1. Kodi ni phindu liponi lomwe timbakhala nalo thangwe ra kukhala m’gulu la Yahova?

 NI MWAYI ukulu kwene-kwene kwa ifepano kukhala m’gulu la Yahova mu ntsiku zino zakumalizira zomwe n’zakunesa kwene-kwene. Pomwe bzinthu m’dzikoli bzikupitiriza kuipa, Yahova watipasa banja lauzimu lakuphatana la abale na mpfumakazi. (Salimo 133:1) Iye ambatithandiza kuti tikhale na banja lakukondwa. (Aefezo 5:33–6:1) Ndipo iye ambatipasa nzeru yakutithandiza kuti tikhale na mtendere wa mu mtima.

2. N’ciyani comwe tin’funika kucita, ndipo thangwe ranyi?

² Tsono, tin’funika kucita ciri-centse kuti tipitirize kutumikira Yahova mwakukhulupirika. Thangwe ranyi? Thangwe nthawe zinango tingakalipe thangwe ra bzakuphonya bza anzathu. Ndipo bzingakhale bzakunesa kupirira bzakuphonya bzathu, maka-maka tikakhala tikubzicita mwakubwereza-bwereza. Tin’funika kupitiriza kupirira pomwe tikutumikira Yahova (1) pomwe mwanzathu omwe timbanamata naye pabodzi watikalipisa, (2) pomwe mkazi wathu ayai mwamuna wathu watikalipisa na (3) tikakalipa thangwe ra bzakuphonya bzathu. Mu nkhani ino, tin’cezerana cakucitika ciri-centse. Ndipo tin’cezeranambo bzomwe tingapfunze na munthu wakukhulupirika wa m’Bibliya omwe adagumanambo na mabvuto ninga yamweya.

PITIRIZANI KUTUMIKIRA YAHOVA MKRISTAU MWANZANU AKAKUPHONYERANI

3. Kodi ni mabvuto yaponi yomwe atumiki wa Yahova ambagumana nayo?

³ Bvuto. Abale winango ana makhalidwe yomwe nthawe zinango yangatikalipise. Winango angatiphonyere ayai kuticitira bzinthu  mwakusaya lufoyi. Napo akulu wa gwere angaphonyembo nthawe zinango. Bzimwebzi bzingacitise wanthu winango kupenukira gulu la Mulungu. M’mbuto mwakupitiriza kutumikira Mulungu “mwakuphatana” pabodzi na abale na mpfumakazi, iwo angamalise uxamwali na wale omwe adawaphonyera na kusiyambo kutsonkhana. (Zefaniya 3:9) Kodi kucita bzimwebzi n’kwa nzeru? Onani bzomwe tingapfunze na munthu munango wa m’Bibliya omwe adagumanambo na mabvuto ninga yamweya.

4. Kodi ni mabvuto yaponi yomwe mpostolo Paulo adagumana nayo?

⁴ Ciratizo ca m’Bibliya. Mpostolo Paulo akhadziwa kuti abale na mpfumakazi zace zacikristau akhali wanthu wakuperewera. Mwa ciratizo, abale winango wa ku Jeruzalemu akhakhulupira lini kuti iye akhadacinja. (Mabasa 9:26) Wanthu winango akhalewa bzinthu bzakuipa pakulewa bza iye kuti aipise mbiri yace. (2 Akolinto 10:10) Paulo adawona mkulu wa gwere akucita cakusankhula cakuphonyeka comwe cingadakalipisa winango. (Agalatiya 2:11, 12) Ndipo Marko, mwanzace wa pa mtima wa Paulo, adamukalipisa kwene-kwene. (Mabasa 15:37, 38) Bzimwebzi bzingadacitisa Paulo kusiya kukhala pa uxamwali na wanthu amwewa. Tsono, iye alibe kucita bzimwebzo. Koma adapitiriza kuwafuna abalewo ndipo adapitirizambo kutumikira Yahova mwakukhulupirika. Kodi n’ciyani comwe cidathandiza Paulo kupirira?

5. N’ciyani comwe cidathandiza Paulo kuti aleke kusiya kufuna abale na mpfumakazi zace? (Akolose 3:13, 14) (Onani cithunzi-thunzi.)

⁵ Paulo akhafuna abale na mpfumakazi zace. Lufoyi lomwe Paulo akhanalo lidamuthandiza kuwona bzabwino bzomwe abale na mpfumakazi akhacita sikuti bzakuphonya bzawo. Lufoyi lidathandizambo mpostolo Paulo kucita bzomwe iye adanemba pa Akolose 3:13, 14. (Werengani.) Onani momwe iye adacitira bzinthu na Marko. Napo kuti Marko adamusiya Paulo pa ulendo bwace bwakuyamba bwa umisiyonario, Pauloyo alibe kupitiriza kukhala adakalipa. Pomwe Paulo adanembera tsamba gwere la Akolose, iye adalewa kuti Marko akhali ninga nyabasa mwanzace na “mtsangalazo ukulu” kwa iye. (Akolose 4:10, 11) Pomwe Paulo akhali m’kawoko ku Roma, adakumbira Marko kuti ayende kukamuthandiza. (2 Timotio 4:11) Apa bzikuwonekeratu kuti Paulo adalekerera abale wacewo ndipo adapitiriza kukhala pa uxamwali na iwo. Kodi tingapfunze ciyani na ciratizo ca Paulo?

6-7. Kodi tingalatize tani lufoyi kwa abale na mpfumakazi zathu? (1 Juwau 4:7)

⁶ Bzomwe tikupfunza. Yahova akufuna kuti tipitirize kulatiza lufoyi kwa abale na mpfumakazi zathu. (Werengani 1 Juwau 4:7.) Abale na mpfumakazi zathu akatiphonyera, tin’funika lini kukumbuka kuti iwo atiphonyera utowa. Koma tin’funika kutsimikizira kuti iwo akuyezera kucita bzabwino pa maso pa Yahova. (Mimwani 12:18)  Yahova ambalatiza lufoyi kwa atumiki wace wakukhulupirika napo kuti ambamuphonyera. Napo tikaphonyesa bzinthu bzinango, iye ambapitiriza kukhala xamwali wathu ndipo ambafulumiza lini kukalipa. (Salimo 103:9) Mpsakufunika kwene-kwene kutewezera Baba wathu wakudzulu omwe ambalekerera na mtima wentse! — Aefezo 4:32–5:1.

⁷ Kumbukirani kuti, pomwe cimaliziro cikufendera, tin’funika kukhala wakubverana na abale na mpfumakazi zathu. Tingadikhirire kudzagumana na mabvuto kutsogoloku. Tingaikhidwe m’kawoko thangwe ra cikhulupiro cathu. Bzimwebzi bzikadzacitika, tin’dzafunikira thandizo la abale na mpfumakazi zathu. (Mimwani 17:17) Onani bzomwe bzidacitikira mkulu wa gwere munango wa ku Espanha wakucemeredwa Josep. a Iye pabodzi na abale winango adaikhidwa m’kawoko thangwe ra kusaya kupitira nkhani za ndale. Iye adati: “M’kawokomo bzikhakhala bzakupusa kuphonyerana thangwe tikhakhala pabodzi nthawe zentse. Tikhafunika kupitiriza kupirirana na kulekererana. Bzimwebzi bzidatithandiza kupitiriza kukhala wakubverana na wakukhotcerereka. M’kawokomo tikhakhala pabodzi na wanthu omwe akhatumikira lini Yahova. Nthawe inango, ndidabzipweteka boko ndiciikhidwa goma ndipo ndikhakwanisa lini kucita bzinthu ndekha. Tsono, m’bale wangu wauzimu akhandifulira bzakubvala ndipo akhandithandizambo mu njira zakusiyana-siyana. Ndidalatizidwa lufoyi lomwe ndikhafunikira.” Tina mathangwe yakubveka yakumalisira kusaya kubvesesana tikakhala taphonyerana!

PITIRIZANI KUTUMIKIRA YAHOVA MWANZANU WA M’BANJA AKAKUPHONYERANI

8. Kodi ni mabvuto yaponi yomwe mabanja yambagumana nayo?

⁸ Bvuto. Mabanja mazinji ntsiku zino yakugumana na mabvuto. Bibliya limbalewa mwakutsimikiza kuti wanthu wakulowolana “an’dzagumana na mabvuto mazinji pamoyo wawo.” (1 Akolinto 7:28) Thangwe ranyi? Thangwe wanthu awiri omwe ambalowolanawo mbakuperewera, ana makhalidwe yakusiyana ndipo ambafuna bzinthu bzakusiyana. Wakulowolanawo angasiyane bzikhalidwe na komwe adakulira. Na kupita kwa nthawe, iwo angalatize makhalidwe yomwe akhayalatiza lini pomwe akhanati kulowolana. Bzentsenebzi bzingayambise mabvuto m’banja. M’mbuto mwakuzindikira bzakuphonya bzanu na kubzikonzesa mungayambe kupasa mulandu mkazi wanu ayai mwamuna wanu. Ndipo mungawone kupumirana ayai kulambana ninga njira yakumalisira mabvuto. Tsono kodi kulambana kungamalisedi mabvuto? b Bwerani tipfunze na munthu munango wa m’Bibliya omwe adapirira mabvuto yomwe akhagumana nayo m’banja.

9. Kodi ni mabvuto yaponi yomwe Abigayeli adagumana nayo?

⁹ Ciratizo ca m’Bibliya. Abigayeli akhadalowodwa na Nabali, omwe Bibliya limbalewa kuti akhali mwamuna wakuipa mtima na wa makhalidwe yakuipa. (1 Samuyeli 25:3) Bzikhali bzakunesa kwene-kwene kwa Abigayeli kukhala pa banja na mwamuna umweyu. Kodi pakhana njira inango omwe Abigayeli angadacita kuti amalise banjalo? Inde ikhalipo. Iye angadakhala na mwayi umweyo angadalekerera kuti Davide aphe mwamuna wace thangwe ra kuti mwamuna waceyo adatukwana Davideyo pabodzi na acikunda wace. (1 Samuyeli 25:9-13) Abigayeli angadathawa acisiya Davide kuti aphe Nabali. Tsono, iye alibe kucita bzimwebzo, m’mbuto mwace adaceza na Davide kuti aleke kupha Nabaliyo.  (1 Samuyeli 25:23-27) Thangwe ranyi iye adacita bzimwebzi?

10. Kodi n’ciyani cidathandiza Abigayeli kuti apirire mabvuto m’banja?

¹⁰ Abigayeli akhafuna kwene-kwene Yahova ndipo akhalemekeza malamulo yace pa nkhani ya malowozi. Bzikuwonekeratu kuti iye akhadziwa bzomwe Yahova adauza Adamu na Eva pa nkhani ya malowozi. (Genesesi 2:24) Abigayeli akhadziwa kuti Yahova akhawona malowozi kukhala nkhani yakupambulika. Iye akhafuna kukondwesa Yahova, ndipopa adacita ciri-centse kuti athandize banja lace na kupulumusa mwamuna wace, Nabali. Iye adacita bzinthu mwakamfulumize kuti akhotcerere mwamuna wace ndipo akhali wakukonzeka kupepesa napo kuti ndiye lini omwe akhadaphonya. Bzikuwonekeratu kuti Yahova akhamufuna kwene-kwene Abigayeli thangwe ra kulimba mtima kwace na kubzipereka kwace. Kodi amuna na akazi angapfunze ciyani na ciratizo ca Abigayeli?

11. (a) Kodi Yahova ambadikhirira ciyani kwa wanthu wakulowolana? (Aefezo 5:33) (b) Kodi mwapfunza ciyani na ciratizo ca Carmen omwe adacita nyongo kuti apulumuse banja lace? (Onani cithunzi-thunzi.)

¹¹ Bzomwe tikupfunza. Yahova ambafuna kuti wanthu wakulowolana alemekeze malowozi yawo napo kuti mkazi ayai mwamuna angakhale wakunesa. Yahova ambakomedwa kwene-kwene akambawona wanthu wakulowolana akucita nyongo kuti amalise mabvuto yawo na kulatizana lufoyi na ulemu. (Werengani Aefezo 5:33.) Onani ciratizo ca Carmen. Pambuyo pa kukhala m’banja magole 6, Carmen adayamba kupfunza Bibliya na Mboni za Yahova ndipo adabatizidwa. Carmen adati: “Bayangu alibe kukomedwa na cakusankhula cangu. Iye akhambabva ukali kwene-kwene thangwe rakuti inepano ndikhambayenda ku mitsonkhano pa nthawe yomwe iye akhambafuna kuceza nane ndipo ndikhali wakutsimikiza kutumikira Yahova. Iye akhambanditukwana ndipo akhambandigopswa kuti an’dilamba.” Napo bzikhali tenepo, Carmen adapirira ndipo adapitiriza kukhala na mwamuna waceyo. Kwa magole 50, iye adacita nyongo yakuti m’banja mwace mukhale lufoyi na ulemu. Iye adati: “Na kupita kwa magole ndidayamba kumubvesesa mwamuna wangu na kulewalewa naye mwakudeka mtima. Kudziwa kuti malowozi njakulemekezeka pa maso ya Yahova kudandicitisa kuti ndicite ciri-centse kuti ndiyakhotcerere. Ndiribe kumalisa malowozi yangu thangwe nimbafuna Yahova.” c Mukagumana na mabvuto m’banja mwanu imwepo mungatsimikize kuti Yahova an’dzakuthandizani kuti mupitirize kupirira.

PITIRIZANI KUTUMIKIRA YAHOVA MUKAPHONYA

12. Kodi tingabzibve tani tikacita pikado ikulu?

¹² Bvuto. Tingabzibve kukhala wakusaya kufunika tikacita pikado ikulu. Bibliya limbalewa  kuti pikado zathu zingaticitise kubzibva ninga “wakusweka na wakuswanyika.” (Salimo 51:17) M’bale munango wakucemeredwa Robert adaphata basa mwa nyongo kuti athemere kutumikira ninga mtumiki wakuthandiza. Tsono iye adacita pikado ikulu yomwe idamucitisa kukumbuka kuti waphindukira Yahova. Iye adati: “Cikumbu-mtima cangu cidandinesa kwene-kwene ndipo bzidakhala ninga kuti ndagweredwa na matijolo yakulemera. Ndidabzibva kuipa kwene-kwene, ndidalira ndipo ndidapemba kwa Yahova. Ndidakumbukira kuti Mulungu angadatetekera lini pomwe mipembo yangu.” Tikacita pikado ikulu tingabzibve ninga wakusweka ndipo tingayambe kukumbuka kuti Yahova watisiya ndipo palibe mathangwe yakumutumikira pomwe. (Salimo 38:4) Penu imwepo mudabzibva kale tenepo, onani nkhani ya munthu wa m’Bibliya omwe adapirira pa kutumikira Yahova napo kuti adacita pikado ikulu.

13. Kodi ni pikado iponi ikulu yomwe Pedru adacita, ndipo adabzibva tani?

¹³ Ciratizo ca m’Bibliya. Pa usiku bwakuti mangwana yace Jezu angadaphedwa, mpostolo Pedru adaphonya kazinji-kentse. Bzomwe iye adacitabzo bzikhali pikado ikulu. Cakuyamba, Pedru adabzikhulupira kwene-kwene acimbacita magayo kuti angadapitiriza kukhala wakukhulupirika kwa Jezu napo anzace angadamusiya Jezuyo. (Marko 14:27-29) Caciwiri, pomwe akhali m’Munda wa getsemani, Pedru alibe kukhala tceru. (Marko 14:32, 37-41) Cacitatu, pomwe thimu lomwe likhana xipada lidabwera kudzamanga Jezu, Pedru adamuthawa. (Marko 14:50) Ndipo cacinai, Pedru adamulamba Jezu katatu ndipo adacita kulumbira kuti akhamudziwa lini. (Marko 14:66-71) Kodi n’ciyani comwe Pedru adacita pomwe adakumbukira bza pikado yomwe adacita? Iye adaneseka kwene-kwene mu mtima ndipo adayamba kulira. (Marko 14:72) Ndokumbukirani momwe Pedru adabvera pomwe xamwali wace Jezu adaphedwa. Iye adabzibva kuti akhalibe na basalo!

14. N’ciyani cidathandiza Pedru kupirira acipitiriza kutumikira Yahova? (Onani cithunzi-thunzi )

¹⁴ Pana bzinthu bzizinji bzomwe bzidacitisa Pedru kuti apitirize kutumikira Yahova. Iye alibe kubzipambula; iye adayenda komwe kukhana abale wace wauzimu ndipo adamutsangalaza. (Luka 24:33) Pambuyo pa kulamusidwa, Jezu adagumana na Pedru ndipo adamulimbikisa. (Luka 24:34; 1 Akolinto 15:5) Pomwe padapita nthawe, m’mbuto mwakukumbukira bzakuphonya bza Pedru, Jezu adamuuza xamwali waceyo kuti angadamupasa maudindo yakuthumizirika. (Juwau 21:15-17) Pedru adadziwa kuti adacita pikado ikulu, tsono alibe kubwerera mbuyo. Thangwe ranyi? Thangwe iye adatsimikiza kuti Jezu akhakumbukira lini pomwe bza pikado yaceyo. Ndipo abale wace wauzimu adamuthandiza. N’ciyani comwe tingapfunze na ciratizo ca Pedru?

15. Kodi ni citsimikizo ciponi comwe Yahova akufuna kuti tikhale naco? (Salimo 86:5; Aroma 8:38, 39) (Onani cithunzi-thunzi.)

 ¹⁵ Bzomwe tikupfunza. Yahova akufuna kuti titsimikize kuti iye ngwalufoyi ndipo ambatilekerera. (Werengani Salimo 86:5; Aroma 8:38, 39.) Tikaphonya timbabzipasa mulandu. Tsono lekani kukumbuka kuti mukuthemera lini kulatizidwa lufoyi ne kulekereredwa. M’mbuto mwace, tingafunikire kukumbira thandizo mwakamfulumize. Robert, omwe tamulewa kale ule, adati: “Ndidacita pikado thangwe ndikhathemba mphanvu yangu yakukunda mayezo.” Iye adazindikira kuti akhafunikira thandizo la akulu. Iye adati: “Pambuyo pa kuceza na akulu, iwo adandithandiza kuwona kuti Yahova ambandifuna. Akuluwo alibe kundisiya ndekha. Iwo adandithandiza kudziwa kuti Yahova alibe kundisiya.” Ifepanombo tikalatiza kukungula pikado zathu, tikakumbira thandizo na kutcenkha kubwerezera pikado zomwe tacita, Yahova an’dzatifuna ndipo an’dzatilekerera. (1 Juwau 1:8, 9) Tikakhala na citsimikizo cakuti Yahova ambatifuna ndipo akufuna kutilekerera tin’dzasiya lini kumutumikira napo tikaphonya.

16. Thangwe ranyi imwepo ndimwe wakukonzeka kupitiriza kutumikira Yahova?

¹⁶ Yahova ambawona nyongo yomwe timbacita pa kumutumikira mu ntsiku zakumalizira zino. Na thandizo la Yahovayo, ifepano tingapitirize kumutumikira napo anzathu akatiphonyera. Tingapitirize kulatiza lufoyi kwa abale na mpfumakazi zathu ticiwalekerera napo acitiphonyera. Tingalatize lufoyi lakucokera pantsi pa mtima kwa Yahova na kulatizambo ulemu pa makonzedwe yace mwakucita ciri-centse comwe tingakwanise kuti timalise mabvuto yomwe yangabwere m’banja mwathu. Tikacita pikado tingakumbire thandizo kwa Yahova kuti atilekerere ticibvuma lufoyi lace na kupitiriza kumutumikira. Tingakhale na citsimikizo cakuti tin’dzatambira bzisimbo bzizinji ‘tikaleka kusiya kucita bzinthu bzabwino.’ — Agalatiya 6:9.