Pa nthawe imweyi, tingakhale wakusaya mphanvu ninga mwana ng’ono. Kodi Yahova ambatithandiza tani pa nthawe ninga zimwezi?
15. Kodi Salimo 94:19 ambalewa bza citsimikizo ciponi?
15 Momwe Yahova an’dzatithandizira. Iye ambatitsangalaza ndipo ambatithandiza kuti tikhale wakugwa mpfuwa. (Werengani Salimo 94:19.) Salimo limweri lingaticitise kukumbukira bza kamtsikana komwe kakukwanisa lini kugona thangwe ra mantha na cimphepo camphanvu. Ndokumbukirani pai wace akupita ndipo akumukumbatira mpaka iye kufika pa kugona. Napo kuti cimphepoco cikupitiriza kucitika, iye akubzibva kuti ali wakukhotcerereka ndipo ali wakutsangalazidwa thangwe rakuti pai wacewo amukumbatira. Tikakhala tikugumana na mabvuto yakugopswa tingafunikire thandizo la Baba wathu wakudzulu kuti atiphate na boko lace mpaka kugwa mpfuwa. Kodi tingatsangalazidwe tani na Yahova mwa njira imweyi?
Bvumani kuti Baba wanu wa kudzulu akutsangalazeni mwa kuphatisa basa bzinembo (Onani ndime 15-16)
16. Kodi n’ciyani comwe tingacite kuti titsangalazidwe na Yahova? (Onani cithunzi-thunzi.)
16 Bzomwe tin’funika kucita. Mbamalani nthawe mukupemba kwa Yahova na kumbawerenga Fala lace. (Salimo 77:1, 12-14) Imwepo mukambakhala na cizolowezi cimweci cinthu cakuyamba comwe mun’dzacita mukakhala kuti mukugumana na bvuto mun’dzapemba kwa Baba wanu wakudzulu kuti akuthandizeni. Mbamuuzani Yahova bzinthu bzomwe bzikukucitisani mantha na thupo lomwe munalo. Patsogolo pace, mutetekereni mwa kuwerenga Fala lace ndipo imwepo mun’dzawona kuti iye an’dzakutsangalazani. (Salimo 119:28) Imwepo mungakwanise kugumana mbali za m’Bibliya zomwe zingakutsangalazeni mukakhala kuti muna mantha. Mwa ciratizo, imwepo mungagumane cilimbikiso m’bukhu la Djobi, Masalimo, Mimwani na mafala ya Jezu yomwe yambagumanika mu kapitulo 6 ya Mateu. Mukambapemba kwa Yahova na kuwerenga Fala lace, imwepo mun’dzakhala wakutsangalazidwa.
17. Kodi ni citsimikizo ciponi comwe tingakhale naco?
17 Tingakhale na citsimikizo centse cakuti Yahova an’dzakhala ku mbali yathu pa nthawe zakunesa za pa moyo wathu. Tin’dzakhala lini tekha. (Salimo 23:4; 94:14) Yahova akupicira kuti an’dzatikhotcerera, kutithandiza na kutitsangalaza. Pakulewa bza Yahova, Zaiya 26:3 ambati: “Wanthu omwe ana mtima wakusaya kutekenyeka mun’dzawapasa mtendere wakusaya kumala thangwe iwo ambathemba imwepo.” Na tenepo, mbathembani Yahova ndipo mbabvumani thandizo lomwe iye ambakupasani. Mukacita tenepoyo, imwepo mun’dzakhala na mphanvu napo pa nthawe zakunesa.
KODI MUNGATAWIRE TANI?
-
Kodi ni lini pomwe tingafunikire thandizo la Yahova?
-
Kodi ni njira zinai ziponi zomwe Yahova ambaziphatisa basa kuti atithandize pa nthawe zakunesa?
-
Kodi n’ciyani comwe tingacite kuti tigumane phindu na thandizo lomwe Yahova ambatipasa?
NYIMBO 12 Yahova, Mulungu Mkulu
a Madzina yanango yacinjidwa.