IMWEPO mungadayenda kukazungira ntsuwa yakucemeredwa Sangir Besar ku Indonésia magole ya m’mbuyomu mungadawona mpfumakazi zathu zitatu ku praya. Izo zimbadziwika kwene-kwene pa ntsuwa imweyire thangwe ra basa lakupfunzisa wanthu Bibliya. Koma nthawe imweyo, izo zikhacita bzinthu bzakusiyana.

Cakutoma, izo zikhapita m’madzi zicicosa minyala m’praya. Minyala minango ikhali mikulu kwene-kwene ninga mabola. Ndipo patsogolo pace azikaziwo akhambakhala m’tumabankho acimbaswa minyalayo na martelo kuti ikhale ming’ono-ming’ono ninga mazai ya nkhuku. Ndipo iwo akhambaikha minyalayo m’mabardi acimbanyamula kuyenda nayo ku mui kwawo. Patsogolo pace, akhambaiyikha m’masakha makulu-makulu acikapakiza m’makaro ndipo minyalayo ikhaphatisidwa basa pa kukonzera misewu.

M’bodzi wa mpfumakazizi akhali Hulda. Bzinthu pa moyo wace bzidacitisa kuti iye akhale na nthawe izinji ya kuphata basa limweri. Iye angadaphatisa basa kobiriyo kuti agulire wadzinza wace bzinthu bzakufunika pa moyo wawo. Tsono iye akhaphata basalo na cakulinga cinango. Iye akhafuna kugula tableti kuti aphatise basa JW Library^®. Hulda akhadziwa kuti mavidiyo na bzinthu bzinango bza mu aplikativoyi bzingadamuthandiza mu upalizi na kuti abvesese Bibliya.

Hulda akhaphata basa maora mawiri macibese yali-yentse kwa mwezi ubodzi na meya, ndipo minyala yomwe adaswayo idadzaza karo ya ngolo ing’ono. Ndipo adakhala na kobiri yakuti agulire tableti.

Hulda adalewa kuti: “Napo kuti basa lakuswa minyala lidandinetesa kwene-kwene, mwakamfulumize ndidayebwa bzentsenebzo pomwe ndikhaphatisa basa tableti mu upalizi na kukonzekera mitsonkhano.” Ndipo mpfumakaziyo idalewambo kuti tabletiyo idamuthandizambo pa nthawe ya COVID-19 thangwe mitsonkhano na basa la kupalizira bzikhacitikira pa Vidiyokonferensiya. Ifepano tikukomedwa kwene-kwene thangwe mpfumakazi Hulda adakwanisa cakulinga cace.