1-2. Kodi Zadoki akhali yani? (1 Nkhani 12:22, 26-28)

 NDOKUMBUKIRANI kuti mukuwona thimu la amuna wakupitirira 340 000 omwe akonkhana kuti aikhe Davide kuti akhale mambo. Kwa ntsiku zitatu amuna amwewa akupitiriza kukhala m’phiri la minyala pafupi na ku Hebroni. Iwo akukomedwa, akuceza acimbaseka ndipo akuimba nyimbo zakutumbiza Yahova. (1 Nkhani 12:39) Pakati pa amuna amwewa pana tswaka linango lakucemeredwa Zadoki. Wanthu azinji akumuwona lini tsono Yahova akumuwona ndipo akufuna kuti tidziwe kuti Zadoki akhalipombo pamwepo. (Werengani 1 Nkhani 12:22, 26-28.) Kodi Zadoki akhali yani?

² Zadoki akhali wantsembe omwe akhaphata basa pabodzi na Mkulu wa Antsembe Abiyatari. Mulungu adapasa Zadoki nzeru na luso lakubvesesa kufuna kwace. (2 Samuyeli 15:27) Wanthu akhambakumbira malango ya nzeru kwa Zadoki. Iye akhalimbo mwamuna wakukhwimika. Mu nkhani ino, tin’pfunza momwe Zadoki adalatizira kuti akhali wakukhwimika.

3. (a) Thangwe ranyi atumiki wa Yahova an’funika kukhala wakukhwimika? (b) Kodi tin’cezerana ciyani mu nkhani ino?

³ Mu ntsiku zakumalizira zino, Sathani akucita ciri-centse kuti adzonge cikhulupiro cathu kwa Yahova. (1 Pedru 5:8) Ndipopa tin’funika kukhala wakukhwimika kuti tikwanise kupirira mpaka pomwe Yahova adzapfudze Sathani pabodzi na dziko lakuipali. (Salimo 31:24) Mbatiwoneni njira zitatu za momwe tingatewezerere kukhwimika kwa Zadoki.

THANDIZIRANI UMAMBO BWA MULUNGU

4. Thangwe ranyi atumiki wa Yahova an’funika kukhala wakukhwimika kuti athandizire Umambo bwa Mulungu? (Onani cithunzi-thunzi.)

⁴ Ninga atumiki wa Yahova, timbathandizira Umambo bwace na mtima wentse, tsono kucita bzimwebzi kumbafunika kukhwimika. (Mateu 6:33) Mwa ciratizo, mu dziko lakuipali timbafunika kukhala wakukhwimika kuti ticite bzinthu mwakubverana na mitemo ya  Yahova na kupalizira mafala yabwino ya Umambo. (1 Atesalonika 2:2) Pakuti dzikoli ndakugawanika thangwe ra nkhani za ndale, tin’funika kukhala wakukhwimika kuti tileke kupitira nkhani za ndalezo. (Juwau 18:36) Atumiki azinji wa Yahova ambaneseka kugumana kobiri, ambamenyedwa ayai kuikhidwa m’kawoko thangwe ra kusaya kupitira nkhani za ndale ayai kuyenda ku nkhondo.

5. Thangwe ranyi Zadoki akhafunika kukhala wakukhwimika kuti athandize Davide?

⁵ Zadoki alibe kuyenda ku Hebroni kuti akandosekerere umambo bwa Davide. Iye adatenga bzifuzo bzace bzakumenyera nkhondo ndipo akhali wakukonzeka kumenya nkhondo. (1 Nkhani 12:38) Iye akhali wakukonzeka kuyenda ku nkhondo pabodzi na Davide na kukhotcerera Ajirayeri kwa anyamadulanthaka wawo. Pinango Zadoki akhadziwa lini kumenya bwino nkhondo, ndipopa iye akhafunika kukhala wakukhwimika.

6. Kodi n’ciyani cidathandiza Zadoki kukhala wakukhwimika? (Salimo 138:3)

⁶ Kodi wantsembe Zadoki adapfunza kuponi kukhala wakukhwimika? Iye adakhala pabodzi na amuna azinji omwe akhali wamphanvu na wakukhwimika. Bzikuwonekeratu kuti iye adapfunza na ciratizo ca amuna amwewa. Mwa ciratizo, pakuti Davide akhali mtsogoleri na mcikunda wakukhwimika, Ajirayeri wentse akhafuna kumuikha kuti akhale mambo. (1 Nkhani 11:1, 2) Davide akafuna kumenyana na anyamadulanthaka wace, nthawe zentse akhambathemba Yahova. (Salimo 28:7; Werengani Salimo 138:3.) Zadoki adapfunzambo na amuna wamphanvu ninga Jehoyada na mwana wace Benaya, omwe akhali mcikunda, ndipo adapfunzambo na atsogoleri 22 wa madzinza omwe akhathandizira Davide. (1 Nkhani 11:22-25; 12:26-28) Amuna wentsenewa akhafunisisa kuikha Davide kuti akhale mambo na kumukhotcerera.

7. (a) Kodi tingapfunze ciyani na bziratizo bza wanthu wakukhwimika wa ntsiku zino? (b) Kodi mwapfunza ciyani na ciratizo ca m’bale wakucemeredwa Nsilu omwe alatizidwa mu vidiyoyi?

⁷ Ifepano timbakhalambo wakukhwimika tikambakumbukira momwe wanthu winango adakhalira wakukhwimika kuti apitirize kukhala  wakukhulupirika kwa Yahova na Umambo bwace. Pomwe Mambo wathu Jezu Kristu akhali pa dziko la pantsi pano, iye adalamba na mtima wentse kupitira nkhani za ndale za m’dziko la Sathaniri. (Mateu 4:8-11; Juwau 6:14, 15) Iye nthawe zentse adathemba Yahova kuti akhale wakukhwimika kuti acite bzinthu bzabwino. Mu ntsiku zathu zino, tina bziratizo bzakusiyana-siyana bza maswaka yomwe yadalamba kuyenda ku nkhondo ayai kupitira nkhani za ndale. Tani imwepo muciwerenga nkhani zimwezi mu webisaite yathu ya jw.org? a

THANDIZANI ABALE WANU

8. Kodi ni pa nthawe iponi yomwe akulu angafunike kukhwimika kuti athandize abale na mpfumakazi?

⁸ Wanthu wa Yahova ambafuna kuthandizana. (2 Akolinto 8:4) Tsono nthawe zinango, kucita bzimwebzi kumbafuna kukhwimika. Mwa ciratizo, kukacitika nkhondo, akulu ambazindikira kuti abale na mpfumakazi akufunikira kulimbisidwa na kuthandizidwa, ndipo pinango-pentse kuthandizidwa mwauzimu ayai mwakuthupi. Akulu ambafuna abale na mpfumakazi zawo, ndipopa iwo ambacita bzomwe angakwanise kuti apase abale na mpfumakazi zawo bzomwe akufunikira, napo kuti kucita bzimwebzi kungaikhe moyo wawo pa ngozi. (Juwau 15:12, 13) Iwo akacita bzimwebzi, ambakhala akutewezera ciratizo ca kukhwimika kwa Zadoki.

9. Mwakubverana na 2 Samuyeli 15:27-29, n’ciyani comwe Davide adauza Zadoki kuti acite? (Onani cithunzi-thunzi.)

⁹ Onani momwe Zadoki adathandizira abale wace pa nthawe zakunesa. Mwana wa Davide, Abisalomu, akhafuna kupha Davideyo kuti iye akhale mambo. (2 Samuyeli 15:12, 13) Davide akhafunika kucoka ku Jeruzalemu mwakamfulumize! Iye adakuwira atumiki wace, aciti: “Mbatithaweni, pakuti palibe ne na m’bodzi wa ifepano omwe angapulumuke kuna Abisalomu!” (2 Samuyeli 15:14) Pomwe Davide na atumiki wace akhacoka ku Jeruzalemu, iye adazindikira kuti akhafunika kusiya munthu kuti ambamuuze bzomwe Abisalomuyo akhafuna kucita. Na tenepo, Davide  adatuma Zadoki pabodzi na antsembe winango mu mzindamo kuti iwo akakhale azondi. (Werengani 2 Samuyeli 15:27-29.) Iwo akhafunikira kucita bzinthu mwakusamala kwene-kwene. Kucita bzimwebzi kukhali kuikha moyo pa ngozi. Abisalomu akhali munthu wakuipa na wakubzifuna yekha omwe adaphindukira pai wace caiwo. Ndokumbukirani bzomwe Abisalomu angadamucita Zadoki pabodzi na antsembe anzacewo bzingadakhala kuti iye wazindikira kuti iwo akhali azondi wakukhotcerera Davide!

10. Kodi Zadoki pabodzi na anzace adakhotcerera tani Davide?

¹⁰ Davide adakumbira Zadoki pabodzi na xamwali wace munango wakukhulupirika wakucemeredwa Husai kuti amuthandize pa bzomwe iye akhafuna kucita. (2 Samuyeli 15:32-37) Husai adanamizira kuti akhali ku mbali ya Abisalomu ndipo adamupasa malango ya momwe angadaphatira Davide, ndipo bzimwebzi bzingadapasa nthawe Davideyo kuti akwanise kukonzekera acithawa. Patsogolo pace, Husai adauza Zadoki na Abiyatari bzomwe iye akhadauza Abisalomu. (2 Samuyeli 17:8-16) Iwo adadziwisa Davide bza nkhaniyo. (2 Samuyeli 17:17) Na thandizo la Yahova, Zadoki pabodzi na antsembe winangowo adacita basa lakufunika kwene-kwene lakukhotcerera moyo wa Davide. — 2 Samuyeli 17:21, 22.

11. Kodi tingatewezere tani ciratizo ca Zadoki pomwe tikuthandiza abale wathu?

¹¹ Kodi tingakhale tani wakukhwimika ninga Zadoki pa nthawe zomwe abale wathu ali pa ngozi ndipo tikukumbiridwa kuti tikawathandize? (1) Bverani malango. Pa nthawe zimwezi, mpsakufunika kwene-kwene kupitiriza kukhala wakuphatana. Mbabverani malango ya mthambi ya kwanuko. (Ahebereu 13:17) Akulu nthawe zentse an’funika kumbawerenga malango yomwe yambalewa bza momwe angakonzekerere malengwa ya pantsi na bzomwe angadzafunikire kucita malengwayo yakacitika. (1 Akolinto 14:33, 40) (2) Khalani wakukhwimika ndipo citani bzinthu mwakusamala. (Mimwani 22:3) Pomwe mukanati kucita cinthu, yambani mwakumbuka. Lekani kundobziikha pa ngozi mwakusaya mathangwe yakubveseseka. (3) Thembani Yahova.  Kumbukirani kuti Yahova akufuna kuti imwepo na abale wanu mukhale wakukhotcerereka. Iye angakuthandizeni kuti mukwanise kuthandizambo abale wanu mwakukhotcerereka.

12-13. Kodi mwapfunza ciyani na nkhani ya Viktor na Vitalii? (Onani cithunzi-thunzi.)

¹² Onani bzomwe adalewa Viktor na Vitalii, abale awiri omwe akhambapereka cakudya na madzi kwa abale na mpfumakazi ku Ucrânia. Viktor adalewa kuti: “Tidanyang’ana cakudya ku mbuto iri-yentse. Kazinji-kazinji tikhabva kulira kwa mpfuti pafupi na ifepanopo. M’bale munango adapereka cakudya ca mu loja yace. Cakupereka cimweci cidathandiza apalizi azinji kwa ka nthawe. Pomwe tikhapakiza cakudyaco m’karo yathu, bomba lidagwa pafupi na pomwe tikhalipo pa mtantho wa mametro 20. Ntsiku yentseneyo ndikhambadandaulira Yahova kuti andithandize kukhala wakukhwimika kuti ndipitirize kuthandiza apalizi.”

¹³ Vitalii adalewambo kuti: “Ifepano tikhafunika kukhala wakukhwimika kwene-kwene. Inepano ndidacita ulendo bwakuyamba bwa maora 12. Ndikhapemba kwa Yahova mu njira mwentse.” Vitalii akhali wakukhwimika tsono adacitambo bzinthu mwakusamala. Iye adati: “Ndidapitiriza kukumbira nzeru kwa Yahova na kuti andithandize kuleka kucita bzinthu bzomwe bzingadatibweresera ngozi. Ndidafambisa karo m’miseu yomwe ikhadabvumizidwa na boma basi. Cikhulupiro cangu cidalimba kwene-kwene pomwe ndidawona momwe abale na mpfumakazi akhaphatira basa pabodzi. Iwo adacosa bzinthu bzomwe bzikhaphingiza mseu, adacita mtsonkha-mtsonkha acilongedza bzinthu m’karo ndipo adatipasa cakudya, bzakubvala na mbuto yakugona pa ulendobo.”

PITIRIZANI KUKHALA WAKUKHULUPIRIKA KWA YAHOVA

14. Kodi tingabzibve tani munthu omwe timbamufuna akasiya kutumikira Yahova?

¹⁴ Bvuto linango lomwe lingakhale lakunesa kulipirira ni pomwe m’bodzi wa m’banja mwathu ayai xamwali wathu wasiya kutumikira Yahova. (Salimo 78:40; Mimwani 24:10) Imwepo mukakhala mumbamufuna kwene-kwene munthuyo, bzimbawawa ndipo bzimbakhala bzakunesa kupirira. Penu bzimwebzi bzidakucitikiranimbo kale, ciratizo ca kukhulupirika ca Davide na Zadoki cingakulimbiseni.

15. Thangwe ranyi Zadoki akhafunika kukhala wakukhwimika kuti apitirize kukhala wakukhulupirika kwa Yahova? (1 Amambo 1:5-8)

¹⁵ Zadoki adapitiriza kukhala wakukhulupirika kwa Yahova pomwe xamwali wace Abiyatari adasiya kukhala wakukhulupirika. Bzimwebzi bzidacitika kuphampha kwa utongi bwa Davide. Pomwe Davide akhadakalamba ndipo akhadasala pang’ono kufa, mwana wace Adoniya adayezera kubzikhalisa mambo napo kuti Yahova akhadasankhula kale Salomau kuti akhale mambo. (1 Nkhani 22:9, 10) Abiyatari adakhala ku mbali ya Adoniya. (Werengani 1 Amambo 1:5-8.) Mwakucita bzimwebzi, Abiyatari adasiya kukhala wakukhulupirika, sikuti kwa Davide yekha, koma na kwa Yahova! Bzikuwonekeratu padeca kuti Zadoki adasunama kwene-kwene na bzimwebzi. Iye pabodzi na Abiyatariyo akhadamala magole yakupitirira 40 akuphata basa pabodzi ninga antsembe. (2 Samuyeli 8:17) Iwo akhasamalira “Thungwa la Mpangano” pabodzi. (2 Samuyeli 15:29) Ndipo iwo adathandizira Davide kuti akhale mambo na kucita bzinthu bzizinji pabodzi pakutumikira Yahova. — 2 Samuyeli 19:11-14.

16. N’ciyani comwe cidathandiza Zadoki kuti apitirize kukhala wakukhulupirika?

¹⁶ Napo kuti Abiyatari adasiya kukhala wakukhulupirika kwa Yahova mwa kupandukira Davide, Zadoki adapitiriza kukhala wakukhulupirika kwa Yahova. Davide akhadziwa kuti Zadoki akhali munthu wakukhulupirika. Pomwe Davide adadziwa kuti Adoniya akufuna kubziikha kukhala mambo, iye adasankhula Zadoki, Natani, na Benaya kuti akadzoze Salomau kuti akhale mambo. (1 Amambo 1:32-34) Zadoki adalimbisidwa kwene-kwene na ciratizo cabwino ca atumiki winango wakukhulupirika wa Yahova, ninga Natani,  omwe adakhalambo wakukhulupirika kwa Yahova acithandizira Mambo Davide. (1 Amambo 1:38, 39) Pomwe Salomau adakhala mambo, “iye adasankhula wantsembe Zadoki kuti apite mbuto ya Abiyatari.” — 1 Amambo 2:35.

17. Kodi imwepo mungatewezere tani Zadoki penu munthu omwe mumbamufuna wasiya kutumikira Yahova?

¹⁷ Kodi imwepo mungatewezere tani Zadoki? Munthu omwe mumbamufuna akasiya kutumikira Yahova, imwepo pitirizani kukhala wakukhulupirika kwa iye. (Djoswa 24:15) Yahova an’dzakupasani mphanvu na kukuthandizani kukhala wakukhwimika kuti mucite bzinthu bzabwino. Pembani kwa Yahova ndipo pitirizani kukhala pa uxamwali bwakulimba na axamwali wanu omwe mbakukhulupirika kwa iye. Yahova ambawona kukhulupirika kwanu ndipo an’dzakusimbani thangwe ra bzimwebzi. — 2 Samuyeli 22:26.

18. Kodi mwapfunza ciyani na nkhani ya Marco na Sidse?

¹⁸ Onani bzomwe bzidacitikira Marco na mkazace, Sidse, pomwe wana wawo awiri adasiya kutumikira Yahova. Marco adalewa kuti: “Kucokera pomwe wana ambabadwa, timbawafuna kwene-kwene. Timbacita cinthu ciri-centse kuti tiwakhotcerere. Tsono iwo akasiya kutumikira Yahova, bzimbakhala bzakuwawa kwene-kwene.” Iye adalewa pomwe kuti: “Tsono Yahova ambatithandiza kupirira. Iye ambatithandiza kuti timbalimbikisane. Ine ndikasunama thangwe ra bzomwe bzidacitikabzo, mkazangu ambandilimbikisa kuti ndicite bzomwe mpsabwino, ndipo iye akasunama, inepano nimbamulimbikisambo.” Sidse adalewa kuti: “Tingadakwanisa lini kupirira bzingadakhala kuti Yahova alibe kutipasa mphanvu yomwe tikhafunikira. Inepano ndikhabzipasa mulandu, tenepo ndidamuuza Yahova momwe ndikhabvera. Pomwe padapita nthawe pang’ono, mpfumakazi inango yomwe ndikhawonana lini nayo kwa magole mazinji, idabwera pomwe pakhana inepano icindiphata pa phewa pangu ndipo idandiuza kuti: ‘Leka kubzipasa mlandu, Sidse!’ Na thandizo la Yahova, ndidapitiriza kumutumikira mwakukondwa.”

19. Kodi mwatsimikiza kucita ciyani?

¹⁹ Yahova ambafuna kuti atumiki wace wentse ambakhale wakukhwimika ninga Zadoki. (2 Timotio 1:7) Tsono, iye akufuna lini kuti ifepano timbathembe mphanvu zathu. Iye akufuna kuti timukhulupire. Na tenepo, imwepo mukagumana na bvuto lomwe mun’funika kukhala wakukhwimika, pembani kwa Yahova. Imwepo mungakhale na citsimikizo cakuti iye an’dzakuthandizani kukhala wakukhwimika ninga Zadoki! — 1 Pedru 5:10.