NKHANI YAKUPFUNZA 20
NYIMBO 67 “Palizira Fala”
Bvumani Kuti Lufoyi Lipitirize Kukuthandizani Kupalizira!
“Mafala yabwino yan’funikambo kupaliziridwa cakuyamba kwa wanthu wa mitundu yentse.” — MARKO 13:10.
CAKULINGA CA NKHANIYI
Mu nkhani ino, tin’pfunza momwe lufoyi limbatithandizira kucita nyongo pa basa lakupalizira.
1. N’ciyani comwe tidapfunza pa mtsonkhano wa pa gole wa 2023?
PA MTSONKHANO wa pa gole wa 2023, a tidatambira malango mapsa pakulewa bza kanamatidwe kathu ndipo tidabva bzidziwiso bzakudekeza kwene-kwene bzakulewa bza basa lathu lakupalizira. Tidapfunza kuti wanthu winango pinango angadzakhale na mwayi wakukhala kumbali ya wanthu wa Yahova pambuyo pa Babiloniya Mkulu kupfudzidwa. Ndipo tidadziwambo kuti kuyambira mu Novembro 2023, apalizi wa Umambo angadadzapereka lini pomwe maora yomwe iwo ambacita pa basa lakupalizira. Kodi kucinja kumweku kukuthandauza kuti basa la kupalizira ndakusaya kufunika kwene-kwene kuposa kale-kale? Bzikuwonekeratu kuti ne!
2. Thangwe ranyi basa lathu lakupalizira ndakufunika kwene-kwene ntsiku iri-yentse? (Marko 13:10)
2 Ntsiku iri-yentse basa lathu lakupalizira likukhala lakufunika kwene-kwene. Thangwe ranyi? Thangwe rakuti cimaliziro casala pang’ono kufika. Onani bzomwe Jezu adalewa bza basa lakupalizira mu ntsiku zakumalizira zino. (Werengani Marko 13:10.) Mwakubverana na bukhu la Mateu, Jezu adalewa kuti mafala yabwino yangadadzapaliziridwa pa dziko lentse la pantsi pomwe “cimaliziro” cikanati kufika. (Mateu 24:14) Fala limweri lakuti cimaliziro limbathandauza kupfudzidwa kwa dziko la Sathaniri. Yahova adaikha “ntsiku na nthawe” yomwe bzimwebzi bzin’dzacitika. (Mateu 24:36; 25:13; Mabasa 1:7) Ntsiku iri-yentse ikapita ntsiku imweyi imbakhala ikufendera. (Aroma 13:11) Pomwe ntsikuyo ikanati kufika tin’funika kucita nyongo yakupalizira mpaka kuphampha.
3. N’ciyani comwe cimbaticitisa kuti tipalizire?
3 Tikambakumbukira bza basa lathu lakupalizira, tingambabzibvunze kuti: Thangwe ranyi timbapalizira mafala yabwino ya Umambo? Mwacigwatho, lufoyi ndiro lomwe limbaticitisa kuti tipalizire. Tikambapalizira timbalatiza kuti timbafuna mafala yabwino, timbafuna wanthu ndipo kuthumizira bzentse timbafuna Yahova pabodzi na dzina lace. Bwerani tiwone cibodzi na cibodzi.
TIMBAPALIZIRA THANGWE TIMBAFUNA MAFALA YABWINO
4. Kodi timbabzibva tani tikatambira nkhani yabwino?
4 Kumbukirani momwe mudakhalira wakukondwa pomwe cinthu cakudekeza cidakucitikirani pa moyo wanu. Pinango winango wa adzinza wanu adakhala na mwana ayai munthu munango adakupitisani basa lomwe mukhalifuna kwene-kwene. Imwepo mudakhala wakukondwa kwene-kwene mwakuti mudauzambo adzinza wanu na axamwali wanu. Kodi bzimwebzi ndibzo bzomwe bzidakucitikiranimbo pomwe mudabva mafala yabwino ya Umambo bwa Mulungu?
5. Kodi mudabzibva tani pomwe mudapfunza mafala ya Mulungu pakuyamba? (Onani bzithunzi-thunzi.)
5 Kumbukirani momwe mudabvera pomwe mudayamba kupfunza mafala ya Mulungu. Imwepo mudapfunza kuti Pai wanu wa lufoyi ambakufunani, akufuna kuti mucite mbali ya banja lace, akufuna kudzamalisa kuwawa na kubonera ndipo akufuna kuti mudzawonane pomwe na adzinza wanu omwe adafa na bzinthu bzinango bzizinji. (Marko 10:29, 30; Juwau 5:28, 29; Aroma 8:38, 39; Apokalipse 21:3, 4) Bzomwe imwepo mudapfunza bzidakucitisani kuti mukhale wakukondwa kwene-kwene. (Luka 24:32) Imwepo mudakomedwa na bzomwe mukhapfunza ndipo mudafuna kuuzambo wanthu winango! — Ndendemezerani na Jeremiya 20:9.
Pomwe tidayamba kupfunza cadidi ca m’Bibliya, tidakomedwa kwene-kwene ndipo tikhafunambo kuuza wanthu winango bzomwe tidapfunzabzo! (Onani ndime 5)
6. N’ciyani comwe mwapfunza na ciratizo ca Ernest na Rose?
6 Mbatiwoneni ciratizo. M’bale wakucemeredwa Ernest b akhana magole 10 pomwe pai wace adasaika. Ernest adati: “Inepano ndidabzibvunza kuti: ‘Kodi pai wangu ayenda kudzulu? Ayai iwo afa ndipo an’dzawoneka lini pomwe?’ Inepano ndikhambawenga wana winango omwe akhana azipai wawo.” Ernest akhambayenda ku thenje, ndipo akhambagodama pa nthutu ya pai wace, acimbapemba kuti: “Mulungu, ndaphata minyendo ndikufuna kudziwa komwe pai wangu ali.” Pomwe padapita magole 17 kucokera pomwe pai wace adafa, Ernest adayamba kupfunza Bibliya. Iye adakhala wakukondwa pomwe adadziwa kuti anyakufa ambadziwa lini cinthu ambakhala ninga adagona nakuti Bibliya limbapicira kuti iwo an’dzalamusidwa. (Mpalizi 9:5, 10; Mabasa 24:15) Patsogolo pace, iye adagumana mitawiro ya mibvunzo yomwe akhanayo kwa magole mazinji! Ernest adakomedwa kwene-kwene na cadidi ca m’Bibliya comwe akhacipfunza. Mkazi wace, Rose, adayambambo kumbakhala naye pabodzi pakumbapfunza Bibliya ndipo akhakomedwa kwene-kwene na bzomwe akhapfunzabzo. Mu gole la 1978 iwo adabatizidwa. Iwo adapalizira mwa nyongo adzinza wawo, axamwali na wanthu winango bza cadidi ca m’Bibliya comwe iwo adapfunza. Thangwe ra bzimwebzi, Ernest na Rose adathandiza wanthu 70 kudziwa Yahova acibatizidwa.
7. Kodi n’ciyani comwe cimbacitika tikambafuna kwene-kwene cadidi ca m’Bibliya? (Luka 6:45)
7 Tikambafuna bzomwe timbapfunza m’Bibliya timbafunisisa kupalizirambo wanthu winango. (Werengani Luka 6:45.) Timbabzibva ninga anyakupfunza wa Jezu omwe adati: “Tingaleke lini kulewalewa bzinthu bzomwe tidawona na kubva.” (Mabasa 4:20) Timbafuna cadidi ndipo timbafunambo kupalizira wanthu wakusiyana-siyana.
TIMBAPALIZIRA THANGWE TIMBAFUNA WANTHU
8. N’ciyani comwe cimbaticitisa kuuza wanthu winango mafala yabwino? (Onani kwadru yakuti “ Mbafunani Wanthu — Ndipo Apfunziseni.”) (Onani cithunzi-thunzi.)
8 Ninga Yahova na Jezu, ifepanombo timbafuna wanthu. (Mimwani 8:31; Juwau 3:16) Timbabvera ntsisi wale omwe ‘alibe Mulungu’ na omwe ‘alibe cidikhiro.’ (Aefezo 2:12) Iwo akugumana na mabvuto mazinji ndipo bziri ninga kuti ali m’cidindi cakuzika, tsono ifepano tina cingwe comwe tingawathusire kuti tiwacose m’mwemo; cingweco ni mafala yabwino ya Umambo bwa Mulungu. Lufoyi na ntsisi zomwe tinazo kuna iwo bzimbatilimbikisa kuti tiwapalizire mafala yabwino. Mafala yamweya, yangawacitise kuti akhale na cidikhiro, yangawathandize kuti akhale wakukondwa tsapano ndipo yangawapasembo mwayi wa kudzakhala na “moyo caiwo”mu dziko lipsa la Mulungu. — 1 Timotio 6:19.
Lufoyi na ntsisi zomwe timbalatiza kwa wanthu bzimbaticitisa kuti tipalizire mafala yabwino (Onani ndime 8)
9. Kodi timbacenjeza wanthu kuti n’ciyani comwe cin’citika tsapanopapa, ndipo n’thangwe ranyi? (Ezekiyeli 33:7, 8)
9 Lufoyi limbaticitisa kuti tiuze wanthu bza kumala kwa dzikoli. (Werengani Ezekiyeli 33:7, 8.) Timbabvera ntsisi wanthu wentse kuphatanidzambo adzinza wathu omwe ambatumikira lini Yahova. Wanthu azinji ambandokhalambo mwakusaya kudziwa n’ciyani comwe cikubwera kutsogoloku comwe ni “citsautso cikulu comwe cikanati kucitika kale kucokera pa ciyambi ca dziko mpaka pano, ndipo cin’dzacitika lini pomwe.” (Mateu 24:21) Tikufuna kuti iwo adziwe n’ciyani comwe cin’dzacitika pa nthaweyo. Cakuyamba, Babiloniya Mkulu an’dzapfudzidwa ndipo patsogolo pace dziko lentse lakuipali lin’dzapfudzidwa pa nkhondo ya Armagedo. (Apokalipse 16:14, 16; 17:16, 17; 19:11, 19, 20) Timbapemba kuti wanthu azinji abve mafala yabwino acisankhula kutumikirambo Yahova ninga ifepano. Tsono tani pakulewa bza wale omwe ambatitetekera lini, kuphatanidzambo na wanthu wa m’banja mwathu?
10. Thangwe ranyi mpsakufunika kupitiriza kuuza wanthu bzomwe bzin’citika kutsogolo?
10 Ninga momwe idafotokozera nkhani idapita ire, pinango Yahova angadzapulumuse wanthu winango omwe an’dzayamba kumukhulupira akadzawona kupfudzidwa kwa Babiloniya Mkulu. Penu n’tenepo, mpsakufunika kwene-kwene kupitiriza kuwauza wanthu tsapano. Kumbukirani ibzi: Bzomwe tingawauze tsapano iwo angadzabzikumbukire kutsogolo. (Ndendemezerani na Ezekiyeli 33:33.) Pinango iwo angadzakumbukire bza cenjezo lomwe tikhawapalizira acidzayamba kuphatana nafe pakutumikira Yahova pomwe madzi yakali m’mabondo. Ninga momwe “nyakunyang’anira m’kawoko,” wa ku Filipi adacinjira nzeru zace pomwe citeketeke camphanvu cidacitika, pinango winango omwe akucinja lini ntsiku zino angadzacinje akadzawona kupfudzidwa kwa Babiloniya Mkulu. — Mabasa 16:25-34.
TIMBAPALIZIRA THANGWE TIMBAFUNA YAHOVA NA DZINA LACE
11. Kodi timbapereka tani ulemu, ulemerero na mphanvu kwa Yahova? (Apokalipse 4:11) (Onani bzithunzi-thunzi.)
11 Thangwe likulu lomwe limbaticitisa kuti tipalizire mafala yabwino ya Umambo ndakuti timbafuna Yahova Mulungu na dzina lace lakucena. Timbawona utumiki bwathu ninga njira yakutumbizira Mulungu wathu. (Werengani Apokalipse 4:11.) Timbabveranambo na mafala yakuti: Ndimwe wakuthemera imwe Yahova Mulungu wathu, kupasidwa ulemerero, ulemu na mphanvu. Timbamupasa ulemu na ulemerero tikambauza wanthu kuti ndiye omwe ‘adalenga bzinthu bzentse’ nakuti tina moyo thangwe ndiye omwe adatipasa moyoyu. Timbamupasa mphanvu zathu Yahova tikambaphatisa basa nthawe yathu, mphanvu zathu na bzinthu bzomwe tinabzo kuti ticite ciri-centse comwe tingakwanise pa basa lakupalizira. (Mateu 6:33; Luka 13:24; Akolose 3:23) Kulewa cadidi timbafuna kuuza winango bza Yahova thangwe timbamufuna. Timbalimbikisidwa kuuza winango bza dzina lace na bzomwe dzina lacero limbathandauza. Thangwe ranyi?
Timbapereka mphanvu zathu kwa Yahova tikambaphatisa basa nthawe yathu, mphanvu zathu na bzinthu bzomwe tinabzo kuti tipalizire mwa nyongo mwakubverana na momwe bzinthu bziriri pa moyo wathu (Onani ndime 11)
12. Kodi timbacenesa tani dzina la Mulungu pomwe tikupalizira?
12 Lufoyi lathu kwa Yahova limbaticitisa kuti ticenese dzina lace. (Mateu 6:9) Bzimwebzi bzimbathandauza kuti tin’funika kuuza wanthu winango kuti bzomwe Sathani adalewa pakulewa bza Yahova mpsakunama. (Genesesi 3:1-5; Djobi 2:4; Juwau 8:44) Pomwe tikucita basa lakupalizira, timbakhala wakukonzeka kukhotcerera Mulungu na kulewa cadidi pakulewa bza iye kuna wentse omwe akufuna kubvesera. Tikufuna kuti wanthu wentse adziwe kuti khalidwe lace likulu kwene-kwene ni lufoyi nakuti katongedwe kace n’kakulungama ndipo tsapanopa Umambo bwace bunimalisa mabvuto yentse pa dziko la pantsi bucibweresa mtendere na cikondweso kuna wanthu. (Salimo 37:10, 11, 29; 1 Juwau 4:8) Tikambakhotcerera dzina la Yahova pomwe tikupalizira timbakhala tikucenesa dzina lacero. Timbakomedwa kudziwa kuti tikucita bzinthu mwakubverana na dzina lathu. Mwa njira iponi?
13. Thangwe ranyi timbakomedwa na kucemeredwa na dzina lakuti Mboni za Yahova? (Zaiya 43:10-12)
13 Yahova adatisankhula kuti tikhale “mboni zace.” (Werengani Zaiya 43:10-12.) Tsamba lakucokera ku Bungwe Lakutonga la gole linango m’mbuyomu lidalewa kuti: “Mwayi ukulu kwene-kwene omwe tentsenefe tingakhale nawo ni kudziwika kuti ndife Mboni za Yahova.” c Thangwe ranyi tikulewa tenepo? Mbatiwoneni ciratizo. Ndokumbukirani kuti mwanamiziridwa kuti mwacita cinthu cakuphonyeka, imwepo mungafunikire mboni kuti ikutawirireni bzomwe akukunamiziranibzo icilewambo kuti imwepo ndimwe munthu wabwino ndipo mungacite lini bzimwebzo. Bzimwebzi bzikacitika, kodi imwepo mungasankhule yani? Imwepo mungasankhule munthu omwe mumbamudziwa, omwe mumbamukhulupira na omwe ana makhalidwe yabwino yomwe yangacitise wanthu kukhulupira bzomwe ambalewa. Yahova pakutisankhula kuti tikhale Mboni zace, iye adalatiza kuti ambatidziwa bwino nakuti ambatithemba kuti timbapalizire kuti iye ni Mulungu wacadidi. Mwa njira imweyi timbacita bzomwe dzina lathu limbatiuza kuti ticite bzomwe ni kukhala Mboni za Yahova! — Salimo 83:18; Aroma 10:13-15.
TIN’DZAPITIRIZA KUPALIZIRA MPAKA KUPHAMPHA
14. Kodi ni bzinthu bziponi bzakudekeza bzomwe bzin’dzacitika kutsogoloku?
14 Tikudikhirira bzinthu bzakudekeza bzomwe bzin’citika kutsogoloku! Na thandizo la Yahova, tikudikhirira wanthu azinji kubvuma cadidi pomwe citsautso cikulu cikanati kuyamba. Kuthumizira bzimwebzi, ndife wakukondwa kwene-kwene kudziwa kuti napo pa nthawe yakunesa kwene-kwene ya citsautso cikulu, wanthu azinji an’dzasiya kucita mbali ya dziko la Sathaniri aciphatana nafe pa kutumbiza Yahova! — Mabasa 13:48.
15-16. N’ciyani comwe tin’pitiriza kucita ndipo mpaka lini?
15 Na tenepo, tina basa likulu kwene-kwene lomwe tin’funika kulicita ndipo tin’dzalicita lini pomwe. Tina mwayi wakupalizira mafala yabwino ya Umambo bwa Mulungu pa dziko lentse la pantsi. Pa nthawe ibodzi-bodziyo tin’funika kupitiriza kucenjeza wanthu bzomwe bzin’citika tsapanopali. Wanthu an’funika kudziwa kuti kumala kwa dzikoli kuli pafupi kwene-kwene. Ikadzafika nthawe yakutongedwa, iwo an’dzadziwa kuti mafala yomwe tikhapalizira yakhacokeradi kwa Yahova. — Ezekiyeli 38:23.
16 N’ciyani comwe tatsimikiza kucita? Thangwe rakuti timbafuna mafala yabwino, wanthu ndipo kuposa bzentse timbafuna Yahova Mulungu na dzina lace, tin’dzapitiriza kupalizira mwakukondwa, mwakamfulumize na mwa nyongo mpaka pomwe Yahova adzalewe kuti, “bzakwana!”
NYIMBO 54 “Njira Njiyi”
a Mtsonkhano wa pagole udacitika pa 7 Outubro, 2023, m’Nyumba yakucitira Mitsonkhano Mikulu-mikulu ya Mboni za Yahova ya ku EUA, Nova Iorque. Patsogolo pace, mbali yakuyamba ya programayi idalatizidwa mu JW Broadcasting ya Novembro 2023 ndipo mbali yaciwiri idalatizidwa mu Janeiro 2024.
b Onani nkhani yakuti “Baibulo Limasintha Anthu — Ndinapeza Mayankho Ogwira Mtima a Mafunso Anga,” mu Nsanza ya Mulindiri ya 1 Fevereiro, 2015 (Chichewa.)