1-2. (a) Kodi ni kubverana kuponi komwe kulipo pa bzomwe bzimbaticitikira ntsiku zino na bzomwe bzidacitikira Adjuda omwe adabwerera ku Jeruzalemu? (b) Fotokozani mabvuto manango yomwe Adjuda adagumana nayo. (Onani kwadru yakuti “ Ntsiku za Agai, Zakariya na Ezara.”)

 KODI nthawe zinango imwepo mumbacita thupo na tsogolo lanu? Pinango imwepo mudacosedwa basa ndipo mukucita thupo la momwe mungasamalirire banja lanu. Ndipo pinango mukucitambo thupo la momwe mungakhotcererere banja lanu pa nkhani za ndale, kuzunzidwa na kutsutsidwa kwa basa lakupalizira. Kodi imwepo mukugumana na mabvuto ninga yomwe yafotokozedwaya? Penu ndibzo, imwepo munilimbikisidwa kwene-kwene mukawona momwe Yahova adalimbikisira Ajirayeri pomwe iwo akhagumana na mabvuto yakundendemerana na yamweya.

² Adjuda omwe akhakhala ku Babiloniya akhafunika kukhala na cikhulupiro cakulimba kuti asiye bzinthu bzawo bzentse na moyo wawo wabwino kuti ayende ku mbuto yomwe winango akhaidziwa lini. Pomwe iwo adafika, adagumana na mabvuto ya momwe angadagumanira bzinthu kuti asamalire mabanja yawo ndipo kukhacitikambo phiringu la boma la Perisiya na kutsutsidwa na mitundu inango. Winango adawona kuti bzikhali bzakunesa kumanga pomwe templo ya Yahova. Ndipopa, mu gole la 520 AEC, Yahova adatuma apolofeta awiri, Agai na Zakariya, kuti akathandize wanthuwo kucita pomwe nyongo pa kunamata Yahova. (Agai 1:1; Zakariya 1:1) Cilimbikiso comwe apolofetawo adapereka kwa Adjuda cidabweresa bzisimbo bzizinji. Pomwe padapita magole pafupi-fupi 50, Adjuda omwe akhadabwerera ku Jeruzalemu wale akhafunika kulimbikisidwa pomwe. Ezara, omwe akhakopiyari Lamulo, adacoka ku Babiloniya aciyenda ku Jeruzalemu kuti akalimbikise wanthu wa Mulungu kuti ambaikhe kunamata Yahova pa mbuto yakuyamba. — Ezara 7:1, 6.

3. Kodi tin’cezerana mibvunzo iponi mu nkhani ino? (Mimwani 22:19)

³ Ninga momwe mapolofesiya ya Agai na Zakariya yadalimbikisira wanthu wa Mulungu kuti apitirize kuthemba Yahova pa nthawe  yakunesa, iyo yangatithandizembo ntsiku zino kuti tipitirize kuthemba Yahova napo kuti tikugumana na mabvuto. (Werengani Mimwani 22:19.) Pomwe tikucezerana mafala ya Yahova yomwe yadalewedwa na apolofeta Agai na Zakariya na kuwona ciratizo ca Ezara, tin’tawira mibvunzo iyi: Kodi ni mabvuto yaponi yomwe Adjuda adagumana nayo? Thangwe ranyi tin’funika kupitiriza kucita kufuna kwa Yahova napo pa nthawe zakunesa? Ndipo kodi tingapitirize tani kukhulupira Yahova pa nthawe zakunesa?

4-5. N’ciyani comwe cidacitisa Adjuda winango kucepesa nyongo yawo ya kumanga pomwe templo?

⁴ Pomwe Adjuda adafika ku Jeruzalemu, iwo akhana basa likulu kuti acite. Mwakamfulumize, iwo adamanga pomwe guwa la ntsembe la Yahova na aliserse ya templo. (Ezara 3:1-3, 10) Tsono nyongo yomwe iwo akhanayo idayamba kucepa. Thangwe ranyi? Thangwe kuthumizira pa basa la kumanga templo, iwo akhafunikira kumangambo nyumba zawo, kufungula minda na kudyesa mabanja yawo. (Ezara 2:68, 70) Ndipo cinango n’cakuti, iwo adayamba kutsutsidwa na anyamadulanthaka wawo, omwe akhayezera kuwaletsa kumanga pomwe templo. — Ezara 4:1-5.

⁵ Ndipo wanthu omwe adabwerera ku Jeruzalemuwo adagumanambo na mabvuto ya kusaya cakudya na nkhani za ndale. Dziko lawo likhatongedwa na utongi bwa Perisiya. Pomwe Mambo Siro wa Utongi bwa Perisiya adafa mu gole la 530 AEC, mambo omwe adapita m’mbuto mwace, Kambise, adayenda na acikunda wace kuti akamenyane na dziko la Edjipito. Pomwe iwo akhayenda ku Edjipitoko, acikunda wace, adauza Ajirayeri kuti awapase cakudya, madzi na mbuto yakugona, ndipo bzimwebzi bzidathimizira mabvuto ya Ajirayeriwo. Katongedwe ka omwe adapita mbuto ya Kambise, Dariyo Wakuyamba, kadacitisambo kuti moyo ukhale wakunesa kwene-kwene kwa wanthu. Mwakusaya kupenukira, bzimwebzi bzidacitisa kuti Ajirayeri omwe adabwerera ku Jeruzalemu akhale na thupo la momwe angadasamalirira mabanja yawo. Thangwe ra mabvuto mazinji yomwe akhagumana nayo, Adjuda winango adawona kuti ikhali lini nthawe yabwino kuti akonze pomwe templo ya Yahova. — Agai 1:2.

6. Mwakubverana na Zakariya 4:6, 7, kodi ni mabvuto yanango yaponi yomwe Adjuda adagumana nayo, ndipo ni citsimikizo ciponi comwe Zakariya adawapasa?

⁶ Werengani Zakariya 4:6, 7. Kuthumizira pa mabvuto yakusaya bzinthu bza pa moyo wawo na nkhani za ndale, Adjuda adagumana pomwe na cizunzo. Mu gole la 522 AEC, anyamadulanthaka wawo adakwanisa kuwaletsa kumanga pomwe templo. Tsono Zakariya adatsimikizira Adjudawo kuti Yahova angadaphatisa basa mzimu wace wakucena kuti acose bvuto liri-lentse. Mu gole la 520 AEC, Mambo Dariyo adabvumiza Adjuda kuti apitirize kucita basa lakumanga pomwe templo ndipo adawapasa kobiri kuti zithandizire basalo. Iye adatongambo kuti maboma ya m’dzikolo yawathandize. — Ezara 6:1, 6-10.

7. Kodi Yahova adasimba tani Adjuda omwe adabwerera ku Jeruzalemu pomwe iwo adaikha basa lace pa mbuto yakuyamba?

 ⁷ Mwakuphatisa basa Agai na Zakariya, Yahova adapicira wanthu wace kuti iye angadawathandiza pokha-pokha iwo angadaikha basa lakumanga templo pa mbuto yakuyamba. (Agai 1:8, 13, 14; Zakariya 1:3, 16) Mafala ya apolofetawa yadalimbikisa kwene-kwene Adjuda. Iwo adayamba pomwe kumanga templo mu gole la 520 AEC, ndipo adamaliza basalo pomwe yakhanati kumala magole 5. Pakuti Adjuda adaikha kufuna kwa Yahova pa mbuto yakuyamba napo kuti akhagumana na mabvuto, iwo adathandizidwa na Yahovayo, sikuti mwakuthupi mokha, koma na mwauzimumbo. Ndipo bzimwebzi bzidacitisa kuti anamate Yahova mwakukondwa. — Ezara 6:14-16, 22.

8. Kodi mafala ya pa Agai 2:4 yangatithandize tani kuti tipitirize kucita kufuna kwa Mulungu? (Onani mafala ya m’nyantsi.)

⁸ Pomwe citsautso cikulu cikufendera, tikuwona kuti mpsakufunika kwene-kwene kubvera lamulo lakuti ticite basa lakupalizira. (Marko 13:10) Tsono, nthawe zinango bzingatinese kucita bwino basa lakupalizira penu tikugumana na bvuto la kusaya kobiri ayai tikutsutsidwa pa basa lakupaliziralo. Kodi n’ciyani comwe cingatithandize kuti timbaikhe Umambo bwa Mulungu pa mbuto yakuyamba? Comwe cingatithandize ni kupitiriza kukhulupira kuti “Yahova wa anyankhondo” b ali ku mbali yathu. Iye an’dzapitiriza kutithandiza tikaikha Umambo bwace pa mbuto yakuyamba ndipo bzinthu bzathu bzicibwera m’mbuyo. Ndipopa, ifepano timbacita lini mantha. — Werengani Agai 2:4.

9-10. Kodi banja linango lidawona tani kukwanisika kwa mafala yomwe Jezu adalewa pa Mateu 6:33?

⁹ Onani bzomwe bzidacitikira Oleg na Irina, c banja lomwe likutumikira ninga apainiya. Pomwe iwo adafuluka aciyenda kukathandizira gwere linango, iwo adacosedwa basa thangwe bzinthu bzikhadafika pakunesa mu dzikolo. Napo kuti iwo adamala nthawe akuphata lini basa, iwo adakwanisa kuwona Yahova akuwathandiza thangwe akhambathandizidwa na abale na mpfumakazi. Kodi n’ciyani comwe cidawathandiza pomwe akhagumana na mabvuto yamweya? Oleg, omwe pakuyamba akhadasunama, adalewa kuti: “Kukhala wakutanganika pa basa lakupalizira kudatithandiza kuti tiwone kuti mpsiponi bzinthu bzakufunika kwene-kwene pa moyo.” Pomwe iye na mkazace akhapitiriza kunyang’ana basa, iwo akhapitirizambo kucita basa lakupalizira.

¹⁰ Ntsiku ibodzi pomwe iwo adabwerera kucokera mu upalizi, adazindikira kuti xamwali wawo akhadacita ulendo bwa makilometro 160  kuti awabweresere mapasta mawiri ya bzakudya. Oleg adalewa kuti: “Pa ntsiku imweyire tidakwanisa pomwe kuwona kuti Yahova akhatisamalira pabodzi na gwere lace. Tina citsimikizo centse cakuti Yahova ambayebwa lini atumiki wace, napo kuti mabvuto yawoyo yangawoneke ninga kuti yangamale lini.” — Mateu 6:33.

11. Kodi tingadikhirire ciyani tikaikha kufuna kwa Mulungu pa mbuto yakuyamba?

¹¹ Yahova akufuna kuti tipitirize kucita basa lomwe limbapulumusa wanthu azinji kuti akhale anyakupfunza wace. Ninga momwe  ndime 7 yalatizira, Agai adauza wanthu wa Mulungu kuti ayambe pomwe kucita basa lakupambulika, ndipo bzimwebzi bzikhali ninga kuti akukonza pomwe papsa aliserse ya templo. Iwo angadacita bzimwebzi, Yahova adawapicira kuti angadawapasa “bzisimbo.” (Agai 2:18, 19) Ifepanombo tingakhale na citsimikizo cakuti Yahova an’dzatisimbambo tikambaikha basa lomwe iye adatipasa pa mbuto yakuyamba.

12. Thangwe ranyi Ezara na Adjuda winango akhafunikira cikhulupiro cakulimba?

¹² Mu gole la 468 AEC, Ezara adacita ulendo na grupo laciwiri la Adjuda kucoka ku Babiloniya aciyenda ku Jeruzalemu. Ezara na wanthuwo akhafunikira kukhala na cikhulupiro kuti akwanise kucita ulendo bumwebo. Njira zomwe iwo adapita nazo zikhali zakugopswa, ndipo akhadanyamulambo oro na prata izinji yomwe akhadapasidwa kuti akakonzere pomwe templo. Pinango wanthu angadafuna kuwabera bzinthubzo mu njira. (Ezara 7:12-16; 8:31) Kuthumizira bzimwebzi, iwo adazindikira kuti mzinda wa Jeruzalemu ukhali lini wakukhotcerereka. Mu mzindamo mukhakhala lini wanthu azinji, ndipo litsito na misuwo ikhafunikira kukonzedwa pomwe. Kodi tingapfunze ciyani na Ezara bza kupitiriza kuthemba Yahova?

13. N’ciyani cidathandiza Ezara kuti akhulupire Yahova? (Onani mafala ya m’nyantsi.)

¹³ Ezara adakwanisa kuwona momwe Yahova adathandizira wanthu wace pa nthawe yakunesa. Pomwe gole la 484 AEC likhanati kufika, Ezara akhakhala ku Babiloniya pomwe Mambo Asuwero adaikha lamulo lakuti Adjuda wentse omwe akhakhala mu Utongi bwa Perisiya apfudzidwe. (Esteri 3:7, 13-15) Moyo wa Ezara na wa Adjuda wentse ukhali pa ngozi! Pomwe iwo adadziwa bzimwebzi, adakhala na thupo kwene-kwene. “M’bzigawo bzentse,” iwo adasiya kudya ndipo adalira pomwe akhakumbira thandizo kwa Yahova. (Esteri 4:3) Ndokumbukirani momwe Ezara pabodzi na Adjuda anzace adabvera pomwe wale omwe akhadakonza ciwembo cimweci adaphedwa m’mbuto mwa iwo! (Esteri 9:1, 2) Bzomwe Ezara adagumana nabzo pa nthawe imweyire bzidamukonzekeresa pa mabvuto yomwe angadadzagumana nayo kutsogolo. Ndipo bzidamucitisambo kuti athembe mphanvu yomwe Yahova anayo yakukhotcerera wanthu wace. d

14. N’ciyani comwe mpfumakazi inango idapfunza pomwe idathandizidwa na Yahova pa nthawe zakunesa?

¹⁴ Tikambathandizidwa na Yahova pa nthawe zakunesa, bzimwebzi bzimbacitisa kuti timukhulupire kwene-kwene. Mbatiwoneni ciratizo ca Anastasia, omwe ambakhala ku mabvadzuwa kwa Europa. Iye adasiya kuphata basa kuti aleke kupitira nkhani za ndale. Iye adati: “Ndikhanati kugumana kale na bvuto lakusaya kobiri.” Iye adalewa pomwe kuti: “Ndidapemba kwa Yahova ndipo ndidakwanisa kuwona kuti iye akhandisamalira. Ntsiku inango ndikadzasaya pomwe basa, nin’dzacita lini thupo. Penu Baba wangu wa kudzulu akundisamalira lero, iye an’dzandisamalirambo kutsogolo.”

15. N’ciyani cidathandiza Ezara kuti apitirize kukhulupira Yahova? (Ezara 7:27, 28)

 ¹⁵ Ezara adawona kuti Yahova akhamuthandiza. Pomwe Ezara adakumbukira momwe Yahova akhadamuthandizira kale m’mbuyo, bzimwebzi bzidacitisa kuti iye amukhulupire kwene-kwene Yahovayo. Onani mafala yakuti: “Boko la Yahova Mulungu wangu likhali pa inepano.” (Werengani Ezara 7:27, 28.) Ezara adalewa mafala mabodzi-bodziya maulendo yakukwana 6 m’bukhu lomwe lina dzina lace. — Ezara 7:6, 9; 8:18, 22, 31.

16. Ni lini pomwe tingakwanise kuwona kuti Yahova akutithandiza? (Onani cithunzi-thunzi.)

¹⁶ Yahova angatithandize tikakhala tikugumana na mabvuto. Mwa ciratizo, tikakumbira patrau wathu kuti atipase nthawe kuti tikwanise kuyenda ku mtsonkhano wa cigawo ayai kumukumbira kuti acinje nthawe yomwe timbaphata basa kuti tikwanise kumbagumanika pa mitsonkhano, timbakhala tikumupasa mpata Yahova kuti atithandize pa moyo wathu. Tingadabwe kwene-kwene tikawona momwe bzinthu bzikufambira pa moyo wathu. Ndipo bzimwebzi bzin’dzacitisa kuti timukhulupire kwene-kwene Yahova.

17. Kodi Ezara adalatiza tani kubzicepesa pa nthawe zakunesa? (Onani cithunzi-thunzi pa tsamba lakuyamba.)

¹⁷ Ezara adapemba kwa Yahova acimukumbira thandizo. Nthawe zentse Ezara akawona kuti bzinthu bzamuwandira pa udindo bomwe akhanabo, akhapemba mwakubzicepesa kwa Yahova. (Ezara 8:21-23; 9:3-5) Bzomwe Ezara akhacita bzidacitisa kuti wanthu winango amuthandize na kutewezerambo bzomwe iye akhacitabzo. (Ezara 10:1-4) Tikakhala tikucita thupo na bzinthu bzathu bzakuthupi ayai momwe tingakhotcererere banja lathu, tin’funika kupemba kwa Yahova.

18. N’ciyani cingalimbise cikhulupiro cathu kwa Yahova?

¹⁸ Tikambakumbira thandizo la Yahova mwakubzicepesa na kubvuma thandizo la abale na mpfumakazi zathu, bzimwebzi bzin’dzacitisa kuti timukhulupire kwene-kwene Yahova. Erika, omwe ni mai wa wana atatu, nthawe zentse akhana cikhulupiro cakuti Yahova angadamusamalira napo kuti adagumana na bzinthu bzizinji bzakuipa. Mu nthawe yakucepa, mwana wace omwe akhali m’mimba pabodzi na bayace adafa. Pakulewa bza bzinthu bzomwe bzidamucitikirabzo, iye adati: “Imwepo mungakwanise lini kudziwa momwe Yahova angakuthandizireni. Thandizolo lingabwere mu njira yomwe mukhaidikhirira lini. Ndidakwanisa kuwona kuti mipembo yangu ikhatawiridwa m’mafala na m’bzicito bzomwe axamwali wangu akhambacita. Inepano ndikambafotokozera anzangu bzomwe bzikundicitikira, bzin’dzakhala bzakupusa kwene-kwene kuti iwo andithandize.”

19-20. Kodi tikupfunza ciyani na Adjuda omwe alibe kubwerera ku Jeruzalemu?

¹⁹ Tingakwanisembo kupfunza bzizinji na Adjuda omwe alibe kukwanisa kubwerera ku Jeruzalemu. Winango wa iwo alibe kukwanisa kubwerera thangwe rakuti akhali wakukalamba, akhaduwala ayai thangwe ra mphitca zinango za m’banja mwawo. Napo bziri tenepo, iwo mwakukondwa adathandiza wale omwe akhabwerera mwa kuwapasa bzinthu bzizinji bzomwe angadabziphatisa basa pa kumanga templo. (Ezara 1:5, 6) Pinango pomwe padapita magole 19 kucokera pomwe grupo lakuyamba la Adjuda lidafika ku Jeruzalemu, wale omwe adasala ku Babiloniya adapitiriza kumbatumiza mphaso ku Jeruzalemu. — Zakariya 6:10.

²⁰ Napo kuti tingakwanise lini kucita bzizinji pa kutumikira Yahova, tingakhale na citsimikizo centse cakuti iye ambawona ndipo ambatenda nyongo yentse yomwe timbacita pa kumutumikira. Kodi timbadziwa tani bzimwebzi? Mu ntsiku za Zakariya, Yahova adakumbira Zakariyayo kuti akonze korowa ya oro na prata yomwe ikhadatumizidwa na Adjuda omwe akhali ku Babiloniya. (Zakariya 6:11) “Korowayo” ingadacitisa kuti wanthu “akumbukire” bza mphaso zomwe Adjuda omwe akhali ku Babiloniya adatumiza. (Zakariya 6:14) Tingakhale na citsimikizo centse cakuti Yahova an’dzayebwa lini nyongo yomwe timbacita pa kumutumikira pa nthawe zakunesa. — Ahebereu 6:10.

21. N’ciyani comwe cin’dzatithandiza kupitiriza kukhulupira Yahova napo kuti tikudziwa lini bzomwe bzingabwere kutsogolo?

²¹ N’cadidi kuti tin’pitiriza kugumana na mabvuto mazinji mu ntsiku zakumalizira zino, ndipo bzinthu kutsogolo kuno bzingafike pa kuipiratu. (2 Timotio 3:1, 13) Tsono, tin’funika lini kucita thupo. Kumbukirani mafala yomwe Yahova adauza wanthu wace mu ntsiku za mpolofeta Agai. Iye adati: “Ndinamwe . . . Lekani kugopa.” (Agai 2:4, 5) Ifepanombo tingakhale na citsimikizo cakuti Yahova an’dzakhala nafe tikapitiriza kucita bzomwe tingakwanise kuti ticite bzomwe iye ambafuna. Tikaphatisa basa bzomwe tapfunza pa mapolofesiya ya Agai, Zakariya na ciratizo ca Ezara tin’dzapitiriza kukhulupira Yahova, bziribe basa mabvuto yomwe tingadzagumane nayo kutsogolo.