Nicolas na Céline adagumana na mphitca zakusiyana na zimwezi. Iwo adabvuma pomwe adapasidwa utumiki bupsa ku mthambi ya ku França ndipo adauzidwa kuti acinje gwere. Iwo adalewa kuti: “Napo kuti pakuyamba tidakomedwa na kucinjako koma tidadzasunama thangwe rakuti tidasiyana na axamwali wathu. Tiribe kukhala pa uxamwali bwakulimba na abale wa mu gwere lipsalo.” a Pakuti kucinja gwere kumbabweresa mphitca, kodi n’ciyani comwe mungacite kuti bzinthu bzikufambireni bwino pomwe mwacinja gwere? N’ciyani comwe wanthu winango angacite kuti athandize? Ndipo ni bzisimbo bziponi bzomwe mumbatambira mu gwere lanu lipsalo?

NFUNDO ZINAI ZOMWE ZINGAKUTHANDIZENI MUKACINJA GWERE

1. Mbathembani Yahova. (Salimo 37:5) Mpfumakazi ibodzi yakucemeredwa Kazumi, yomwe ikhakhala ku Japão, idacinja gwere pomwe bayace adauzidwa kuti akaphate basa kunango pambuyo pakukhala m’gwerero magole 20. Kodi iye adacita tani kuti ‘apitirize kutsogoleredwa na Yahova’? Iye adati: “Ndidamuuza Yahova momwe ndikhabvera, upswoma bomwe ndikhanabo na thupo lomwe ndikhabva. Ndikacita bzimwebzi, iye akhandipasa mphanvu yomwe ndikhafunikira.”

Kodi tingacite tani kuti timbathembe kwene-kwene Yahova? Ninga muti omwe umbafunikira madzi yakucokera pantsi pa mataka kuti ukule, cikhulupiro cathu cimbafunikirambo kusamaliridwa kuti cikule. Nicolas omwe wafotokozedwa padzaulupa adagumana phindu mwa kukumbukira bziratizo bza m’Bibliya bza Abalahamu, Jezu na Paulo omwe adabzipereka na mtima wawo wentse kuti acite kufuna kwa Mulungu. Kucita bzimwebzi kudamuthandiza kuti ambakhulupire kwene-kwene Yahova. Kupfunza Bibliya patekha nthawe  zentse kumbandotithandiza lini kuti tikwanise kulimbana na mabvuto yomwe tikugumana nayo pa moyo wathu koma kumbatithandizambo kuti tigumane nfundo zomwe tingathandize nazo anzathu.

2. Lekani kumbandendemezera gwere lanu lakale na lipsalo. (Mpalizi 7:10) Jules adafunika kuzolowerana na cikhalidwe cipsa pomwe adacoka ku Benin aciyenda kukakhala ku Estados Unidos. Iye adati: “Inepano ndikhakumbuka kuti ningadakauza wanthu wentse bza moyo wangu ndikakafika kumweko.” Tsono pakuti cikhalidwe ca kumweko cikhali cakusiyana na komwe adacokera, iye adayamba kumbabzipambula mu gwere. Iye adacinja makumbukidwe yace pomwe adayamba kuwadziwa bwino abale na mpfumakazi zace. Iye adati: “Ndidazindikira kuti kuli-kwentse komwe tingakhale wanthu mbabodzi-bodzi. Tsono iwo ambandolewa-lewa na kucita bzinthu mwakusiyana. Mpsakufunika kwene-kwene kubvuma momwe wanthuwo aliri.” Ndipopa lekani kumbandendemezera gwere lanu lakale na lipsa. Bzingakhale bwino kukhala na makumbukidwe ya mpfumakazi Anne-Lise, yomwe ikucita upainiya. Iyo idati: “Ndiribe kucinja kuti ndikagumane bzinthu bzomwe ndidasiya m’mbuyo koma ndidacinja kuti ndikawone bzinthu bzipsa.”

Akulu an’funikambo lini kumbandendemezera gwere lawo lakale na gwere lawo lipsa. Penu abale wa gwere lomwe ayendalo akucita bzinthu bzakusiyana bzin’funa lini kulewa kuti akucita bzinthu bzakuphonyeka. Cakuyamba, mpsakufunika kudziwa momwe bzinthu bziriri kumweko mukanati kufotokoza nzeru zanu za momwe bzinthu bzingacitikire. (Mpalizi 3:1, 7b) Bzingakhale bwino kuthandiza abalewo na ciratizo canu m’mbuto mwa kucita kuwauza bzakucita. — 2 Akolinto 1:24.

3. Mbacitani bzizinji mu gwere lanu lipsalo. (Afilipi 1:27) Kucinja kumbacitisa kuti munthu akhale na bzizinji bzakucita, napo bziri tenepo mpsakufunika kwene-kwene kuti mukandofika ku gwere lanu lipsa muyambe kugumanika pa mitsonkhano mwakamfulumize. Bzimwebzi mpsakufunika thangwe rakuti abale wa mu gwere lanu lipsalo akasaya kumbakuwonani bzingakhale bzakunesa kukuthandizani. Lucinda, omwe adayenda kukakhala mu mzinda ukulu wa África do Sul pabodzi na wana wace awiri wacikazi, adalewa kuti: “Ndidauzidwa kuti bzikhali bzakufunika kuti nimbacite bzizinji na gwere langu lipsalo, kumbabula mu upalizi kawiri-kawiri na kumbayenda ku mitsonkhano nthawe zentse. Ndidabvumambo kuti abale ambadzacitire mtsonkhano wa upalizi pa mui pathu.”

Kucita mabasa yauzimu pabodzi na abale na mpfumakazi ni njira yabwino kuti tipitirize kukhulupira “mafala yabwino ya Mulungu.” Anne-Lise omwe wafotokozedwa kale ule adalimbikisidwa na akulu wa gwere kuti ambayezere kupalizira na mpalizi ali-wentse. Kodi ni phindu liponi lomwe iye adakhala nalo? Iye adalewa kuti: “Mwakusaya kutenga nthawe, ndidazindikira kuti imweyi ikhali njira yabwino kuti ndibzibve kuti nimbacita mbali ya gwere.” Ndipo kubziperekambo pa mabasa manango yomwe yambacitika pa Nyumba ya Umambo ninga kupsaira na kukonza bzinthu mu Nyumba ya Umambo ni njira yakulatizira kuti mukuzindikira kuti gwere lipsalo ndiro gwere lanu tsapano. Mukambabzipereka pa mabasa yamweya, mwakusaya kucedwa abale na mpfumakazi an’dzakudziwani ndipo mun’dzabzibva kuti mumbacita mbali ya gwerero.

 4. Khalani na axamwali wapsa. (2 Akolinto 6:11-13) Mukakhala wakutsudzuka kuceza na wanthu bzin’dzakhala bzakupusa kuti mukhale axamwali wawo. Ndipopa mbafikani pa Nyumba ya Umambo pomwe mitsonkhano ikanati kuyamba ndipo lekani kumbayenda kamangu ikamala. Mukacita bzimwebzi, mun’dzakhala na nthawe yakuceza na abale na mpfumakazi. Citani nyongo yakudziwa madzina yawo. Kukumbukira madzina ya anzanu na kumbaceza nawo mwantsangala bzin’dzacitisa kuti wanthu akufenderereni ndipo bzin’dzakhala bzakupusa kukhala na axamwali.

M’mbuto mwa kubisa unthu bwanu na cakulinga cakuti abale akomedwe namwe, siyani kuti iwo akudziweni momwe imwepo muliri. Citani ninga bzomwe Lucinda adacita. Iye adati: “Ifepano tidakhala na axamwali thangwe tikhayamba ndife kuwacemera kuti abwere ku mui kwathu.”

“MBATAMBIRANANI”

Kupita mu Nyumba ya Umambo yomwe ina abale na mpfumakazi omwe mumbawadziwa lini kungakhale kwakunesa. Tenepo, kodi n’ciyani comwe tingacite kuti abale anovu abzibve kuti atambiridwa? Mpostolo Paulo adalewa kuti: “Mbatambiranani ninga momwe Kristu adakutambirirani.” (Aroma 15:7) Akulu angathandize abale anovu kubzibva kuti atambiridwa akatewezera Kristu. (Onani kwadru yakuti “ Bzomwe Bzingatithandize Tikafulukira ku Gwere Lipsa.”) Napo bziri tenepo, wentse m’gwere kuphatanidzambo wana angathandizire kuti abale omwe afulukira m’gweremo abzibve kuti atambiridwa.

Kutambira wanthu winango kumbaphatanidza kuwacemera kuti abwere ku mui kwathu ndipo kumbaphatanidzambo kuwathandiza pa bzomwe iwo angafunikire. Mwa ciratizo, mpfumakazi inango idathandiza mpfumakazi yomwe ikhadafulukira m’gwere lace mwa kuilatiza mzindayo na komwe ingapakirire karo. Bzimwebzi bzidacitisa kuti mpfumakazi ipsayo izolowere kamangu gwerero.

MWAYI WA KUKULA

Ninga momwe bombo limbafunikira kugundula kuti likwanise kumbuluka, ifepanombo tikacinja ticiyenda ku gwere linango, tin’funikambo kugundula mwakuyezezera kuti tikwanise kucita bzizinji pakutumikira Yahova. Nicolas na Céline adalewa kuti: “Kucinja kumbatipfunzisa.  Kucinja kuti tibverane na wanthu wakusiyana-siyana omwe tikukhala nawo kumbatithandiza kuti tikulise makhalidwe mapsa.” Jean-Charles omwe afotokozedwa kumayambiriro kwa nkhaniyi adafotokoza momwe banja lace lidagumanira phindu thangwe ra kucinja. Iye adati: “Kucinja kudathandiza wana wathu kuti akhale wakukhwima mwauzimu na kukhalambo pa uxamwali bwakulimba na Yahova. Pomwe padapita minyezi yakucepa mwana wathu wacikazi adatambira mbali ya pakati pa sumana ndipo mwana wathu wacimuna adakhala mpalizi wakusaya kubatizidwa.”

Mwa ciratizo, kodi n’ciyani comwe mungacite penu bzakucitika pa moyo wanu bzikukutazisani kucinja kuti muyende komwe kukufunikira apalizi azinji? Imwepo mungacitise gwere lanulo kuti libzibve ninga kuti ndimwe anovu mwakuphatisa basa nfundo zomwe zafotokozedwa mu nkhaniyi. Mungacite bzimwebzi mwakuthemba Yahova na kucita makonzedwe yakuti mumbapalizire na abale wakusiyana-siyana na kukhala na axamwali apsa ayai kulimbisa uxamwali bwanu na omwe muli nawo kale pa uxamwali. Pinango imwepo mungacite makonzedwe yakuti muthandize abale anovu na wale omwe akufunikira thandizo. Pakuti lufoyi limbadziwikisa Akristau wacadidi, kulewa cadidi kucita bzimwebzi kun’dzathandiza wanthu winango kukhala wakufendererana na Yahova. (Juwau 13:35) Ndipo khalani na citsimikizo cakuti “Mulungu ambakomedwa na ntsembe zimwezi.” — Ahebereu 13:16.

Akristau azinji adakwanisa kukhala wakukondwa mu gwere lipsa lomwe adafulukira napo kuti akhagumana na mphitca ndipo bzimwebzi bzingacitikembo kwa imwepo! Anne-Lise adalewa kuti: “Kucinja gwere kudatithandiza kucinja bzinthu bzizinji.” Kazumi akutsimikizira kuti: “Kucinja gwere kungakucitiseni kuwona momwe Yahova akukuthandizirani mu njira yomwe mukhanati mwaiwona kale.” Tsono tani pakulewa bza Jules? Iye adati: “Axamwali omwe ndidakhala nawo adandithandiza kubzibva ninga kuti ndiri ku mui. Tsapano nimbabzibva kuti nimbacita mbali ya gwere linango ndipo nimbawona kuti bzingandinese kucoka.”