1. Kodi ni mafala yaponi yomwe mpolofeta Zaiya adauza Ajirayeri?

 MPOLOFETA Zaiya adauza Ajirayeri kuti Yahova ni “Mulungu wacadidi.” Fala lomwe lidasanduliziridwa kuti “cadidi” limbathandauza “ameni.” (Zaiya 65:16) Fala lakuti “ameni” limbathandauza “bzikhale tenepo,” ayai “bziri bwino.” Fala lakuti “ameni” likaphatisidwa basa m’Bibliya pakulewa bza Yahova ayai Jezu, limbafuna kutsimikizira kuti bzomwe bzalewedwabzo mpsacadidi. Ndipopa, mafala yomwe Zaiya adalewaya yakhali yacadidi. Bzomwe Yahova ambalewa nthawe zentse bzimbakhala mpsacadidi. Yahova adalatiza bzimwebzi mwa kukwanirisa mapiciro yace yentse.

2. Thangwe ranyi tingakhulupire kuti mapiciro ya Yahova yakulewa bza kutsogolo yan’dzakwanisika, ndipo tin’cezerana mibvunzo iponi mu nkhani ino?

² Kodi tingakhalembo na cikhulupiro cibodzi-bodzici pa mapiciro ya Yahova yakulewa bza kutsogolo? Pafupi-fupi magole 800 kucokera mu nthawe ya Zaiya, mpostolo Paulo adafotokoza kuti thangwe ranyi mapiciro ya Mulungu nthawe zentse yambakwanisika. Paulo adalewa kuti: “Iye anganame lini.” (Ahebereu 6:18) Ninga momwe mcera ungakhale lini na madzi ya munyu na madzi yakusaya munyu pa nthawe ibodzi-bodziyo, mpsibodzi-bodzimbo na Yahova omwe ni Mulungu wacadidi, iye anganame lini. Ndipopa, tin’funika kukhulupira cinthu ciri-centse comwe Yahova ambalewa kuphatanidzambo mapiciro ya bzinthu bzomwe iye an’dzacita kutsogolo. Mu nkhani ino, tin’cezerana mibvunzo iyi: N’ciyani comwe Yahova adapicira kuti an’dzaticitira kutsogolo? Ndipo thangwe ranyi timbakhulupira kuti iye an’dzacita bzomwe adalewa?

3. (a) Kodi ni piciro liponi lomwe atumiki wa Yahova ambakomedwa nalo kwene-kwene? (Apokalipse 21:3, 4) (b) Kodi wanthu winango ambalewa ciyani tikawauza bza piciro limweri?

³ Piciro lomwe tin’funa kucezeranali ni piciro lomwe atumiki wa Yahova wa pa dziko lentse la pantsi ambakomedwa nalo kwene-kwene. (Werengani Apokalipse 21:3, 4.) Yahova adapicira kuti “infa in’dzawoneka lini pomwe, pan’dzawoneka lini pomwe kusunama, kulira ne kuwawidwa.” Azinji wa ifepano timbaphatisa basa mafala ya mu cinemboci tikakhala tikupalizira wanthu bza Paraizo yomwe in’dzabwera kutsogoloku. Kodi wanthu winango ambalewa ciyani tikawauza mafala yamweya? Winango ambalewa kuti: “Bzimwebzi bzingacitike lini.”

4. (a) Kodi n’ciyani comwe Yahova akhadziwa kale? (b) Kuthumizira pa kulewa piciro, n’ciyani cinango comwe Yahova adacita?

⁴ Pomwe Yahova adafulizira mpostolo Juwau kuti anembe mafala yamweya, iye akhadziwa kuti ifepano tingadadzayaphatisa basa pa kupalizira wanthu. Yahova akhadziwambo kuti wanthu winango bzingadadzawanesa kukhulupira mapiciro ya “bzinthu bzatsapano” bzomwe iye adapicira. (Zaiya 42:9; 60:2; 2 Akolinto 4:3, 4) Tsono, kodi tingacite ciyani kuti tikhulupire na kuthandizambo anzathu kuti akhulupire kuti bzinthu bzomwe bzidanembedwa pa Apokalipse 21:3, 4 bzin’dzacitikadi? Yahova alibe kundolewa mapiciro yamweya yomwe yambatikondwesa, koma adalewambo mathangwe yomwe yambaticitisa kuyakhulupira. Kodi ni mathangwe yaponi yomwe iye adalewa?

5. Thangwe ranyi timbakhulupira piciro lomwe Mulungu adalewa lakubweresa Paraizo, ndipo piciro limweri timbaligumana kuponi?

⁵ Pana mathangwe yomwe yambaticitisa kukhulupira piciro la Yahova lakuti an’dzatibweresera Paraizo kutsogoloku. Timbawerenga kuti: “Ule omwe akhadakhala pa mpando wa umambo, adati: ‘Ona! Ndikukonza papsa bzinthu bzentse.’ Ndipo adalewa pomwe kuti: ‘Nemba, pakuti mafala yamweya njakukhulupirika na yacadidi.’ Ndipo iye adandiuza kuti: ‘Bzakwanisika! Inepano ndine Alfa na Omega, wakuyamba na wakumalizira.’” — Apokalipse 21:5, 6a.

6. Thangwe ranyi mafala ya pa Apokalipse 21:5, 6 yambalimbisa cikhulupiro cathu pa piciro la Mulungu?

⁶ Thangwe ranyi mafala yamweya yambalimbisa cikhulupiro cathu pa mapiciro ya Mulungu? Pa nkhani ya mavesi yamweya, bukhu la Chivumbulutso limbalewa kuti: “Bzimbakhala ninga kuti Yahova caiyeyo akusinari tsamba la citsimikizo kuna wanthu wakukhulupirika kuti bzimwebzi bzin’dzacitikadi.” b Piciro la Mulungu lidanembedwa pa Apokalipse 21:3, 4. Tsono pa mavesi 5 na 6, pambakhala ninga pana assinatura ya Yahova yomwe ikutitsimikizirisa kuti picirolo lin’dzakwanisikadi. Mbaticezeraneni mafala yomwe Yahova adayaphatisa basa pa kutitsimikizira piciro lace.

7. Thangwe ranyi mafala yakuyambirira ya citsimikizo ca Mulungu ya pa vesi 5 yakulatiza kuti piciro lace lin’dzakwanisikadi?

⁷ Citsimikizo ca Yahova cimbayambira pa mbali yakuyambirira ya vesi 5 pomwe pambati: “Ule omwe akhadakhala pa mpando wa umambo, adati.” (Apokalipse 21:5a) Mafala yamweya njakupambulika thangwe ni pa mbali imweyi basi m’bukhu la Apokalipse pomwe pambalatiza Yahova caiyeyo ali kulalewa. Citsimikizo cimweci cikulewedwa lini na anjo wamphanvu ayai na Jezu omwe adalamusidwa, koma cikulewedwa na Yahova caiyeyo! Bzimwebzi bzikulatiza kuti ifepano tingakhulupire mafala yomwe yakulewedwa patsogolo pace. Thangwe ranyi? Thangwe Yahova “anganame lini.” (Tito 1:2) Penu Mulungu anganame lini, ndiye kuti mafala ya pa Apokalipse 21:5, 6 njacadidi.

8. Kodi n’ciyani comwe Yahova adalewa kuti alatize kuti piciro lace lin’dzakwanisikadi? (Zaiya 46:10)

⁸ Bwerani ticezerane bza fala lakuti “Ona!” (Apokalipse 21:5) Fala la Cigerego lomwe lidasanduliziridwa kuti “ona!” lidabwerezeredwa kazinji m’bukhu la Apokalipse. Bukhu linango limbalewa kuti fala limweri “limbathandiza munthu omwe akuwerenga kuti akhale tceru na mafala yomwe yakubwera kutsogolo.” Kodi n’ciyani comwe ciri kutsogolo kwa fala lakuti “ona!”? Ni mafala ya Mulungu yomwe yakulewa kuti: “Ndikukonza papsa bzinthu bzentse.” N’cadidi kuti Yahova pamwepa akulewa bza bzinthu bzomwe an’dzacita kutsogolo, koma iye akubzilewa ninga kuti akubzicita pa nthawe imweyino thangwe rakuti akudziwa kuti an’dzabzicitadi. — Werengani Zaiya 46:10.

9. (a) Kodi mafala yakuti “ndikukonza papsa bzinthu bzentse” yakulewa bza bzinthu bziwiri bziponi? (b) Kodi n’ciyani comwe cin’dzacitika na “kudzulu” na “dziko la pantsi” bzomwe bziripobzi?

⁹ Mbatiwoneni mafala yanango yomwe yali pa Apokalipse 21:5: “Ndikukonza papsa bzinthu bzentse.” Mu kapitulo imweyi, mafala yamweya yakuthandauza kuti Yahova an’dzacita bzinthu bziwiri. Cakuyamba, iye an’dzapfudza dzikoli ndipo caciwiri, iye an’dzabweresa dziko lipsa. Cakuyamba, kodi Yahova an’dzacosa ciyani? Pa Apokalipse 21:1 pambalewa kuti: “Kudzulu kwa kale na dziko la pantsi lakale bzikhadacoka.” “Kudzulu kwa kale” kumbathandauza maboma ya dziko yomwe yambatsogoleredwa na Sathani pabodzi na madimonyo yace. (Mateu 4:8, 9; 1 Juwau 5:19) Nthawe zinango, “dziko la pantsi” limbathandauza wanthu omwe akukhala pa dzikolo. (Genesesi 11:1; Salimo 96:1) Ndipopa, “dziko la pantsi lakale” likuthandauza wanthu wakuipa omwe ali pa dziko la pantsi pano. Yahova an’dzandokonza lini “kudzulu” na “dzikoli”; koma iye an’dzabzicinja. Iye an’dzacosa kudzulu kwa kale na dziko la pantsi la kale aciikha “kudzulu kupsa na dziko la pantsi lipsa.” Bzimwebzi bzikuthandauza kuti pan’dzakhala na boma lipsa pabodzi na wanthu wapsa pa dziko la pantsi.

10. Kodi ni bzinthu bziponi bzomwe Yahova an’dzakonza papsa?

¹⁰ Pa Apokalipse 21:5, timbawerenga bzinthu bzomwe Yahova an’dzabzikonza kuti bzikhale bzipsa. Pamwepa Yahova akulewa lini kuti: “Ndikukonza bzinthu bzentse kuti bzikhale bzipsa.” Iye akulewa kuti: “Ndikukonza papsa bzinthu bzentse.” Na tenepo, Yahova an’dzacitisa kuti dziko la pantsi pabodzi na wanthu bzikhale bzipsa mwakucitisa wanthu kuti akhale wakulungamiratu. Ninga momwe Zaiya adalewera, dziko lentse la pantsi lin’dzakhala lakudeka ninga zunde la Edeni. Iye an’dzaticitisa kuti tikhale wanthu wapsa mwa kupozeratu wanthu wentse kuti akhale wakulungama. Wanthu wakupunduka, wakusaya kuwona na wakusaya kubva an’dzapozedwa ndipo omwe adafa an’dzalamusidwa. — Zaiya 25:8; 35:1-7.

11. Kodi Yahova adauza Juwau kuti acite ciyani, ndipo thangwe ranyi?

¹¹ Kodi n’ciyani cinango comwe Yahova adalewa kuti atsimikizire kuti mafala yace njacadidi? Iye adauza Juwau kuti: “Nemba, pakuti mafala yamweya njakukhulupirika na yacadidi.” (Apokalipse 21:5) Yahova alibe kondomuuza Juwau kuti “nemba.” Iye adamuuzambo thangwe race lomwe akhafunikira kunemba mafalayo. Iye adati: “Pakuti mafala yamweya njakukhulupirika na yacadidi”, bzimwebzi bzin’funa kulewa kuti mafala ya Mulungu nthawe zentse njakukhulupirika ndipo yambakwanisika. Ifepano timbatenda kwene-kwene thangwe rakuti Juwau adabvera ndipo “adanemba” mafala yamweya. Ndipopa ifepano lero tina mwayi wakuwerenga bza piciro la Mulungu lakulewa bza Paraizo yomwe iye an’dzabweresa kutsogolo ticikumbukira bzisimbo bzomwe tin’dzakhala nabzo pa nthaweyo.

12. Thangwe ranyi Yahova adalewa kuti: “Bzakwanisika!”

 ¹² Kodi n’ciyani comwe Mulungu adalewa patsogolo pace? Iye adalewa kuti: “Bzakwanisika!” (Apokalipse 21:6) Pamwepa Yahova adalalewa ninga kuti bzomwe iye adapicira bzacitika kale. Iye ana mathangwe yakulewera tenepa thangwe palibe cinthu comwe cingatazise kuti cakulinga cace cikwanisike. Yahova adatipasa pomwe citsimikizo cinango camphanvu ca kukwanisika kwa piciro lace pa mbali yaciwiri ya citsimikizo caceco. Kodi n’ciponi?

13. Thangwe ranyi Yahova adalewa kuti: “Inepano ndine Alfa na Omega”?

¹³ Ninga momwe talewera kale pakuyambirira, Yahova caiyeyo adalalewa na Juwau katatu m’masomphenya. (Apokalipse 1:8; 21:5, 6; 22:13) Ndipo pa nthawe zentse zomwe iye akhalewalewa na Juwauyo akhalewa kuti: “Inepano ndine Alfa na Omega.” Alfa ni letra yakuyamba ya alfabeto ya Cigerego ndipo Omega ni letra yakumalizira. Mwakuphatisa basa maletra yamweya ya “Alfa na Omega,” Yahova adalatiza kuti iye akayamba kucita cinthu, cinthuco ambadzacimaliza.

14. (a) Kodi ni lini pomwe Yahova adalewa kuti “Alfa” ndipo ni lini pomwe iye an’dzalewa, “Omega?” (b) Kodi ni citsimikizo ciponi comwe cimbagumanika pa Genesesi 2:1-3?

¹⁴ Pomwe Yahova adamala kulenga Adamu na Eva, iye adawafotokozera cakulinga comwe iye akhanaco kuna iwo pa dziko la pantsi. Bibliya limbalewa kuti: “Mulungu adawasimba, aciwauza kuti: ‘Balanani, muwande, mudzaze dziko la pantsi, mucirinyang’anira.’” (Genesesi 1:28) Mafala yomwe Yahova adalewaya yakuthandauza kuti iye adalewa kuti “Alfa.” Iye adalewa cakulinga cace: Ingadadzafika nthawe yomwe mbadwa zakubvera na zakulungama za Adamu na Eva zingadadzaza dziko la pantsi zicilisandusa Paraizo. Bzimwebzi bzikadzakwanisika kutsogolo, Yahova an’dzalewa kuti “Omega.” Pomwe Yahova adamala kulenga “kudzulu, dziko la pantsi pabodzi na bzentse,” iye adapereka  citsimikizo. Citsimikizoco timbacigumana pa Genesesi 2:1-3. (Werengani.) Yahova adalewa kuti ntsiku yaci 7 ikhali yakupambulika kwa iye. Kodi bzimwebzi bzikuthandauza ciyani? Yahova adatsimikizira kuti an’dzakwanirisa cakulinga cace kuna wanthu na dziko la pantsi. Ndipo bzimwebzi bzingadadzakwanirisidwa kuphampha kwa ntsiku yaci 7.

15. Thangwe ranyi pakuyamba bzikhawoneka ninga kuti Sathani akwanisa kutazisa cakulinga ca Mulungu kuna wanthu?

¹⁵ Pomwe Adamu na Eva adapanduka, iwo adakhala na pikado ndipo adapasambo wana wawo pikadoyo pabodzi na infa. (Aroma 5:12) Bzimwebzi bzidawoneka ninga kuti Sathani akhadakwanisa kucitisa kuti cakulinga ca Yahova cakuti pa dziko la pantsi padzale na wanthu wakulungama na wakubvera citazike. Bzidakhala ninga kuti Sathani acitisa kuti Yahova ataze kukhala “Omega.” Pinango Sathani adakumbuka kuti Yahova akhalibe nzeru ya momwe angadacinjira bzinthu. Pinango iye akhakumbuka kuti bzomwe Yahova angadacita bzikhali kondopha Adamu na Eva acilenga wanthu winango kuti akwanirise cakulinga cace cakuti pa dziko la pantsi pakhale na wanthu wakulungama. Tsono Mulungu angadacita bzimwebzi, Dyabuyo angadalewa kuti Mulungu ngwakunama. Thangwe ranyi? Thangwe ndakuti pa Genesesi 1:28, Yahova adacita kuleweratu kuti dziko la pantsi lingadadzadzala na mbadwa za Adamu na Eva.

16. Thangwe ranyi Sathani akhakumbuka kuti angadakwanisa kulewa kuti Yahova atazira kukwanirisa cakulinga cace?

¹⁶ Kodi n’ciyani cinango comwe Sathani adakumbuka kuti pinango Mulungu angadacita? Pinango iye adakumbuka kuti Yahova angadalekerera kuti Adamu na Eva abereke wana wakuperewera bzomwe bzingadacitisa kuti bzomwe Mulungu akhafuna bzisaye kucitika thangwe wanawo angadapitiriza kukhala wakuperewera. (Mpalizi 7:20; Aroma 3:23) Yahova angadacita bzimwebzi, Sathani angadalewa kuti Mulungu atazira kucita bzomwe akhafuna. Thangwe ranyi? Thangwe bzimwebzi bzingadacitisa lini kuti cakulinga ca Mulungu ca kudzaza dziko la pantsi na mbadwa zakulungamiratu za Adamu na Eva cikwanisike.

17. Kodi Yahova adacita ciyani kuti cakulinga cace cidzakwanisike, ndipo n’ciyani comwe cin’dzacitika kutsogolo? (Onani cithunzi-thunzi.)

¹⁷ Yahova adacita bzinthu mwakusiyana kwene-kwene na momwe Sathani akhakumbukira ndipo bzimwebzi pinango pentse bzidamudabwisa kwene-kwene Sathaniyo. (Salimo 92:5) M’mbuto mwakukhala wakunama, Yahova adalatiza kuti ambanama lini mwa kulekerera kuti Adamu na Eva akhale na wana. Ndipo m’mbuto mwakuti cakulinga ca Yahova cisaye kukwanisika, iye adanyang’ana njira yakuti cakulingaco cikwanisike. Iye adacita bzimwebzo mwakuphatisa  basa “munthu” omwe angadadzakwanisa kupulumusa mbadwa zentse za kubvera za Adamu na Eva. (Genesesi 3:15; 22:18) Pinango Sathani adadabwa kwene-kwene pomwe adawona makonzedwe ya Yahova yamweya! Thangwe ranyi? Thangwe makonzedwe yamweya yadalatiza kuti Yahova ana lufoyi kwene-kwene na wanthu. (Mateu 20:28; Juwau 3:16) Sathani alibe khalidwe limweri, koma iye ni munthu wadyera. Tsono n’ciyani comwe cin’dzacitika thangwe ra makonzedwe ya cakulombolera yomwe Yahova adakonza? Kuphampha kwa magole 1000 mbadwa zakulungamiratu na za kubvera za Adamu na Eva zin’dzakhala mu Paraizo pa dziko la pantsi ninga momwe Yahova akhafunira pakuyamba. Nthawe imweyo ikadzafika tingalewe kuti Yahova an’dzalewa kuti, “Omega.”

18. Kodi ni mathangwe matatu yaponi yomwe Mulungu adatipasa yomwe yambatithandiza kutsimikizira kuti an’dzakwanirisa piciro lace? (Onani kwadru yakuti “ Mathangwe Matatu Yomwe Yambaticitisa Kukhulupira Piciro la Yahova.”)

¹⁸ Ninga momwe tapfunzira mu nkhani yathuyi, kodi ni citsimikizo ciponi comwe tingafotokozere wale omwe ambapenukira kuti piciro la Paraizo lin’dzakwanisikadi kutsogoloku? Cakuyamba, tawona kuti Yahova caiyeyo ndiye omwe adapicira. Bukhu la Apokalipse limbalewa kuti: “Ule omwe akhadakhala pa mpando wa umambo, adati: ‘Ona! Ndikukonza papsa bzinthu bzentse.’” Iye ana nzeru na mphanvu ndipo akufunisisa kukwanirisa piciro lace. Caciwiri, piciro lomwe Yahova adalewa lin’dzakwanisikadi ndipopa iye adalewa ninga kuti bzakwanisika kale. Iye adati: “Mafala yamweya njakukhulupirika na yacadidi. . . . Bzakwanisika!” Cacitatu, Yahova akayamba kucita cinthu, iye ambadzacimaliza, ndipopa iye adalewa kuti: “Inepano ndine Alfa na Omega.” Yahova an’dzalatiza kuti Sathani ngwakunama ndipo angamutazise lini kukwanirisa cakulinga cace.

19. Kodi n’ciyani comwe imwepo mungacite wanthu akambapenukira kuti Mulungu an’dzakwanirisa piciro lace lakubweresa Paraizo?

¹⁹ Kumbukirani kuti mukambafotokozerambo anzanu bza citsimikizo ca Mulungu cakuti an’dzakwanirisa bzomwe adalewa mu upalizi, mumbakhala mukulimbisa cikhulupiro canu pa mapiciro ya Yahova. Na tenepo, mukadzawerengera pomwe munthu mafala yabwinoya yakulewa bza Paraizo yomwe yali pa Apokalipse 21:4 ndipo iye acilewa kuti, “Bzimwebzi bzingacitike lini,” kodi imwepo mungacite ciyani? Imwepo mungamuwerengere vesi 5 na 6 mucimufotokozera bzomwe mavesiya yambalewa na kumulatiza momwe Yahova adatsimikizira kuti bzimwebzi bzin’dzacitikadi mwakucita kuikha assinatura yace. — Zaiya 65:16.