NKHANI YAKUPFUNZA 30
NYIMBO 36 Tikhotcerere Mitima Yathu
Bzomwe Tingapfunze na Amambo wa Ajirayeri
“Imwepo mun’dzakwanisa . . . kuwona kusiyana komwe kulipo pakati pa munthu wakulungama na munthu wakuipa na pakati pa munthu omwe ambatumikira Mulungu na omwe ambamutumikira lini.” — MALAKIYA 3:18.
CAKULINGA CA NKHANIYI
Kupfunza momwe Yahova akhawonera amambo wa Ajirayeri kuti tidziwe bzomwe iye akufuna kuti ifepano ticite pa kumunamata ntsiku zino.
1-2. Kodi Bibliya limbatiuza ciyani bza amambo winango wa Ajirayeri?
BIBLIYA limbalewa bza amuna wakupitirira 40 omwe adatonga ninga amambo wa Ajirayeri. a Iro limbafotokoza padeca bzinthu bzabwino na bzakuipa bzomwe winango wa iwo adacita. Ndipo limbafotokozambo bzinthu bzakuipa bzomwe amambo wabwino adacita. Mwa ciratizo, pakulewa bza Mambo Davide, Yahova adalewa kuti: “Mtumiki wangu Davide . . . adateweza malango yangu na mtima wentse na kucita bzomwe mpsabwino bzokha-bzokha pamaso pangu.” (1 Amambo 14:8) Tsono, Davideyo adacita upombo na mkazi wa mwenekaciro ndipo adacitisa kuti mwamuna wa mkaziyo aphedwe ku nkhondo. — 2 Samuyeli 11:4, 14, 15.
2 Bibliya limbatiuzambo bza amambo omwe adacita bzinthu bzabwino pakuyamba tsono patsogolo pace adadzasiya kukhala wakukhulupirika kwa Yahova. M’bodzi wa iwo ni Robuwamu. Iye “adacita bzinthu bzakuipa kwene-kwene” pamaso pa Yahova. (2 Nkhani 12:14) Napo bziri tenepo, Robuwamu adacita bzinthu bzinango bzabwino. Mwa ciratizo, iye adabvera Yahova pomwe adamuuza kuti aleke kukamenyana na madzinza 10 ya Ajirayeri ndipo aciwasiya kuti abzitonge okha. Ndipo adakonzambo mizinda mizinji kuti akhotcerere wanthu wa Mulungu kwa anyamadulanthaka wawo. — 1 Amambo 12:21-24; 2 Nkhani 11:5-12.
3. Kodi ni mbvunzo uponi wakufunika omwe tingabzicite, ndipo tin’cezerana ciyani mu nkhani ino?
3 Bzimwebzi bzikuticitisa kukhala na mbvunzo uyu: Penu amambo wa Ajirayeri adacita bzinthu bzabwino na bzakuipa, n’ciyani comwe cikhacitisa Yahova kukwanisa kuwona kuti mambo akhali wakukhulupirika ayai ne? Mtawiro wa mbvunzo umweyu un’dzatithandiza kubvesesa bzinthu bzomwe tin’funika kucita kuti tikondwese Yahova. Mu nkhani ino, tin’pfunza bzinthu bzitatu bzomwe bzidathandiza Yahova kuwona penu mambo akhali wabwino ayai wakuipa. Cakuyamba, iye akhawona penu mamboyo akhamufuna na mtima wentse, caciwiri, penu akhakungula na mtima wentse akakhala kuti waphonya na cacitatu, penu akhathandizira kunamata kwa cadidi.
AMAMBO OMWE AKHAFUNA YAHOVA NA MTIMA WENTSE
4. Kodi n’kusiyana kuponi komwe kukhalipo pakati pa amambo wakukhulupirika na wakusaya kukhulupirika?
4 Amambo omwe akhakondwesa Yahova akhamutumikira na mtima wentse. b Mambo wabwino Jewosafati “adanyang’ana Yahova na mtima wentse.” (2 Nkhani 22:9) Pakulewa bza Josiya, Bibliya limbalewa kuti: “Palibe mambo munango omwe adabwerera kwa Yahova na mtima wace wentse, . . . ninga momwe iye adacitira.” (2 Amambo 23:25) Tsono, tani pakulewa bza Salomau omwe patsogolo pace adacita bzinthu bzakuipa? Bibliya limbalewa kuti: “Iye alibe kutumikira Yahova, Mulungu wace, na mtima wentse.” (1 Amambo 11:4) Pa kulewambo bza mambo wakusaya kukhulupirika Abiya, Bibliya limbalewa kuti: “Iye akhatumikira lini Yahova na mtima wentse.” — 1 Amambo 15:3.
5. Kodi kutumikira Yahova na mtima wentse kumbathandauza ciyani?
5 Tsono, kodi kutumikira Yahova na mtima wentse kumbathandauza ciyani? Munthu omwe ambatumikira Yahova na mtima wentse ambandomutumikira lini thangwe ra kuti ndibzo bzomwe an’funika kucita. M’mbuto mwace, iye ambatumikira Yahova thangwe rakuti ambamufuna na kumulemekeza. Ndipo ambapitiriza kucita bzimwebzo kwa moyo wace wentse.
6. Kodi tingacite ciyani kuti tipitirize kutumikira Yahova na mtima wentse? (Mimwani 4:23; Mateu 5:29, 30)
6 Kodi tingatewezere tani amambo wakukhulupirika ticipitiriza kutumikira Yahova na mtima wentse? Mwa kumbatcenkha cinthu ciri-centse comwe cingatitazise kukhala wakukhulupirika kwa Yahova. Mwa ciratizo, tin’funika kusamala na bzomwe timbawona na kucita pa nthawe yomwe tikucita masenzeka. Tin’funikambo kucita bzinthu mwakusamala ticisankhula bwino axamwali kuti tileke kumbawona kobiri ninga cinthu cakufunika kwene-kwene pa moyo wathu. Tikazindikira kuti pana cinthu cinango comwe cikuwofokesa uxamwali bwathu na Yahova, tin’funika kucita ciri-centse kuti ticinje momwe timbakumbukira na bzomwe timbacita kuti bzinthu bzimwebzi bzileke kutiluzisa lufoyi lomwe tinalo kwa Yahova. — Werengani Mimwani 4:23; Mateu 5:29, 30.
7. Thangwe ranyi tin’funikira kutcenkha makhalidwe ya m’dzikoli?
7 Tin’funika lini kulekerera kuti mtima wathu ugawike. Tin’funika kusamala kuti tileke kukumbuka kuti pakuti tikucita bzinthu bzizinji pakutumikira Yahova bzinthu bzakuipa bzingaticitikire lini. Tiyezezere kuti imwepo mwapukuta m’nyumba mwanu. Imwepo mungasiye lini msuwo na majanela bzidafunguka uko kukucita conzi thangwe m’nyumbamo mungadzale pfumbi. Mpsibodzi-bodzimbo na uxamwali bwathu na Yahova. Tin’funika kucita bzizinji sikuti kundocita bzinthu bzomwe bzingaticitise kukhala pa uxamwali na Yahova basi. Ninga momwe tingalekerere lini kuti pfumbi lipite m’nyumba mwathu. Tin’funikambo kucita cinthu ciri-centse comwe tingakwanise kuti “mphuwe” ya m’dzikoli ireke kuwofokesa uxamwali bwathu na Yahova. — Aefezo 2:2.
AMAMBO OMWE ADAKUNGULA PIKADO ZAWO
8-9. Kodi n’ciyani comwe Mambo Davide na Mambo Ezekiya adacita pomwe adapasidwa malango? (Onani pa tsamba lakuyamba.)
8 Ninga momwe yalatizira ndime yakuyamba, Mambo Davide adacita pikado ikulu kwene-kwene. Tsono pomwe mpolofeta Natani adamuuza momwe Yahova adabvera na pikado yomwe iye akhadacitayo, Davide adabzicepesa ndipo adakungula. (2 Samuyeli 12:13) Mafala yomwe Davide adanemba pa Salimo 51 yambalatiza kuti iye akhadakungula na mtima wentse pa bzomwe iye akhadacitabzo. Davide alibe kundonamizira kuti akhadakungula na cakulinga cakuti aleke kupasidwa cirango. — Salimo 51:3, 4, 17, onani mafala yomwe yali padzaulu pa kapituloyi.
9 Mambo Ezekiya adaphonyerambo Yahova. Bibliya limbalewa kuti: “Mtima wace udabzikuza, bzomwe bzidacitisa kuti ukali bwa Yahova bufikire iye, Djuda na Jeruzalemu.” (2 Nkhani 32:25) Thangwe ranyi Ezekiya adabzikuza? Pinango-pentse thangwe rakuti Yahova adamucitisa kuti akhale wakudala, adamuthandiza kukunda Asiriya ayai thangwe rakuti adamupoza matenda. Pinango-pentse limweri lidakhala thangwe lomwe lidamucitisa kuti alatize Ababiloniya bzinthu bzentse bzomwe akhanabzo thangwe rakuti akhali wakubzikuza. Mpolofeta Zaiya adamuuza kuti Yahova akhadakalipa thangwe ra bzomwe iye akhadacitabzo. (2 Amambo 20:12-18) Tsono ninga Davide, Ezekiya adabzicepesa ndipo adakungula. (2 Nkhani 32:26) Thangwe ra bzimwebzi, Yahova adamuwona ninga mambo wakukhulupirika omwe “adapitiriza kucita bzomwe mpsabwino.” — 2 Amambo 18:3.
Mambo Davide pabodzi na Mambo Ezekiya adabzicepesa pambuyo pa kupasidwa malango thangwe ra pikado zomwe iwo adacita (Onani ndime 8-9)
10. Kodi n’ciyani comwe Amaziya adacita pomwe adapasidwa malango?
10 Mwakusiyana na Davide na Ezekiya, Mambo Amaziya wa ku Djuda adacita bzomwe mpsabwino “tsono alibe kubzicita na mtima wentse.” (2 Nkhani 25:2) Kodi n’ciyani comwe iye adaphonya? Pambuyo pa Yahova kumuthandiza kukunda Aedomu, Amaziya adayamba kunamata mirungu yawo. c Pomwe mpolofeta wa Yahova adayenda kukalewalewa naye, iye alibe kubva bzomwe mpolofetayo adalewa ndipo adamuthamangisa. — 2 Nkhani 25:14-16.
11. Mwakubverana na 2 Akolinto 7:9, 11, n’ciyani comwe tin’funika kucita kuti Yahova atilekerere? (Onani bzithunzi-thunzi.)
11 Kodi tikupfunza ciyani na bziratizobzi? Tikacita pikado, tin’funika kukungula pikado zathuzo ticicita ciri-centse kuti tileke kuzibwerezera pomwe. Tsono tani tikatambira malango kwa akulu wa gwere pa cinthu comwe cikuwoneka kuti n’cing’ono? Tin’funika lini kukumbuka kuti Yahova akutifuna lini ayai kuti akuluwo akutiwenga. Napo amambo wa Ajirayeri akhafunikirambo kupasidwa malango. (Ahebereu 12:6) Tikapasidwa malango, tin’funika (1) kubvuma malangoyo mwakubzicepesa, (2) kucinja na (3) kupitiriza kutumikira Yahova na mtima wentse. Tikakungula pikado zathu Yahova an’dzatilekerera. — Werengani 2 Akolinto 7:9, 11.
Tikapasidwa malango, tin’funika (1) kubzicepesa, (2) kucinja na (3) kutumikira Yahova na mtima wentse (Onani ndime 11) f
IWO ADATHANDIZIRA KUNAMATA KWACADIDI
12. N’cinthu ciponi comwe cikhacitisa kuti amambo wakukhulupirika akhale wakusiyana na amambo wakusaya kukhulupirika?
12 Amambo omwe Yahova adawawona kuti akhali wakukhulupirika adathandizira kunamata kwacadidi. Ndipo iwo adalimbikisambo wanthu wa Mulungu kuti acite bzibodzi-bodzibzo. N’cadidi kuti iwo adaphonyambo ninga momwe tawonera. Tsono, iwo adatumikira Yahova yekha ndipo adacita nyongo yakupfudza bzifanikiso m’mizinda yawo. d
13. Thangwe ranyi Yahova adawona Mambo Akabe ninga wakusaya kukhulupirika?
13 Tsono tani bza amambo omwe Yahova adawawona kuti akhali wakusaya kukhulupirika? Ni bzinthu lini bzentse bzomwe iwo adacita bzomwe bzikhali bzakuipa. Mwa ciratizo, pambuyo pa Mambo Akabe kubva kuti Nabote akhadaphedwa thangwe ra iye, iye adabzicepesa ndipo adasunama kwene-kwene. (1 Amambo 21:27-29) Iye adamanga mizinda ndipo adakunda anyamadulanthaka azinji acikhotcerera Ajirayeri. (1 Amambo 20:21, 29; 22:39) Tsono pana cinthu cakuipa comwe Akabe adacita. Thangwe ra kubvera mkazace, iye adacitisa kuti wanthu anamate bzifanikiso. Ndipopa, iye alibe kukungula. — 1 Amambo 21:25, 26.
14. (a) Thangwe ranyi Yahova adawona Mambo Robuwamu ninga wakusaya kukhulupirika? (b) N’cinthu ciponi comwe amambo azinji wakusaya kukhulupirika akhaphonya?
14 Mbaticezeraneni bza mambo winango wakusaya kukhulupirika wakucemeredwa Robuwamu. Ninga momwe yafotokozera ndime 2, iye adacita bzinthu bzizinji bzabwino mu umambo bwace. Tsono pomwe iye adakhala na mphanvu adasiya kubvera Lamulo la Yahova ndipo adayamba kunamata mirungu yakunama. (2 Nkhani 12:1) Kuthumizira bzimwebzi, iye akhanamata Yahova acimbanamatambo mirungu yakunama. (1 Amambo 14:21-24) Ni Robuwamu lini na Akabe yekha omwe adasiya kunamata Mulungu. Kulewa cadidi, pana amambo azinji omwe adasiya kunamata Yahova ndipo adalimbikisambo winango kuti acitembo bzibodzi-bodzibzo. Bzomwe bzikhacitisa Yahova kuwona kuti mambo akhali wabwino ayai ne ni bzomwe mamboyo akhacita pakunamata kwacadidi.
15. Thangwe ranyi kuthandizira kunamata kwacadidi n’kwakufunika kwa Yahova?
15 Thangwe ranyi nkhani yakunamata ikhali yakufunika kwa Yahova? Cakuyamba amambowo ndiwo omwe akhana udindo bwakuthandiza wanthu wa Mulungu kuti amunamate. Cinango n’cakuti wanthu akanamata mirungu yakunama bzimwebzi bzikhacitisa kuti acite pikado na kucitirambo bzinthu bzakuipa anzawo. (Ozeya 4:1, 2) Kuthumizira bzimwebzi, amambo pabodzi na Ajirayeri akhadabzipereka kwa Yahova. Bibliya limbalewa kuti pomwe iwo akhasiya kukhala wakukhulupirika kwa Yahova acinamata mirungu yakunama bzikhali ninga kucita upombo. (Jeremiya 3:8, 9) Munthu akacita upombo ambakhala wakusaya kukhulupirika kwa mwanzace wa m’banja ndipo bzimwebzi bzimbacitisa kuti mwanzaceyo asuname kwene-kwene. Mwakundendemerana na bzimwebzi atumiki omwe mbakubzipereka kwa Yahova akanamata mirungu yakunama ambamusunamisa kwene-kwene Yahovayo. e — Deuteronomiyo 4:23, 24.
16. Kwa Yahova, n’ciyani comwe cimbasiyanisa munthu wakulungama na wakuipa?
16 Kodi tingapfunze ciyani na bzimwebzi? Ifepano tin’funika kukhala wakutsimikiza kutcenkha kunamata mirungu yakunama. Koma tin’funika nthawe zentse kumbanamata Yahova ticicita bzizinji pakumutumikira. Mpolofeta Malakiya adalewa bzomwe bzimbasiyanisa munthu wakuipa na wabwino. Iye adanemba kuti: “Imwepo mun’dzakwanisa . . . kuwona kusiyana komwe kulipo pakati pa munthu wakulungama na munthu wakuipa na pakati pa munthu omwe ambatumikira Mulungu na omwe ambamutumikira lini.” (Malakiya 3:18) Tikufuna kuti Yahova atiwone ninga wanthu wakulungama, ndipopa tin’dzacita bzinthu mwakusamala ticileka kulekerera kuti bzakuphonya bzathu bzititazise kutumikira Yahova. Thangwe kusiya kutumikira Yahovako ni pikado pomwe.
17. Thangwe ranyi tin’funika kusamala pomwe tikusankhula munthu omwe tingamange naye banja?
17 Penu imwepo mukukumbuka bza kulowola ayai kulowodwa, mafala ya Malakiyaya yangakuthandizeni kusankhula bwino munthu omwe mungamange naye banja. Munthuyo angakhale na makhalidwe yabwino, tsono penu iye ambatumikira lini Yahova, kodi angawonedwe na Yahovayo ninga munthu wakulungama? (2 Akolinto 6:14) Kodi imwepo mukalowola ayai kulowodwa naye munthuyo an’dzakuthandizani kukhala wakukhulupirika kwa Yahova? Kumbukirani kuti akazi omwe Salomau akhadalowola pinango akhana makhalidwe yabwino. Tsono, iwo akhatumikira lini Yahova ndipo adamupandusambo Salomau aciyamba kunamata mirungu yakunama. — 1 Amambo 11:1, 4.
18. N’ciyani comwe abereki an’funika kupfunzisa wana wawo?
18 Abereki, imwepo mungaphatise basa bziratizo bza amambo wa m’Bibliya kuti muthandize wana wanu kufuna kutumikira Yahova. Athandizeni kubvesesa kuti amambo omwe Yahova akhakomedwa nawo mbale omwe akhamunamata na kulimbikisambo wanthu winango kuti amunamatembo. Apfunziseni wana wanu kuwona kuti bzinthu ninga kuwerenga Bibliya, kuyenda ku mitsonkhano na kupalizira bzimbakuthandizani kwene-kwene kukhala pa uxamwali bwakulimba na Yahova ndipo mpsakufunika kwene-kwene pa moyo. (Mateu 6:33) Mukasaya kucita tenepo, wana wanu an’dzatumikira Yahova thangwe ra kuti imwepo ndimwe “Mboni.” Ndipo bzimwebzi bzin’dzawacitisa kuyamba kuwona kuti kutumikira Yahova n’kwakufunika lini ayai an’dzasiya kumutumikirako.
19. Kodi n’cidikhiro ciponi comwe ciripo kwa wale omwe adasiya kutumikira Yahova? (Onani kwadru yakuti “ Imwepo Mungabwerere kwa Yahova!”)
19 Munthu akasiya kutumikira Yahova, kodi bzimwebzi bzin’funa kulewa kuti munthuyo angadzakhale lini pomwe xamwali wa Yahova? Ne, thangwe iye angakungule aciyamba pomwe kutumikira Yahova. Kuti bzimwebzi bzikwanisike, iye an’funika kubzicepesa acibvuma thandizo lomwe angapasidwe na akulu wa gwere. (Tiyago 5:14) Kuti akhale pomwe pa uxamwali na Yahova, iye an’funika kucita nyongo!
20. Tikatewezera amambo wakukhulupirika, kodi Yahova an’dzatiwona tani?
20 Kodi tapfunza ciyani na amambo wa Ajirayeri? Tingakhale ninga amambo omwe adakhala wakukhulupirika kwa Yahova tikatumikira Yahovayo na mtima wentse. Tin’funika kupfunza na bzakuphonya bzathu, kukungula na kucinja. Ndipo tin’funikambo kukumbukira kuti cinthu cakufunika ndico kunamata Yahova yekha basi. Imwepo mukapitiriza kukhala wakukhulupirika kwa Yahova, iye an’dzakufunani ninga munthu omwe ambacita bzinthu bzakulungama.
NYIMBO 45 Bzakukumbuka bza Mtima Wangu
a Mu nkhani ino, mafala yakuti “amambo wa Ajirayeri” yakuthandauza amambo wentse omwe adatonga wanthu wa Mulungu bziribe basa penu adatonga umambo bwa madzinza mawiri ya Djuda, umambo bwa madzinza 10 ya Ajirayeri ayai umambo bwa madzinza yentse 12.
b KAFOTOKOZEDWE KA MAFALA YANANGO: Kazinji-kazinji m’Bibliya fala lakuti “mtima” limbakhala likulewa bza unthu bwathu bwa mkati, bzikhumbo bzathu, makumbukidwe yathu, bzomwe timbacita, bzakulinga bzomwe timbakhala nabzo na bzomwe timbafuna kukwanirisa.
c Mu nthawe zimwezire, amambo omwe akhali lini Ajirayeri kazinji-kazinji akhanamata mirungu ya wanthu omwe akhawakunda.
d Mambo Aza adacita pikado zikulu-zikulu. (2 Nkhani 16:7, 10) Tsono Bibliya limbalewa kuti adacita bzinthu bzabwino pamaso pa Yahova. Pomwe mpolofeta wa Yahova adamutsimula, pakuyamba Aza alibe kumutetekera, tsono patsogolo pace iye adakungula. Yahova adawona bzinthu bzabwino bzomwe iye akhacita sikuti bzakuphonya bzace. Aza adatumikira Yahova yekha ndipo adacita bzomwe angadakwanisa kuti amalise kunamata kwakunama mu umambo bwace. — 1 Amambo 15:11-13; 2 Nkhani 14:2-5.
e Malamulo mawiri yakuyambirira mu Lamulo la Mozeji yakhalatiza kuti munthu akhafunikira lini kunamata munthu mwanzace ayai cinthu ciri-centse koma akhafunikira kunamata Yahova yekha basi. Bzimwebzi bzikulatiziratu kuti kunamata Yahova kukhali kwakufunika kwene-kwene. — Ekisodo 20:1-6.
f BZOMWE BZIKUCITIKA PA CITHUNZI-THUNZI: Mkulu wacitswaka akuthandiza m’bale omwe ana bvuto la kumwa. M’baleyo wabvuma malangoyo mwakubzicepesa, wacinja bzinthu pa moyo wace ndipo akupitiriza kutumikira Mulungu mwakukhulupirika.
