1-2. N’ciyani comwe munthu an’funikira kucita pomwe akanati kubatizidwa?

 MAGOLE 5 m’mbuyomu, wanthu azinji adabatizidwa acikhala Mboni za Yahova. Ninga Timotio, azinji wa iwo adapfunza cadidi kuyambira pomwe ‘akhali wana.’ (2 Timotio 3:14, 15) Tsono, pana winango wa iwo omwe adapfunza cadidi pomwe akhadakula kale. Mwa ciratizo, mkazi munango omwe adapfunza Bibliya na Mboni za Yahova adabatizidwa pomwe akhana magole 97!

² Penu imwepo ndimwe nyakupfunza wa Bibliya ayai penu abereki wanu ni Mboni za Yahova, kodi mukukumbuka bza kubatizidwa? Penu ndibzo, imwepo mwakumbuka bwino kwene-kwene. Tsono pomwe mukanati kubatizidwa, imwepo mun’funika kubzipereka kwa Yahova. Nkhani ino in’fotokoza thandauzo la kubzipereka kwa Yahova ndipo in’kuthandizani kuti muleke kucita mantha mukadzafuna kubatizidwa.

KODI KUBZIPEREKA N’CIYANI?

3. Fotokozani bziratizo bza m’Bibliya bza wanthu omwe adabzipereka kwa Yahova.

³ M’Bibliya, munthu omwe wabzipereka kwa Yahova ambasankhula kucita basa linango lakupambulika. Mtundu wentse wa Ajirayeri ukhali wakubzipereka kwa Yahova. Tsono wanthu winango mu mtundu wa Ajirayeriwo akhabzipereka kwa Yahova mu njira yakupambulika. Mwa ciratizo, pa duku la Aroni pakhana kalata ka oro kakuyetima komwe kakhali “cizindikiro cakupambulika ca kubzipereka.” Kalata ka oro kamweka kakhalatiza kuti iye akhadasankhulidwa kuti acite basa lakupambulika ninga mkulu wa antsembe wa Jirayeri. (Levitiko 8:9) Anazireu akhadabziperekambo mu njira yakupambulika. Fala lakuti “Nazireu” limbacokera ku fala la Cihebereu lakuti nazir, lomwe limbathandauza “Wakusankhulidwa” ayai “Wakubzipereka.” Anazireu akhafunika  kuteweza malamulo ya Unazireu yomwe yakhadanembedwa mu Lamulo la Mozeji. — Numero 6:2-8.

4. (a) Kodi munthu akabzipereka kwa Yahova ambasankhula ciyani? (b) Kodi ‘kubzilamba tekha’ kumbathandauza ciyani? (Onani cithunzi-thunzi.)

⁴ Imwepo mukabzipereka kwa Yahova mumbasankhula kukhala mteweri wa Jezu ndipo mumbawona kuti kucita kufuna kwa Mulungu n’cinthu cakufunika kwene-kwene pa moyo wanu. Kodi kubziperekako kumbaphatanidza ciyani? Jezu adalewa kuti: “Munthu ali-wentse omwe an’funa kunditewera, abzilambe yekha.” (Mateu 16:24) Fala la Cigerego lomwe lidasanduliziridwa kuti “abzilambe yekha” lingathandauze “kuleka kubzifuna yekha.” Imwepo mukabzipereka kwa Yahova, mun’dzafunikira kulamba cinthu ciri-centse comwe cimbabverana lini na kufuna kwace. (2 Akolinto 5:14, 15) Bzimwebzi bzimbaphatanidzambo “mabasa ya thupi,” ninga upombo. (Agalatiya 5:19-21; 1 Akolinto 6:18) Kodi kubvera malango yamweya kungacitise kuti moyo wanu ukhale wakunesa? Penu imwepo mumbafuna Yahova, mun’dzakwanisa kuzindikira kuti malango yamweya njabwino kwa imwepo ndipo yan’dzakucitisani kuti mukhale na moyo wabwino. (Salimo 119:97; Zaiya 48:17, 18) M’bale munango wakucemeredwa Nicholas adalewa kuti: “Imwepo mungambawone malamulo ya Yahova ninga grade za n’kawoko zomwe zimbakutazisani kuti mucite bzomwe mumbafuna ayai ninga grade zomwe zimbakukhotcererani kuti muleke kulumidwa na mphondolo.”

5. (a) Kodi imwepo mungabzipereke tani kwa Yahova? (b) Kodi n’kusiyana kuponi komwe kulipo pakati pa kubzipereka na ubatizo? (Onani cithunzi-thunzi.)

⁵ Kodi imwepo mungabzipereke tani kwa Yahova? Imwepo mungacite bzimwebzi mwa kucita mpembo kwa iye mucimupicira kuti mun’dzatumikira iye yekha basi ndipo mun’dzaikha kufuna kwace pa mbuto yakuyamba pa moyo wanu. Ndipo mumbapicira kwa Yahova kuti mun’dzapitiriza kumufuna “na mtima wanu  wentse, moyo wanu wentse, nzeru zanu zentse na mphanvu zanu zentse.” (Marko 12:30) Mpembo wakubziperekayo imwepo mumbaucita pa mwekha, imwepo na Yahova. Mwakusiyana na bzimwebzi, imwepo mukabatizidwa mumbalatiza kwa wanthu winango kuti mwabzipereka kwa Yahova. Kubzipereka kwanu ni cinthu cakufunika kwene-kwene. Imwepo mun’dzafunika kucita ciri-centse kuti mukwanirise lumbiro lanu la kubzipereka thangwe ni cinthu cakufunika kwene-kwene kwa Yahova ndipo iye ambadikhira kuti mucite bzimwebzo. — Mpalizi 5:4, 5.

THANGWE RANYI MUN’FUNIKA KUBZIPEREKA KWA YAHOVA?

6. N’ciyani cimbacitisa munthu kubzipereka kwa Yahova?

⁶ Thangwe likulu lomwe lingakucitiseni kubzipereka kwa Yahova ni lufoyi lomwe munalo kwa iye. Ni thangwe lini lokhali basi. Imwepo mwamudziwa Yahova ndipo bzimwebzi bzacitisa kuti mukhale na “cidziwiso caico” na “kubvesesa bzinthu bzauzimu” pakulewa bza iye na cakulinga cace. (Akolose 1:9) Pomwe imwepo mudapfunza Bibliya mudatsimikizira kuti: (1) Yahova ni Munthu caiye, (2) iye ndiye omwe adafulizira Bibliya na (3) iye ambaphatisa basa gulu lace kuti akwanirise bzomwe ambafuna.

7. N’ciyani comwe tin’funika kucita tikanati kubzipereka kwa Mulungu?

⁷ Wanthu omwe an’funa kubzipereka kwa Yahova an’funika kudziwa mapfunziso yakuyambirira ya m’Bibliya ndipo an’funika kuteweza malamulo ya Yahova na kuuzambo wanthu winango bzomwe adapfunza. (Mateu 28:19, 20) Lufoyi lawo kwa Yahova likakula, iwo ambafunisisa kutumikira iye yekha basi. Kodi bzimwebzi ndibzo bzomwe bzakucitikirani? Penu ndibzo, imwepo mun’dzawona lini kubzipereka kwanu ninga cinthu comwe mwandocicita thangwe rakuti mukufuna kukondwesa mpfunzisi wanu wa  Bibliya ayai abereki wanu ayai thangwe rakuti mukufuna kutewezera axamwali wanu.

8. Kodi kutenda kungakuthandizeni tani kuti mubzipereke kwa Yahova? (Salimo 116:12-14)

⁸ Imwepo mukakumbukira bzinthu bzentse bzabwino bzomwe Yahova adakucitirani mun’dzamutenda ndipo mun’dzafunisisa kubzipereka kwa iye. (Werengani Salimo 116:12-14.) Bibliya limbalewa kuti Yahova ndiye omwe ambapereka “mphaso iri-yentse yabwino na yakulungama.” (Tiyago 1:17) Mphaso ikulu pa mphaso zentse zomwe adatipasa ni cakulombolera ca Mwana wace, Jezu. Cakulombolera cidacitisa kuti bzikhale bzakukwanisika kukhala pa uxamwali na Mulungu. Ndipo iye adakupasanimbo mwayi wakuti mudzakhale na moyo wakusaya kumala. (1 Juwau 4:9, 10, 19) Kubzipereka kwa Yahova ni njira ibodzi ya momwe imwepo mungalatizire kuti mumbatenda lufoyi lomwe iye adakulatizani na bzisimbo bzentse bzomwe Yahova adakupasani. (Deuteronomiyo 16:17; 2 Akolinto 5:15) Kubzipereka kumweku kumbafotokozedwa pa pfunziro 46, nfundo 4, mu bukhu lakuti Khalani na Moyo Wakukondwa Mpaka Kale-kale!. Ndipo pa nfundo imweyi panambo vidiyo ya mphindi zitatu ya msolo wakuti Kodi Mulungu Tingam’pasembo Ciyani?

KODI IMWEPO MWAKONZEKA KUTI MUBZIPEREKE KWA YAHOVA MUCIBATIZIDWA?

9. Thangwe ranyi munthu an’funika lini kucita kungingimizidwa kuti abzipereke kwa Yahova?

⁹ Pinango imwepo mungabzibve kuti muli lini wakukonzeka kubzipereka kwa Yahova na kubatizidwa. Pinango mukuwona kuti mukufunika kucinja bzinthu bzinango pa moyo wanu kuti mukwanise kubvera malamulo yentse ya Yahova, ayai mukadafunikira nthawe kuti mulimbise cikhulupiro canu. (Akolose 2:6, 7) Anyakupfunza wa Bibliya ambakula lini mwauzimu mwakundendemerana, ndipo maswaka yambakhala lini yakukonzeka kubzipereka kwa Yahova na kubatizidwa na magole mabodzi-bodzi. Yezerani kuwona bzinthu bzomwe mun’funika kucinja ndipo citani bzimwebzo mucitcenkha kubzindendemezera na winango. — Agalatiya 6:4, 5.

10. N’ciyani comwe mu’funika kucita penu mukuwona kuti muli lini wakukonzeka kuti mubzipereke na kubatizidwa? (Onani kwadru yakuti “ Wale Omwe Adabadwira m’Banja Lacikristau.”)

¹⁰ Penu mukuwona kuti muli lini wakukonzeka kuti mubzipereke kwa Yahova, pitirizani kucita ciri-centse kuti mudzakwanirise cakulinga cimweci. Pembani kwa Yahova kuti akuthandizeni kucinja bzinthu pa moyo wanu. (Afilipi 2:13; 3:16) Khalani na citsimikizo cakuti iye an’dzabva mpembo wanu ndipo an’dzakuthandizani. — 1 Juwau 5:14.

THANGWE RANYI WANTHU WINANGO AMBAZEZA KUBZIPEREKA NA KUBATIZIDWA?

11. Kodi Yahova an’dzakuthandizani tani kuti mupitirize kukhala wakukhulupirika kwa iye?

¹¹ Wanthu winango ambazeza kubzipereka kwa Yahova na kubatizidwa. Iwo ambacita mantha kuti pambuyo pa kubatizidwa angadzacite pikado ikulu acidzacosedwa. Penu imwepo mukucita mantha na bzimwebzo, khalani na citsimikizo cakuti Yahova an’dzakuthandizani “kuti mufambe mwakuthemera ninga momwe Yahova akufunira.” (Akolose 1:10) Iye an’dzakupasanimbo mphanvu kuti mucite bzinthu bzabwino. Iye adapasa kale mphanvu wanthu azinji kuti acite bzinthu bzabwino. (1 Akolinto 10:13) Ndipopa mbanthu ang’ono-ng’ono omwe ambacosedwa m’gwere. Yahova ambathandiza wanthu wace kuti apitirize kukhala wakukhulupirika.

12. Kodi tingacite ciyani tikayezedwa kuti ticite pikado ikulu?

¹² Munthu ali-wentse wakuperewera ambayezedwa kuti acite bzinthu bzakuipa. (Tiyago 1:14) Tsono, imwepo mungasankhule bzomwe mungadzacite mukadzayezedwa. Omwe angadzacite cakusankhula cimweco ndimwepo.  Napo kuti winango ambalewa kuti tingakwanise lini kubziphata pa bzomwe timbacita, tsono bzimwebzi mpsakunama. Imwepo mungapfunze kubziphata mukakhala na bzikhumbo bzakuipa na pomwe mukuyezedwa kucita cinthu cakuipa. Imwepo mungasankhule kuleka kucita cinthuco. Pana bzinthu bzinango bzomwe bzingakuthandizeni kuti mumbatcenkhe kucita bzinthu bzakuipa. Mwa ciratizo, mbapembani kwa Yahova ntsiku zentse, mbapfunzani Fala la Mulungu ntsiku zentse, mbatsonkhanani nthawe zentse ndipo mbapalizirani nthawe zentse. Bzinthu bzimwebzi bzin’dzakuthandizani kuti mupitirize kukhala wakukhulupirika kwa Yahova. Ndipo lekani kuyebwa kuti iye an’dzakuthandizani kuti mucite bzimwebzi. — Agalatiya 5:16.

13. Kodi n’ciyani comwe Zuze adacita pomwe adayezedwa?

¹³ Mpsakupusa kwa imwepo kukhala wakukhulupirika kwa Yahova mukakhala kuti mwakonzekereratu bzomwe mun’dzacita mukadzayezedwa. Bibliya limbafotokoza bza wanthu omwe adacita bzimwebzi napo kuti akhali wakuperewera. Mwa ciratizo, mkazi wa Potifari adayezera kupumpsa Zuze mwakubwereza-bwereza. Tsono Zuzeyo akhadziwa kale bzomwe angadacita. Bibliya limbalewa kuti “iye adalamba” ndipo adalewa kuti: “Ningacitirenyi cinthu cakuipa kwene-kweneci, ndiciphonyera Mulungu?” (Genesesi 39:8-10) Zuze akhadziwa kale bzomwe angadacita pomwe akhanati kuyezedwa. Bzimwebzi bzidacitisa kuti bzikhale bzakupusa iye kucita bzinthu bzabwino pomwe adayezedwa.

14. Kodi tingakonzekere tani kuti tidzaleke kucita pikado tikadzayezedwa?

¹⁴ Kodi imwepo mungacite ciyani kuti mukhale ninga Zuze? Mungakonzekereretu tsapano bzomwe mungadzacite mukadzayezedwa. Khalani wakukonzeka kulamba munthu akukuuzani kuti mucite bzinthu bzomwe Yahova ambakomedwa lini nabzo ndipo lekani kumbabzikumbukira. (Salimo 97:10; 119:165) Mukacita bzimwebzi, imwepo mun’dzacita lini pikado mukadzayezedwa, thangwe mun’dzakhala mwadziwa kale momwe mungatcenkhere pikadoyo.

15. Kodi munthu angalatize tani kuti ‘akulinga Yahova na mtima wace wentse’? (Ahebereu 11:6)

¹⁵ Pinango imwepo mwazindikira kuti comwe mwagumanaci ni cadidi ndipo mukufunisisa kutumikira Yahova na mtima wanu wentse, tsono mukuwona kuti muli lini wakukonzeka kubzipereka kwa iye na kubatizidwa. N’ciyani comwe mun’funika kucita? Imwepo mun’funika kutewezera bzomwe Mambo Davide adacita.  Mungadandaulire Yahova kuti: “Ndifufudzeni, imwe Mulungu, muciudziwa mtima wangu. Ndifufudzeni, muciyadziwa makumbukidwe yangu yomwe yakundisayisa mtendere. Ndipo onani penu ciripo ciri-centse comwe cikundifambisa mu njira yakuipa, mucinditsogolera mu njira ya muyaya.” (Salimo 139:23, 24) Yahova ambasimba wale omwe “ambamulinga na mtima wentse.” Ndipo nyongo yomwe imwepo mukucita kuti mubzipereke kwa iye na kubatizidwa ikulatiza kuti mukufunisisa kucitadi bzimwebzi. — Werengani Ahebereu 11:6.

PITIRIZANI KUKHALA PA UXAMWALI BWAKULIMBA NA YAHOVA

16-17. Thangwe ranyi tingalewe kuti wale omwe adakulira m’banja lacikristau adacita kubweresedwa na Yahova? (Juwau 6:44)

¹⁶ Jezu adalewa kuti ateweri wace adacita kubweresedwa na Yahova. (Werengani Juwau 6:44.) Kumbukirani momwe bzimwebzi bziriri bzabwino kwa imwepo. Yahova ambawona bzinthu bzabwino kwa munthu ali-wentse payekha ndipo ambakhala naye pa uxamwali. Iye ambawona munthu ali-wentse payekha ninga “cuma cace cakupambulika.” (Deuteronomiyo 7:6) Ni momwe iye ambakuwonerani.

¹⁷ Pinango imwepo ndimwe maswaka ndipo abereki wanu ni Mboni za Yahova. Imwepo mungabzibve ninga kuti mukutumikira Yahova thangwe ra kutewezera abereki wanu sikuti thangwe rakuti Yahovayo adakubweresani mu cadidi. Tsono Bibliya limbalewa kuti: “Fendererani Mulungu ndipo iye an’dzakufendereranimbo.” (Tiyago 4:8; 1 Nkhani 28:9) Mukayamba ndimwepo kumufenderera Yahova, iye an’dzakufendereranimbo. Yahova ambakuwonani lini ninga munthu m’bodzi omwe akondocita mbali ya thimu lace basi. Iye ambabvuma munthu ali-wentse payekha-payekha, kuphatanidzambo wale omwe ambabadwa pomwe abereki wawo ni Mboni kale. Munthuyo akacita ciri-centse kuti afenderere Yahova, Yahovayo ambamufendererambo munthuyo, ninga momwe tawonera pa Tiyago 4:8. — Ndendemezerani na 2 Atesalonika 2:13.

18. Kodi tin’dzacezerana ciyani mu nkhani ikubwerayi? (Salimo 40:8)

¹⁸ Imwepo mukabzipereka kwa Yahova mucibatizidwa, mumbakhala mukutewezera Jezu. Jezu adabzipereka kwa Pai wace kuti acite bzentse bzomwe Pai wacewo angadamukumbira kuti acite. (Werengani Salimo 40:8; Ahebereu 10:7) Mu nkhani yomwe ikubwerayi, tin’dzacezerana bzomwe bzingakuthandizeni kuti mupitirize kutumikira Yahova mwakukhulupirika pambuyo pakubatizidwa.