NKHANI YAKUPFUNZA 28
NYIMBO 123 Kubvera Mwakukhulupirika Mitemo ya Gulu la Mulungu
Kodi Mumbakwanisa Kusiyanisa Cadidi na Nkhani Zakunama?
“Khalani wakulimba . . . mumange cadidi m’ciuno mwanu ninga bande.” — AEFEZO 6:14.
CAKULINGA CA NKHANIYI
Kutipfunzisa kuti tikwanise kusiyanisa cadidi cakulewa bza Yahova comwe timbapfunza na nkhani zomwe Sathani na wanthu omwe ambatitsutsa ambamwaza.
1. Kodi cadidi cimbakucitisani kuti mubzibve tani?
WANTHU wa Yahova ambafuna cadidi comwe ambacigumana m’Fala lace. Cikhulupiro cathu cimbacokera pa cadidi comwe timbapfunzaco. (Aroma 10:17) Ifepano tidakhulupira kuti Yahova adakhazikisa gwere “lomwe limbathandizira na kukhotcerera cadidi.” (1 Timotio 3:15) Ndipo timbabvuma mwakukondwa “wale omwe akutsogolera” pakati pathu akambatifotokozera cadidi ca m’Bibliya na kutipasa malango mwakubverana na kufuna kwa Mulungu. — Ahebereu 13:17.
2. Mwakubverana na Tiyago 5:19, kodi ni ngozi iponi yomwe ingabwere pambuyo pa kupfunza cadidi?
2 Tsono napo kuti tidabvuma cadidi ndipo timbakhulupirambo kuti Mulungu ambatitsogolera mwakuphatisa basa gulu lace, ifepano tingasoceresedwe. (Werengani Tiyago 5:19.) Bzomwe Sathani akufuna mpsakuti tisiye kukhulupirira Bibliya na malango yomwe timbatambira kucokera m’gulu la Mulungu. — Aefezo 4:14.
3. Thangwe ranyi tin’funika kuphatisisa cadidi? (Aefezo 6:13, 14)
3 Werengani Aefezo 6:13, 14. Tsapanopali Sathani an’phatisa basa nkhani zakunama kuti acitise mitundu ya wanthu kuti ipandukire Yahova. (Apokalipse 16:13, 14) Ndipo tikudikhirirambo kuti Sathani an’cita ciri-centse kuti asocerese atumiki wa Yahova. (Apokalipse 12:9) Ndipopa, kuti tipitirize kubvera cadidi, tin’funika kucita ciri-centse kuti timbakwanise kusiyanisa cadidi na nkhani zakunama. (Aroma 6:17; 1 Pedru 1:22) Kuti ifepano tidzapulumuke pa citsautso cikulu tin’funika kucita bzimwebzi!
4. Kodi tin’pfunza ciyani mu nkhani ino?
4 Mu nkhani ino, tiniwona makhalidwe mawiri yomwe yangatithandize kuzindikira cadidi cakucokera m’Bibliya na kubvuma malango ya gulu la Mulungu. Tikamala tin’dzacezerana nfundo zitatu zomwe zingatithandize kuti tipitirize kukhala n’cadidi.
MAKHALIDWE YOMWE YANGATITHANDIZE KUKHALA N’CADIDI
5. Kodi kugopa Yahova kumbatithandiza tani kuzindikira cadidi?
5 Kugopa Yahova. Tikapfunza kugopa Yahova, ifepano tin’dzamufuna kwene-kwene Yahovayo mwakuti tin’dzatcenkha kucita cinthu comwe cingamusunamise. Thangwe ra kumugopako, timbafunisisa kudziwa kusiyana komwe kulipo pakati pa cabwino na cakuipa, nkhani zacadidi na zakunama, ndipo bzimwebzi bzimbaticitisa kuti tifunidwe na Yahova. (Mimwani 2:3-6; Ahebereu 5:14) Tin’funika lini kubvuma kuti kugopa munthu kukhale kukulu kwene-kwene kuposa kugopa Yahova, thangwe bzinthu bzomwe wanthu ambafuna, kazinji-kazinji Yahova ambakomedwa lini nabzo.
6. Kodi kugopa wanthu kudacitisa tani kuti atsogoleri 10 wa Ajirayeri ataze kuzindikira cadidi?
6 Tikambagopa kwene-kwene wanthu, ifepano tingapambusidwe pa cadidi. Onani ciratizo ca atsogoleri 12 omwe adatumidwa na Yahova kuti akazonde Dziko Lakupiciridwa lomwe iye akhafuna kupasa Ajirayeri. Kwa azondi 10 wale, mantha yawo yakhali makulu kwene-kwene kuposa lufoyi lomwe iwo akhanalo kwa Yahova. Iwo adauza abale wawo Ajirayeri kuti: “Tin’funika lini kuyenda kukamenyana na wanthu amwewale thangwe iwo mbamphanvu kwene-kwene kuposa ifepano.” (Numero 13:27-31) Mu kawonedwe ka wanthu, Akananiwo akhali wamphanvu kwene-kwene kuposa Ajirayeri. Tsono munthu omwe angadalewa kuti Ajirayeri angadakwanisa lini kukunda anyamadulanthaka wawo akhakumbukira lini Yahova. Ajirayeriwo akhafunika kukumbukirambo bzomwe Yahova akhadawacitira kale. Iwo angadakwanisa kuzindikira kuti mphanvu zomwe Akanani akhanazo zikhali zakucepa kwene-kwene mwakundendemezera na mphanvu zakusaya malire zomwe Yahova anazo. Mwakusiyana na azondi wakusaya kukhulupirika wale, Djoswa na Kalebe akhafuna kukondwesa Yahova. Iwo adauza wanthuwo kuti: “Penu Yahova akukomedwa nafe, kulewa cadidi an’tipitisa mu dziko lomwe akufuna kutipasalo.” — Numero 14:6-9.
7. Kodi n’ciyani comwe tingacite kuti timbagope kwene-kwene Yahova? (Onani cithunzi-thunzi.)
7 Kuti tikwanise kumbagopa Yahova, nthawe zentse tin’funika kumbakumbukira bzomwe bzimbamukondwesa tikakhala tikucita cakusankhula. (Salimo 16:8) Tikakhala tikuwerenga nkhani za m’Bibliya, tin’funika kumbabzibvunza kuti: ‘Bzimwebzi bzingadakhala bzikucitikira inepano, kodi ningadacita cakusankhula ciponi?’ Mwa ciratizo, kumbukirani kuti imwepo mukubva mafala yakutepesa yomwe azondi 10 wale adalewa. Kodi mungadakhulupira bzomwe iwo akhalewabzo thangwe ra kugopa munthu ayai lufoyi lanu kwa Yahova lakufuna kumukondwesa lingadakucitisani kuti muleke kukhala na mantha? Ajirayeri azinji alibe kuwona kuti bzomwe Djoswa na Kalebe akhawauza bzikhali bzacadidi. Thangwe ra bzimwebzi, iwo adaluza mwayi wakupita mu Dziko Lakupiciridwa. — Numero 14:10, 22, 23.
Kodi imwepo mungadakhulupira yani? (Onani ndime 7)
8. Kodi ni khalidwe liponi lomwe tin’funika kukhala nalo, ndipo thangwe ranyi?
8 Kubzicepesa. Yahova ambazimbula cadidi cace kwa wanthu wakubzicepesa. (Mateu 11:25) Thangwe ra kubzicepesa, ifepano tidabvuma kupfunza cadidi. (Mabasa 8:30, 31) Napo bziri tenepo, tin’funika kucita mphole kuti tileke kukhala wakubzikuza. Kukhala wakubzikuza kungaticitise kuyamba kuwona kuti bzomwe tikukumbuka mpsabwino kuposa nfundo za m’Bibliya na malango ya gulu la Yahova.
9. Kodi n’ciyani comwe tingacite kuti tikhale wakubzicepesa?
9 Kuti tikhale wakubzicepesa, tin’funika kukumbukira kuti ifepano ndife wana kwene-kwene tikabzindendemezera na Yahova. (Salimo 8:3, 4) Cinthu cinango comwe cingatithandize kukhala wakubzicepesa na wakupfunzisika ndico kupemba kwa Yahova. Yahova an’dzatithandiza kuti tiphatise basa nzeru zakucokera m’Fala lace, Bibliya, na za m’gulu lace m’mbuto mwakuphatisa basa nzeru zathu. Pomwe mukuwerenga Bibliya, nyang’anani nfundo zomwe zimbalatiza kuti Yahova ambafuna wanthu wakubzicepesa koma ambaipidwa na wanthu wakubzikuza. Mukapasidwa udindo buli-bwentse citani ciri-centse kuti mukhale wakubzicepesa.
KODI TINGAPITIRIZE TANI KUBVERA CADIDI?
10. Kodi Yahova adaphatisa basa yani kuti apfunzise na kutsogolera wanthu wace?
10 Pitirizani kukhulupira malango ya gulu la Yahova. Mu nthawe ya Ajirayeri, Yahova adaphatisa basa Mozeji na Djoswa kuti apase malango Ajirayeri. (Djoswa 1:16, 17) Ajirayeri akhasimbidwa pomwe akhabvuma wanthu amwewa ningati aimikiri wa Yahova Mulungu. Pomwe padapita magole mazinji, gwere lacikristau lidakhazikisidwa ndipo apostolo 12 adapereka malango ku magwere. (Mabasa 8:14, 15) Grupo limweri lidadzathumizirika pomwe akulu winango wa ku Jeruzalemu adayamba kucita mbali ya grupolo. Thangwe ra kuteweza malango ya amuna wakukhulupirikawa, “wanthu omwe akhakhulupira m’magweremo akhayenda acithumizirika ntsiku na ntsiku.” (Mabasa 16:4, 5) Mu ntsiku zathu zino, ifepano tin’dzasimbidwambo tikambateweza malango ya Yahova. Tsono kodi Yahova angabve tani tikalamba kubvera wale omwe iye awasankhula kuti atitsogolere? Tingatawire mbvunzo umweyu mwa kucezerana bzomwe bzidacitika pomwe Ajirayeri akhayendesedwa mu Dziko Lakupiciridwa.
11. Kodi n’ciyani comwe cidacitika na wale omwe akhatsutsana na Mozeji? (Onani cithunzi-thunzi.)
11 Pa nthawe inango pomwe Ajirayeri akhali mu njira yakuyenda mu Dziko Lakupiciridwa, amuna winango omwe akhana maudindo adayamba kunesana na Mozeji bza udindo bomwe iye adapasidwa na Yahova. Iwo adalewa kuti: “Wanthu wentse mbakucena sikuti Mozeji yekha, ndipo Yahova ali pakati pawo.” (Numero 16:1-3) Napo kuti bzomwe iwo adalewabzo bzikhali bzacadidi bzakuti “wanthu wentse” akhali wakucena, Yahova akhadasankhula Mozeji kuti atsogolere wanthuwo. (Numero 16:28) Napo kuti anyakupandukawo akhawona ninga kuti akutsutsana na Mozeji, iwo akhatsutsana lini na Mozejiyo, koma akhatsutsana na Yahova. Iwo alibe kukumbukira bzomwe Yahova akhafuna, koma akhandokumbukira bzomwe iwo akhafuna bzomwe ni kudziwika na kubvekera. Yahova adapha amuna wakupandukawo pabodzi na wentse omwe akhawathandizira. (Numero 16:30-35, 41, 49) Tin’funikambo kukumbukira kuti ntsiku zinombo Yahova ambakomedwa lini na wanthu omwe ambalemekeza lini makonzedwe ya gulu lace.
Kodi imwepo mungadathandizira yani? (Onani ndime 11)
12. Thangwe ranyi tingakhulupire gulu la Yahova?
12 Ifepano tingapitirize kukhulupira gulu la Yahova. Abale omwe ambatsogolera mu gulu la Yahova akawona kuti tin’funika kucinja kabvesesedwe kanango ka cadidi ca m’Bibliya, ayai ka momwe basa la Umambo likufambira, iwo ambazeza lini kucita bzimwebzo. (Mimwani 4:18) Iwo ambacita bzimwebzi thangwe cinthu cakufunika kwene-kwene kwa iwo ndico kukondwesa Yahova. Ndipo iwo ambacitambo ciri-centse kuti bzakusankhula bzomwe iwo ambacita bzicokere m’Fala la Mulungu comwe ni ciratizo comwe atumiki wentse wa Yahova ambaciphatisa basa.
13. Kodi “ciratizo ca mafala yabwino” n’ciyani, ndipo n’ciyani comwe tin’funika kucita na mapfunzisoyo?
13 ‘Pitirizani kuphatisisa ciratizo ca mafala yabwino.’ (2 Timotio 1:13) “Ciratizo ca mafala yabwino” ni mapfunziso yacikristau yomwe yambagumanika m’Bibliya. (Juwau 17:17) Bzinthu bzentse bzomwe timbakhulupira bzimbacokera pa mapfunziso yamweya. Gulu la Yahova limbatipfunzisa kuti timbakhulupire mapfunziso yamweya. Tikacita bzimwebzi, tin’dzasimbidwa.
14. Kodi n’ciyani comwe cidacitisa Akristau winango kutaza kuphatisisa “ciratizo ca mafala yabwino”?
14 Kodi n’ciyani comwe cingacitike tikapambuka pa “ciratizo ca mafala yabwino”? Mbatiwoneni ciratizo cibodzi. Mu nthawe ya Akristau wakuyambirira, bzikuwoneka kuti abale winango akhamwaza nkhani yakunama yakuti ntsiku ya Yahova ikhadafika. Pinango pakhana tsamba lomwe likhawoneka ninga kuti ni mpostolo Paulo omwe akhadanemba. M’mbuto mwakuti afufudze nkhaniyo, Akristau winango wa ku Tesalonika adakhulupira nkhaniyo ndipo adayamba kuuzambo anzawo. Iwo angadabvuma lini kunamizidwako bzingadakhala kuti adakumbukira bzomwe mpostolo Paulo adawauza pomwe akhawazungira. (2 Atesalonika 2:1-5) Paulo adacenjeza abale wacewo kuti aleke kumbakhulupira bzentse bzomwe iwo akhabva. Ndipo kuti awathandize pa bzomwe bzingadadzacitika kutsogolo, Paulo adamaliza tsamba lace laciwiri lakuyenda kwa Atesalonika na mafala yakuti: “Ine Paulo, ndikupereka kulimba, ndanemba tsambali na manja yangu caiyo; ndipo cimweci ni cizindikiro cangu. Nimbanemba tenepa m’matsamba yangu yentse.” — 2 Atesalonika 3:17.
15. Kodi tingabzikhotcerere tani ku nkhani zakunama zomwe zingawoneke ninga n’zacadidi? Fotokozani. (Onani bzithunzi-thunzi.)
15 Kodi tikupfunza ciyani na mafala yomwe Paulo adanembera abale wa ku Tesalonika? Tikabva nkhani yomwe ikubverana lini na bzomwe ifepano timbapfunza m’Bibliya ayai tikabva nkhani yakunama tin’funika kucita bzinthu mwa nzeru. Mu nthawe ya União Soviética, anyamadulanthaka wathu adapasa tsamba abale lomwe bzikhawoneka ninga kuti lacokera ku likulu lathu la pa dziko lentse. Tsambalo likhalimbikisa abale kuti akonze magulu yakubziimira payokha. Tsambalo likhawoneka ninga kuti lidacokeradi ku likulu lathu la pa dziko lentse. Tsono abale wakukhulupirika alibe kupumpsika. Iwo adawona kuti mafala yomwe yakhali pa tsambalo yakhabverana lini na bzomwe iwo akhadapfunza m’Bibliya. Ntsiku zino, anyamadulanthaka wa cadidi ambaphatisa basa mitcini ya nzeru kuti atitazise kukhala wakuphatana. Comwe cingatithandize kuti tileke “kuluza makumbukidwe [yathu] mwakamfulumize” ndico kuwona penu bzomwe tikubva ayai kuwerengabzo bzikubverana na cadidi ca m’Bibliya comwe tidapfunza. — 2 Atesalonika 2:2; 1 Juwau 4:1.
Lekani kupumpsika na nkhani zakunama zomwe zingawoneke ninga kuti n’zacadidi (Onani ndime 15) a
16. Mwakubverana na Aroma 16:17, 18, kodi n’ciyani comwe tingacite anzathu akapambuka pa cadidi?
16 Pitirizani kukhala wakuphatana na wale omwe mbakukhulupirika kwa Yahova. Yahova akufuna kuti tikhale wakuphatana pomwe tikumunamata. Tikaphatisisa cadidi tin’dzakhala wakuphatana. Munthu omwe wapambuka pa cadidi ambacitisa kuti mu gwere mukhale na “magawano.” Ndipopa Yahova akuticenjeza kuti “mbawatcenkhani.” Tikasaya kucita bzimwebzi, ifepano tingapambuke pa cadidi. — Werengani Aroma 16:17, 18.
17. Kodi ni phindu liponi lomwe timbakhala nalo tikazindikira cadidi na kuciphatisisa?
17 Tikazindikira cadidi ticiciphatisisa timbapitiriza kukhala wakulimba mwauzimu. (Aefezo 4:15, 16) Tin’dzanamizidwa lini na bzipfunziso bzakunama pabodzi na nkhani zakunama za Sathani ndipo tin’dzapitiriza kukhala wakukhotcerereka m’manja mwa Yahova pa nthawe ya citsautso cikulu. Pitirizani kuphatisisa cadidi ndipo “Mulungu wa mtendere an’dzakhala namwe.” — Afilipi 4:8, 9.
NYIMBO 122 Khalani Wakulimba na Wakukhazikika!
a BZOMWE BZIKUCITIKA PA CITHUNZI-THUNZI: Cithunzi-thunzi cakuyezezera ca magole ya m’mbuyomu pa nthawe ya União Soviética pomwe abale adatambira tsamba lomwe likhawoneka ninga kuti likhadacokera ku likulu lathu la pa dziko lentse uko likhadacokera kwa anyamadulanthaka wathu. Ntsiku zino pinango anyamadulanthaka wathu angaphatise basa interneti kuti amwaze nkhani zakunama pakulewa bza gulu la Yahova.
