1. Kodi atumiki winango wakukhulupirika wa Yahova ana makumbukidwe yaponi?

 MPSABWINO kwene-kwene kudziwa kuti Yahova ambafuna wanthu wace ninga thimu! Bibliya limbati: “Yahova ambakomedwa na wanthu wace.” (Salimo 149:4) Tsono nthawe zinango, ifepano tingawone ninga kuti Yahova ambakomedwa lini nafe, ndipopa tingabzibvunze kuti: ‘Kodi Yahova ambakomedwa nandembo inepano?’ M’mbuyomu, atumiki winango wakukhulupirika wa Yahova adakhalambo na nzeru ninga zimwezi. — 1 Samuyeli 1:6-10; Djobi 29:2, 4; Salimo 51:11.

2. Kodi ni wanthu aponi omwe angafunidwe na Yahova?

² Bibliya limbafotokoza mwakubveka bwino kuti wanthu wakuperewera angafunidwe na Yahova. Kodi bzimwebzi bzingacitike tani? Ifepano tin’funika kukhulupira ntsembe ya cakulombolera ya Jezu Kristu na kubatizidwa. (Juwau 3:16) Tikacita bzimwebzi timbalatiza padeca kuti takungula pikado zathu ndipo tapicira kwa Mulungu kuti tin’dzacita kufuna kwace. (Mabasa 2:38; 3:19) Yahova ambakomedwa kwene-kwene akatiwona tikucita bzimwebzi kuti tikhale pa uxamwali bwakulimba na iye. Tikapitiriza kucita nyongo yakukhala na moyo mwakubverana na bzomwe tidamupicira Yahovayo, iye ambakomedwa nafe ndipo timbakhala xamwali wace. — Salimo 25:14.

3. Kodi ni mibvunzo iponi yomwe tin’cezerana mu nkhani ino?

³ Tsono thangwe ranyi nthawe zinango wanthu angawone ninga kuti Mulungu akukomedwa lini nawo? Kodi Yahova ambalatiza tani kuti akukomedwa na munthu? Ndipo kodi Mkristau angacite ciyani kuti alimbise cikhulupiro cace cakuti Mulungu akukomedwa naye?

THANGWE RANYI WANTHU WINANGO AMBAKUMBUKA KUTI YAHOVA AKUKOMEDWA LINI NAWO?

4-5. Napo penu tikubziwona kuti ndife wakusaya basa, n’ciyani comwe tingatsimikizire?

⁴ Azinji wa ifepano timbabziwona kuti ndife wanthu wakusaya kufunika thangwe ra momwe tidaleredwera. (Salimo 88:15) M’bale munango  wakucemeredwa Adrián adalewa kuti: “Inepano nthawe zentse ndikhabziwona kuti ndine munthu wakusaya kufunika. Pomwe inepano ndikhali mwana ndikhawona kuti famidya yangu yentse ingadadzakwanisa kupita m’Paraizo, koma inepano ningadakwanisa lini kupita.” Tony, omwe alibe kukulira m’banja lacikristau, adalewa kuti: “Abereki wangu alibe kundiuzambo ne ntsiku ibodzi kuti ambandifuna ayai kulewa kuti ambakomedwa nande. Bzomwe iwo akhacita bzikhalatiza kuti pana cinthu comwe inepano ndikhaphonyesa ndipo ndikhafunika kucita nyongo kuti nimbacite bzinthu bzabwino.”

⁵ Penu ifepano timbakumbukambo tenepo, tin’funika kukumbukira kuti Yahova ambatifuna, ndipopa adatibweresa mu cadidi. (Juwau 6:44) Iye ambakwanisa kuwona bzinthu bzabwino mwa ifepano bzomwe timbakwanisa lini kubziwona tekha, ndipo iye ambadziwa mtima wathu. (1 Samuyeli 16:7; 2 Nkhani 6:30) Ndipopa tin’funika kukhulupira iye akatiuza kuti ambatifuna. — 1 Juwau 3:19, 20.

6. Kodi mpostolo Paulo adabva tani thangwe ra pikado zomwe adacita m’mbuyo?

⁶ Pomwe azinji wa ifepano tikhanati kupfunza Bibliya tikhacita bzinthu bzizinji bzakuipa, ndipo tikakumbukira bzimwebzi ifepano timbabzipasa mulandu. (1 Pedru 4:3) Napombo Akristau wakukhulupirika ambakhalambo nazo nzeru zimwezi. Kodi imwepo mumbabvambo tenepo nthawe zinango? Penu ndibzo, dziwani kuti muli lini mwekha. Atumiki winango wakukhulupirika wa Yahova adabvambo bzibodzi-bodzibzo. Mwa ciratizo, mpostolo Paulo akhabziwona kuti ni munthu wakutsautsika thangwe ra pikado zomwe adacita pomwe akhanati kukhala Mkristau. (Aroma 7:24) Tsono, iye akhadakungula pikado zacezo ndipo adabatizidwa. Napo bzikhali tenepo, iye adabzilewa kuti akhali “mpostolo wakumalizira” ndipo akhali nyapikado “mkululetu.” — 1 Akolinto 15:9; 1 Timotio 1:15.

7. N’ciyani comwe tin’funika kukumbukira bza pikado zomwe tidacita m’mbuyo?

⁷ Yahova adatipicira kuti an’dzatilekerera pikado zathu tikakungula. (Salimo 86:5) Tenepo, ifepano tikakungula na mtima wathu wentse pikado zomwe tidacita tin’funika kukhulupira kuti Yahova watilekerera. — Akolose 2:13.

8-9. Kodi n’ciyani comwe tingacite kuti tikunde makumbukidwe yakuti bzomwe tikucita kwa Yahova bzing’ono-ng’ono?

⁸ Ifepano timbafuna kutumikira Yahova na mtima wathu wentse. Tsono, wanthu winango ambakumbuka kuti Yahova akukomedwa lini nawo thangwe rakuti akucita bzinthu bzing’ono-ng’ono pakumutumikira. Mpfumakazi inango yakucemeredwa Amanda idalewa kuti: “Ndikhakumbuka kuti nin’funika kucita bzizinji kuti Yahova akomedwe nande. Ndipopa ndikhayezera kucita bzizinji napo kuti bzikhali bzakunesa kwa inepano. Ndikatazira ndikhagoboka m’mabondo ndipo ndikhakumbuka kuti Yahova akukomedwa lini nande.”

⁹ Kodi tingacite ciyani kuti tikunde makumbukidwe yakuti bzomwe tikucita mpsing’ono-ng’ono nakuti Yahova akukomedwa lini nafe? Kumbukirani kuti Yahova alibe kukhala ninga wanthufe. Iye ambakwanisa kucinja bzinthu mwakamfulumize. Yahova alibe kunesa ayai ambaumirira lini pa bzinthu bzomwe iye akufuna. Iye ambatenda ciri-centse comwe tingamucitire tikakhala tikucicita na mtima wathu wentse. Ndipo kumbukiranimbo bziratizo bza m’Bibliya bza wanthu omwe adatumikira Yahova na mtima wawo wentse. Kumbukirani bza Paulo. Iye adaphata basa na nyongo kwa magole mazinji acicita maulendo matali-matali na kukhazikisa magwere. Tsono pomwe bzinthu bzidacinja pa moyo wace acitazira kucita bzizinji pa basa lakupalizira, kodi Mulungu adasiya kumufuna? Ne. Iye adapitiriza kucita bzomwe angadakwanisa ndipo Yahova adamusimba. (Mabasa 28:30, 31) Mwakundendemerana na bzimwebzi, bzomwe tingacitire Yahova bzingacinje na kupita kwa nthawe. Tsono cakufunika kwene-kwene kwa iye ni thangwe lomwe tikucitira bzinthubzo. Bwerani tiwone njira zinango za momwe Yahova ambalatizira kuti ambakomedwa nafe.

 KODI YAHOVA AMBALATIZA TANI KUTI AMBAKOMEDWA NAFE?

10. Kodi tingacite ciyani kuti tibve “fala” la Mulungu likutiuza kuti akukomedwa nafe? (Juwau 16:27)

¹⁰ Iye ambaphatisa basa Bibliya. Yahova ambafuna kulatiza wale omwe akukomedwa nawo kuti ambawafuna. Bibliya limbafotokoza bza nthawe ziwiri zomwe Yahova adalewa kuti ambafuna Mwana wace, Jezu. (Mateu 3:17; 17:5) Kodi imwepo mukufuna kubva Yahova akukuuzani kuti ambakufunani? Imwepo mungakwanise lini kubva fala la Mulungu likukuuzani kuti ambakufunani. Tsono imwepo mungabve falalo mukakhala mukuwerenga Bibliya. Ifepano tingabve fala la Mulungu likutiuza kuti ambatifuna tikambawerenga mafala ya Jezu m’mabukhu manai yomwe yambafotokoza bza moyo wace. (Werengani Juwau 16:27.) Jezu ambatewezera mwakulungamiratu makhalidwe ya Pai wace, Yahova. Tenepo, tikambabva mafala ya Jezu yomwe iye adauuza ateweri wace wakukhulupirika kuti ambawafuna, tidziwembo kuti mafala yokha-yokhayo ndiyo yomwe Yahova akufotokozambo kwa ifepano. — Juwau 15:9, 15.

11. Thangwe ranyi mabvuto yomwe tikugumana nayo ni cizindikiro lini cakuti Yahova akukomedwa lini nafe? (Tiyago 1:12)

¹¹ Iye ambatipasa bzomwe tikufunikira. Yahova ambafunisisa kutithandiza. Iye ambatipasa bzomwe tikufunikira ntsiku na ntsiku. Tsono nthawe zinango, iye angalekerere kuti ifepano tigumane na mabvuto ninga momwe bzidacitikira na munthu wakulungama Djobi. (Djobi 1:8-11) Tikagumana na mabvuto bzin’funa lini kulewa kuti Mulungu akukomedwa lini nafe, mabvutoyo yambatipasa mwayi wakuti tilatize kukula kwa lufoyi lomwe tinalo kwa Mulungu nakuti ifepano timbamuthemba. (Werengani Tiyago 1:12.) Tikapirira ifepano timbakwanisa kuwona lufoyi lomwe Yahova analo kwa ifepano na momwe ambatithandizira.

12. N’ciyani comwe cidacitikira Dmitrii, ndipo tikupfunza ciyani na bzimwebzo?

¹² Onani bzomwe bzidacitikira m’bale munango wa ku Ásia wakucemeredwa Dmitrii. Iye adacosedwa basa ndipo padapita minyezi mizinji akanati kugumana basa linango. Pa nthawe imweyi, iye adawona kuti bzikhali bwino kuti aphatise basa nthaweyo kuti acite bzizinji mu upalizi, ndipo bzimwebzi bzidalatizambo kuti akhathemba kwene-kwene Yahova. Minyezi ikhapita ndipo iye akhakwanisa lini kugumana basa linango. Patsogolo pace, iye adaduwala kwene-kwene ndipo akhakwanisa lini kumuka. Iye adayamba kubziwona kuti akhali lini mwamuna na pai wabwino, ndipo adayambambo kukumbuka kuti Yahova akhakomedwa lini naye. Tsono ntsiku inango usiku, mwana wace wacikazi adadinda tsamba lomwe likhana mafala ya pa Zaiya 30:15, yomwe  yambati: “Mun’dzakhala wamphanvu mukapitiriza kukhala wakuderekha na wakukhulupirika.” Mwanayo adabweresa tsambalo kuna pai wacewo ndipo adawauza kuti: “Papá, imwepo mukakhala mwasunama mbakumbukirani mafala ya cinemboci.” Dmitrii adazindikira kuti banja lace likhapitiriza kugumana cakudya na mbuto yakukhala thangwe rakuti akhathandizidwa na Yahova. Iye adati: “Bzomwe ndikhafunikira ni kukhala wakuderekha na kupitiriza kuthemba Mulungu wangu.” Penu mukugumanambo na bvuto lakundendemerana na limweri, khalani na citsimikizo cakuti Yahova an’dzakusamalirani ndipo an’dzakuthandizani kupirira.

13. Kodi mbani omwe Yahova angaphatise basa kuti alatize kuti akukomedwa nafe, ndipo kodi iye ambacita tani bzimwebzi?

¹³ Mwakuphatisa basa Akristau anzanu. Yahova ambaphatisa basa abale na mpfumakazi zathu kuti atilatize kuti ambakomedwa nafe. Mwa ciratizo, iye angacitise abale kutiuza mafala yakulimbikisa pa nthawe yomwe tikufunikira thandizo. Bzimwebzi bzidacitikira mpfumakazi inango ya ku Ásia pomwe ikhagumana na mabvuto. Mpfumakaziyi ikhadacosedwa basa ndipo ikhaduwala kwene-kwene. Bayace adacita pikado ikulu ndipo adasiya kutumikira ninga mkulu. Mpfumakaziyi idalewa kuti: “Inepano ndikhafunika kubvesesa kuti thangwe ranyi bzinthu bzimwebzi bzikhacitika. Ndikhakumbuka kuti pinango ndacita cinthu cakuphonyeka ndipo Yahova akukomedwa lini nande.” Mpfumakaziyi idadandaulira Yahova kuti ailatize kuti akukomedwa nayo. Kodi Yahovayo adacita tani bzimwebzi? Mpfumakaziyi idati: “Akulu wa gwere adaceza nande ndipo adanditsimikizira kuti Yahova ambandifuna.” Pomwe padapita nthawe, mpfumakaziyi idakumbira pomwe thandizo kwa Yahova. Iyo idati: “Pa ntsiku imweyoletu ndidatambira tsamba lakucokera kwa abale na mpfumakazi zangu za m’gwere. Pomwe inepano ndidawerenga mafala yomwe iwo adanemba, ndidawona kuti Yahova adatawira mpembo wangu.” Inde, Yahova ambalatiza kuti ambakomedwa nafe mwakuphatisa basa mafala ya lufoyi yomwe anzathu angatiuze. — Salimo 10:17.

14. Kodi ni njira inango iponi yomwe Yahova ambaiphatisa basa kuti alatize kuti ambakomedwa nafe?

 ¹⁴ Yahova ambalatizambo kuti ambakomedwa nafe mwakuphatisa basa malango yomwe abale wathu wacikristau angatipase. Mwa ciratizo, mu nthawe ya Akristau wakuyambirira Yahova adaphatisa basa mpostolo Paulo kuti anembe matsamba 14 kuna abale wace wacikristau. M’matsamba yamweya mpostolo Paulo adapereka malango yakubveka bwino kwa abale wace wacikristau, koma mwa lufoyi. Thangwe ranyi Yahova adacitisa mpostolo Paulo kunemba malango yamweya? Yahova ni Pai wabwino, ndipo iye ambalanga wana wace thangwe ra kuti ‘ambawafuna.’ (Mimwani 3:11, 12) Ndipopa tikapasidwa malango yakucokera m’Bibliya, tin’funika kuwona kuti bumwebu ni umboni bwakuti Yahova akutifuna sikuti wasiya kutifuna. (Ahebereu 12:6) Kodi n’ciyani cinango comwe cimbalatiza kuti Yahova ambatifuna?

NJIRA ZINANGO ZA MOMWE YAHOVA AMBALATIZIRA KUTI AMBAKOMEDWA NAFE

15. Kodi mbani omwe ambapasidwa mzimu wakucena na Yahova, ndipo thangwe ranyi kudziwa bzimwebzi kungatitsimikizire kuti Yahova ambatifuna?

¹⁵ Yahova ambapereka mzimu wace wakucena kwa wale omwe iye akukomedwa nawo. (Mateu 12:18) Bzibvunzeni kuti: ‘Kodi pana makhalidwe yanango yacikristau yomwe inepano nimbakwanisa kuyalatiza pa moyo wangu?’ Pinango tsapano imwepo mumbakwanisa kupirira na anzanu kuposa pomwe mukhanati kupfunza Bibliya. Mukambacita nyongo yakulatiza makhalidwe yomwe mzimu wakucena umbabala, imwepo mun’dzakhala na citsimikizo cakuti Yahova akukomedwa namwe! — Onani kwadru yakuti “ Mzimu Wakucena Umbabala Bzisapo Bzomwe ni . . . ”

16. Kodi mbani omwe Yahova ambaphatisa basa kuti mafala ya umambo yapaliziridwe, ndipo bzimwebzi bzimbakucitisani kuti mubzibve tani? (1 Atesalonika 2:4)

¹⁶ Yahova adapasa basa lakupalizira mafala yabwino ya Umambo wanthu omwe iye ambakomedwa nawo. (Werengani 1 Atesalonika 2:4.) Onani phindu lomwe mpfumakazi inango yakucemeredwa Jocelyn idakhala nalo thangwe ra basa lakupalizira mafala yabwino ya Umambo. Ntsiku inango, Jocelyn adamuka adasunama. Iye adati:“Inepano ndikhalibe mphanvu ndipo ndikhabva kuti ningakwanise lini kucita cinthu. Tsono inepano ndikhali mpainiya, ndipo imweyi ikhali ntsiku yakuti ndiyende mu upalizi. Tenepo, ndidapemba ndipo ndidayenda kukapalizira.” Ntsiku imweyi Jocelyn adaceza na mkazi munango wakucemeredwa Mary, ndipo iye adabvuma kupfunza Bibliya. Pomwe padapita minyezi, mkaziyo adadzalewa kuti pa ntsiku yomwe Jocelyn adagogodza msuwo wace iye akhapemba kwa Mulungu acikumbira thandizo. Pakukumbukira cakucitika  cimweci, Jocelyn adalewa kuti: “Bzimwebzi bzidandicitisa kubva ninga kuti Yahova akundiuza kuti, ‘Inepano nimbakomedwa nawe.’” N’cadidi kuti ni wanthu lini wentse omwe an’dzabvuma mafala yomwe tikupalizira. Tsono tikacita bzomwe tingakwanise kuti tipalizire anzathu mafala yabwino ya Umambo tingakhale na citsimikizo cakuti Yahova akukomedwa nafe.

17. Kodi mwapfunza ciyani na bzomwe Vicky adalewa pa nkhani ya cakulombolera? (Salimo 5:12)

¹⁷ Yahova ambaphatisa basa mphanvu ya cakulombolera kuti abvume wanthu omwe iye ambakomedwa nawo. (1 Timotio 2:5, 6) Tsono tani penu ifepano tina makumbukidwe yakuti Yahova ambakomedwa lini nafe napo kuti timbakhulupira cakulombolera ndipo tidabatizidwa? Cinthu comwe tingacite ndico kutcekha kukhulupira nzeru zathu koma tin’funika kukhulupira Yahova. Iye ambawona wentse omwe ambakhulupira cakulombolera kuti mbakulungama m’maso mwace ndipo ambapicira kuti an’dzawasimba. (Werengani Salimo 5:12; Aroma 3:26) Kukumbukira bza cakulombolera kudathandiza mpfumakazi yakucemeredwa Vicky. Ntsiku inango, pomwe mpfumakaziyi ikhakumbukira bwino bza cakulombolera iyo idalewa kuti: “Yahova wapirira nande kwa nthawe itali. . . . Napo bziri tenepo pa nthawe inango inepano nimbalewa kuti: ‘Imwepo mungakwanise lini kundifuna inepano. Ntsembe ya cakulombolera ya mwana wanu ingakwanise lini kumalisa pikado zangu.’” Tsono pomwe mpfumakaziyi idayamba kukumbukira bwino bza cakulombolera iyo idayamba kuwona kuti Yahova ambaifuna. Ifepanombo tingakwanise kukhulupira kuti Yahova ambatifuna tikambacita nyongo yakumbakumbukira bza cakulombolera.

18. Tikapitiriza kufuna Yahova, kodi tingatsimikizire ciyani?

¹⁸ Napo kuti tingacite nyongo kuti tiphatise basa malango yomwe tapfunzaya, nthawe zinango tingasuname ndipo tingawone ninga kuti Yahova akukomedwa lini nafe. Mukakhala na nzeru zimwezi, mbatsimikizirani kuti iye ambakomedwa namwe thangwe iye ambafuna “wentse omwe an’pitiriza kumufuna.” (Tiyago 1:12) Tenepo, pitirizani kulimbisa uxamwali bwanu na Yahova ndipo kumbukirani kuti iye ambakomedwa namwe. Ndipo lekani kuyebwa kuti Yahova “ali pafupi na m’bodzi na m’bodzi wa ifepano.” — Mabasa 17:27.