NKHANI YAKUPFUNZA 49
Kodi Yahova An’dzatawira Mipembo Yangu?
“Imwepo mun’dzandicemera, ndipo mun’dzabwera, mucindipemba, ndipo inepano ndin’dzakutetekerani.” — JEREMIYA 29:12.
NYIMBO 41 Mulungu, Bvani Mpembo Wangu
BZOMWE TIN’PFUNZA a
1-2. Kodi thangwe ranyi tingawone ninga kuti Yahova akutawira lini mipembo yathu?
“KONDWA kwene-kwene mwa Yahova, ndipo iye an’dzakupasa bzomwe mtima wako umbakhumba.” (Salimo 37:4) Limweri ni piciro labwino kwene-kwene! Tsono, kodi tin’funika kudikhirira kuti Yahova atipase cinthu ciri-centse comwe tingamukumbire pa nthawe yomwe takumbirayo? Thangwe ranyi tin’funika kubzicita mbvunzo umweyu? Onani bzakucitika ibzi. Mpfumakazi yakusaya kulowodwa ikupemba kwa Yahova kuti aithandize kuyenda ku Xikola ya Apalizi wa Umambo. Tsono pakupita magole mazinji ndipo mpfumakaziyo ikucemeredwa lini. M’bale omwe ni tswaka akupemba kwa Yahova kuti amupoze matenda yomwe akuduwala na cakulinga cakuti acite bzizinji m’gwere. Tsono, napo bziri tenepo iye akulimba lini. Banja lacikristau likupemba kwa Yahova kuti athandize mwana wawo kuti apitirize kumutumikira. Tsono mwanayo asankhula kusiya kutumikira Yahova.
2 Pinango imwepo mudakumbirambo kale cinthu kwa Yahova, tsono iye alibe kukupasani. Ndipo bzimwebzi pinango bzidakucitisani kukumbuka kuti Yahova ambatawira mipembo inango, koma ambatawira lini mipembo yanu. Ayai pinango mungakumbuke kuti iye alibe kukutawirani thangwe rakuti mudacita cinthu cinango cakuphonyeka. Mpfumakazi inango yakucemeredwa Janice b ikhakumbukambo tenepoyo. Mpfumakaziyo na bayace adapemba kwa Yahova kuti awathandize kuyenda kukatumikira pa Beteli. Mpfumakaziyo idalewa kuti: “Inepano ndikhakhulupira kuti tingadayenda kukatumikira pa Beteli.” Tsono padapita magole mazinji ndipo banjalo liribe kucemeredwa. Mpfumakazi Janice adalewa kuti: “Inepano ndidasunama kwene-kwene ndipo ndidasokonezeka. Ndikhambabzibvunza kuti kodi ndamuphonyera ciyani Yahova. Inepano ndikhadapemba mwakubveka bwino kuti iye anditsogolere. Thangwe ranyi iye alibe kutawira mpembo wangu?”
3. Kodi tin’cezerana ciyani mu nkhani ino?
3 Nthawe zinango, ifepano tingabzibvunze penu Yahova ali kubva mipembo yathu. Napo amuna wakukhulupirika wakale-kale adakhalambo na thupo libodzi-bodziri. (Djobi 30:20; Salimo 22:2; Habakuki 1:2) Kodi n’ciyani comwe cingakutsimikizireni kuti Yahova an’dzatawira mipembo yanu? (Salimo 65:2) Kuti tiwone mtawiro wa mbvunzo umweyu, bwerani tiwone mitawiro ya mibvunzo iyi: (1) Kodi n’ciyani comwe tingadikhire kwa Yahova? (2) Kodi n’ciyani comwe Yahova akudikhira kwa ifepano? (3) Thangwe ranyi nthawe zinango tin’funika kucinja bzomwe takumbira?
KODI N’CIYANI COMWE TINGADIKHIRIRE KWA YAHOVA?
4. Mwakubverana na Jeremiya 29:12, kodi Yahova akupicira kuti an’dzacita ciyani?
4 Yahova akupicira kuti an’dzatetekera mipembo yathu. (Werengani Jeremiya 29:12.) Mulungu wathu ambafuna kwene-kwene atumiki wace wakukhulupirika, ndipopa an’dzatawira mipembo yawo. (Salimo 10:17; 37:28) Tsono bzimwebzi bzin’funa lini kulewa kuti iye an’dzaticitira bzinthu bzentse bzomwe tingamukumbire. Pana bzinthu bzinango bzomwe iye angatitawire lini mu dziko lino, koma an’dzatitawira mu dziko lipsa.
5. Kodi n’ciyani comwe Yahova ambakumbukira akakhala akutetekera mipembo yathu? Fotokozani.
5 Yahova ambawona kubverana komwe kulipo pakati pa bzomwe takumbira na cakulinga cace. (Zaiya 55:8, 9) Cakulinga caceco n’cakuti adzaze dziko la pantsi na wanthu wakukondwa omwe an’dzabvuma kutongedwa na Umambo bwace. Tsono, Sathani adalewa kuti wanthu angakhale na moyo wabwino akambabzitonga okha. (Genesesi 3:1-5) Kuti Yahova alatize kuti bzomwe Sathaniyo adalewa mpsakunama, iye alekerera kuti wanthu abzitonge okha. Tsono, tikuwona kuti utongi bwa wanthu bukucitisa kuti wanthu agumane na mabvuto mazinji kwene-kwene. (Mpalizi 8:9) Ifepano timbabvesesa kuti Yahova angacose lini mabvuto yentse yomwe tikugumana nayo ntsiku zino. Thangwe iye akacita bzimwebzi, wanthu angawone ninga kuti utongi bwa wanthu bun’kwanisa kutonga bucimalisa mabvuto yomwe wanthuwo akugumana nayo.
6. Thangwe ranyi tin’funika nthawe zentse kumbakhulupira kuti Yahova ambacita bzinthu bza lufoyi na bzakulungama?
6 Yahova angatawire mkumbiro ubodzi-bodzi mu njira zakusiyana. Mwa ciratizo, pomwe Mambo Ezekiya adaduwala kwene-kwene, iye adakumbira Yahova kuti amuthandize kulimba. Ndipo Yahovayo adamupoza. (2 Amambo 20:1-6) Tsono mwakusiyana na bzimwebzi, pomwe mpostolo Paulo adadandaulira Yahova kuti amucosere “munga m’thupi,” omwe pinango pentse likhalimbo bvuto la thanzi, Yahova alibe kumucosera bvutolo. (2 Akolinto 12:7-9) Kumbukiranimbo bzomwe bzidacitikira mpostolo Tiyago na Pedru. Awiriwo adaphatidwa ndipo akhafuna kuphedwa na Mambo Herode. Gwere lidapempherera Pedru ndipo pinango pentse lidapemphererambo Tiyago. Tsono Tiyago adaphedwa, koma Pedru adapulumusidwa mwakudabwisa. (Mabasa 12:1-11) Bzimwebzi pinango bzingaticitise kubzibvunza kuti: ‘Thangwe ranyi Yahova adapulumusa Pedru, koma adalekerera kuti Tiyago aphedwe?’ Bibliya limbalewa lini. c Tsono comwe tin’funika kutsimikizira n’cakuti mabasa yentse ya Yahova ‘si yakusaya kulungama.’ (Deuteronomiyo 32:4) Ndipo timbadziwa kuti wentse, Pedru na Tiyago, akhafunidwa na Yahova. (Apokalipse 21:14) Nthawe zinango, Yahova angatawire lini mipembo yathu ninga momwe ifepano tikhadikhirira. Tsono pakuti timbakhulupira kuti mitawiro yentse ya Yahova pa mipembo yathu njacirungamo ndipo imbalatiza kuti iye ambatifuna, ifepano timbakumbuka lini kuti iye alibe kutitawira. — Djobi 33:13.
7. Kodi n’ciyani comwe tin’funika kutcenkha, ndipo thangwe ranyi?
7 Tin’funika kutcenkha kumbandendemezera bzakucitika bzathu na bza anzathu. Mwa ciratizo, ifepano tingakumbire kuti Yahova atithandize pa cinthu cinango, tsono mkumbiro wathu ungatawiridwe lini. Patsogolo pace, pinango tingadzadziwe kuti munthu munango adacitambo mkumbiro wakundendemerana na wathuyo, tsono bzikuwoneka kuti Yahova adamutawira. Bzinthu ninga bzimwebzi bzidacitikirambo mpfumakazi yakucemeredwa Anna. Mpfumakaziyo idapemba kwa Yahova kuti iye athandize bayace, Matthew, kuti alimbe matenda ya kankro yomwe iye akhaduwala. Pa nthawe ibodzi-bodziyo, mpfumakazi ziwiri zacikulire zikhaduwalambo matenda ya kankro. Anna adapemba kwene-kwene kuti Yahova athandize bayace Matthew pabodzi na mpfumakazizo. Mpfumakazizo zidalimba, tsono bayace Matthew adasaika. Pakuyamba, Anna adabzibvunza penu mpfumakazizo zidalimba thangwe rakuti Yahova ndiye omwe adazithandiza. Penu ni Yahova omwe adathandiza mpfumakazizo kuti zilimbe, thangwe ranyi Yahova alibe kutawira mipembo yomwe mpfumakaziyo ikhacita kuti mwamuna waceyo alimbe? Tingakwanise lini kulewa bwino-bwino kuti thangwe ranyi mpfumakazi ziwirizo zidalimba. Comwe tikudziwa n’cakuti Yahova akufunisisa kudzamalisa mabvuto yentse yomwe tikugumana nayo na kulamusambo azixamwali wace omwe adafa. — Djobi 14:15.
8. (a) Mwakubverana na Zaiya 43:2, kodi Yahova ambatithandiza tani? (b) Kodi mpembo umbatithandiza tani tikakhala tikugumana na bvuto likulu? (Onani vidiyo yakuti Mpembo Umbatithandiza Kupirira.)
8 Yahova nthawe zentse an’dzatithandiza. Pakuti iye ni Baba wathu omwe ambatifuna, iye ambafuna lini kutiwona tikubonera. (Zaiya 63:9) Tsono, iye angacitise lini kuti tileke kugumana na mabvuto yomwe yali ninga mikulo ayai moto. (Werengani Zaiya 43:2.) Tsono, iye akupicira kuti an’dzatithandiza “kulimbana” na mabvutoyo. Ndipo iye an’dzalekerera lini kuti mabvuto yomwe tikugumana nayo yatitazise kupitiriza kumutumikira. Yahova ambatipasambo mzimu wakucena kuti utithandize kupirira. (Luka 11:13; Afilipi 4:13) Ndipopa tingakhale na citsimikizo cakuti iye an’dzatipasa bzomwe tikufunikira kuti tipirire na kuti tipitirize kumutumikira mwakukhulupirika. d
KODI N’CIYANI COMWE YAHOVA AKUDIKHIRA KWA IFEPANO?
9. Mwakubverana na Tiyago 1:6, 7, thangwe ranyi tin’funika kukhulupira kuti Yahova an’dzatithandiza?
9 Yahova ambafuna kuti ifepano timukhulupire. (Ahebereu 11:6) Nthawe zinango bzingawoneke ninga kuti tingakwanise lini kupirira mabvuto yomwe tikugumana nayo. Ndipo tingayambe kupenukira penu Yahova an’dzatithandiza. Tsono Bibliya limbatitsimikizira kuti na mphanvu ya Yahova tingakwanise “kukwira mpanda.” (Salimo 18:29) Ndipopa m’mbuto mwa kumbapenukira, timbapembe kwa Yahova na cikhulupiro cakuti Yahova an’dzatawira mipembo yathu. — Werengani Tiyago 1:6, 7.
10. Fotokozani ciratizo ca momwe tingacitire bzinthu mwakubverana na mpembo wathu.
10 Yahova ambafuna kuti timbacite bzinthu mwakubverana na mipembo yathu. Mwa ciratizo, m’bale angapembe kwa Yahova kuti amuthandize kukumbira patrau wace kuti amubvumize kuyenda ku mtsonkhano wa cigawo. Kodi Yahova angatawire tani mpembo umweyu? Iye angathandize m’bale umweyu kuti akhale wakukhwimika kuti alalewe na patrau waceyo. Tsono kuti bzimwebzi bzikwanisike, iye an’dzafunika kulalewa na patrau waceyo. Iye angafunike kucita mkumbiroyo mwakubwereza-bwereza. Ndipo iye angafunikembo kubzipereka kucinjana na mwanzace wa basa. Ndipo nthawe zinango iye angabvume kugwatidwa kobiri yace.
11. Thangwe ranyi ifepano tin’funika kumbapemba mwakubwereza-bwereza bza thupo lomwe tinalo?
11 Yahova ambafuna kuti tipempherere nkhani yomwe tikufunayo mwakubwereza-bwereza. (1 Atesalonika 5:17) Mafala ya Jezu yambalatiza kuti mipembo yathu inango ingatawiridwe lini pa nthawe yomwe ifepano tikuidikhirira. (Luka 11:9) Tsono tin’funika lini kuwofoka! Mbapembani na mtima wentse na mwakubwereza-bwereza. (Luka 18:1-7) Tikambapemba mwakubwereza-bwereza kwa Yahova, timbamulatiza kuti bzomwe tikupemphererabzo mpsakufunika kwene-kwene. Ndipo timbalatizambo kuti tikukhulupira kuti iye an’kwanisa kutithandiza.
THANGWE RANYI NTHAWE ZINANGO TIN’FUNIKA KUCINJA BZOMWE TAKUMBIRA?
12. (a) Kodi ni mbvunzo uponi omwe tin’funika kubzibvunza tikakhala tacita mpembo, ndipo thangwe ranyi? (b) Kodi tingacite ciyani kuti tilatize kuti mipembo yathu imbalemekeza Yahova? (Onani kwadru yakuti “ Kodi Mipembo Yangu Imbalatiza Kuti Nimbalemekeza Yahova?”)
12 Tikakhala tiribe kutambira bzinthu bzomwe takumbira, bzingakhale bwino kubzicita mibvunzo mitatu. Wakuyamba, ‘Kodi bzomwe ndikupemphererabzo bzikubverana na kufuna kwa Mulungu?’ Nthawe zinango timbakumbuka kuti tikudziwa bzinthu bzomwe mpsabwino kwa ifepano. Tsono pinango bzinthu bzomwe ifepano takumbira bzingatithandize lini mpaka kale-kale. Penu tikupemba kwa Yahova thangwe ra bvuto linango lomwe tikugumana nalo, pinango Yahova angawone kuti pana njira yabwino yakutithandizira kuposa momwe ifepano tikukumbukira. Ndipo bzinthu bzinango bzomwe ifepano tikukumbira bzingakhale bzikubverana lini na cakulinga ca Yahova. (1 Juwau 5:14) Mwa ciratizo, kumbukirani bza nkhani ya abereki omwe afotokozedwa mu ndime zakuyambirira wale. Iwo adakumbira Yahova kuti athandize mwana wawo kuti apitirize kumutumikira. Umweyu ukuwoneka ninga mkumbiro wabwino. Tsono Yahova an’dzangingimiza lini ali-wentse wa ifepano kuti amutumikire. Iye akufuna kuti tentsenefe kuphatanidzambo wana wathu tisankhule tekha kumutumikira. (Deuteronomiyo 10:12, 13; 30:19, 20) Ndipopa bzingadakhala bwino abereki wale angadakumbira Yahova kuti awathandize kuti iwo akwanise kuthandiza mwana wawoyo kucita bzinthu bzomwe bzingamuthandize kuti afune Yahova na kukhalambo xamwali wace. — Mimwani 22:6; Aefezo 6:4.
13. Mwakubverana na Ahebereu 4:16, kodi ni pa nthawe iponi yomwe Yahova an’dzatithandiza? Fotokozani.
13 Mbvunzo waciwiri ngwakuti, ‘Kodi imweyi ni nthawe yakuti Yahova atawire mkumbiro wangu?’ Ifepano tingawone ninga kuti tikufunikira mtawiro wa mipembo yathu mwakamfulumize. Tsono Yahova ndiye ambadziwa nthawe yakuthemera kuti atawire mkumbiro wathu. (Werengani Ahebereu 4:16.) Ifepano tikasaya kutawiridwa mkumbiro wathu pa nthawe yomwe tikhadikhirira, tingakumbuke kuti mtawiro wa Yahova ngwakuti ‘Ne.’ Tsono pinango pentse mtawiro wace ungakhale wakuti ‘Tsapanopali ne.’ Mwa ciratizo, kumbukirani bza m’bale wacitswaka omwe adapemba kwa Yahova kuti amupoze matenda yace ule. Yahova angadamulimbisa mwakudabwisa matenda yace yale, Sathani angadalewa kuti m’baleyo apitirize kutumikira Yahova thangwe rakuti Yahovayo adamupoza. (Djobi 1:9-11; 2:4) Ndipo kuthumizira bzimwebzi, ifepano tikudziwa kuti Yahova adaikha kale nthawe yomwe an’dzapoza matenda yentse. (Zaiya 33:24; Apokalipse 21:3, 4) Pomwe nthawe imweyo ikanati kufika, Yahova angatipoze lini mwakudabwisa. Ndipopa, bzomwe m’baleyo angadakumbira mpsakuti Yahova amupase mphanvu na mtendere wa mu mtima kuti apirire matenda yaceyo acipitiriza kutumikira Yahova mwakukhulupirika. — Salimo 29:11.
14. Kodi mwapfunza ciyani pa bzomwe bzidacitikira Janice?
14 Kodi mukukumbukira bza mpfumakazi Janice, yomwe idapemba kwa Yahova kuti ikatumikire pa Beteli ire? Padapita magole 5 kuti iye abvesese momwe Yahova adatawirira mpembo wace. Mpfumakaziyo idati: “Yahova adaphatisa basa nthawe imweyire kuti andipfunzise na kundithandiza kukhala Mkristau wabwino. Inepano ndikhafunika kukulisa cikhulupiro cangu kwa iye. Ndidafunika kupfunza bzomwe ningacite kuti pfunziro langu la pandekha limbakhale lakudekeza. Ndidafunika kupfunza kuti ndidziwe bzomwe ningacite kuti ndipitirize kukhala wakukondwa napo pa nthawe yomwe ningakhale ndikugumana na mabvuto pa moyo wangu.” Pomwe padapita nthawe, Janice na bayace adakhala anyakunyang’anira dera. Mpfumakazi Janice idalewa kuti: “Yahova adatawira mipembo yangu napo kuti alibe kuyitawira mu njira yomwe inepano ndikhadikhirira. Padatenga nthawe kuti ndikwanise kuzindikira kuti mtawiro wace udakhala wabwino kwa inepano, ndipo tsapano ndikutenda kwene-kwene thangwe ra kuwona lufoyi na kudeka mtima kwace.”
Mukawona ninga kuti Yahova alibe kutawira mpembo wanu, pemphererani bzinthu bzinango (Onani ndime 15) f
15. Thangwe ranyi nthawe zinango tin’funika lini kucita kufotokozeratu bwino-bwino bzomwe tikufuna pomwe tikucita mpembo? (Onani bzithunzi-thunzi.)
15 Mbvunzo wacitatu nguyu, ‘Kodi pana cinthu cinango comwe inepano ningapempherere?’ Mpsabwino kwene-kwene kumbafotokoza bwino-bwino cinthu comwe tikufuna pomwe tikupemba kwa Yahova, tsono nthawe zinango bzingakhale bwino kuleka kuleweratu cinthu comwe tikufunaco kuti tikwanise kudziwa bzomwe Yahova akufuna kwa ifepano. Onani ciratizo ca mpfumakazi yomwe idapemba kwa Yahova kuti aithandize kupita Xikola ya Apalizi wa Umambo ire. Iyo ikhafuna kupita xikolayo kuti ikathandizire komwe kukufunikira thandizo. Ndipopa, pomwe iyo ikhapempherera cakulinga cimweci, ingadapembambo kwa Yahova kuti aithandize kuwona njira zinango za momwe ingathumizirire utumiki bwace. (Mabasa 16:9, 10) Ndipo patsogolo pace, iyo ingadacita bzinthu mwakubverana na mpembo wace mwakubvunza nyakunyang’anira dera kuti adziwe penu pana gwere lomwe likufunikira apainiya. Ayai iyo ingadanembera tsamba mthambi kuti ibvunze komwe kukufunikira apalizi azinji wa Umambo. e
16. Kodi n’ciyani comwe tin’funika kumbakhulupira nthawe zentse?
16 Bzomwe tapfunzabzi bzalatiza kuti Yahova an’dzatawira mipembo yathu mu njira yabwino na yacirungamo. (Salimo 4:3; Zaiya 30:18) Nthawe zinango tingatambire lini mtawiro omwe ifepano tikhadikhirira. Tsono Yahova an’dzaitetekera basi mipembo yathuyo. Iye ambatifuna kwene-kwene. Ndipo an’dzatisiya lini tekha. (Salimo 9:10) Na tenepo, pitirizani “khulupirani Mulungu ntsiku zentse,” ndipo mukhuthulireni bza mu mtima mwanu. — Salimo 62:8.
NYIMBO 43 Mpembo Wakutenda
a Nkhaniyi in’fotokoza kuti thangwe ranyi tingatsimikizire kuti Yahova nthawe zentse an’dzatawira mipembo yathu mwalufoyi na mwacirungamo.
b Madzina yanango yacinjidwa.
c Onani nkhani yakuti “Kodi Imwepo Mumbakhulupira Bzinthu Bzomwe Yahova Ambacita?” mu Ntsanza ya Mulindiri ya Fevereiro 2022, ndi. 3-6.
d Kuti tidziwe bzizinji bza momwe Yahova ambatithandizira kupirira mabvuto yomwe timbagumana nayo, onani vidiyo yakuti Mpembo Umbatithandiza Kupirira mu jw.org.
e Kuti mudziwe bzomwe mungacite mukafuna kubzipereka kuti mukatumikire mu gawo la mthambi inango, onani bukhu lakuti Gulu Lochita Chifuniro cha Yehova, msolo 10 ndi. 6-9.
f BZOMWE BZIKUCITIKA PA CITHUNZI-THUNZI: Mpfumakazi ziwiri zikupemba pomwe zikanati kuprenceri petição ya Xikola ya Apalizi wa Umambo. Patsogolo pace m’bodzi akucemeredwa ndipo munangoyo akucemeredwa lini. Mpfumakazi yomwe iribe kucemeredwayo ikukalipa lini thangwe ra bzimwebzo, koma ikupemba kwa Yahova kuti aithandize kuzindikira mipata inango ya momwe ingathumizirire utumiki bwace. Patsogolo pace mpfumakaziyo ikunembera tsamba mthambi kuti ibzipereke kuti ikatumikire komwe kukufunikira thandizo.
