1. Mbani omwe adapasa mphanvu atumiki wa Mulungu wakale-kale?

 KAZINJI-KAZINJI Fala la Mulungu likambalewa bza amuna wakukhulupirika, limbalewa kuti iwo akhali wamphanvu. Tsono napo ule omwe akhabziwona kuti akhali wamphanvu kwene-kwene, nthawe zinango akhali lini wa mphanvu. Mwa ciratizo, nthawe zinango Mambo Davide akhabziwona kukhala wamphanvu “ninga mapiri,” tsono nthawe zinango, iye “akhabva mantha.” (Salimo 30:7) Napo kuti Samusoni akhabzibva kuti akhali wamphanvu thangwe ra kuthandizidwa na mzimu wa Mulungu, iye adazindikira kuti angadasaya kuthandizidwa na mphanvu ya Mulungu “angadakhala wakusaya mphanvu ninga amuna winango.” (Atongi 14:5, 6; 16:17) Yahova ndiye omwe adapasa mphanvu atumiki wace wakukhulupirikawa.

2. Thangwe ranyi mpostolo Paulo adalewa kuti akhali wakuwofoka na wa mphanvu? (2 Akolinto 12:9, 10)

² Mpostolo Paulo adazindikira kuti akhafunika kuthandizidwa na mphanvu ya Yahova. (Werengani 2 Akolinto 12:9, 10.) Ninga tentsenefe, Paulo akhana bvuto la thanzi. (Agalatiya 4:13, 14) Nthawe zinango, iye akhaneseka kucita bzinthu bzabwino. (Aroma 7:18, 19) Ndipo nthawe zinango, iye akhakhala na thupo pabodzi na mantha ya bzomwe bzingadamucitikira. (2 Akolinto 1:8, 9) Napo bziri tenepo, pomwe Paulo akhali wakuwofoka iye adakhala wamphanvu. Mwa njira iponi? Yahova adapasa Paulo mphanvu yomwe iye akhafunikira kuti akwanise kukunda mabvuto yomwe akhagumana nayo.

3. Kodi ni mibvunzo iponi yomwe in’tawiridwa mu nkhani ino?

³ Yahova akutipicira kuti an’dzatithandizambo. (1 Pedru 5:10) Tsono kuti titambire mphanvu imweyi, ifepano tin’funika lini kundokhala tenepo. Kuti tibvesese tingayezezere tenepa. Motori ndiwo umbacitisa kuti karo ifambe. Tsono kuti karoyo ifambe bzimbafunika kuti motorista aifambise. Mwakundendemerana na bzimwebzi, Yahova ali wakukonzeka kutipasa mphanvu yomwe ifepano  tikufunikira, koma tin’funika kucita cinthu kuti titambire mphanvuyo. N’ciyani comwe Yahova wacita kuti atipase mphanvu? Ndipo n’ciyani comwe tingacite kuti titambire mphanvuyo? Tin’gumana mitawiro ya mibvunzo imweyi mwa kucezerana momwe Yahova adapasira mphanvu atumiki wace atatu wa m’Bibliya, omwe ni mpolofeta Djona, Mariya mai wace wa Jezu na mpostolo Paulo. Ndipo tiniwonambo momwe Yahova akupitirizira kupasa mphanvu atumiki wace ntsiku zino mu njira ibodzi-bodziyi.

4. Kodi n’ciyani comwe tingacite kuti titambire mphanvu kwa Yahova?

⁴ Njira ibodzi ya momwe tingatambirire mphanvu kwa Yahova ndiyo kucita mpembo. Pakutawira mipembo yathu, Yahova angatipase “mphanvu yakuposa yacibadwa.” (2 Akolinto 4:7) Tingakhalembo na mphanvu tikambawerenga Fala lace na kumbakumbukira bzomwe tawerengabzo. (Salimo 86:11) Mafala ya Yahova yomwe yali m’Bibliya ‘njamphanvu.’ (Ahebereu 4:12) Mukambapemba kwa Yahova na kuwerenga Fala lace, imwepo mun’dzatambira mphanvu yomwe mukufunikira kuti mupirire, mupitirize kukhala wakukondwa na kukwanirisa basa lomwe mukhawona kuti mungalikwanise lini. Mbatiwoneni momwe Yahova adapasira mphanvu mpolofeta Djona.

5. Thangwe ranyi mpolofeta Djona akhafunikira mphanvu?

⁵ Mpolofeta Djona akhafunika kukhala wakukhwimika. Djona akhana mantha kuyenda komwe Yahova akhadamutuma. Iye adapakira xitima ya m’madzi acithawa kuti ayende ku mbuto inango. Thangwe ra bzimwebzo, iye pabodzi na wanthu omwe akhali mu xitimamo akhafuna kufa na conzi. Pomwe wanthuwo adamuthusa m’madzi, cintsomba cikulu cidamukhudyula. Kodi mukukumbuka kuti Djona adabva tani pomwe akhali m’mimba mwa cintsomba? Kodi iye akhakumbuka kuti angadafa? Kodi iye akhakumbuka kuti Yahova wamusiya? Bzikuwonekeratu kuti Djona akhana thupo kwene-kwene.

6. Mwakubverana na Djona 2:1, 2, 7, n’ciyani cidapasa mphanvu Djona pomwe akhali m’mimba mwa cintsomba?

⁶ N’ciyani comwe Djona adacita kuti atambire mphanvu pomwe akhali m’mimba mwa cintsomba? Iye adapemba kwa Yahova. (Werengani Djona 2:1, 2, 7.) Napo kuti Djona alibe kubvera Yahova, iye adakhala na cikhulupiro cakuti Yahova angadabva mpembo wace wakulatiza kuti akungula. Djona adakumbukira mwakamderekho bzinembo bzomwe iye akhadawerenga. Thangwe ranyi tikulewa tenepoyo? Thangwe mpembo wace omwe udanembedwa mu bukhu la Djona kapitulo 2 una mafala ya m’bukhu la Masalimo. (Mwa ciratizo, ndendemezerani Djona 2:2, 5 na Salimo 69:1; 86:7.) Bzikuwonekeratu kuti Djona akhayadziwa bwino mafala yamweya. Mavesi yamweya yadapasa Djona citsimikizo cakuti Yahova angadamuthandiza. Yahova adadzamupulumusa Djona ndipo Djonayo adadzakhala wakukonzeka kucita basa liri-lentse lomwe Yahova adamuuza kuti acite. — Djona 2:10–3:4.

7-8. Kodi n’ciyani comwe m’bale munango wa ku Taiwan ambacita kuti agumane mphanvu?

⁷ Nkhani ya Djona ingatithandize tikakhala tikugumana na mabvuto mazinji. Mwa ciratizo, m’bale munango wa ku Taiwan, wakucemeredwa Zhiming, b ambaduwala-duwala. Kuthumizira bzimwebzi, wanthu wa m’banja mwace ambamuboneresa thangwe ra kukhulupira kwace Yahova. Kuti iye agumane mphanvu yakucokera kwa Yahova, ambacita mpembo na pfunziro lace la payekha. Iye adati: “Nthawe zinango ndikakhala ndikugumana na mabvuto nimbakhala na thupo kwene-kwene mwakuti bzimbandinesa kukhala wakugwa mpfuwa kuti ndikwanise kucita pfunziro langu lapandekha.” Tsono iye ambabwerera lini m’mbuyo. Iye adati:  “Cakuyamba, nimbapemba kwa Yahova. Patsogolo pace, nimbaikha aurikulare zangu m’makutu ndicimbatetekera nyimbo zathu za Umambo. Nthawe zinango, nimbaimba mwa pantsi-pantsi mpaka kubzibva kuti mtima wangu waderekha. Ndikamala nimbayamba kupfunza.”

⁸ Kucita pfunziro la payekha kwathandiza kwene-kwene Zhiming mu njira yomwe akhaidikhirira lini. Mwa ciratizo, pambuyo pa iye kucitidwa operasau, adotolo adamuuza kuti akhafunika kuikhidwa mulopa thangwe rakuti mulopa wace ukhadacepa. Pomwe Zhiming akhanati kucitidwa operasauyo, iye adawerenga nkhani ya mpfumakazi inango yomwe idagumanambo na bvuto libodzi-bodziro. Mulopa wa mpfumakaziyo ukhali ung’ono-ng’ono kwene-kwene kuposa wace. Tsono napo bziri tenepo, mpfumakaziyo iribe kubvuma kuikhidwa mulopa. Koma, iyo idalimba basi. Nkhani imweyi idamulimbisa kwene-kwene Zhiming kuti apitirize kukhala wakukhulupirika.

9. Penu imwepo mukucita thupo thangwe ra mabvuto yomwe mukugumana nayo, n’ciyani comwe mungacite? (Onani bzithunzi-thunzi.)

⁹ Pomwe imwepo mukhagumana na mabvuto, kodi mudakhala na thupo kwene-kwene mwakuti mudatazira kufotokoza momwe mukhabvera mu mpembo? Ayai, kodi imwepo mumbatazira kupfunza thangwe ra kuneta? Dziwani kuti Yahova ambabvesesa bwino mabvuto yomwe mukugumana nayo. Ndipopa kuti iye akupaseni mphanvu, mbacitani mpembo kwa iye na citsimikizo cakuti an’dzakupasani bzomwe mukufunikira napo kuti mungakwanise lini kufotokoza bzizinji. (Aefezo 3:20) Penu bzimbakunesani kuwerenga na kupfunza thangwe rakuti mukuduwala, mudaneta ayai muna thupo, imwepo mungambatetekere gravação za maaudiyo ya Bibliya ayai za mabukhu yathu manango. Imwepo mungatetekere nyimbo zathu ayai kuwona vidiyo mu webisaite yathu ya jw.org. Yahova akufuna kukupasani mphanvu ndipo iye an’dzacita bzimwebzo mukambapemba kwa iye, mukambanyang’ana mitawiro ya mipembo yanuyo m’Bibliya na mu bzinthu bzentse bzomwe iye ambakupasani.

10. Kodi abale na mpfumakazi zathu ambatipasa tani mphanvu?

¹⁰ Yahova angaphatise basa abale na mpfumakazi zathu kuti atipase mphanvu. Iwo angakhale  “mtsangalazo ukulu” pomwe tikugumana na mabvuto ayai pomwe tikucita nyongo kuti ticite basa lakunesa. (Akolose 4:10, 11) Timbafunikira axamwali maka-maka “pa nthawe ya mabvuto.” (Mimwani 17:17) Tikawofoka, abale na mpfumakazi zathu angatipase bzomwe tikufunikira, angatitsangalaze na kutilimbikisa kuti tipitirize kutumikira Yahova mwakukhulupirika. Onani momwe Mariya, mai wace wa Jezu, adalimbisidwira na wanthu winango.

11. Thangwe ranyi Mariya akhafunikira mphanvu?

¹¹ Mariya akhafunikira mphanvu kuti acite bzomwe Yahova akhafuna. Ndokumbukirani momwe iye adakhalira na thupo pomwe adapasidwa basa lakunesa kwene-kwene na anjo Gabriyeli. Mariya akhanati kulowodwa, koma iye angadadzakhala na pathupi. Iye akhanati kukhala kale na wana, tsono akhafunikira kusamalira mwana omwe angadadzakhala Mesiya. Iye akhanati kucita kale malume ya pa mphasa, koma akhafunika kumuuza Zuze kuti akhana pathupi. Bzimwebzi bzikhali bzakunesa kwene-kwene. — Luka 1:26-33.

12. Mwakubverana na Luka 1:39-45, kodi n’ciyani comwe Mariya adacita kuti atambire mphanvu yomwe akhafunikira?

¹² Kodi Mariya adapasidwa tani mphanvu kuti akwanirise basa lakupambulika na lakunesali? Iye adathemba thandizo la wanthu winango. Mwa ciratizo, iye adakumbira anjo Gabriyeli kuti amuuze bzakuthumizirika pakulewa bza basa lomwe akhadapasidwalo. (Luka 1:34) Pomwe padapita ntsiku zing’ono-ng’ono, Mariya adacita ulendo aciyenda “ku mphimpha za ku mapiri mu mzinda wa Djuda” kuti akawone wacibale wace Elizabeti. Ulendobo budakhala bwabwino kwene-kwene. Elizabeti adatenda Mariya ndipo adadzazidwa na mzimu wakucena wa Yahova kuti afotokoze polofesiya yomwe ikhalewa bza mwana omwe Mariya angadadzabereka. (Werengani Luka 1:39-45.) Mariya adalewa kuti Yahova “wacita bzinthu bza mphanvu na boko lace.” (Luka 1:46-51) Yahova adapasa mphanvu Mariya mwakuphatisa basa anjo Gabriyeli na Elizabeti.

13. N’ciyani comwe cidacitika pomwe mpfumakazi inango ya ku Bolívia idakumbira thandizo kwa abale na mpfumakazi?

¹³ Ninga Mariya, imwepo mungapasidwembo mphanvu na wanthu winango. Mpfumakazi inango ya ku Bolívia, yakucemeredwa Dasuri, ikhafunikira mphanvu imweyi. Pai wace adaduwala kwene-kwene. Ndipo matenda yawoyo yakhalibe mankhwala. Pomwe pai wacewo akhali ku xipitali, iye akhafunikira kukhala nawo pafupi. (1 Timotio 5:4) Kucita bzimwebzi kukhali lini kwakupusa. Iye adati: “Kazinji-kentse ndikhawona kuti ningadakwanisa lini kupirira.” Pakuyamba iye alibe kukumbira thandizo la munthu ali-wentse. Iye adati: “Ndikhafuna lini kupasa basa abale. Ndidakumbuka kuti ‘Yahova ndiye an’ndipasa thandizo lomwe inepano ndikufunikira.’ Tsono ndidadzazindikira kuti pomwe ndikhakhala kutali na winango, ndikhayezera kumalisa mabvuto yangu ndekha.” (Mimwani 18:1) Dasuri adanembera axamwali wace aciwafotokozera bza mabvuto yomwe iye akhagumana nayo. Iye adati: “Inepano ndikutazira kufotokoza momwe ndidalimbikisidwira na abale na mpfumakazi zangu. Iwo akhandibweresera cakudya ku xipitali ndipo akhaceza nande mavesi yakulimbisa ya m’Bibliya. Mpsabwino kwene-kwene kudziwa kuti tiri lini tekha. Tentsenefe timbacita mbali ya banja la Yahova. Ndipo abale na mpfumakazi zathu ambafuna kutithandiza kugumana bzomwe timbafunikira, kulira nafe pomwe tikubonera na kutilimbisa kuti tipitirize kutumikira Yahova pabodzi na iwo.”

14. Thangwe ranyi tin’funika kubvuma thandizo la akulu?

¹⁴ Njira ibodzi ya momwe Yahova ambatipasira mphanvu ni kuphatisa basa akulu wa gwere. Iwo ni mphaso yomwe Yahova ambaphatisa basa kuti atilimbise na kutitsangalaza. (Zaiya 32:1, 2) Ndipopa, imwepo mukakhala na thupo, fotokozerani akulu bza mabvuto yomwe mukugumana nayo. Lekani kuzeza kubvuma thandizo lomwe iwo angakupaseni. Mwakuphatisa basa iwo, Yahova angakulimbiseni.

15. Kodi ni cidikhiro ciponi comwe Akristau wentse ambakomedwa naco?

¹⁵ Mapiciro ya m’Bibliya yangatipase cidikhiro na mphanvu kuti tipitirize kutumikira Yahova. (Aroma 4:3, 18-20) Akristau winango ana cidikhiro cakukakhala na moyo wakusaya kumala kudzulu pomwe winango ana cidikhiro ca kudzakhala na moyo wakusaya kumala m’Paraizo wakudeka pa dziko la pantsi pano. Thangwe ra cidikhiro cimweci, timbakwanisa kupirira mabvuto yakusiyana-siyana, kupalizira mafala yabwino ya Umambo na kuthandiza abale na mpfumakazi zathu. (1 Atesalonika 1:3) Cidikhiro cibodzi-bodzici cidalimbisambo mpostolo Paulo.

16. Thangwe ranyi mpostolo Paulo akhafunikira mphanvu?

¹⁶ Mpostolo Paulo akhafunikira mphanvu. Mu tsamba lomwe iye adanembera abale wa ku Kolinto, Paulo adabziyezezera na combo ca dongo. Iye ‘akhadapanikizidwa,’ ‘nzeru zikhadamumalira,’ ‘akhazunzidwa,’ na ‘kugwesedwa pantsi.’ Moyo wace ukhalidi pa ngozi. (2 Akolinto 4:8-10) Paulo adanemba mafala yamweya pa ulendo bwace bwacitatu ninga misiyonario. Pomwe iye adanemba mafalaya, akhadziwa lini kuti bzimwebzi bzingadamucitikira. Tsono patsogolo pace, iye adadzagumana na mabvuto makulu. Wanthu adamumenya, adaikhidwa m’kawoko ndipo adalubzika na xitima ya m’madzi.

17. Mwakubverana na 2 Akolinto 4:16-18, n’ciyani cidapasa mphanvu Paulo kuti apirire mabvuto?

¹⁷ Paulo adakhala na mphanvu ya kupirira thangwe rakuti akhakumbukira bza cidikhiro comwe iye akhanaco. (Werengani 2 Akolinto 4:16-18.) Iye adauza Akristau wa ku Kolinto kuti napo kuti thupi lace ‘likhamala,’ iye angadalekerera lini kuti bzimwebzi bzimuwofokese. Paulo akhakumbukira bza tsogolo lace. Cidikhiro comwe Paulo akhanaco cakukakhala na moyo kudzulu ‘cikhayenda cicithumizirika’ mwakuti iye akhali wakukonzeka kupirira mabvuto yali-yentse kuti akakwanise kutambira mabaibai yace. Paulo akhakumbukira bza cidikhiro cimweci, ndipo bzimwebzi bzikhacitisa kuti ‘unthu bwace bwa mkati bukhalisidwe bupsa ntsiku na ntsiku.’

18. Kodi Tihomir na banja lace ambalimbisidwa tani na cidikhiro comwe anaco ca kutsogolo?

 ¹⁸ M’bale munango wa ku Bulgária, wakucemeredwa Tihomir, adalimbisidwa kwene-kwene na cidikhiro comwe anaco ca kutsogolo. M’mbuyomu, mng’ono wace, Zdravko, adafa thangwe ra ngozi ya pa mseu. Bzimwebzi bzidamusunamisa kwene-kwene Tihomir. Kuti akwanise kupirira bzimwebzi, iye pabodzi na banja lace ambakumbukira bza cilamuso. Iye adati: “Timbacezerana komwe tin’dzamugumana Zdravko, cakudya comwe tin’dzamuphikira, wanthu omwe tin’dzawacemera pa festa yace yakuyamba iye akadzalamuka na bzomwe tingadzamuuze pakulewa bza ntsiku zakumalizira.” Tihomir adalewa kuti kukumbukira bza cidikhiro comwe anaco kumbapasa mphanvu banja lace kuti lipitirize kupirira na kudikhirira nthawe yomwe Yahova an’dzalamusa m’bale waceyo.

19. Kodi n’ciyani comwe imwepo mungacite kuti mulimbise cidikhiro canu? (Onani cithunzi-thunzi.)

¹⁹ Kodi imwepo mungalimbise tani cidikhiro canu? Mwa ciratizo, penu cidikhiro canu n’cakudzakhala pa dziko la pantsi, werengani bzomwe Bibliya limbalewa pakulewa bza Paraizo mucimbabzikumbukira. (Zaiya 25:8; 32:16-18) Kumbukirani momwe moyo un’dzakhalira mu dziko lipsa. Kumbukirani kuti muli m’mwemo. Kodi mukuwona yani? Kodi ni nyimbo ziponi zomwe mukubva? Kodi mukubzibva tani? Kuti mubvesese bwino momwe bzin’dzakhalira, werengani bziratizo bzomwe bzimbafotokozedwa m’mabukhu yathu bzakulewa bza Paraizo, ayai onani mavidiyo ya nyimbo yakuti Moyo m’Dziko Lipsa Lomwe Likubwera, Dziko Lipsa Lafendera, ayai Kumbukirani Nthawe Yomwe Bzinthu Bzin’dzakhala Bwino. Tikambakhala na nthawe ya kukumbukira bza cidikhiro cathu, mabvuto yathu yan’dzakhala ‘yakanthawe na mang’ono.’ (2 Akolinto 4:17) Cidikhiro comwe Yahova adakupasani cin’dzakuthandizani kupirira mabvuto yomwe mukugumana nayo.

20. Kodi n’ciyani cingatipase mphanvu pomwe tawofoka?

²⁰ Napo ticikhala kuti tawofoka “timbakwanisa kukhala na mphanvu thangwe ra Mulungu.” (Salimo 108:13) Yahova adakupasani bzomwe mukufunikira kuti mutambire mphanvu yace. Tenepo, mukafuna thandizo kuti mukwanise kucita basa lomwe mwapasidwa, kuti mupirire mabvuto yomwe mukugumana nayo ayai kuti mukhale wakukondwa, mbapembani kwa Yahova ndipo mbacitani pfunziro lanu la pamwekha. Bvumani thandizo la abale na mpfumakazi zanu, mbakhalani na nthawe ya kumbakumbukira bza cidikhiro comwe munaco ca kutsogolo. Na tenepo, imwepo mun’dzalimbikisidwa “na mphanvu zikulu za Mulungu mwakubverana na ulemerero bwace bukulu, kuti mukwanise kulimbikira, kupirira na kukondwa.” — Akolose 1:11.