Mibvunzo Yakucokera kwa Anyakuwerenga
Kodi tin’funika kucibvesesa tani cinembo ca Salimo 12:7?
Nkhani yentse imbalatiza kuti cinemboci cimbalewa bza wanthu.
Pa Salimo 12:1-4 timbawerenga kuti: “Wanthu wentse wakukhulupirika anyembereka.” Ndipo pa Salimo 12:5-7 pambalewa kuti:
Yahova walewa kuti: “‘Thangwe ra kupondereredwa kwa wanthu wakusaya,
Thangwe ra kulira kwa wanthu wakusauka,
Nin’dzalamuka kuti ndicite cinthu.’
Nin’dzawapulumusa kwa wale omwe ambawanyoza.”
Mafala ya Yahova njakucena;
Yali ninga prata yakusungunusidwa mu forno ya dongo yakucenesedwa kanomwe.
Imwe Yahova, imwepo mun’dzawalindira;
Ali-wentse mun’dzamukhotcerera ku m’badwoyu mpaka kale-kale.
Pa vesi 5 pambalewa kuti Mulungu an’dzapulumusa “wanthu wakusaya.”
Pa vesi 6 pambalewa kuti “mafala ya Yahova njakucena” ‘ninga prata yomwe yasungunusidwa.’ Ni mwa njira imweyi momwe tentsenefe timbabvera na Fala la Mulungu. — Salimo 18:30; 119:140.
Tsapano onani bzomwe Salimo 12:7 ambalewa, iye ambati: “Imwe Yahova, imwepo mun’dzawalindira; ali-wentse mun’dzamukhotcerera ku m’badwoyu mpaka kale-kale.” Pakuti mafala yakuti “mafala ya Yahova” yambalewedwa mu vesi 6, wanthu winango pinango angakumbuke kuti mafala yamweya yakulewa kuti Mulungu an’dzalindira ayai kukhotcerera mafala yace. N’cadidi kuti Yahova adakhotcerera Fala lace, Bibliya, napo kuti anyamadulanthaka wace adayezera kulipfudza ayai kuletsa kuti iro likonzedwe na kugawidwa. — Zaiya 40:8; 1 Pedru 1:25.
Tsono Yahova ambalindira na kukhotcerera wanthu omwe akulewedwa mu vesi 5, ndipo nthawe zentse an’dzapitiriza kuthandiza “wanthu wakusaya” na omwe ‘akupondereredwa.’ — Djobi 36:15; Salimo 6:4; 31:1, 2; 54:7; 145:20.
Tsono kodi mbani omwe akufotokozedwa mu vesi 7 kuti an’dzalindiridwa na kukhotcereredwa? Kodi ni wanthu ayai Fala lace?
Tikawerenga bwino-bwino salimo limweri, timbakwanisa kuwona kuti likulewa bza wanthu. Kumayambiriro kwa Salimo kapitulo 12 kumbalewa bza atumiki wakukhulupirika wa Yahova omwe anamizidwa na wanthu wakuipa. Ndipo pa vesi 3 pambafotokoza kuti Yahova an’dzapfudza wanthu wentse wacinyengo. Cinemboci cimbatitsimikizira kuti tingakhulupire kuti Mulungu an’dzapulumusa atumiki wace thangwe rakuti mafala yace njakucena.
Tenepo pa vesi 7 pakuthandauza kuti Yahova an’dzakhotcerera wanthu wakusaya omwe akuboneresedwa na wanthu wakuipa.
Tsono thangwe ranyi Mabibliya manango yambasandulizira vesiri kuti “imwepo mun’dzawalindira”? Mabibliya yamweya yadaphatisa basa makopiya ya Bzinembo Bzacihebereu yomwe njakukhulupirika. Tsono pomwe vesiri lidasanduliziridwa kakuyamba mu Cigerego adaphatisa basa mafala yakuti: “Iye an’dzatilindira” na “Iye an’dzatikhotcerera.” Mafala yamweya yakulewa bza wanthu wakusaya na wakupondereredwa. Iwo an’dzakhotcereredwa “ku m’badwoyu” omwe umbalimbikisa anzawo kuti acite bzinthu bzakuipa. (Salimo 12:7, 8) Mbali yakuyamba ya mafala ya vesi 7 m’Bzinembo Bzacihebereu yomwe yadasanduliziridwa mu cirewedwe ca Ciaramaiko yambalewa kuti: “Imwe Mbuya, mun’dzakhotcerera wanthu wakulungama, imwepo mun’dzawakhotcerera ku m’badwo wakuipayu mpaka kale-kale.” Bzentsenebzi bzikulatiziratu padeca kuti Salimo 12:7 ambalewa lini bza mafala ya Mulungu.
Vesi limweri limbatitsimikizira kuti Mulungu an’dzathandiza “wanthu wace wakukhulupirika.”
