NKHANI YAKUPFUNZA 25
NYIMBO 7 Yahova ni Mphanvu Yathu
Lekani Kuyebwa Kuti “Yahova ni Mulungu Wamoyo”
“Yahova ni Mulungu wamoyo!” — SALIMO 18:46.
CAKULINGA CA NKHANIYI
Timbagumana phindu likulu tikambakumbukira kuti Mulungu omwe timbamunamata ni “Mulungu wamoyo.”
1. N’ciyani comwe cimbathandiza atumiki wa Yahova kupitiriza kumunamata napo kuti akugumana na mabvuto?
BIBLIYA limbalewa kuti ntsiku zomwe tikukhala zino ni “zakunesa na zakugopswa.” (2 Timotio 3:1) Kupambula pa mabvuto yomwe tentse tikugumana nayo thangwe rakuti tikukhala mu ntsiku zakunesa, atumiki wa Yahova ambazunzidwa. N’ciyani comwe cimbatithandiza kupitiriza kunamata Yahova napo kuti tikugumana na mabvuto? Cinthu cibodzi comwe cimbatithandiza ndico kudziwa kuti “Yahova ni Mulungu wamoyo.” — Jeremiya 10:10; 2 Timotio 1:12.
2. N’ciyani comwe timbadziwa pakulewa bza Yahova comwe cimbatilimbisa kwene-kwene?
2 Yahova ni Munthu caiye. Iye ambatithandiza tikakhala tikugumana na mabvuto ndipo ambanyang’ana njira zakutithandizira. (2 Nkhani 16:9; Salimo 23:4) Tikambakumbukira kuti Mulungu ngwakukonzeka kutithandiza timbakhala na mphanvu yakulimbana na mabvuto yomwe tingagumane nayo. Onani momwe bzimwebzi bzidakhalira bzacadidi kwa Mambo Davide.
3. N’ciyani comwe Davide akhafuna kulewa pomwe adalewa kuti “Yahova ni Mulungu wamoyo!”?
3 Davide akhamudziwa bwino Yahova ndipo akhamuthemba. Pomwe iye akhanyang’anidwa na anyamadulanthaka wace, kuphatanidzambo Mambo Sauli, Davide adapemba kwa Yahova kuti amuthandize. (Salimo 18:6) Patsogolo pace, Yahova adatawira mpembo wa Davide ndipo adamuthandiza. Davideyo adati: “Yahova ni Mulungu wamoyo!” (Salimo 18:46) Kodi Davide akhafuna kulewa ciyani na mafala yamweya? Bukhu linango lakulewa bza nkhani za m’Bibliya lidalewa kuti Davide akhatsindika kuti “Yahova ni Mulungu wamoyo omwe nthawe zentse ambathandiza atumiki wace.” Bzomwe bzidamucitikirabzi bzidathandiza Davide kudziwa kuti Yahova n’gwakukonzeka kumuthandiza. Ndipo bzimwebzi bzidamuthandizambo kupitiriza kutumikira Yahova na kumutumbiza. — Salimo 18:28, 29, 49.
4. Thangwe ranyi mpsakufunika kwene-kwene kukhala na citsimikizo cakuti Yahova ni Mulungu wamoyo?
4 Kudziwa kuti Yahova ni Mulungu wamoyo kun’dzatithandiza kumutumikira na nyongo. Bzimwebzi bzin’dzatipasa mphanvu yakulimbana na mabvuto na kutithandiza kupitiriza kucita ciri-centse kuti timutumikire. Ndipo bzin’dzatithandizambo kupitiriza kukhala pa uxamwali na iye.
MULUNGU WAMOYO AN’DZAKULIMBISANI
5. N’ciyani cingatithandize kupitiriza kuthemba Yahova tikagumana na mabvuto? (Afilipi 4:13)
5 Ifepano tingakunde mabvuto napo yacikhala mang’ono ayai makulu tikambakumbukira kuti Yahova ni Mulungu wamoyo ndipo nthawe zentse ngwakukonzeka kutithandiza. Cadidi n’cakuti palibe mabvuto yomwe Yahova angatazire kuyamalisa, thangwe iye ni Mulungu Wamphanvu-zentse ndipo angatipase mphanvu zomwe tikufunikira. (Werengani Afilipi 4:13.) Na tenepo, ifepano tingakunde mabvuto yali-yentse tikathemba Yahova. Tikambawona Yahova akutithandiza pa bzinthu bzing’ono timbakhala na citsimikizo cakuti iye an’dzatithandiza napo pa bzinthu bzakunesa.
6. N’ciyani comwe cidacitikira Davide pomwe iye akhali tswaka comwe cidacitisa kuti iye athembe Yahova?
6 Onani bzakucitika bziwiri bzomwe bzidathandiza Davide kupitiriza kuthemba Yahova. Pomwe Davide akhali tswaka ndipo akhausa mabira ya pai wace, cimbalangondo na mphondolo bzidaphata mwana wa bira. Pa bzakucitika bziwiribzi, Davide adapulumusa mwana wa birayo. Tsono, Davide alibe kukumbuka kuti adakwanisa kucita bzimwebzire thangwe ra mphanvu zace. Iye adadziwa kuti Yahova ndiye omwe adamupasa mphanvu na kukhwimika kuti akwanise kucita bzimwebzire. (1 Samuyeli 17:34-37) Davide alibe kuyebwa bzakucitika bzimwebzi. Thangwe ra kukumbukira bzimwebzi, iye adapitiriza kuthemba Yahova na kudziwa kuti Mulungu wamoyo an’dzapitiriza kumuthandiza kutsogolo.
7. N’ciyani comwe Davide akhadziwa, ndipo bzimwebzi bzidamuthandiza tani kukunda Goliyati?
7 Pa tsogolo pace, pomwe Davide akhanati kupfitsa magole 20 yakubadwa, iye adayenda ku tsasa la acikunda wa Ajirayeri. Iye adadziwa kuti acikunda wale akhabva mantha thangwe ra Mfilisteu munango wakucemeredwa Goliyati omwe akhacita “mapici na acikunda wa Jirayeri.” (1 Samuyeli 17:10, 11) Acikundawo akhabva mantha thangwe rakuti iye akhali cinzonzomtali ndipo akhambawagopswa. (1 Samuyeli 17:24, 25) Tsono Davide adawona bzomwe bzikhacitikabzo mu njira yakusiyana. Iye akhadziwa kuti Goliyati akhanyoza lini kokha acikunda wa Ajirayeri, koma akhanyoza “acikunda wa Mulungu wamoyo.” (1 Samuyeli 17:26) Davide akhathemba Yahova. Iye akhadziwa kuti Mulungu omwe adamuthandiza pa nthawe yomwe akhali makabusa angadacitambo bzibodzi-bodzibzo pa cakucitika cimweci. Davide akhapenukira lini kuti Yahova angadamuthandiza, ndipopa iye adakwanisa kumenyana na Goliyati ndipo adamukunda! — 1 Samuyeli 17:45-51.
8. N’ciyani comwe cingatithandize kudziwa kuti Yahova an’dzapitiriza kutithandiza pa nthawe zakunesa? (Onani cithunzi-thunzi.)
8 Ifepanombo tingakwanise kulimbana na mabvuto tikambakumbukira kuti Mulungu ngwamoyo ndipo n’gwakukonzeka kuti atithandize. (Salimo 118:6) Tikambakumbukira bzomwe iye adacita m’mbuyomu bzimbatithandiza kukhala wakulimba na kuthemba Yahovayo. Na tenepo, werengani nkhani za m’Bibliya zomwe zimbalatiza momwe Yahova adathandizira atumiki wace. (Zaiya 37:17, 33-37) Imwepo mungawerengembo nkhani za abale na mpfumakazi pa webisaite ya jw.org. Nkhani zimwezi zingakutsimikizireni bwino momwe Yahova ambathandizira atumiki wace ntsiku zino. Imwepo mungakumbukirembo momwe Yahova adakuthandizirani. Bzomwe adakucitiranibzo bzingakhale lini bzinthu bzakudabwisa kwene-kwene, tsono ibzo bzimbalatiza kuti Yahova wakhala anamwe pa moyo wanu! Ndiye omwe adakupfuwani kuti mukhale xamwali wace. (Juwau 6:44) Thangwe ra thandizo la Yahova, imwepo mumbapitiriza kukhala wakukhulupirika kwa iye. Tenepo, kumbirani Yahova kuti akuthandizeni kukumbukira nthawe zomwe iye adatawira mipembo yanu, adakupasani bzomwe mukhafunikira pa nthawe yakuthemera ayai adakusamalirani pa nthawe yomwe mukhagumana na mabvuto. Kukumbukira bzimwebzi kun’dzakucitisani kuti nthawe zentse mumbathembe Yahova.
Bzomwe tingacite tikagumana na mabvuto bzimbatokonya Yahova (Onani ndime 8-9)
9. N’ciyani comwe tin’funika kukumbukira tikagumana na mabvuto? (Mimwani 27:11)
9 Kuwona Yahova ninga Mulungu wamoyo kumbatithandizambo kuwona mwakuthemera mabvuto yomwe timbagumana nayo. Mwa njira iponi? Tikagumana na mabvuto tin’funika kukumbukira cinthu cakufunika kwene-kwene. Sathani ambalewa kuti tikagumana na mabvuto tingasiye kutumikira Yahova. Tenepo, momwe timbacitira bzinthu tikagumana na mabvuto bzin’funika kulatiza kuti timbakumbukira Yahova. (Djobi 1:10, 11; werengani Mimwani 27:11.) Ndipopa, tikapitiriza kukhala wakukhulupirika kwa Yahova napo tikugumana na mabvuto timbalatiza lufoyi kwa iye ndipo timbalatizambo kuti Sathani ngwakunama. Kodi imwepo mukugumanambo na mabvuto ninga kuboneresedwa na boma, kusaya kobiri, kutsutsidwa na wanthu omwe mumbawapalizira ayai mabvuto manango? Penu ndibzo, kumbukirani kuti bzomwe mukugumana nabzobzo bzimbakupasani mpata wakuti mukondwese Yahova. Lekani kuyebwa kuti Yahova an’dzakusiyani lini kuti mugumane na mabvuto yomwe mungakwanise lini kuyapirira. (1 Akolinto 10:13) Iye nthawe zentse an’dzakupasani mphanvu kuti mukwanise kupirira.
MULUNGU WAMOYO AN’DZAKUBAIRANI
10. N’ciyani comwe Mulungu wapicira kwa wale omwe mbakukhulupirika kwa iye?
10 Yahova nthawe zentse ambabaira wale omwe mbakukhulupirika kwa iye. (Ahebereu 11:6) Iye ambatipasa mtendere na cikondweso ntsiku zino ndipo kutsogolo an’dzatipasa moyo wakusaya kumala. Ifepano timbathemba Yahova thangwe timbadziwa kuti an’dzatibaira ndipo anayo mphanvu yakucita bzimwebzi. Ndipopa timbapitiriza kucita ciri-centse comwe tingakwanise kuti timunamate ninga momwe atumiki wace wa m’mbuyomu adacitira. Ndibzo bzomwe Timotio adacita. — Ahebereu 6:10-12.
11. Thangwe ranyi Timotio adacita ciri-centse kuti athandize gwere? (1 Timotio 4:10)
11 Werengani 1 Timotio 4:10. Timotio akhakhulupira Mulungu wamoyo. Ndipopa, iye adacita nyongo yakuphata basa la Yahova na kuthandizambo abale. Kodi iye adacita tani bzimwebzi? Mpostolo Paulo adamupfunzisa kuti akhale mpfunzisi wabwino m’gwere na mu upalizi. Paulo adauzambo Timotio kuti akhale ciratizo cabwino kwa abale wacikulire na maswaka. Timotio adapasidwambo mautumiki manango yakunesa kuphatanidzambo kupereka malango yamphanvu koma yalufoyi kwa wale omwe akhafunikira. (1 Timotio 4:11-16; 2 Timotio 4:1-5) Nthawe zinango anzace akhabvesesa lini basa lomwe iye akhacita ndipo akhalatiza lini kutenda pa bzimwebzo. Tsono Timotio akhadziwa kuti Yahova akhawona basa lentse lomwe iye akhacita ndipo angadamubaira. — Aroma 2:6, 7.
12. Thangwe ranyi akulu ambacita ciri-centse kuti athandize gwere? (Onani cithunzi-thunzi.)
12 Ntsiku zino, akulu ambakhalambo na citsimikizo centse cakuti Yahova ambawona bzentse bzomwe iwo ambacita ndipo ambatenda na bzimwebzi. Kupambula maulendo ya ubusa, kupfunzisa na kupalizira, iwo ambathandizirambo pa basa lakumanga-manga na kuthandizirambo pakagwa malengwa ya pantsi. Winango ambatumikira m’Mathimu Yakuzungira Atenda ayai Komiti Zakucezerana na Nyumba za Ulapi. Akulu omwe ambabzipereka kucita basa limweri iwo ambadziwa kuti gwere nda Yahova sikuti la munthu. Iwo ambacita ciri-centse comwe angakwanise ndipo ambakhala na citsimikizo centse cakuti Yahova an’dzawabaira pa basa lentse lomwe iwo ambacita. — Akolose 3:23, 24.
Mulungu wamoyo an’dzakubairani pa bzentse bzomwe mumbacitira gwere (Onani ndime 12-13)
13. Kodi Yahova ambabva tani akambawona nyongo yathu yakumutumikira?
13 Ni abale lini wentse omwe angatumikire ninga akulu. Tsono, tentsenefe tingam’pase cinthu Yahova. Mulungu ambakomedwa kwene-kwene ifepano tikacita ciri-centse kuti timutumikire. Iye ambawona bzakupereka bzathu bzomwe timbacita bza basa la pa dziko lentse napo bzikhale bzakucepa. Iye ambakhala wakukondwa tikacita ciri-centse kuti timalise mantha, tikaimisa boko kuti titawire pa mitsonkhano, ndipo ambakomedwambo akawona kuti tacita ciri-centse kuti tilekerere abale wathu. Napo kuti mungawone kuti mun’kwanisa lini kucita bzizinji pakutumikira Yahova, mungakhale na citsimikizo cakuti iye ambawona nyongo yomwe mumbacita. Thangwe ra bzimwebzi, iye ambakufunani kwene-kwene ndipo an’dzakubairani. — Luka 21:1-4.
PITIRIZANI KUKHALA PAFUPI NA MULUNGU WAMOYO
14. Kodi tingacite ciyani kuti tipitirize kukhala wakukhulupirika kwa Yahova? (Onani cithunzi-thunzi.)
14 Bzingakhale bzakupusa kupitiriza kukhala wakukhulupirika kwa Yahova tikambamuwona ninga Munthu caiye. Bzimwebzi ndibzo bzomwe bzidacitikira Zuze. Iye adalamba kucita upombo. Mulungu akhali Munthu caiye kwa iye ndipo akhafuna lini kumusunamisa. (Genesesi 39:9) Tikafuna kumbawona Yahova ninga Munthu caiye, ifepano tin’funika kumbapambula nthawe yakumbaceza naye mu mpembo na kumbapfunza Fala lace, Bibliya. Mwa njira imweyi, uxamwali bwathu na iye bun’dzapitiriza kukula. Ninga Zuze, tikapitiriza kukhala pa uxamwali bwakulimba na Yahova tin’dzatcenkha kucita cinthu ciri-centse comwe cingamukalipise. — Tiyago 4:8.
Kukhala pa uxamwali na Mulungu wamoyo kun’dzakuthandizani kupitiriza kukhala wakukhulupirika (Onani ndime 14-15)
15. Kodi tingapfunze ciyani na bzomwe bzidacitikira Ajirayeri m’dambo? (Ahebereu 3:12)
15 Wale omwe ambayebwa kuti Yahova ni Mulungu wamoyo ambakhala pa ngozi yakusiya kumutumikira. Onani bzomwe bzidacitikira Ajirayeri pomwe iwo akhali m’dambo. Iwo akhadziwa kuti Yahova alipo, tsono adayamba kupenukira penu Yahovayo angadawasamalira. Tenepo, iwo adabvunza kuti: “Kodi Yahovayo alidi pakati pathu ayai ne?” (Ekisodo 17:2, 7) Bzimwebzi bzidacitisa kuti iwo apandukire Mulungu. Ifepano tin’funika lini kukhala ninga iwo mwa kupandukira Yahova. — Werengani Ahebereu 3:12.
16. Kodi cikhulupiro cathu cingayezedwe tani?
16 Mpsakupusa lini kukhala pa uxamwali bwakulimba na Yahova m’dziko lomwe tikukhalali. Wanthu azinji ambalewa kuti kulibe Mulungu. Ndipo bzimbawoneka ninga kuti wale omwe ambafuna lini Mulungu bzinthu bzimbawafambira bwino. Tikambawona bzimwebzi bzikucitika cikhulupiro cathu cingayezedwe. N’cadidi kuti tingafike lini pakulamba kuti Yahova alipo, koma tingayambe kupenukira penu iye angatithandizedi. Munembi wa Salimo 73 adagumanambo na bvuto ninga limweri. Wanthu wa mu nthawe yace akhateweza lini malamulo ya Mulungu ndipo akhacita bzomwe iwo akhafuna. Thangwe ra bzimwebzi, iye adakumbuka kuti kutumikira Mulungu kukhalibe phindu. — Salimo 73:11-13.
17. N’ciyani comwe cingatithandize kupitiriza kukhala pa uxamwali bwakulimba na Yahova?
17 N’ciyani comwe cidathandiza munembi wa Salimoyu kucinja makumbukidwe yace? Iye adakumbukira bzomwe bzingadacitikira wale omwe angadasiya kuthemba Mulungu. (Salimo 73:18, 19, 27) Iye adakumbukirambo bzisimbo bzomwe angakhale nabzo thangwe ra kutumikira Mulungu. (Salimo 73:24) Ifepanombo tingakumbukire bzisimbo bzomwe Yahova watipasa kale. Yezerani kukumbukira momwe moyo wanu ungadakhalira mungadakhala mukutumikira lini Mulungu. Tikambakumbukira bzinthu bzimwebzi tin’dzapitiriza kukhala wakukhulupirika kwa iye, ndipo ninga munembi wa Salimoyu, tingalewe kuti: “Tsono kwa ine kufenderera Mulungu ni cinthu cabwino kwene-kwene.” — Salimo 73:28.
18. Thangwe ranyi tin’funika lini kukhala na mantha pa bzomwe bziti bzicitike kutsogoloku?
18 Ifepano tingalimbane na mabvuto yali-yentse yomwe tingagumane nayo mu ntsiku zakumalizira zino thangwe ndife “akapolo wa Mulungu wamoyo na wacadidi.” (1 Atesalonika 1:9) Yahova ni Munthu caiye ndipo iye ngwakukonzeka kutithandiza. Iye nthawe zentse adakhala ku mbali ya atumiki wace wakale-kale ndipo an’citambo bzibodzi-bodzibzi na ifepano ntsiku zino. Tsapanopapa ifepano tin’gumana na citsautso cikulu, tsono tin’dzakhala lini tekha. Yahova ali ku mbali yathu. (Zaiya 41:10) Tentsenefe “tikhale wakukhwimika kwene-kwene ticilewa kuti: ‘Yahova ni mthandizi wangu, nin’dzagopa lini cinthu.’” — Ahebereu 13:5, 6.
NYIMBO 3 Ndimwe Mphanvu Yathu, Cidikhiro Cathu, Timbakukhulupirani
