NKHANI YAKUPFUNZA 24
NYIMBO 24 Bwerani pa Phiri la Yahova
Khalani Mulendo wa Yahova Mpaka Kale-kale!
“Imwe Yahova, kodi ni mbani omwe angakhale mulendo mu tendi mwanu?” — SALIMO 15:1.
CAKULINGA CA NKHANIYI
Tiniwona bzomwe tin’funika kucita kuti tipitirize kukhala pa uxamwali na Yahova na momwe tingambacitire bzinthu na anzathu omwe mbaaxamwalimbo wa Yahova.
1. Kodi Salimo 15:1-5 angatithandize tani?
MU NKHANI yomwe idapita ire, tidapfunza kuti munthu omwe ambabzipereka kwa Yahova ambakhala xamwali wace ndipo mwa njira imweyi ambapita mu tendi mwace. Tsono kodi ifepano tingapitirize tani kukhala alendo mu tendi la Yahova? Salimo 15 ambalewa bza nkhani imweyi. (Werengani Salimo 15:1-5.) Cinemboci cimbafotokoza bzomwe ifepano tin’funika kucita kuti tipitirize kukhala pa uxamwali bwakulimba na Yahova.
2. Kodi n’ciyani comwe pinango-pentse Davide adakumbukira pomwe adalewa bza tendi la Yahova?
2 Salimo 15 ambayamba na mafala yakuti: “Imwe Yahova, kodi ni mbani omwe angakhale mulendo mu tendi mwanu? Mbani omwe angakhale m’phiri lanu lakucena?” (Salimo 15:1) Pomwe Davide adalewa bza “tendi” la Yahova, pinango akhakumbukira bza tendi la mkonkhano lomwe pa nthawe inango likhakhala ku Gibeyoni. Pomwe Davide adalewa bza “phiri lakucena” la Mulungu, pinango iye akhalewa bza Phiri la Ziyoni lomwe likhali ku Jeruzalemu. Pa phiri limweri lomwe likhakhala patali na mzinda wa Gibeyoni, Davide akhadamanga tendi kuti akoyere thungwa la mpangano pomwe akhadikhirira kuti mbuto yomwe angadaikha thungwa la mpanganolo ikonzedwe. — 2 Samuyeli 6:17.
3. Thangwe ranyi mpsakufunika kubvesesa bzomwe Salimo 15 ambalewa? (Onani cithunzi-thunzi.)
3 N’cadidi kuti Ajirayeri azinji angadatumikira lini pa tendi la mkonkhano ayai kupita mkati mwace momwe mukhana thungwa la mpangano. Tsono atumiki wentse wakukhulupirika wa Yahova angadakhala mu tendi mwace mwakuyezezera acikhala axamwali wace. Ndipo bzimwebzi ndibzo bzomwe tentsenefe tikufuna. Salimo 15 ambalewa bza makhalidwe manango yomwe tin’funika kukhala nayo na kuyalatiza kuti tipitirize kukhala axamwali wa Yahova.
Kwa Ajirayeri omwe adakhala mu nthawe ya Davide bzikhali bzakupusa kubvesesa kuti kukhala mulendo mu tendi la Yahova kumbathandauza ciyani (Onani ndime 3)
FAMBANI MWAKUKHULUPIRIKA NDIPO MBACITANI BZINTHU BZABWINO
4. Kodi timbadziwa tani kuti kwa Yahova tin’funika kucita bzinthu bzizinji kuposa kundobatizidwa? (Zaiya 48:1)
4 Salimo 15:2 ambalewa kuti xamwali wa Mulungu “ni ule omwe ambafamba mwakukhulupirika, [ndipo] ambacita bzinthu bzabwino.” Mafala yakuti “ambafamba” na “ambacita” yakulatiza kuti tin’funika kupitiriza kucita bzimwebzi. Tsono kodi tingakwanisedi ‘kufamba mwakukhulupirika’? Inde tingakwanise. Pakuti ndife wakuperewera, kwa Yahova ‘timbafamba mwakukhulupirika’ tikacita nyongo yakumubvera. Tikabzipereka kwa iye na kubatizidwa timbakhala tikuyamba kufamba na iye. Tsono kumbukirani kuti kale-kale munthu kundocita mbali ya mtundu wa Ajirayeri bzikhacitisa lini kuti akhale mulendo wa Yahova. Winango akhalewa kuti akutumikira Mulungu koma akhacita lini bzimwebzi na “mtima wentse na mwakukhulupirika.” (Werengani Zaiya 48:1.) Ajirayeri omwe akhafuna kukhala alendo wa Yahova akhafunikira kupfunza bzomwe Yahovayo ambafuna acibziteweza. Mpsibodzi-bodzimbo ntsiku zino. Kuti tibvumidwe na Mulungu, tin’funika kucita bzinthu bzizinji kuposa kundobatizidwa ticilewa kuti ndife Mboni ya Yahova. Tin’funika kupitiriza kucita “bzinthu bzabwino.” Kodi bzimwebzi bzikuthandauza ciyani?
5. Kodi kubvera Yahova mu bzinthu bzentse kumbathandauza ciyani?
5 Kwa Yahova, ‘kufamba mwakukhulupirika’ na “kucita bzabwino” bzimbathandauza kucita bzinthu bzizinji kuposa kundoyenda ku mitsonkhano. (1 Samuyeli 15:22) Tin’funika kucita nyongo kuti tibvere Yahova mu bzinthu bzentse pa moyo wathu kuphatanidzambo pomwe tiri tekha. (Mimwani 3:6; Mpalizi 12:13, 14) Mpsakufunika kwene-kwene kucita nyongo yakubvera Yahova napo pa bzinthu bzomwe bzingawoneke kuti mpsakusaya kufunika. Tikacita tenepo, tin’dzalatiza kuti timbafuna kwene-kwene Yahova ndipo iye an’dzatifunambo — Juwau 14:23; 1 Juwau 5:3.
6. Mwakubverana na Ahebereu 6:10-12, n’cinthu ciponi comwe n’cakufunika kwene-kwene kuposa bzinthu bzabwino bzomwe tidacita m’mbuyo?
6 Yahova ambawona kuti bzomwe tidamucitira m’mbuyomu mpsakufunika kwene-kwene. Tsono bzinthu bzomwe tidacita m’mbuyo ndibzo lini bzomwe bzin’dzacitisa kuti tipitirize kukhala alendo mu tendi la Yahova. Bzimwebzi bzimbafotokozedwa bwino pa Ahebereu 6:10-12. (Werengani.) N’cadidi kuti Yahova ambayebwa lini bzomwe tidamucitira m’mbuyo. Tsono kwa iye cinthu cakufunika kwene-kwene ndico kupitiriza kumutumikira na mtima wentse “mpaka kuphampha.” Ndipo ifepano tin’dzapitiriza kutumikira Yahova mpaka kale-kale “tikasaya kuneta.” — Agalatiya 6:9.
LEWANI CADIDI MU MTIMA MWANU
7. Kodi kulewa cadidi mu mtima kumbathandauza ciyani?
7 Munthu omwe akufuna kukhala mulendo wakubvumidwa mu tendi la Yahova an’funika ‘kumbalewa cadidi mu mtima mwace.’ (Salimo 15:2) Bzimwebzi bzimbaphatanidza bzinthu bzizinji kuposa kuleka kunama. M’mbuto mwa kundokhala wakukhulupirika pa bzomwe timbalewa tin’funika kukhala wakukhulupirika pa bzentse bzomwe timbacita. (Ahebereu 13:18) Bzimwebzi mpsakufunika kwene-kwene thangwe “munthu wacinyengo Yahova ambaipidwa naye, tsono iye ambafuna munthu wakulungama.” — Mimwani 3:32.
8. N’ciyani comwe tin’funika lini kucita?
8 Munthu omwe ‘ambalewalewa cadidi mu mtima mwace’ ambanamizira lini kuti akubvera Yahova pakakhala kuti pana wanthu pa nthawe ibodzi-bodziyo acisaya kubvera Mulungu akakhala kuti ali yekha. (Zaiya 29:13) M’mbuto mwace, iye ambatcenkha kukhala munthu wacinyengo. Munthu wacinyengo angawone ninga kuti ni nthawe lini zentse zomwe mpsakufunika kuteweza malamulo ya Yahova. (Tiyago 1:5-8) Iye angayambe kusaya kubvera Yahova mu bzinthu bzomwe bzingawoneke ninga mpsakusaya kufunika. Ndipo akawona kuti palibe cinthu comwe cacitika ambadzayamba kucita bzinthu bzomwe mpsakuipa kwene-kwene. Iye angawone ninga kuti akutumikira Mulungu, tsono Mulunguyo ambabvuma lini kanamatidwe kace. (Mpalizi 8:11) Ndipopa ifepano tin’funika kukhala wakukhulupirika mu bzinthu bzentse.
9. N’ciyani comwe cidacitika pomwe Jezu adagumana na Nataniyeri, ndipo tingapfunze ciyani na bzimwebzi? (Onani cithunzi-thunzi.)
9 Tingapfunze kufunika kwa kukhala wanthu wacadidi tikakumbukira bzomwe bzidacitika pa ntsiku yakuyamba yomwe Jezu adagumana na Nataniyeri. Pomwe Filipi adamudziwikisa xamwali wace Nataniyeri kwa Jezu, pana cinthu cinango comwe cidacitika. Napo kuti Jezu akhamudziwa lini Nataniyeri, iye adalewa kuti: “Onani Mjirayeri wacadidi, omwe mwa iye mulibe cinyengo.” (Juwau 1:47) N’cadidi kuti Jezu akhawona kuti anyakupfunza wace akhali wanthu wakukhulupirika, tsono iye adadabwa kwene-kwene na kusaya cinyengo kwa Nataniyeri. Nataniyeri akhali munthu wakuperewerambo ninga ifepano. Tsono iye akhali lini wacinyengo. Iye akhali wakukhulupirika mu bzinthu bzentse. Jezu adadabwa kwene-kwene na bzimwebzo ndipo adatenda Nataniyeri. Kodi mukuwona lini kuti ungadakhala mwayi ukulu Jezu kulewa mafala ninga yamweya pakulewa bza imwepo?
Filipi adadziwikisa xamwali wace Nataniyeri kwa Jezu, omwe akhali munthu wakusaya cinyengo. Kodi Jezu angalewembo bzibodzi-bodzibzi pakulewa bza ifepano? (Onani ndime 9)
10. Thangwe ranyi tin’funika kucita mphole na bzomwe timbalewa? (Tiyago 1:26)
10 Bzinthu bzizinji bzomwe bzimbafotokozedwa pa Salimo 15 bzimbalatiza momwe tin’funika kucitira bzinthu na wanthu winango. Salimo 15:3 ambalewa kuti mulendo mu tendi la Yahova ambalewa lini “gunkha na lirime lace, ambacitira lini bzinthu bzakuipa anzace, ndipo ambalewa lini kuipa xamwali wace.” Ifepano tikalewa kuipa munthu munango ayai kumunamizira, bzimwebzi bzingasunamise munthuyo ndipo bzingacitise kuti Yahova aleke kutibvuma ninga alendo wace. — Werengani Tiyago 1:26.
11. Kodi magunkha n’ciyani, ndipo n’ciyani cimbacitikira munthu omwe wacita magunkha omwe alibe kukungula?
11 Davide adafotokozambo bza magunkha. Kodi magunkha n’ciyani? Magunkha ni kulewa bzinthu bzakunama pakulewa bza munthu munango na cakulinga cakuti tidzonge mbiri yace. Munthu omwe ambalewa magunkha ayai ambalewa bzakunama pakulewa bza wanthu winango ndipo ambakungula lini an’funika lini kukhala Mboni ya Yahova. — Jeremiya 17:10.
12-13. Kodi ni nkhani ninga ziponi zomwe zingaticitise kuyamba kudzonga mbiri ya axamwali wathu? (Onani cithunzi-thunzi.)
12 Salimo 15:3 ambatikumbusambo kuti alendo wa mu tendi la Yahova ambacita lini kuipa anzawo ndipo ambadzonga lini mbiri ya axamwali wawo ayai kuwanyazisa. Kodi bzimwebzi bzikuthandauza ciyani?
13 Pinango mwakusaya kuzindikira tingayambe kudzonga mbiri ya munthu munango mwakulewa nkhani zakuipa pakulewa bza munthuyo. Kumbukirani bza nkhanizi: (1) mpfumakazi yomwe yasiya kutumikira ninga mpainiya, (2) banja lomwe lasiya kutumikira pa Beteli ayai (3) m’bale omwe wasiya kutumikira ninga mkulu ayai mtumiki wakuthandiza. Bzingakhale bzakuphonyeka kwene-kwene ifepano kulewa kuti pinango bzimwebzi bzawacitikira thangwe rakuti iwo acita cinthu cinango cakuphonyeka. Pana mathangwe mazinji yomwe yangacitise kuti iwo asiye utumiki bwawo ndipo ifepano tingayadziwe lini. Na tenepo, mulendo wa mu tendi la Yahova “ambacitira lini bzinthu bzakuipa anzace, ndipo ambalewa lini kuipa axamwali wace.”
Mwakusaya kuzindikira tingayambe kulewa kuipa wanthu winango, ndipo bzimwebzi bzingasanduke magunkha (Onani ndime 12-13)
LEMEKEZANI WANTHU OMWE AMBAGOPA YAHOVA
14. Fotokozani momwe mulendo wa Yahova angatcenkhere “wanthu omwe ambacita bzakuipa.”
14 Salimo 15:4 ambalewa kuti xamwali wa Yahova “ambawenga wanthu omwe ambacita bzakuipa.” Kodi tingacite tani bzimwebzi? Pakuti ndife wanthu wakuperewera tingakwanise lini kudziwa munthu wakuipa na wakusaya kuipa. Thangwe ranyi? Thangwe rakuti kuperewera timbaticitisa kufuna wale omwe timbabverana nawo bzakucita ticisaya kufuna wale omwe ambatikalipisa. Tsono tin’funika kutcenkha wale okha omwe Yahova ambawawona kuti ‘mbakuipa.’ (1 Akolinto 5:11) Bzimwebzi bzimbaphatanidza wale omwe ambacita bzinthu bzakuipa ndipo ambakungula lini, wale omwe ambalemekeza lini bzomwe timbakhulupira na wale omwe ambayezera kudzonga uxamwali bwathu na Yahova. — Mimwani 13:20.
15. Kodi timbalemekeza tani “wale omwe ambagopa Yahova”?
15 Salimo 15:4 ambalewa kuti tin’funika kumbalemekeza “wale omwe ambagopa Yahova.” Kuti ticite bzimwebzi ifepano timbanyang’ana njira zomwe tingalatizire kudeka mtima na ntsisi kwa axamwali wa Yahova. (Aroma 12:10) Kodi tingacite tani bzimwebzi? Pa Salimo 15:4 pambafotokoza njira ibodzi ya momwe tingacitire bzimwebzi. Mulendo wa mu tendi la Yahova “ambakwanirisa bzomwe wapicira, napo kuti bzomwe wapicirabzo bzingamubweresere mabvuto.” Tikaleka kukwanirisa bzomwe tapicira tingasunamise wanthu winango. (Mateu 5:37) Mwa ciratizo, Yahova ambadikhirira kuti amuna na akazi akwanirise lumbiro lomwe adacita pomwe adalowolana. Yahova ambakomedwambo kwene-kwene akawona kuti abereki akucita nyongo yakukwanirisa bzomwe adapicira kwa wana wawo. Thangwe ra kufuna Yahova na kufuna wanthu winango tin’dzacita bzentse bzomwe tingakwanise kuti tikwanirise bzentse bzomwe tidalumbira.
16. Kodi ni mwa njira inango iponi yomwe timbalemekezera axamwali wa Yahova?
16 Njira inango yomwe tingalemekezere axamwali wa Mulungu ndiyo kukhala wakutambira bwino alendo na wakudeka mtima. (Aroma 12:13) Kumala nthawe na abale na mpfumakazi zathu pomwe tiri lini pa mitsonkhano ayai mu upalizi kumbatithandiza kuti tilimbise uxamwali bomwe tinabo na iwo pabodzi na Yahova. Kuthumizira bzimwebzi tikambatambira bwino alendo timbatewezera Yahova.
LEKANI KUMBAFUNA KWENE-KWENE KOBIRI
17. Thangwe ranyi Salimo 15 ambalewambo bza kobiri?
17 Pa Salimo 15:5 timbawerenga kuti mulendo wa Yahova “ambafiyalisi lini kobiri na juro, [ndipo] ambabvuma lini bobobo kuti ataxule munthu omwe alibe mulandu.” Thangwe ranyi Davide adalewa bza kobiri mu cinembo ca Salimoci? Thangwe tikambafuna kwene-kwene kobiri tingayambe kuwona kuti iyo njakufunika kwene-kwene kuposa wanthu ayai kuposa Yahova. (1 Timotio 6:10) Mu nthawe ya Ajirayeri, winango akhafiyalisi abale wawo omwe akhali wakusauka na juro izinji kwene-kwene ndipo bzimwebzi bzikhacitisa kuti atazire kupagali kobiriyo. Kuthumizira bzimwebzi, atongi winango akhabvuma bobobo kuti atonge wanthu wakusaya kuphonya mwakusaya cirungamo. Tsono Yahova ambaipidwa kwene-kwene wanthu akambacita bzimwebzi. — Ezekiyeli 22:12.
18. Kodi ni mibvunzo iponi yomwe tin’funika kubzicita kuti tiwone momwe timbaiwonera kobiri? (Ahebereu 13:5)
18 Bzingakhale bwino kwene-kwene tentsenefe kumbakumbukira momwe timbaiwonera kobiri. Bzibvunzeni kuti: ‘Kodi inepano nimbandokhala ndicikumbukira kobiri na bzomwe ningadagula ningadakhala na kobiri zizinji? Ndikafiyali kobiri, kodi nimbacedwa kubwezera ndicikumbuka kuti munthuyo akuifuna lini kobiriyo? Kodi nimbabziwona kuti ndine wakufunika kwene-kwene thangwe rakuti ndina kobiri mwakuti bzimbandinesa kulatiza kudeka mtima kwa wanthu winango? Kodi nimbawona kuti m’bale ayai mpfumakazi ambafuna lini Yahova thangwe rakuti ana kobiri? Kodi ndina uxamwali na wanthu omwe mbakudala ndipo nimbaceza lini kwene-kwene na wanthu omwe mbakusauka?’ Tentsenefe tina mwayi ukulu wakukhala alendo mu tendi la Yahova. Tsono kuti tipitirize kukhala alendo wace tin’funika kutcenkha kumbafuna kwene-kwene kobiri. Tikambafuna kwene-kwene Yahova kuposa kobiri, iye cipo acidzatisiya! — Werengani Ahebereu 13:5.
YAHOVA AMBAFUNA AXAMWALI WACE
19. Thangwe ranyi Yahova ambatiuza kuti ticite bzomwe bzidanembedwa pa Salimo 15?
19 Salimo 15 ambamaliza na mafala yakuti: “Omwe ambacita bzimwebzi an’dzatekenyeka lini.” (Salimo 15:5) Pamwepa Davide adafotokoza thangwe lomwe limbacitisa Yahova kutiuza bzinthu bzimwebzi. Yahova akufuna kuti tikhale wakukondwa. Ndipopa tikacita bzomwe Mulungu ambatikumbira timbakhala na moyo wabwino ndipo iye ambatikhotcerera. — Zaiya 48:17.
20. Kodi ni tsogolo liponi lomwe analo wale omwe ni alendo wa Yahova?
20 Alendo wa Yahova akudikhirira tsogolo labwino kwene-kwene. Anyakudzozedwa wakukhulupirika an’dzayenda kukakhala kudzulu ku “mbuto zizinji” zomwe Jezu adawakonzera. (Juwau 14:2) Wale omwe ana cidikhiro cakukhala pa dziko la pantsi akudikhirira kukwanisika kwa piciro la pa Apokalipse 21:3. Kulewa cadidi timbawona kuti ni mwayi ukulu kwene-kwene kucemeredwa na Yahova kuti tikhale axamwali wace na kukhalambo alendo mu tendi mwace mpaka kale-kale!
NYIMBO 39 Tikhale na Dzina Labwino kwa Mulungu
