NKHANI YAKUPFUNZA 29
NYIMBO 121 Tin’funika Kubziretsa
Khalani Mudapenya Kuti Muleke Kuyezedwa
“Pitirizani kukhala mudapenya ndipo mbapembani nthawe zentse kuti muleke kuyezedwa.” — MATEU 26:41.
CAKULINGA CA NKHANIYI
Nkhani ino in’tikumbusa kuti mpsakufunika kucita nyongo kuti tileke kucita pikado ndipo in’tikumbusambo bza kukhala tceru kuti tileke kucita bzinthu bzomwe bzingatifikise pakucita pikado ikulu.
1-2. (a) Kodi Jezu adacenjeza ciyani ateweri wace? (b) Thangwe ranyi ateweri wa Jezu adamuthawa? (Onani bzithunzi-thunzi.)
“N’CADIDI kuti mtima ukufuna tsono thupi ndakutepa.” a (Mateu 26:41b) Na mafala yamweya, Jezu adalatiza kuti ambabvesesa kuti ifepano ndife wakuperewera. Tsono, mafala yamweya yakuticenjezambo kuti tin’funika lini kumbabzithemba kwene-kwene. Pomwe Jezu akhanati kulewa mafalaya, anyakupfunza wace akhadalewa mwakutsimikiza kuti angadamusiya lini. (Mateu 26:35) Bzomwe iwo akhafuna kucitabzo bzikhali bzabwino. Tsono, iwo alibe kuzindikira kuti mayezo yaciwabwerera, mphanvu zawo zakucitira bzinthu bzabwino zingacepe acimalizira kucita bzinthu bzakuphonyeka. Ndipopa, Jezu adawacenjeza kuti: “Pitirizani kukhala mudapenya ndipo mbapembani nthawe zentse kuti muleke kuyezedwa.” — Mateu 26:41a.
2 Bzakupasa ntsisi mpsakuti anyakupfunzawo adatazira kupitiriza kukhala adapenya. Pomwe Jezu adamangidwa, kodi iwo adakhala naye ayai adacita mantha acithawa? Pakuti iwo alibe kukhala tceru, adacita bzinthu bzomwe iwo akhadalewa kuti angadacita lini, bzomwe ni kuthawa Jezu. — Mateu 26:56.
Jezu adacenjeza anyakupfunza wace kuti akhale adapenya acitcenkha kucita pikado, tsono iwo adamuthawa (Onani ndime 1-2)
3. (a) Kuti tipitirize kukhala wakukhulupirika kwa Yahova, thangwe ranyi tin’funika kutcenkha kumbabzithemba? (b) Kodi tin’cezerana ciyani mu nkhani ino?
3 Tin’funika lini kumbabzithemba kwene-kwene. N’cadidi kuti ndife wakutsimikiza kuleka kucita cinthu ciri-centse comwe cingasunamise Yahova. Tsono pakuti ndife wakuperewera, tikabzithemba bzingakhale bzakupusa kuyezedwa ticicita bzinthu bzomwe mpsakuphonyeka. (Aroma 5:12; 7:21-23) Mwakusaya kudikhiririka, mayezo yangatibwerere pa nthawe yomwe bzingakhale bzakupusa kugwa nayo. Kuti tipitirize kukhala wakukhulupirika kwa Yahova na kwa Mwana wace, tin’funika kuteweza malango ya Jezu ya kupitiriza kukhala tidapenya kuti tileke kuyezedwa ticifika pakucita pikado. Nkhani ino in’tithandiza kucita bzimwebzi. Cakuyamba tiniwona bzinthu bzomwe tin’funika kucita nabzo mphole. Patsogolo pace, tiniwona momwe tingakhalire wakupenya kuti tileke kucita pikado. Pakumalizira tin’dzawona momwe tingapitirizire kukhala tidapenya.
PITIRIZANI KUKHALA MUDAPENYA PA BZINTHU BZOMWE BZIMBAKUYEZANI KAWIRI-KAWIRI
4-5. Thangwe ranyi mpsakufunika kutcenkha kucita pikado napo zicikhala zing’ono-zing’ono?
4 Napo pikado zinango n’zing’ono-zing’ono, izo zingatepese uxamwali bwathu na Yahova. Ndipo zingatifikise pa kucita pikado zikulu-zikulu.
5 Tentsenefe timbayezedwa kuti ticite pikado. Tsono ali-wentse wa ifepano ana bvuto linango lomwe lingakhale la kucita pikado ikulu, kukhala na khalidwe lakupswipa ayai kukhala na makumbukidwe ya dziko. Mwa ciratizo, munthu angakhale akucita nyongo yakuti aleke kucita upombo. Munango angakhale akucita nyongo kuti aleke kukhala na makhalidwe yakupswipa ninga kusenzekesa cidzo ayai kuwona pornografia. Ndipo munango angakhale akucita nyongo kuti aleke kukhala waukali, wakubzikuza ayai kucita bzinthu bzakuipa thangwe ra kugopa bzomwe wanthu winango angakumbuke. Tiyago adalewa kuti: “Munthu ali-wentse ambayezedwa na bzomwe ambakhumba ndipo bzimwebzo ni bzomwe bzimbamukwewa na kumupumpsa.” — Tiyago 1:14.
6. Kodi tin’funika kuzindikira ciyani?
6 Kodi imwepo mumbazindikira bzinthu bzomwe bzingakugweseni mwakusaya kunesa? Ni ngozi ikulu kwene-kwene kusaya kuzindikira bzinthu bzomwe bzingaticitise kufika pakucita pikado ayai kukumbuka kuti ndife wakulimba ndipo tingacite lini pikado. (1 Juwau 1:8) Kumbukirani kuti Paulo adalewa kuti napo “Akristau wakukhwima mwauzimu” angafike pakucita pikado akasiya kukhala adapenya. (Agalatiya 6:1) Tin’funika kuzindikira mbali zomwe tiribe kulimba zomwe zingatigwese mwakusaya kunesa. — 2 Akolinto 13:5.
7. Kodi tin’funika kubzikhotcerera pa bzinthu bziponi? Fotokozani.
7 Pakuti tazindikira bzinthu bzomwe bzingatiyeze ticifika pakucita pikado mwakusaya kunesa, n’ciyani comwe tin’funika kucita? Citani nyongo kuti mukwanise kukhala wakulimba mukayezedwa! Mu nthawe za m’Bibliya, mbuto yomwe ikhali yakupusa kwene-kwene kuti anyamadulanthaka apite mu mzinda wakuzunguliridwa na muro, ikhali msuwo wakupitira mu mzindamo. Ndipopa alindiri azinji akhafunika kumbakhala pa msuwopo kuti akhotcerere mzindayo. Mu njira ibodzi-bodziyi, tin’funika kukhala tceru pa bzinthu bzomwe tikudziwa kuti bzingatifikise pa kucita pikado. — 1 Akolinto 9:27.
KODI TINGAKHALE TANI WAKUPENYA?
8-9. Kodi n’ciyani comwe mulumbwana omwe adafotokozedwa pa Mimwani kapitulo 7 akhafunika kucita kuti atcenkhe kucita pikado ikulu? (Mimwani 7:8, 9, 13, 14, 21)
8 Kodi tingakhale tani wakupenya ticitcenkha pikado? Onani bzomwe tingapfunze na mulumbwana omwe ambafotokozedwa pa Mimwani kapitulo 7. Iye adacita pikado na mkazi omwe ni puta. Vesi 22 limbalewa kuti mulumbwanayo adamutewera mkaziyo “mwadzidzidzi.” Ninga momwe mavesi ya m’mbuyo yambalatizira, iye adayamba kucita bzinthu bzinango bzomwe pang’ono na pang’ono bzidamufikisa pakucita pikado.
9 N’ciyani comwe cidacitisa mulumbwanayu kuti afike pa kucita pikado? Cakuyamba, iye ‘adapita na mseu omwe [ukhali] pafupi na mphambano ya kuyenda kumui kwa mkazi’ putayo usiku. Patsogolo pace, iye adayenda kumui kwa mkaziyo. (Werengani Mimwani 7:8, 9.) Ndipo pomwe iye adawona mkaziyo, alibe kuthawa. M’mbuto mwace, iye adabvuma kumpsompsonedwa na mkaziyo ndipo adatetekera pomwe iye akhalewa bza mtsembe yaciphatano yomwe adapereka. Pinango mkaziyu adalewa bzimwebzi kuti mulumbwanayo awone ninga kuti iye ni munthu wabwino. (Werengani Mimwani 7:13, 14, 21.) Bzingadakhala kuti iye alibe kucita bzinthu bzakusaya nzerubzi angadatcenkha kucita pikado.
10. Kodi munthu angacite tani bzinthu bzakuphonyeka ninga momwe mulumbwana ule adacitira?
10 Nkhani yomwe Salomau adalewayi ikulatiza bzomwe bzingacitikire mtumiki ali-wentse wa Yahova. Iye angacite pikado ikulu ndipo patsogolo pace aciwona ninga kuti bzentse bzacitika “mwadzidzidzi” ayai angalewe kuti “ndikudziwa lini kuti bzacitika tani.” Tsono, iye akakumbukira bwino-bwino bzomwe bzacitikabzo ambakwanisa kuwona kuti pana bzinthu bzakusaya nzeru bzomwe bzamucitisa kufika pa kucita pikadoyo. Bzinthubzo bzingakhale axamwali wakuipa, masenzeka ayai bzakutsangalaza bzakuipa, mbuto zakuphonyeka zomwe ambayenda ayai mawebisaite yomwe iye ambafuna kupita. Pinango pentse iye akhadasiyambo kupemba, kuwerenga Bibliya, kuyenda ku mitsonkhano na kuyenda mu upalizi. Ninga mulumbwana omwe ambafotokozedwa pa Mimwani ule, iye alibe kucita pikadoyo “mwadzidzidzi.”
11. Kuti titcenkhe kucita pikado, n’ciyani comwe tin’funika kucita?
11 Kodi tikupfunza ciyani na nkhani imweyi? Tin’funika lini kundotcenkha kucita pikado koma tin’funikambo kutcenkha bzinthu bzentse bzomwe bzingatifikise pa kucita pikado. Bzimwebzi ndibzo bzomwe Salomau adafotokoza pomwe adamala kulewa bza mulumbwana ule pabodzi na mkazi puta ule. Pakulewa bza mkaziyo, Salomau adalewa kuti: “Lekani kupita na njira yomwe imbayenda kumui kwace.” (Mimwani 7:25) Ndipo adalewambo kuti: “Khalani kutali na iye; lekani kufendera pafupi na njira yomwe imbayendesa kumui kwace.” (Mimwani 5:3, 8) Kuti tikwanise kutcenkha pikado, tin’funika kutcenkha bzinthu bzomwe bzingaticitise kufika pakucita pikadoyo. b Bzimwebzi bzikuthandauza kuti napo bzinthu bzomwe mpsakuphonyeka lini kwa Akristau, tin’funika kubzitcenkha tikazindikira kuti bzingatifikise pa kucita bzinthu bzakuphonyeka. — Mateu 5:29, 30.
12. Kodi ni cakusankhula ciponi comwe Djobi adacita, ndipo cidamuthandiza tani kuti atcenkhe kucita pikado? (Djobi 31:1)
12 Kuti titcenkhe kucita bzinthu bzomwe bzingatifikise pa kucita pikado tin’funika kukhala tidapenya. Bzimwebzi ndibzo bzomwe Djobi adacita. Iye ‘adacita mpangano na maso yace’ kuti aleke kunyang’anisisa mkazi na cikhumbo cakuipa. (Werengani Djobi 31:1.) Kucita bzomwe iye akhadasankhulabzo kungadamuthandiza kutcenkha kucita bzinthu bzomwe bzingadamufikisa pa kucita pikado. Ifepanombo tingasankhule kutcenkha kucita cinthu ciri-centse comwe cingatifikise pa kucita pikado.
13. Thangwe ranyi tin’funika kucita mphole pa bzomwe timbakumbuka? (Onani bzithunzi-thunzi.)
13 Cinthu cinango comwe tin’funika kucita ndico kukhotcerera makumbukidwe yathu. (Ekisodo 20:17) Wanthu winango ambakumbuka kuti mpsakuphonyeka lini kukumbukira kuti akucita cinthu cinango cakuipa akasaya kudzacicitadi. Tsono makumbukidwe yamweya ngakuphonyeka. Munthu akafuna kucita cinthu comwe n’cakuphonyeka ndipo akapitiriza kukumbukira bza cinthuco iye ambadzafika pakucicita. Iye akacita bzimwebzi bzin’dzakhala bzakunesa kwene-kwene kutcenkha kucita bzinthu bzomwe mpsakuphonyeka. N’cadidi kuti nthawe zinango tingakhale na makumbukidwe yakuphonyeka. Bzimwebzi bzikacitika, cinthu cakufunika kwene-kwene ndico kukumbukiriratu mwakamfulumize bzinthu bzomwe mpsabwino. Tikacita bzimwebzo timbatcenkha kucita pikado thangwe timbalekerera lini kuti makumbukidwe yakuphonyeka yakule yacitifikisa pakucita pikado ikulu. — Afilipi 4:8; Akolose 3:2; Tiyago 1:13-15.
Tin’funika kutcenkha cinthu ciri-centse comwe cingatifikise pa kucita pikado (Onani ndime 13)
14. N’cinthu ciponi comwe cingatithandize kutcenkha kucita pikado?
14 N’cinthu ciponi cinango comwe tingacite kuti titcenkhe kucita pikado? Tin’funika kutsimikizira kuti nthawe zentse tin’dzagumana phindu tikapitiriza kubvera malamulo ya Yahova. Nthawe zinango bzingatinese kukumbuka ayai kubva ninga momwe Yahova akufunira, tsono tikacita nyongo yakucita bzimwebzi tin’dzakhala wakukondwa kwene-kwene.
15. Kodi kufuna bzomwe mpsabwino kun’dzatithandiza tani kuleka kucita pikado?
15 Tin’funika kucita nyongo kuti timbakumbuke bzinthu bzabwino. Tikapfunza ‘kuwenga comwe n’cakuipa [na] kufuna comwe n’cabwino,’ tin’dzakhala wakutsimikiza kucita bzabwino ticitcenkha kucita bzinthu bzomwe bzingatifikise pa kucita pikado. (Amose 5:15) Tikakhala na makumbukidwe yabwino tin’dzakwanisa kulamba tikayezedwa kucita bzinthu bzakuipa napo bzicicitika pa nthawe yomwe tikhaidikhirira lini.
16. Kodi kucita bzinthu bzauzimu kungatithandize tani kupitiriza kukhala tidapenya? (Onani bzithunzi-thunzi.)
16 Kodi ifepano tingakhale tani na makumbukidwe yabwino? Tingakhale nayo tikambamala nthawe ikulu tikucita bzinthu bzauzimu. Tikakhala tiri pa mitsonkhano ayai tikupalizira timbalimbisa cikhumbo cathu cakufuna kukondwesa Yahova. Ndipo bzimbakhala bzakunesa pa nthawe imweyo kuyezedwa ticifika pakucita bzinthu bzakuipa. (Mateu 28:19, 20; Ahebereu 10:24, 25) Tikambawerenga Bibliya na kupfunza Fala la Mulungu ticimbakumbukira bzomwe tikuwerengabzo, timbalimbisa lufoyi lathu lakucita bzomwe mpsabwino ticimbawenga bzomwe mpsakuipa. (Djoswa 1:8; Salimo 1:2, 3; 119:97, 101) Kumbukirani kuti Jezu adauza ateweri wace kuti: “Mbapembani nthawe zentse kuti muleke kuyezedwa.” (Mateu 26:41) Tikambapemba kwa Baba wathu wakudzulu timbamupasa mwayi kuti atithandize, ndipo timbakhalambo wakutsimikiza kucita ciri-centse kuti timukondwese. — Tiyago 4:8.
Kucita bzinthu bzauzimu kungatithandize kutcenkha kucita pikado (Onani ndime 16) c
PITIRIZANI KUKHALA MUDAPENYA
17. Kodi ni bvuto liponi lomwe Pedru adapitiriza kukhala nalo?
17 Ifepano tingakwanise kutcenkha bzinthu bzinango bzomwe bzingatifikise pa kucita pikado. Tsono napo bziri tenepo pana bzinthu bzinango bzomwe pangamale nthawe ikulu kwene-kwene kuti tibzikunde. Kumbukirani ciratizo ca mpostolo Pedru. Thangwe ra kugopa wanthu, iye adalamba Jezu katatu-kentse. (Mateu 26:69-75) Pedru akhawona ninga kuti akunda bvuto limwelire thangwe mwakukhwimika iye adapalizira bza Jezuyo mu Sinedriyo. (Mabasa 5:27-29) Tsono pomwe padapita magole, iye adasiya kudya na wanthu omwe akhali lini Adjuda “thangwe akhagopa wanthu omwe akhadacita mgwatidwe.” (Agalatiya 2:11, 12) Bvuto la Pedru likhadabwerera pomwe. Pinango-pentse bvuto lacero likhalibe kumaliratu.
18. Kodi n’ciyani comwe cingacitike na bvuto lomwe tikhakumbuka kuti talikunda?
18 Ifepano tingagumanembo na bvuto libodzi-bodziri. Mwa njira iponi? Ninga Pedru tingalimbane na bvuto lomwe tikhakumbuka kuti tikhadalikunda kale. Mwa ciratizo, m’bale munango adalewa kuti: “Ndikhadasiya kuwona pornografia kwa magole 10 ndipo ndikhatsimikizira kuti ndalikunda bvuto limweri. Tsono kulewa cadidi bvuto langulo likhalibe kumala.” M’baleyo alibe kubwerera m’mbuyo. Iye adazindikira kuti ntsiku iri-yentse akhafunika kucita nyongo kuti alimbane na bvuto lacero nakuti akhafunika kupitiriza kucita bzimwebzo kwa moyo wace wentse mu dziko lakuipali. Na thandizo la mkazace pabodzi na akulu wa gwere, iye akucita nyongo ikulu kwene-kwene kuti aleke kuwona pomwe pornografia.
19. N’ciyani comwe tingacite penu pana bvuto lomwe tikanati kukwanisa kulikunda?
19 Kodi n’ciyani comwe tingacite kuti bvuto lomwe tikanati kulikunda lileke kutifikisa pakucita cinthu cakuphonyeka? Tingakwanise kucita bzimwebzi tikateweza bzomwe Jezu adalewa bzakuti: “Pitirizani kukhala mudapenya.” Napo pa nthawe yomwe mungabzibve kuti mudalimba pitirizani kutcenkha bzinthu bzomwe bzingakufikiseni pa kucita pikado. (1 Akolinto 10:12) Pitirizani kucita bzinthu bzomwe bzidakuthandizani kale kukunda bvutolo. Cinembo ca Mimwani 28:14 cimbalewa kuti: “An’kondwa ni munthu omwe ambakhala wakupenya nthawe zentse.” — 2 Pedru 3:14.
PHINDU LOMWE TIMBAKHALA NALO TIKAPITIRIZA KUKHALA TIDAPENYA
20-21. (a) Kodi ni bzisimbo bziponi bzomwe tin’dzakhala nabzo tikapitiriza kukhala tidapenya ticitcenkha kucita pikado? (b) Tikacita mbali yathu, n’ciyani comwe Yahova an’dzacitambo? (2 Akolinto 4:7)
20 Tikapitiriza kukhala tidapenya kuti titcenkhe kucita pikado, bzinthu bzin’dzatifambira bwino. Napo kuti kucita pikado kungaticitise kukhala wakukondwa mu “nthawe yakucepa” koma kubvera malamulo ya Yahova kun’dzaticitisa kukhala wakukondwa mpaka kale-kale. (Ahebereu 11:25; Salimo 19:8) Tikulewa tenepo thangwe rakuti tidalengedwa mu njira yakuti timbateweze malamulo yace. (Genesesi 1:27) Tikakhala na moyo omwe umbakondwesa Yahova timbakhala na cikumbu-mtima cakucena ndipo kutsogolo tin’dzakhala na moyo wakusaya kumala. — 1 Timotio 6:12; 2 Timotio 1:3; Djuda 20, 21.
21 N’cadidi kuti “thupi ndakutepa.” Tsono bzimwebzi bzikuthandauza lini kuti palibe bzomwe tingacite kuti tikunde bvuto lomwe tinalo. Yahova ngwakukonzeka kutipasa mphanvu tikafunikira. (Werengani 2 Akolinto 4:7.) Kumbukirani kuti ni mphanvu yakuposa yacibadwa yomwe Mulungu ambatipasa. Ifepanombo tin’funika kucita bzentse bzomwe tingakwanise kuti tikwanise kukunda bvuto lomwe tinalo. Tikacita mbali yathu tingakhale na citsimikizo cakuti Yahova an’dzatawira mipembo yathu ndipo an’dzatipasa mphanvu yomwe tikufunikira. (1 Akolinto 10:13) Inde, na thandizo la Yahova tingapitirize kukhala tidapenya ticitcenkha kucita pikado.
NYIMBO 47 Mbapembani kwa Yahova Nsiku Zense
a KAFOTOKOZEDWE KA MAFALA YANANGO: Fala lakuti “mtima” lomwe Jezu adalilewa pa Mateu 26:41 limbathandauza cikhumbo cathu cakufuna kucita bzinthu bzabwino. Ndipo pomwe iye adalewa bza “thupi” akhafuna kulewa bza kuperewera kwathu. Tsono nthawe zinango napo tikufuna kucita bzomwe mpsabwino, tikasaya kusamala tingacite bzinthu bzomwe Bibliya limbalewa kuti mpsakuphonyeka.
b Munthu omwe wacita pikado angagumane nfundo zakuthandiza mu bukhu lakuti Khalani na Moyo Wakukondwa Mpaka Kale-Kale! pfunziro 57 nfundo 1-3 na mu nkhani yakuti “Nyang’anisani Kutsogolo” mu Ntsanza ya Mulindiri, ya Novembro 2020, matsa. 27-29, ndi. 12-17.
c BZOMWE BZIKUCITIKA PA CITHUNZI-THUNZI: M’bale akuwerenga vesi la ntsiku ku macibese, akuwerenga Bibliya pomwe akupuma pa nthawe yakudya midiya, ndipo ali pa mitsonkhano ya pakati pa sumana.
