1-2. Kodi ni bzisimbo bziponi bzomwe munthu ambakhala nabzo pambuyo pakubatizidwa?

 IFEPANO timbakomedwa kwene-kwene tikabatizidwa ticicitambo mbali ya banja la Yahova. Kwa ifepano, umweyu ni mwayi ukulu kwene-kwene thangwe umbaticitisa kukhala pa uxamwali na Yahovayo. Timbabva ninga momwe nyakunemba Salimo Davide adabvera, pomwe adati: “Wakukondwa ni munthu omwe imwepo mwamusankhula mucimubweresa pafupi na imwepo kuti akhale mu bwalo lanu.” — Salimo 65:4.

² Yahova ambandobweresa lini munthu ali-wentse mu gulu la lace. Ninga momwe tidawonera mu nkhani idamala ire, iye ambakhala Xamwali wa wale omwe ambalatiza kuti akufuna kukhala naye pa uxamwali. (Tiyago 4:8) Imwepo mukabzipereka kwa Yahova mucibatizidwa, mumbakhala pa uxamwali bwakulimba na iye mu njira yakupambulika. Imwepo mukabatizidwa, mungakhale na citsimikizo cakuti iye ‘an’dzakutsanulirani bzisimbo bzomwe mun’dzasaya pakubzitambirira.’ — Malakiya 3:10; Jeremiya 17:7, 8.

3. N’ciyani comwe munthu omwe abzipereka na kubatizidwa an’dzafunika kucita? (Mpalizi 5:4, 5)

³ Ubatizo ni ciyambi ca moyo wanu wakutumikira Yahova. Pambuyo pa kubatizidwa, imwepo mun’dzafunika kucita nyongo kuti mukwanirise lumbiro lanu la kutumikira Yahova na kupitiriza kukhala wakukhulupirika kwa iye, napo mukayezedwa kucita bzinthu bzakuipa ayai mukakhala mukugumana na mabvuto. (Werengani Mpalizi 5:4, 5.) Ninga mteweri wa Jezu, imwepo mun’dzatewezera ciratizo cace na kubvera malamulo yace nthawe zentse. (Mateu 28:19, 20; 1 Pedru 2:21) Nkhani ino in’kuthandizani kucita bzimwebzi.

 ‘PITIRIZANI KUTEWERA’ JEZU NAPO MUCIYEZEDWA NA KUGUMANA NA MABVUTO

4. Kodi Jezu akhafuna kulewanyi pomwe adalewa kuti ateweri wace angadanyamula “muti [wace] wakuzunzidwira”? (Luka 9:23)

⁴ Lekani kukumbuka kuti pambuyo pakubatizidwa mun’dzagumana lini na mabvuto. Jezu adalewa kuti ateweri wace angadadzanyamula “muti wakuzunzidwira.” Ndipo iwo angadadzacita bzimwebzo “ntsiku zentse.” (Werengani Luka 9:23.) Kodi Jezu akhalewa kuti ateweri wace angadadzabonera nthawe zentse? Ndibzo lini bzomwe iye akhafuna kulewa. Iye akhandofuna kubvekesa kuti kusiya pa bzisimbo bzomwe iwo angadatambira, angadagumanambo na mabvuto. Ndipo yanango mwa mabvuto yamweya yangadakhala yakuwawa kwene-kwene. — 2 Timotio 3:12.

5. Kodi wale omwe ambabvuma kuluza bzinthu bzinango pa moyo wawo ambatambira bzisimbo bziponi?

⁵ Pinango banja lanu limbakutsutsani ayai imwepo mudabvuma kuluza basa lomwe lingadakucitisani kuti mutambire kobiri zizinji kuti muikhe Umambo bwa Mulungu pa mbuto yakuyamba pa moyo wanu. (Mateu 6:33) Yahova ambadziwa bzinthu bzentse bzomwe imwepo mudamucitira. (Ahebereu 6:10) Pinango imwepo mudakwanisa kuwona kukwanisika kwa mafala ya Jezu yakuti: “Palibe munthu omwe adasiya nyumba, abale, mpfumakazi, mai, pai, wana ayai minda thangwe ra inepano na thangwe ra mafala yabwino, omwe an’dzatambira lini mu nthawe ino kubwerezera maulendo 100, nyumba, abale, mpfumakazi, azimai, wana na minda pabodzi na mazunzo, ndipo mu nthawe ikubwerayo acidzatambirambo moyo wakusaya kumala.” (Marko 10:29, 30) Bzisimbo bzomwe imwepo mudatambira mpsizinji kwene-kwene kuposa bzinthu bzomwe mudaluza. — Salimo 37:4.

6. Thangwe ranyi imwepo mun’dzafunika kupitiriza kulimbana na “cikhumbo ca thupi” pambuyo pakubatizidwa?

⁶ Pambuyo pa kubatizidwa, imwepo mun’dzapitiriza kulimbana na “cikhumbo ca thupi.” (1 Juwau 2:16) Bzimwebzi bzimbacitika thangwe rakuti ndimwe wakuperewera. Nthawe zinango, imwepo mungabzibvembo ninga momwe mpostolo Paulo adabvera. Iye adati: “Mu mtima mwangu, nimbafuna kwene-kwene lamulo la Mulungu. Tsono m’thupi mwangu nimbawona lamulo linango lomwe likumenyana na lamulo la makumbukidwe yangu ndipo limbandicitisa kukhala kapolo wa lamulo la pikado lomwe liri m’thupi mwangu.” (Aroma 7:22, 23) Pinango imwepo mungasuname thangwe rakuti nthawe zinango mumbakhala na bzikhumbo bzakuipa. Tsono, kukumbukira bza piciro lomwe imwepo mudacita lakubzipereka kwa Yahova kun’dzakuthandizani kuti muleke kubwerera m’mbuyo, koma mun’dzapitiriza kulimbana na mayezo yomwe mukugumana nayo. Cadidi n’cakuti, mukadzakhala mukulimbana na mayezo piciro lanu lakubzipereka lin’dzakuthandizani. Mwa njira iponi?

7. Kodi kubzipereka kwa Yahova kun’dzakuthandizani tani kukhala wakukhulupirika kwa iye?

⁷ Imwepo mukabzipereka kwa Yahova, mumbakhala mwabzilamba mwekha. Bzimwebzi bzin’funa kulewa kuti mumbalamba bzikhumbo bzanu na bzakulinga bzinango bzomwe Yahova angakomedwe lini nabzo. (Mateu 16:24) Imwepo mukadzayezedwa ayai mukadzakhala mukugumana na bvuto linango lakunesa mun’dzafunika lini kukhala na thupo pa bzomwe mukufunikira kucita. Imwepo mun’dzakhala mukudziwa kale bzomwe mukufunikira kucita bzomwe ni kupitiriza kukhala wakukhulupirika kwa Yahova, ndipo mun’dzakhala wakutsimikiza kukondwesa Yahovayo. Imwepo mun’dzakhala ninga Djobi. Napo kuti akhagumana na mabvuto yakunesa kwene-kwene, iye adalewa mwakutsimikiza kuti: “Nin’dzasiya lini kukhala na mtima wakusaya kugawanika!” — Djobi 27:5.

8. Kodi kukumbukira mpembo wanu wakubzipereka kun’dzakuthandizani tani kukunda mayezo?

⁸ Mukakumbukira bza mpembo wanu wakubzipereka kwa Yahova, imwepo mun’dzagumana mphanvu kuti mukwanise kulimbana na mayezo. Mwa ciratizo, kodi imwepo mungayambe kumbalatiza kuti mumbafuna mwamuna ayai mkazi wa munthu munango? Bzikuwonekeratu kuti  mungacite lini bzimwebzo. Imwepo mudapicira kale kwa Yahova kuti mun’dzacita lini bzimwebzo. Mukasaya kulekerera kuti makumbukidwe yakuipa yakule mun’dzafunika lini kulimbana nayo. Imwepo mun’dzakhala kutali na “njira ya wanthu wakuipa.” — Mimwani 4:14, 15.

9. Kodi kukumbukira mpembo wanu wakubzipereka kungakuthandizeni tani kuikha kunamata Yahova pa mbuto yakuyamba?

⁹ Kodi n’ciyani comwe mungacite mukagumana basa lomwe lingakutaziseni kufika pa mitsonkhano nthawe zentse? Imwepo mukudziwa bzomwe mungacite. Pomwe mukhanati kugumana basalo, imwepo mukhadasankhula kale kuleka kubvuma basa liri-lentse lomwe lingakutaziseni kuyenda ku mitsonkhano. Ndipopa, imwepo mun’dzabvuma lini basalo ndipo patsogolo pace mucinyag’ana njira ya momwe mungaikhire Yahova pa mbuto yakuyamba. Kukumbukira ciratizo ca Jezu kungatithandize kwene-kwene. Iye akhali wakutsimikiza kukondwesa Pai wace. Imwepombo khalani wakutsimikiza kulamba cinthu ciri-centse comwe mukudziwa kuti cingakondwese lini Yahova Mulungu, omwe imwepo mudabzipereka kwa iye. — Mateu 4:10; Juwau 8:29.

10. Kodi Yahova an’dzakuthandizani tani kupitiriza “kutewera” Jezu pambuyo pakubatizidwa?

¹⁰ Bzomwe imwepo mungacite mukakhala mukugumana na mabvuto ayai mukuyezedwa bzingalatize kuti imwepo mukufuna “kutewera” Jezu. Imwepo mungakhale na citsimikizo centse cakuti Yahova an’dzakuthandizani kupitiriza kutewera Jezu. Bibliya limbalewa kuti: “Mulungu ngwakukhulupirika ndipo iye an’dzalekerera lini kuti muyezedwe mpaka kufika pomwe mungakwanise lini kupirira, koma pomwe mukugumana na mayezoyo, iye an’dzakupasani njira yakupulumukira kuti mukwanise kuyapirira.” — 1 Akolinto 10:13.

N’CIYANI COMWE IMWEPO MUNGACITE KUTI MUPITIRIZE KUTEWERA JEZU?

11. Kodi ni njira ibodzi iponi yabwino kwene-kwene yomwe mungatewerere Jezu? (Onani cithunzi-thunzi.)

¹¹ Jezu adatumikira Mulungu na mtima wace wentse ndipo akhambapemba kwa iye nthawe  zentse. (Luka 6:12) Kulewa cadidi, cinthu cabwino comwe mungacite kuti mupitirize kutewera Jezu pambuyo pakubatizidwa ndico kucita bzinthu bzomwe bzingakucitiseni kukhala wakufendererana na Yahova. Bibliya limbalewa kuti: “Bziribe basa momwe tayendera patsogolo, mbatipitirizeni kufamba mu njira imweyi.” (Afilipi 3:16) Nthawe zinango, imwepo mun’dzabva nkhani za abale na mpfumakazi omwe adasankhula kucita bzizinji pakutumikira Yahova. Winango wa iwo adasankhula kupita Xikola ya Apalizi wa Umambo ayai adayenda kukatumikira komwe kukhafunika apalizi azinji. Penu imwepo munacombo cakulinga cimweci bzimwebzo mpsabwino kwene-kwene. Atumiki wa Yahova ambafunisisa kucita bzomwe angakwanise kuti acite bzizinji pakumutumikira. (Mabasa 16:9) Tsono tani penu imwepo mukukwanisa lini kucita bzimwebzo? Lekani kukumbuka kuti imwepo ndimwe lini cinthu mukabzindendemezera na wale omwe ambakwanisa kucita bzimwebzi. Cakufunika kwene-kwene n’cakuti imwepo mupitirize kupirira. (Mateu 10:22) Lekani kuyebwa kuti imwepo mumbakondwesa Yahova mukambacita bzomwe mungakwanise mwakubverana na momwe bzinthu bziriri pa moyo wanu. Imweyi ni njira yabwino kwene-kwene ya momwe mungapitirizire kutewera Jezu pambuyo pakubatizidwa. — Salimo 26:1.

12-13. Kodi n’ciyani comwe imwepo mungacite penu mukukomedwa lini pomwe na kutumikira Yahova? (1 Akolinto 9:16, 17) (Onani kwadru yakuti “ Pitirizani Kuthamanga.”)

¹² Kodi n’ciyani comwe mun’funika kucita penu mukuwona kuti mumbapemba lini na mtima wentse ayai mumbakomedwa lini na upalizi ninga momwe mukhacitira m’mbuyomu? Ndipo n’ciyani comwe mun’funika kucita penu kuwerenga Bibliya kumbakudekerani lini ninga momwe bzikhaliri kale-kale? Penu imwepo mukubzibva tenepo pambuyo pakubatizidwa, lekani kuwona ninga kuti Yahova akukupasani lini pomwe mzimu wace wakucena. Imwepo ndimwe wakuperewera, ndipo makumbukidwe yanu yangacinje nthawe zinango. Penu nyongo yanu ikucepekera, kumbukirani  bza mpostolo Paulo. Napo kuti Paulo akhayezera kutewezera Jezu, iye akhadziwa kuti nthawe zinango angadakhala alibe mphanvu yakucita bzimwebzo. (Werengani 1 Akolinto 9:16, 17.) Iye adati: “Napo ndicicita bzimwebzi mwakukakamizika inepano ndinabo basi udindo bomwe Mulungu adandipasa bwakucita bzimwebzi.” Mafalaya yakulatiza kuti Paulo akhali wakutsimikiza kupitiriza kucita utumiki bwace napo pa nthawe yomwe akhabva kuti alibe mphanvu.

¹³ Mwa njira ibodzi-bodziyi, lekani kulekerera kuti makumbukidwe yanu yakuperewera yakucitireni cakusankhula. Khalani wakutsimikiza kucita bzinthu bzabwino napo kuti mukufuna lini kucita bzimwebzo. Imwepo mukapitiriza kucita bzinthu bzabwino, na kupita kwa nthawe makumbukidwe yanu yangadzacinje. Kucita pfunziro la pamwekha, kupemba, kumbayenda ku mitsonkhano nthawe zentse na kumbapalizira bzingakuthandizeni kuti mupitirize kutewera Jezu pambuyo pakubatizidwa. Abale na mpfumakazi zanu akawona kuti imwepo mumbapirira pakutumikira Yahova iwo an’dzakhala wakulimba. — 1 Atesalonika 5:11.

“PITIRIZANI KUBZIYEZA”

14. N’ciyani comwe imwepo mun’funika kumbacita nthawe zentse, ndipo thangwe ranyi? (2 Akolinto 13:5)

¹⁴ Pambuyo pakubatizidwa bzingakhale bwino kwene-kwene kumbabziyeza nthawe zentse. (Werengani 2 Akolinto 13:5.) Bzingakhale bwino kwene-kwene kumbawona penu imwepo mumbapemba ntsiku zentse, kuwerenga Bibliya, kuyenda ku mitsonkhano na kupalizira. Gumanani njira za momwe mungagumanire phindu na bzinthu bzimwebzi. Mwa ciratizo, bzibvunzeni kuti: ‘Kodi ningafotokozere wanthu winango mapfunziso yakuyambirira ya m’Bibliya? N’ciyani comwe ningacite kuti upalizi bwangu bumbakhale bwakudekeza? Kodi nimbafotokoza bzomwe nimbafuna m’mipembo yangu? Kodi mipembo yanguyo imbalatiza kuti nimbakhulupira Yahova? Kodi nimbagumanika pa mitsonkhano nthawe zentse? N’ciyani comwe ningacite kuti nimbakhale tceru pa mitsonkhano na kumbapereka mitawiro?’

15-16. Kodi imwepo mwapfunza ciyani na nkhani ya m’bale munango bza momwe mungakundire mayezo?

¹⁵ Mpsakufunikambo kudziwa bvuto lomwe munalo. M’bale munango wakucemeredwa Robert adafotokoza bzomwe bzidamucitikira bzomwe bzidalatiza kuti kucita bzimwebzi n’kwakufunika. Iye adati: “Pomwe inepano ndikhana magole 20 ndikhaphata basa ku mbuto inango. Ntsiku inango mtsikana munango wa ku basa kwangu adandiuza kuti ndiyende naye ku mui kwace. Iye adandiuza kuti tingadakakhala tekha-tekha ndipo ‘tingadapfatsa kwene-kwene.’ Pakuyamba ndidamutawira mwakusaya kubveseseka bwino. Tsono patsogolo pace, ndidamutawira mwakubveka bwino thangwe lomwe ndikhalambira.” Robert adakwanisa kulimbana na mayezoyo ndipo bzimwebzi bzidakhala bzabwino kwene-kwene. Patsogolo pace, iye adakumbukira bzomwe bzikhadacitikabzo  ndipo adazindikira kuti akhafunikira kucita bzinthu mu njira yakusiyana. Iye adalewa kuti: “Ndiribe kulamba mu njira yakukhwimika ayai mwakamfulumize ninga momwe Zuze adacitira na mkazi wa Potifari. (Genesesi 39:7-9) Kulewa cadidi, ndidawona kuti bzidakhala bzakunesa kwene-kwene kulamba. Bzomwe bzidacitikabzo bzidandithandiza kuwona kuti ndikhafunikira kulimbisa uxamwali bwangu na Yahova.”

¹⁶ Imwepo mungagumane phindu mukambabziyeza ninga momwe Robert adacitira. Imwepo mukakwanisa kulimbana na mayezo, bzibvunzeni kuti: ‘Kodi ndamala nthawe zingasi kuti ndilambe?’ Mukazindikira kuti pana bzinthu bzomwe mun’funika kucinja, lekani kusunama. M’mbuto mwace, komedwani thangwe rakuti mwakwanisa kulidziwa bvuto lanu. Muuzeni Yahova bza bvutolo ndipo citani bzinthu bzomwe bzin’dzalimbisa cikhumbo canu cakufuna kumubvera. — Salimo 139:23, 24.

17. Kodi bzomwe bzidacitikira Robert bzidacitisa kuti wanthu aliwone tani dzina la Yahova?

¹⁷ Pana cinthu cinango comwe tingapfunze na Robert. Iye adati: “Pambuyo pa kulamba kuyenda ku mui kwa mwanzangu wa ku basa ule, mwanzanguyo adati: ‘Iwepo wakwanisa kukunda mayezo.’ Ndidamubvunza kuti n’ciyani comwe akhafuna kuthandauza na mafala yamweyale. Iye adalewa kuti xamwali wace munango omwe akhali Mboni ya Yahova adamuuza kuti maswaka yentse ya Mboni za Yahova yambacita bzinthu bzakuipa mwakabise-bise yakakhala yagumana mpata. Ndipopa iye adamuuza xamwali waceyo kuti angadandiyeza kuti akwanise kuwona penu inepano ndikhalimbo tenepo. Inepano ndidakhala wakukondwa kwene-kwene thangwe ndidatumbizisa dzina la Yahova.”

18. N’ciyani comwe imwepo mwatsimikiza kucita pambuyo pakubatizidwa? (Onani kwadru yakuti “ Nkhani Ziwiri Zomwe Mungakomedwe Nazo.”)

¹⁸ Imwepo mukabzipereka kwa Yahova mucibatizidwa mumbalatiza kuti mukufuna kucenesa dzina lace bzinese bzitani. Ndipo imwepo mungakhale na citsimikizo centse cakuti Yahova ambadziwa mabvuto yomwe mukugumana nayo na mayezo yomwe mumbalimbana nayo. Mukapitiriza kucita nyongo yakuti mukhale wakukhulupirika kwa Yahova, iye an’dzakusimbani. Ndipo mwakuphatisa basa mzimu wace wakucena, iye an’dzakupasani mphanvu kuti mukwanise kucita bzimwebzo. (Luka 11:11-13) Na thandizo la Yahova, imwepo mun’dzapitiriza kutewera Jezu pambuyo pakubatizidwa.