NKHANI YAKUPFUNZA 45
Kodi Yahova Ambatithandiza Tani Kucita Basa la Kupalizira?
“Iwo an’dzadziwa kuti pakati pawo pakhana mpolofeta.” — ZAKIYERI 2:5.
NYIMBO 67 ‘Palizira Fala’
BZOMWE TIN’PFUNZA a
1. Kodi n’ciyani comwe cingaticitikire pomwe tikupalizira, ndipo n’ciyani comwe Yahova ambaticitira?
POMWE tikuphata basa la kupalizira, timbadziwa kuti wanthu winango angatinyoze ayai kutitazisa kucita basali. Ndipo bzimwebzi bziniyenda bzicilemweratu kutsogoloku. (Daniyeli 11:44; 2 Timotio 3:12; Apokalipse 16:21) Tsono, ifepano timbadziwa kuti Yahova an’dzatithandiza. Kodi timbadziwa tani bzimwebzi? Timbadziwa bzimwebzi thangwe rakuti nthawe zentse Yahova ambathandiza atumiki wace kucita basa lomwe awapasa, napo acikhala akugumana na mabvuto makulu. Kodi iye ambacita tani bzimwebzi? Mbatiwoneni bzomwe bzidacitikira mpolofeta Zakiyeri pomwe akhapalizira Adjuda omwe akhali akapolo ku Babiloniya.
2. Kodi Zakiyeri akhapalizira wanthu wa moda wanyi, ndipo n’ciyani comwe tin’pfunza mu nkhani ino? (Zakiyeri 2:3-6)
2 Kodi Zakiyeri akhapalizira wanthu wa moda wanyi? Yahova adalewa kuti wanthu omwe Zakiyeri akhapalizira akhali “wantimbo,” “wamakani” na “wakupanduka.” Iwo akhali ninga minga na anyamkalize. Ndipopa Yahova adauza Zakiyeri kazinji-kentse kuti: “Leka kugopa”! (Werengani Zakiyeri 2:3-6.) Zakiyeri adakwanisa kucita basa la kupalizira thangwe (1) akhadatumidwa na Yahova, (2) adapasidwa mphanvu na mzimu wakucena ndipo (3) adathandizidwa na Fala la Mulungu. Kodi bzinthu bzitatubzi bzidathandiza tani Zakiyeri? Ndipo bzingatithandizembo tani ntsiku zino? Mu nkhani ino, tin’tawira mibvunzo imweyi.
ZAKIYERI ADATUMIDWA NA YAHOVA
3. Kodi ni mafala yaponi yomwe yadapasa mphanvu Zakiyeri, ndipo Yahova adalatiza tani kuti angadamuthandiza?
3 Yahova adauza Zakiyeri kuti: “Inepano ndikukutuma.” (Zakiyeri 2:3, 4) Mafala yamweya pabodzi na mzimu wakucena bzidapasa mphanvu Zakiyeri. Thangwe ranyi tikulewa tenepoyo? Tikulewa tenepoyo thangwe rakuti pomwe Zakiyeri adabva mafalaya, iye adakumbukira kuti Yahova akhadalewa kale mafala yakundendemerana na yamweya pomwe adasankhula Mozeji na Zaiya kuti akhale apolofeta wace. (Kufuluka 3:10; Zaiya 6:8) Ndipo Zakiyeri akhadziwambo kuti Yahova adathandiza tani apolofeta awiriwa kukunda mphitca zakusiyana-siyana. Ndipopa, pomwe Yahova adauza Zakiyeri kawiri-kentse kuti: “Inepano ndikukutuma,” iye adadziwiratu kuti Yahovayo angadamuthandiza. Ndipo Zakiyeri adanemba kazinji-kentse kuti: “Fala la Yahova lidafika kwa inepano.” (Zakiyeri 3:16) Mafala yamweya yakuti: “Fala la Yahova lidafika kwa inepano” yambagumanika kazinji-kentse mu bukhu la Zakiyeri. (Zakiyeri 6:1) Bzikuwonekeratu padeca kuti Zakiyeri akhakhulupira na mtima wentse kuti akhadatumidwa na Yahova. Ndipo cinango n’cakuti, Zakiyeri akhali mwana wa wantsembe. Pinango-pentse pai wace adamupfunzisa kuti Yahova adathandiza tani apolofeta wace wakale-kale. Yahova adauza Izaki, Djakobo na Jeremiya kuti: “Inepano ndinawe.” — Ciyambo 26:24; 28:15; Jeremiya 1:8.
4. Kodi ni mafala yaponi yomwe yadapasa mphanvu Zakiyeri?
4 Kodi Ajirayeri angadatetekera mafala yomwe Zakiyeri akhafuna kuwapalizira? Yahova adati: “Ajirayeri an’kakutetekera lini, thangwe iwo an’funa lini kunditetekera.” (Zakiyeri 3:7) Mafala yamweya yadatsimikizira Zakiyeri kuti napo wanthuwo angadalamba, bzikhafuna lini kulewa kuti iye akhakwanisa lini kucita bwino-bwino basa lace la upolofeta. Ajirayeri angadatetekera lini Zakiyeri ndipo kumweku kukhali kulamba kutetekera Yahova. Yahova adauzambo Zakiyeri kuti pa nthawe yomwe iye angadadzakhala akuwalanga, wanthuwo ‘angadadzadziwa kuti pakati pawo pakhana mpolofeta.’ (Zakiyeri 2:5; 33:33) Mafala yamweya yadapasa mphanvu Zakiyeri kuti akwanise kucita basa lace la kupalizira.
IFEPANO TIDATUMIDWA NA YAHOVA
Wanthu angatinyoze na kulamba kutitetekera ninga momwe akhacitira na Zakiyeri, tsono timbadziwa kuti Yahova anafe (Onani ndime 5-6)
5. Thangwe ranyi timbakhala na mphanvu ya kupalizira? (Zaiya 44:8)
5 Ifepanombo timbakhala na mphanvu ya kupalizira thangwe timbadziwa kuti tidatumidwa na Yahova. Iye adatipasa mwayi wakukhala “mboni” zace. (Zaiya 43:10) Umweyu ni mwayi ukulu kwene-kwene! Tawona kuti Yahova adauza Zakiyeri kuti: “Leka kugopa.” Ndipo iye akuuzambo ifepano kuti: “Lekani kugopa.” Thangwe ranyi tin’funika lini kugopa anyamadulanthaka wathu? Thangwe ifepano tidatumidwa na Yahova, ndipo iye an’dzatithandiza ninga momwe adacitira na Zakiyeri. — Werengani Zaiya 44:8.
6. (a) Kodi n’ciyani cikulatiza kuti Yahova an’dzatithandiza pa basa lathu? (b) Kodi n’ciyani cimbatipasa mphanvu?
6 Yahova adalewa kale kuti an’dzatithandiza. Kumbukirani bzomwe iye adalewa pomwe akhanati kulewa mafala yakuti: “Imwepo ndimwe mboni zangu.” Yahova adalewa kuti: “Ukadzapita na m’madzi, ine nin’dzakhala nawe, ndipo ukadzayambuka mikulo, iyo in’dzakumiza lini. Ukadzafamba pa moto, un’dzapsa lini, ne kubvulidwa.” (Zaiya 43:2) Pomwe tikupalizira, nthawe zinango tingagumane na mphitca zomwe ziri ninga madzi na mabvuto yomwe yali ninga moto. Koma Yahova ambatithandiza kuti tipitirize kupalizira. (Zaiya 41:13) Wanthu wa mu nthawe ya Zakiyeri akhabva lini, ndipo bzirimbo tenepoyo ntsiku zino. Tsono, ifepano timbapitiriza basi kupalizira thangwe timbadziwa kuti kulamba kwawo kutetekera bzin’funa lini kulewa kuti tikutazira kucita basa lathu la kupalizira. Timbakomedwa kwene-kwene thangwe ra kudziwa kuti Yahova ambakomedwa akatiwona tikupitiriza kupalizira mafala yace mwakukhulupirika. Mpostolo Paulo adalewa kuti: “Ali-wentse an’dzatambira mabaibai yace mwakubverana na basa lace.” (1 Akolinto 3:8; 4:1, 2) Mpfumakazi ibodzi yomwe yamala magole mazinji ikucita upainiya, idalewa kuti: “Nimbakomedwa kwene-kwene thangwe ra kudziwa kuti Yahova ambatibaira tikacita nyongo.”
ZAKIYERI ADAPASIDWA MPHANVU NA MZIMU WA MULUNGU
Zakiyeri akuwona masomphenya yakulatiza ngolo ya Yahova ya kudzulu. Masomphenyaya yadalimbisa cikhulupiro cace cakuti Yahova angadamuthandiza kucita basa lomwe adamupasa (Onani ndime 7)
7. Kodi masomphenya yomwe Zakiyeri adawona yadamuthandiza tani? (Onani cithunzi-thunzi pa tsamba lakuyamba.)
7 Zakiyeri adakwanisa kuwona kuti mzimu wa Mulungu ngwamphanvu kwene-kwene. Bzomwe Zakiyeri adawona m’masomphenya bzidamuthandiza kudziwa kuti mzimu wa Mulungu ukhathandiza anjo wamphanvu na kufambisa ngolo ya kudzulu. (Zakiyeri 1:20, 21) Kodi n’ciyani comwe Zakiyeri adacita pomwe adawona bzimwebzi? Iye adanemba kuti: “Pomwe ndidawona bzimwebzi ndidatsulimisa msolo wangu.” Bzimwebzi bzikulatiza kuti Zakiyeri akhana mantha kwene-kwene, ndipopa adatsulimisa msolo wace pantsi. (Zakiyeri 1:28) Tsono, pomwe padapita nthawe, Zakiyeri adayamba kukumbukira bzinthu bzakudabwisa bzomwe adawona m’masomphenyayo, ndipo iye adakhulupira kuti mzimu wakucena ungadamuthandiza kucita basa lomwe adapasidwa.
8-9. (a) Kodi n’ciyani cidacitikira Zakiyeri pomwe Yahova adamuuza kuti aime? (b) Kodi n’ciyani cinango comwe Yahova adacita kuti athandize Zakiyeri kupalizira wanthu wakunesa?
8 Yahova adauza Zakiyeri kuti: “Mwana wa munthu, cita kuima kuti ndilalewe nawe.” Mafala yamweya pabodzi na mzimu wakucena bzidapasa mphanvu Zakiyeri kuti aime. Iye adanemba kuti: “Mzimu wa Mulungu udafika pa ine ndipo udandipasa mphanvu kuti ndiime.” (Zakiyeri 2:1, 2) Pomwe Zakiyeri akhacita utumiki bwace, iye akhatsogoleredwa na “boko” la Mulungu, omwe ni mzimu wakucena wa Mulunguyo. (Zakiyeri 3:22; 8:1; 33:22; 37:1; 40:1) Mzimu wa Mulungu udapasa Zakiyeri mphanvu kuti akwanise kupalizira wanthu “wakuuma misolo na wakusaya kubva.” (Zakiyeri 3:7) Yahova adauza Zakiyeri kuti: “Ndacitisa nkhope yako kukhala yakulimba ninga nkhope zawo, ndipo ndacitisambo mkuma wako kukhala wakulimba ninga mikuma yawo. Ndacitisa mkuma wako kukhala ninga diamante, wakulimba ninga mwala. Leka kuwagopa ne kucita mantha na nkhope zawo.” (Zakiyeri 3:8, 9) Pomwe Yahova akhalewa mafalaya, bzikhakhala ninga akuuza Zakiyeri kuti: ‘Leka kubvuma kuti wanthu akugobole m’mabondo. Inepano nin’dzakupasa mphanvu.’
9 Pomwe Yahova adamala kumuuza mafalaya, mzimu wa Mulungu udathandiza Zakiyeri kucita basa la kupalizira. Zakiyeri adanemba kuti: “Boko la Yahova lidandinyamula.” Zakiyeri adamala sumana ibodzi akupfunza na kukumbukira mafala yomwe iye adauzidwa kuti akapalizire wanthuwo na mtima wentse. (Zakiyeri 3:14, 15) Yahova adamuuza kuti ayende mu gowa ayai mu cigwa. Ndipo kumweko “mzimu udapita mwa iye.” (Zakiyeri 3:23, 24) Pa nthawe imweyi, Zakiyeri akhali wakukonzeka kuyamba utumiki bwace.
MZIMU WAKUCENA UMBATIPASA MPHANVU
N’ciyani cidathandiza Zakiyeri, ndipo n’ciyani cingatithandizembo kucita basa la kupalizira? (Onani ndime 10)
10. Kodi n’ciyani cimbatithandiza kucita basa la kupalizira, ndipo thangwe ranyi tikulewa tenepoyo?
10 Kodi n’ciyani cingatithandize kucita basa la kupalizira? Kuti titawire mbvunzo umweyu, mbatikumbukireni bzomwe bzidacitikira mpolofeta Zakiyeri. Pomwe iye akhanati kuyamba basa lace la kupalizira, mzimu wakucena udamupasa mphanvu kuti akwanise kucita basali. Ntsiku zino, mzimu wa Mulungu ndiwo umbatipasambo mphanvu kuti tikwanise kucita basa la kupalizira. Thangwe ranyi tikulewa tenepoyo? Tikulewa tenepoyo thangwe Sathani ali pa nkhondo na ifepano kuti atitazise kucita basa la kupalizira. (Apokalipse 12:17) Wanthu azinji ambakumbuka kuti Sathani ngwamphanvu kwene-kwene ndipo tingakwanise lini kumukunda. Tsono tikambacita basa la kupalizira, ifepano timbakhala tikumukunda! (Apokalipse 12:9-11) Thangwe ranyi? Thangwe tikambapalizira, ifepano timbalatiza kuti timbamugopa lini Sathaniyo. Kodi kuwona kuti tikupitiriza kupalizira napo kuti anyamadulanthaka wathu akuyezera kutitazisa kumbatitsimikizira ciyani? Kumbatitsimikizira kuti mzimu wakucena ukutitsogolera ndipo Yahova akukomedwa nafe. — Mateu 5:10-12; 1 Pedru 4:14.
11. Kodi mzimu wakucena ungatithandize kucita ciyani, ndipo n’ciyani comwe tingacite kuti tiutambire?
11 Kodi n’ciyani comwe ifepano tikupfunza tikambakumbukira bzomwe Mulungu adacita kuti apase mphanvu Zakiyeri? Tikupfunza kuti Mulungu angatipase mphanvu kuti tikwanise kukunda mabvuto yentse yomwe tingagumane nayo mu utumiki. (2 Akolinto 4:7-9) Tsono n’ciyani comwe tingacite kuti tipitirize kutambira mzimu wa Mulungu? Ifepano tin’funika kupitiriza kupemba kwa Yahova na kukhulupirambo na mtima wentse kuti an’dzabva mipembo yathu. Jezu adapfunzisa anyakupfunza wace kuti: “Pitirizani kukumbira, . . . pitirizani kunyang’ana, ndipo . . . pitirizani kugogodza.” Ndipo iye adalewa kuti Yahova “an’dzapereka mzimu wakucena kwa wale omwe ambamukumbira.” — Luka 11:9, 13; Mabasa 1:14; 2:4.
ZAKIYERI ADATHANDIZIDWA NA MAFALA YA MULUNGU
12. Kodi tsamba lomwe Zakiyeri adawona lidacokera kuponi, ndipo likhadanembedwa ciyani? (Zakiyeri 2:9–3:3)
12 Cinthu cinango comwe cidathandiza mpolofeta Zakiyeri ni mafala ya Mulungu. Zakiyeri adawona m’masomphenya boko lomwe likhadaphata tsamba. (Werengani Zakiyeri 2:9–3:3.) Kodi tsamba limweri lidacokera kuponi? Kodi likhadanembedwa ciyani? Kodi tsambali lidalimbikisa tani Zakiyeri? Mbatipfunzeni bzimwebzi. Tsamba lire lidacokera ku mpando wa umambo wa Mulungu. Bzikuwoneka kuti Yahova adaphatisa basa anjo m’bodzi wa mu gulu la anjo anai omwe Zakiyeri adawawona kuti amupase tsambali. (Zakiyeri 1:8; 10:7, 20) Mu tsambali mukhana mafala ya Mulungu. Ndipo mafalayo yakhalewa bza cirango comwe Yahova angadapereka kwa Adjuda wakupanduka omwe akhali ku ukapolo. (Zakiyeri 2:7) Mafalaya yakhadanembedwa ku mbali zentse za tsambalo.
13. Kodi n’ciyani comwe Yahova adauza Zakiyeri kuti acite na tsamba lomwe adapasidwa, ndipo thangwe ranyi tsambalo likhatapira?
13 Yahova adauza mpolofeta Zakiyeri kuti adye tsamba lire “acikhuta.” Zakiyeri adacita bzomwe adauzidwabzo; iye adadya tsambalo. Kodi bzimwebzi bzikhafuna kulewanyi? Bzimwebzi bzikhafuna kulewa kuti Zakiyeri akhafunika kubvesesa bwino mafalayo. Ndipo akhafunika kuyakhulupira kuti akwanise kukauza Adjuda. Tsono pomwe adalidya, padacitika cinthu cakudabwisa. Zakiyeri adabva kuti tsambalo “likhatapira ninga uci.” (Zakiyeri 3:3) Thangwe ranyi? Ni thangwe rakuti kwa Zakiyeri, ukhali mwayi ukulu kwene-kwene kukalalewa mu dzina la Yahova, ndipo bzimwebzi bzikhali bzakudekeza ninga kutapira kwa uci. (Salimo 19:8-11) Iye adatenda kwene-kwene Yahova thangwe ra kumusankhula kuti akhale mpolofeta wace.
14. Kodi n’ciyani cidathandiza Zakiyeri kukhala wakukonzeka kucita basa lomwe adapasidwa?
14 Pomwe padapita nthawe, Yahova adauza Zakiyeri kuti: “Tetekera ucibvesesa bwino mafala yomwe nin’funa kukuuza.” (Zakiyeri 3:10) Bzomwe Yahova adalewabzi bzikhathandauza kuti Zakiyeri akhafunika kubvesesa bwino mafala yomwe yakhadanembedwa pa tsamba lire na kuyakumbukira mwakamderekho. Kucita bzimwebzi kudalimbisa cikhulupiro ca Zakiyeri. Ndipo iye adakwanisambo kubvesesa mafala yamphanvu yomwe akhafunika kukauza Adjuda. (Zakiyeri 3:11) Zakiyeri adakhala wakukonzeka kucita basa lomwe adapasidwa thangwe akhadabvesesa bwino mafalayo. — Ndendemezerani na Salimo 19:14.
MAFALA YA MULUNGU YAMBATITHANDIZA
15. Kodi n’ciyani comwe tin’funika kucita kuti tipitirize kupalizira?
15 Kuti tipitirize kucita utumiki bwathu, ifepanombo tin’funika kubvuma kuti mafala ya Mulungu yatithandize. Tin’funika “kumbabvesesa” bwino mafala yentse yomwe Yahova ambatiuza ntsiku zino. Yahova ambalalewa nafe mwakuphatisa basa Fala lace, Bibliya. Kodi tingacite tani kuti Fala la Mulungu litithandize kucinja nzeru zathu na bzicito bzathu?
16. Kodi n’ciyani comwe tin’funika kucita na Fala la Mulungu, ndipo n’ciyani comwe tingacite kuti timbalibvesese?
16 Tikamala kudya, ifepano timbaderekha mbuto ibodzi kuti cakudyaco ciphate bwino basa m’thupi mwathu. Mpsibodzi-bodzimbo na kuwerenga Bibliya. Tikamala kuwerenga Bibliya, ticikhala na nthawe yakukumbukira bzomwe tawerengabzo, cikhulupiro cathu cimbalimba. Kumbukirani kuti Zakiyeri adadya tsamba lomwe adapasidwa. Ndipo mpsimwebzi bzomwe Yahova akufuna kuti ifepano ticite. Iye akufuna kuti ifepano “tikhute” Fala lace. Bzomwe bzin’funa kulewa kuti tin’funika kulibvesesa bwino. Kuti bzimwebzi bzikwanisike, tin’funika kumbapemba, kuwerenga na kukumbukira bzomwe tawerengabzo. Cakuyamba, tin’funika kumbapemba kuti Yahova akonzekerese mtima wathu kuti tikwanise kubvesesa nzeru zace. Caciwiri, tiwerenge mbali ya m’Bibliya yomwe tin’funa. Ndipo cacitatu, tin’funika kumbaima kuti tikumbukire bzomwe tawerengabzo. Kodi n’ciyani cin’dzacitika tikacita bzimwebzi? Tin’dzabvesesa bwino Fala la Mulungu ndipo tin’dzakhala na cikhulupiro cakulimba.
17. Thangwe ranyi tin’funika kumbakumbukira mwakamderekho bzomwe tawerenga m’Bibliya?
17 Thangwe ranyi mpsakufunika kumbawerenga Bibliya na kumbakumbukira bzomwe tawerengabzo? Thangwe ndakuti kucita bzimwebzi kumbatithandiza kupitiriza kupalizira mafala ya Mulungu na kutikonzekeresambo kuti tidzakwanise kudziwisa wanthu cirango comwe Mulungu an’dzapereka kwa wanthu wakuipa kutsogoloku. Ndipo cinango n’cakuti, tikambawona makhalidwe yabwino yomwe Yahova anayo, uxamwali bwathu na iye bumbalimba kwene-kwene. Ndipo bzimwebzi bzimbacitisa kuti tikhale na mpfatso caiwo. — Salimo 119:103.
IFEPANO TIN’PITIRIZA KUPALIZIRA
18. Kodi n’ciyani comwe wanthu omwe timbawapalizira an’dzadziwa ntsiku ya Yahova ikadzafika, ndipo n’thangwe ranyi?
18 Zakiyeri akhali mpolofeta; tsono ifepano ndife lini apolofeta. Napo bziri tenepo, tikufunisisa kupitiriza kupalizira mafala ya Yahova yomwe yali m’Bibliya mpaka pa nthawe yomwe iye an’dzalewa kuti bzakwana. Ndipo ntsiku ya Yahova ikadzafika, wanthu omwe timbawapalizira an’dzalewa lini kuti Mulungu alibe kuwacenjeza. (Zakiyeri 3:19; 18:23) Koma iwo an’dzadziwa kuti ifepano tikhapalizira mafala yakucokera kwa Mulungu.
19. Kodi n’ciyani cimbatipasa mphanvu kuti tipitirize kupalizira?
19 N’ciyani cin’dzatipasa mphanvu kuti tipitirize kupalizira? Ni bzinthu bzitatu bzomwe bzidapasa mphanvu Zakiyeri. Ifepano timbapitiriza kupalizira thangwe timbadziwa kuti tidatumidwa na Yahova, timbapasidwa mphanvu na mzimu wakucena wa Mulungu ndipo Fala lace limbatithandiza. Ifepano tin’pitiriza kucita basa la kupalizira “mpaka kuphampha” thangwe timbathandizidwa na Yahova. — Mateu 24:13.
NYIMBO 65 Tipitirize Kuyenda Patsogolo!
a Mu nkhani ino, tin’pfunza bzinthu bzitatu bzomwe Yahova adacita kuti athandize mpolofeta Zakiyeri kucita basa lace la kupalizira. Kucita bzimwebzi kunilimbisa cikhulupiro cathu cakuti Yahova an’dzatithandizambo kucita basa lathu la kupalizira.