NKHANI YAKUPFUNZA 47
Lekani Kubvuma Kuti Cinthu Ciri-centse Cikulekaniseni na Yahova
“Ine nimbakhulupira imwe, Yahova.” — SALIMO 31:14.
NYIMBO 122 Khalani Wakulimba na Wakukhazikika!
BZOMWE TIN’PFUNZA a
1. Kodi timbadziwa tani kuti Yahova ambafuna kuti tikhale axamwali wace?
YAHOVA ambafuna kuti tikhale axamwali wace. (Tiyago 4:8) Iye ambafuna kukhala Mulungu wathu, Baba wathu na Xamwali wathu. Iye ambatawira mipembo yathu ndipo ambatithandiza tikakhala tikugumana na mabvuto. Ndipo iye ambaphatisambo basa gulu lace kuti atipfunzise na kutikhotcerera. Tsono n’ciyani comwe tin’funika kucita kuti tilimbise uxamwali bwathu na Yahova?
2. Kodi tingacite ciyani kuti tikhale axamwali wa Mulungu?
2 Kuti tikhale axamwali wa Yahova, tin’funika kumbapemba kwa iye, kumbawerenga Fala lace na kumbakumbukira bzomwe tawerengabzo. Tikacita bzimwebzi, ifepano tin’dzamufuna kwene-kwene Yahova na kumbamutenda. Ndipo tin’dzamubvera, thangwe iye ngwakuthemera kucitiridwa bzimwebzi. (Apokalipse 4:11) Tikamudziwa bwino Yahova, tin’dzamukhulupira na kukhulupirambo gulu lace lomwe iye adalikhazikisa kuti litithandize.
3. Kodi n’ciyani comwe Sathani ambacita kuti atilekanise na Yahova, ndipo n’ciyani cingatithandize kupitiriza kukhala wakukhulupirika kwa Mulungu wathu na gulu lace? (Salimo 31:13, 14)
3 Sathani ambafuna kutilekanisa na Yahova ndipo iye ambadziwa kuti mpsakupusa pomwe tikugumana na mabvuto. Kodi iye ambacita tani? Iye ambaticitisa kuti pang’ono na pang’ono tisiye kukhulupira Yahova na gulu lace. Tsono ifepano tingakwanise kubzikhotcerera. Kuti tibzikhotcerere, tin’funika kulimbisa cikhulupiro cathu kwa Yahova. Tikacita bzimwebzi, tin’dzapitiriza kukhala wakukhulupirika kwa Mulungu wathu na kukhulupirambo gulu lace. — Werengani Salimo 31:13, 14.
4. Kodi n’ciyani comwe tin’pfunza mu nkhani ino?
4 Mu nkhani ino, tiniwona mabvuto matatu yomwe tingagumane nayo mu dziko la Sathaniri. Mabvuto yamweya yangatitazise kukhala wakukhulupirika kwa Yahova na gulu lace. Kodi iyo yangatitazise tani? Ndipo n’ciyani comwe tingacite kuti Sathani aleke kutikunda?
TIKAKHALA TIKUGUMANA NA MABVUTO
5. Kodi mabvuto yomwe timbagumana nayo yangatitazise tani kukhulupira Yahova na gulu lace?
5 Nthawe zinango, ifepano timbagumana na mabvuto, ninga kunyozedwa na adzinza wathu ayai kucosedwa basa. Kodi mabvuto yamweya yangatitazise tani kukhulupira Yahova na gulu lace? Yangatitazise thangwe tikamala nthawe ikulu tikugumana na mabvuto, tingasaye bzakucita ndipo tingagoboke m’mabondo. Ndipo Sathani akawona bzimwebzi ambafuna kuticitisa kukumbuka kuti Yahova aleka kutifuna. Iye ambafuna kuti ifepano tikumbuke kuti ni Yahova ayai ni gulu lace lomwe likucitisa kuti ifepano tibonere. Bzinthu ninga bzimwebzi bzidacitikirambo Ajirayeri pomwe akhali ku Edjipito. Pomwe Mozeji na Aroni adalalewa nawo, Ajirayeriwo adakhulupira kuti iwo akhadatumidwa na Yahova kuti awacose ku ukapolo. (Kufuluka 4:29-31) Tsono pomwe Farawo adayamba kuwaboneresa, iwo adayamba kukalipira Mozeji na Aroni acimbalewa kuti ndiwo acitisa kuti iwo abonere. Iwo akhalewa kuti: “Imwepo mwacitisa kuti Farawo na atumiki wace aipidwe nafe kwene-kwene ndipo imwepo mwawapasa xipada kuti atiphe.” (Kufuluka 5:19-21) Ajirayeriwo akhanyoza atumiki wakukhulupirika wa Mulungu. Penu mwamala magole mazinji mukubonera na mabvuto, n’ciyani cingakuthandizeni kupitiriza kukhulupira Yahova na gulu lace?
6. Kodi tikupfunza ciyani na bzomwe Habakuki adacita pomwe adagumana na mabvuto? (Habakuki 3:17-19)
6 Muuzeni Yahova bzomwe bzikukucitisani thupo mu mpembo, ndipo mukumbireni thandizo. Mpolofeta Habakuki adagumana na mabvuto mazinji. Pa nthawe inango, iye adabzibvunza penu Yahova akhacitadi naye thupo. Ndipopa iye adauza Yahova bzentse bzomwe bzikhamucitisa thupo. Iye adati: “Imwe Yahova, mpaka lini nin’dzakulirirani kuti mundithandize koma imwe ne kundibva? . . . Thangwe ranyi mumbalekerera wanthu kubonera?” (Habakuki 1:2, 3) Yahova adatawira mpembo wa mtumiki wace wakukhulupirikayu. (Habakuki 2:2, 3) Habakuki adakumbukira kuti Yahova ambathandiza tani atumiki wace. Pomwe adamala kucita bzimwebzi, iye adakhala pomwe wakukondwa. Iye adadziwa kuti Yahova ambacita naye thupo ndipo angadamuthandiza kupirira mabvuto yentse yomwe akhagumana nayo. (Werengani Habakuki 3:17-19.) Kodi tikupfunza ciyani na nkhani imweyi? Tikupfunza kuti tikagumana na mabvuto, tin’funika kupemba kwa Yahova ticimuuza momwe tikubvera. Tikamala, tiwone kuti iye an’tithandiza tani. Tikacita bzimwebzi, Yahova an’dzatipasa mphanvu zomwe tikufunikira kuti tikwanise kupirira. Ndipo tikawona kuti Yahova akutithandiza, cikhulupiro cathu cin’dzalimba kwene-kwene.
7. Kodi n’ciyani comwe mano wace wa Shirley adalewa, ndipo n’ciyani comwe mpfumakaziyi idacita kuti ipitirize kukhulupira Yahova?
7 Pitirizani kulimbisa uxamwali bwanu na Yahova. Bzimwebzi ndibzo bzomwe mpfumakazi Shirley, yomwe imbakhala ku Papua Nova Guiné, ikhacita. b Banja la mpfumakaziyi likhali lakusauka. Ndipo pa nthawe inango mpfumakaziyi ikhaneseka kugumana cakudya. Mano wace adayezera kumucitisa kusiya kukhulupira Yahova. Iye adati: “Imwepo mumbalewa kuti Mulungu ambakuthandizani, kodi iye akukuthandizani apa? Onani! Pa mui panu pano kusauka kuli tolo. Imwepo mumbandomala nthawe yanu kuyenda kukapalizira!” Mpfumakazi Shirley idalewa kuti: “Pa nthawe imweyire ndidabzibvunza kuti: ‘Kodi Mulungu ambatithandizadi ifepano?’ Pomwe ndidakhala na nzeru zimwezi, ndidapemba kwa Yahova ndicimuuza bzentse bzomwe bzikhandicitisa thupo. Ndidapitiriza kumbawerenga Bibliya na mabukhu yathu na kupitirizambo kupalizira na kumbayenda ku mitsonkhano.” Mpfumakaziyi idayamba kuwona kuti Yahova akhathandiza banja lace. Iwo akhagona lini nayo, ndipo akhali wakukondwa. Mpfumakazi Shirley idalewa kuti: “Ndidawona kuti Yahova akhatawira mipembo yangu.” (1 Timotio 6:6-8) Mukapitiriza kutumikira Yahova napo kuti mukugumana na mabvuto, mun’dzabvuma lini kuti mabvutoyo ayai cinthu ciri-centse cikulekaniseni na Yahova.
ABALE OMWE AKUTSOGOLERA AKACITIRIDWA BZINTHU BZAKUIPA
8. Kodi n’ciyani comwe anyamadulanthaka wathu ambacitira abale omwe akutsogolera mu gulu la Yahova?
8 Anyamadulanthaka wathu ambaphatisa basa radio, televisão na interneti kuti anamizire abale omwe akutsogolera mu gulu la Yahova. (Salimo 31:13) Abale winango ambamangidwa acinamiziridwa kuti mbakambowa. Akristau wakuyambirira adagumanambo na bvuto libodzi-bodziri pomwe mpostolo Paulo adanamiziridwa acimangidwa. Kodi iwo adacita ciyani?
9. Kodi n’ciyani comwe Akristau winango adacita pomwe Paulo adamangidwa?
9 Akristau wakuyambirira winango adasiya kuthandiza Paulo pomwe iye akhali m’kawoko ku Roma. (2 Timotio 1:8, 15) Thangwe ranyi? Kodi iwo akhacita manyazi thangwe wanthu winango akhawona Paulo ninga kambowa? (2 Timotio 2:8, 9) Ayai, kodi iwo akhagopa kuti akamuthandiza, iwo angayambembo kuzunzidwa? Tingasaye kudziwa. Tsono, kodi mukukumbuka kuti Paulo adabva tani na bzimwebzi? Iye akhadapirira kale mabvuto yakusiyana-siyana na kuikha moyo wace pa ngozi kuti awathandize. (Mabasa 20:18-21; 2 Akolinto 1:8) Ifepano tin’funika lini kukhala ninga Akristau amwewale, omwe alibe kuthandiza Paulo pa nthawe yomwe akhafunikira thandizo! Tsono n’ciyani comwe tin’funika kukumbukira tikawona kuti abale omwe akutsogolera mu gulu la Yahova akuzunzidwa?
10. Kodi n’ciyani comwe tin’funika kukumbukira tikambawona abale omwe akutsogolera akuzunzidwa?
10 Kumbukirani kuti mbani ambacitisa kuti tizunzidwe na thangwe lomwe limbacitisa kuti tizunzidwe. Pa 2 Timotio 3:12 pambalewa kuti: “Wentse omwe an’funa kukhala na moyo wakubzipereka kwa Mulungu mwakubverana na Kristu Jezu, an’dzagumanambo na mabvuto.” Ndipopa tin’funika lini kudabwa tikawona Sathani akuzunza abale omwe akutsogolera mu gulu la Yahova. Bzomwe iye ambafuna mpsakuti abale amwewa asiye kukhala wakukhulupirika kuti ifepano tigoboke m’mabondo. — 1 Pedru 5:8.
Oneziforo adakhwimika aciyenda kukathandiza Paulo pomwe akhali m’kawoko. Ntsiku zinombo, abale ambathandiza anzawo omwe aikhidwa m’kawoko, ninga momwe cikulatizira cithunzi-thunzi cakuyezezeraci (Onani ndime 11-12)
11. Kodi tikupfunza ciyani na bzomwe Oneziforo adacita? (2 Timotio 1:16-18)
11 Pitirizani kuthandiza abale wanu ndipo pitirizani kukhala wakukhulupirika kwa iwo. (Werengani 2 Timotio 1:16-18.) Mkristau m’bodzi wakucemeredwa Oneziforo alibe kutewezera bzomwe Akristau wale adacita pomwe Paulo adaikhidwa m’kawoko. “Iye alibe kucita manyazi thangwe ra kumangidwa kwa [Paulo].” Koma adayenda kukanyang’ana Paulo. Ndipo pomwe adamugumana, adanyang’ana manera kuti amuthandize. Bzomwe Oneziforo adacita bzidaikha moyo wace pa ngozi. Kodi tikupfunza ciyani na nkhani imweyi? Tikupfunza kuti tin’funika lini kugopa kuthandiza abale wathu akakhala akuzunzidwa, koma tin’funika kumbawakhotcerera na kuwathandiza. (Mimwani 17:17) Iwo akufunikira lufoyi na thandizo lathu.
12. Kodi tikupfunza ciyani na bzomwe abale na mpfumakazi zathu wa ku Rússia ambacita?
12 Kumbukirani bzomwe abale na mpfumakazi zathu ku Rússia akucita kuti athandize abale wawo omwe ali m’kawoko. Abale na mpfumakazi akakhala akutongedwa mirandu mu nyumba ya mphala, iwo ambayendambo kumweko kuti akawathandize. Kodi tikupfunza ciyani na nkhani imweyi? Tikupfunza kuti abale omwe akutsogolera gulu lathu akambanyozedwa, kumangidwa ayai kuzunzidwa, tin’funika lini kukhala na mantha. Koma tin’funika kumbawapempherera, kuthandiza mabanja yawo na kunyang’anambo manera kuti tiwathandize. — Mabasa 12:5; 2 Akolinto 1:10, 11.
TIKAMBASEKEDWA
13. Kodi wanthu ambacita ciyani kuti atitazise kukhala wakukhulupirika kwa Yahova na gulu lace?
13 Adzinza wathu omwe ni Mboni lini, anzathu wa ku basa ayai wa ku xikola angatiseke thangwe ra kupalizira na kuteweza mitemo ya Yahova. (1 Pedru 4:4) Pinango iwo angalewe kuti: “Iwepo ndiwe munthu wabwino, so gereja yanuyi idanesa kwene-kwene.” Ndipo wanthu winango angatilewe kuti ndife wanthu wakuipa thangwe timbacita lini tsantsa na wanthu wakucosedwa. Iwo angalewe kuti: “Imwepo mumbati mumbafunana, tsono kufunanako n’kumweku apa?” Mafala ninga yamweya yangaticitise kuyamba kuwona ninga kuti mitemo ya Yahova iri lini bwino-bwinoletu. Ndipo pinango tingayambe kubzibvunza kuti: ‘Kodi Yahova akufunadi kuti inepano ndicite bzimwebzi? Kodi bzomwe gulu laceri likucita mpsabwinodi?’ Kodi n’ciyani comwe imwepo mungacite kuti mupitirize kukhala wakukhulupirika kwa Yahova na gulu lace wanthu akambakuuzani bzimwebzi?
Djobi alibe kutetekera bzinthu bzakunama bzomwe axamwali wace adalewa. Koma adapitiriza kukhala wakukhulupirika kwa Yahova (Onani ndime 14)
14. Kodi n’ciyani comwe tin’funika kucita wanthu akambatiseka thangwe ra kuteweza mitemo ya Yahova? (Salimo 119:50-52)
14 Pitirizani kucita bzomwe mpsabwino kwa Yahova. Djobi adapitiriza kuteweza mitemo ya Yahova napo kuti wanthu winango akhamuseka. Xamwali wace m’bodzi adayezera kucitisa Djobi kukumbuka kuti Mulungu akhalibe basa na bzomwe iye akhacita, ndipo kuteweza mitemo ya Yahova kukhalibe na basalo. (Djobi 4:17, 18; 22:3) Tsono Djobi alibe kumutetekera. Iye akhadziwa kuti mitemo ya Yahova njakulungama ndipo akhafunisisa kuiteweza. Iye alibe kubvuma kuti wanthu winango amutazise kukhala wakukhulupirika. (Djobi 27:5, 6) Kodi tikupfunza ciyani na nkhani imweyi? Tikupfunza kuti tin’funika lini kubvuma kuti wanthu omwe akutiseka aticitise kuyamba kunyozera mitemo ya Yahova. Tin’funika kukumbukira phindu lomwe takhala nalo thangwe ra kuteweza mitemo ya Yahova. Ndipo pinango tingakumbukire moyo wabwino omwe tinawo thangwe ra kuteweza mitemo ya Yahova. Pitirizani kuthandizira gulu la Yahova lomwe limbapfunzisa wanthu mitemo imweyi. Mukacita bzimwebzi, wanthu an’dzakwanisa lini kukulekanisani na Yahova. — Werengani Salimo 119:50-52.
15. Thangwe ranyi mpfumakazi Brizit ikhanyozedwa?
15 Onani bzomwe bzidacitikira mpfumakazi Brizit, yomwe imbakhala ku Índia. Iyo ikhambanyozedwa na adzinza wace thangwe ra kukhala Mboni ya Yahova. Pomwe idandoti batizidweni mu 1997, bayace, omwe akhali lini Mboni ya Yahova, adacosedwa basa. Ndipopa, mwamunayo adatenga Brizit na wana wawo aciyenda kukakhala na abereki wace omwe akhakhala mu mzinda unango. Ndipo Brizit adagumana na bvuto likulu. Pakuti bayace akhaphata lini basa, iye ndiye akhafunika kuphata basa kuti adyese banja lawo. Ndipo cinango n’cakuti, Nyumba ya Umambo ikhali kutali kwene-kwene na komwe akhakhalako, makilometro 350. Tsono famidya ya bayace ikhamunyoza thangwe ra kukhala Mboni ya Yahova. Bzinthu bzidafika pakuipa kwene-kwene mwakuti Brizit na bayace adafuluka pomwe. Ndipo mwakusaya kudikhiririka, bayace ule adadzasaika. Ndipo mwana wace wacikazi adadzasaikambo thangwe ra kuduwala matenda ya kankro. Iye adasaika na magole 12 yokha. Kuti bzinthu bziipiretu basi, adzinza wace akhamupasa mulandu thangwe ra kufa kwa wentsenewa. Iwo akhalewa kuti iwo afa thangwe rakuti iye ni Mboni ya Yahova. Ndipo angadasaya kukhala Mboni bzentsenebzi bzingadacitika lini. Napo bzikhali tenepo, mpfumakaziyi idapitiriza kukhulupira Yahova na gulu lace.
16. Kodi mpfumakazi Brizit idasimbidwa tani thangwe ra kupitiriza kukhala wakukhulupirika kwa Yahova na gulu lace?
16 Pakuti mpfumakazi Brizit ikhakhala kutali kwene-kwene na gwere, nyakunyang’anira dera adaiuza kuti imbapalizire komwe ikhakhalako na kumbacitisa mitsonkhano ya gwere pa mui pace. Pakuyamba, iyo idacita thupo kwene-kwene. Tsono idateweza malangoyo. Iyo ikhambapalizira na kucita mitsonkhano ndipo ikhambacitambo kunamata kwa pa banja na wana wace wacikazi. Kodi n’ciyani cidadzacitika? Mpfumakazi Brizit idadzakhala na mapfunziro mazinji kwene-kwene, ndipo azinji adabatizidwa. Mu 2005, iye adayamba kucita upainiya bwakukhazikika. Mpfumakaziyi idasimbidwa thangwe ra kupitiriza kukhala wakukhulupirika kwa Yahova na gulu lace. Wana wace akutumikira Yahova mwakukhulupirika, ndipo mu mzinda omwe iwo ambakhala muna magwere mawiri! Mpfumakazi Brizit imbakhulupira na mtima wentse kuti Yahova ndiye adaithandiza kupirira pomwe ikhanyozedwa na adzinza wace na kugumana na mabvuto yakusiyana-siyana.
PITIRIZANI KUKHALA WAKUKHULUPIRIKA KWA YAHOVA NA GULU LACE
17. Kodi n’ciyani comwe tin’funika kupitiriza kucita?
17 Sathani ambafuna kuti tikhulupire kuti tikakhala tikugumana na mabvuto Yahova ambatilekerera. Ndipo ambafunambo kuti tikhulupire kuti kuthandizira gulu la Yahova kumbandocitisa kuti moyo wathu ukhale wakunesa. Iye ambafuna kuti ifepano timbabve mantha tikawona abale omwe ana udindo akunyozedwa, akuzunzidwa ayai kuikhidwa m’kawoko. Ndipo iye ambaphatisambo basa wanthu wakunyoza kuti atitazise kubvera mitemo yakulungama ya Yahova na kuleka kukhulupira gulu lace. Tsono, ifepano tikudziwa kale bzimwebzi ndipo tidacenjera kale. (2 Akolinto 2:11) Bwerani tipitirize kugaza bzinthu bzakunama bzomwe Sathani ambalewa, ndipo bwerani tipitirize kukhala wakukhulupirika kwa Yahova na gulu lace. Kumbukirani kuti Yahova an’dzatisiya lini. (Salimo 28:7) Ndipo lekani kubvuma kuti cinthu ciri-centse cikulekaniseni na Yahova! — Aroma 8:35-39.
18. Kodi n’ciyani comwe tin’dzapfunza mu nkhani ikubwerayi?
18 Mu nkhani ino, tawona kuti ifepano timbagumana na mabvuto yomwe yambacokera mu dziko la Sathaniri. Tsono kukhulupirika kwathu kwa Yahova na gulu lace kungayezedwembo na mabvuto yomwe tingagumane nayo mkati mwa gwere. Kodi n’ciyani comwe tingacite kuti tikwanise kukunda mabvuto yamweya? Tin’dzapfunza bzimwebzi mu nkhani ikubwerayi.
NYIMBO 118 ‘Tithumizireni Cikhulupiro’
a Kuti tipitirize kukhala wakukhulupirika mu ntsiku zakumalizira zino, tin’funika kuthemba Yahova na gulu lace. Sathani ambafuna kutitazisa kukhala wakukhulupirika kwa Yahova. Mu nkhani ino, tin’pfunza bzinthu bzitatu bzomwe Sathani ambaphatisa basa kuti atigwese, ndipo tiniwonambo bzomwe tingacite kuti tipitirize kukhala wakukhulupirika.
b Madzina yanango yacinjidwa.