Ubutungulu: Abaketi ba Yehova bikukana imikota pamo ubutuli buli bosa ubwa chipatala.

 Ubwanaloli: Bikulonda ukuti bambilileghe ubutuli ubununu ubwa chipatala. Linga babinile, bikubuka ku chipatala ukuti bakaghane naba dokotala aba bamanyile kanunu ukutula umundu kisita ilopa. Lino, abadokotala basyaghile injila isya kutulila ababine kisita ilopa. Injila isi batikutulila Abaketi ba Yehova bene loli nabandu bosa. Mu fisu fingi, umundu ikusala ukubumbulusiwa kisita ilopa panongwa yakutila imbungo isyakwambukila nindamyo isingi isi sibaghile ukwisa panongwa yakubikiwa ilopa.

 Ubutungulu: Abaketi ba Yehova bikuti linga umundu ali nu lwitiko, ikuya pakubumbuluka.

 Ubwanaloli: Tutikusubila ukuti umundu abaghile ukubumbuluka nulusubilo lwene loli abuke ku chipatala.

 Ubutungulu: Injila isyakuntulila umbine kisita ilopa sikulonda indalama nyingi.

 Ubwanaloli: Injila isyakuntulila umbine kisita ilopa sitikulonda indalama nyingi. a

 Ubutungulu: Abaketi bingi ukongelapo abana bikufwa ikyinja kilikyosa panongwa yakukana ukubikiwa ilopa.

 Ubwanaloli: Ubu butungulu bunywamu. Abadokotala bingi bikupanga amaopaleshoni gha ndumbula, aghafifupa naghangi kisita kubikiwa ilopa. b Abapapi na bana aba bikukana ukubikiwa ilopa utubalilo twingi bikubumbuluka ukufwana itolo na aba bikubikiwa ilopa. Utubalilo tumo, aba bakabikiwa ilopa bo bikubumbuluka kanunu fiyo. c Nayumo uyu abaghile ukuyoba mwakusimikisya ukuti linga umundu akanile ukubikiwa ilopa kokuti ikuya pakufwa pamo ukuti linga abikiwe ilopa ikuya pakupona.

 Abaketi ba Yehova bikukana ilopa panongwa ya lwitiko lwabo. Ukwanda mulwitikano Ulukulu nu Lupya, Ibaibolo likutubula ukuti tungalyagha ilopa. (Ubwandilo 9:4; Abanyalevi 17:10; Ukukumbusya Indaghilo 12:23; Imbombo Sya Batumiwa 15:28, 29) Kyala ikuketa ukuti ilopa likwimila ubumi. (Abanyalevi 17:14) Tukukana ukubikiwa ilopa ukuti tumpilikileghe Kyala kangi ukuti tungindikeghe panongwa yakuti yo atupele ubumi.

 Kunyuma, abadokotala baketagha ukuti ukutula umundu kisita ilopa kukaya kununu kangi bulosi, loli lino bachenjile aminong’ono. Ukufuma mu 2004, inkhani ya mu magazini yimo yayobile ukuti “injila isi tukubombela pakutula Abaketi ba Yehova pankyeni sikwisa kutula aliwesa.” d Mu 2010, inkhani ya mu magazini yimo yayobile ukuti “‘amaopaleshoni gha kisita ukubombela ilopa’ ghatikuya pakutula Abaketi ba Yehova bene loli abandu bosa.”

 Amasiku agha, abadokotala bingi bikutula abandu kisita ilopa. Injila isi silimo na mfisu ifi filondo. Linga Unketi wa Yehova abinile ikusuma injila isi.