Ngimba Abaketi ba Yehova Bikukana Ukwambilila Katemela?
Hayi. Abaketi ba Yehova batikukana ukwambilila katemela. Tukuketa ukuti ukwambilila katemela yo nkhani iyi Unkristu aliwesa ikulondiwa ukusala pamwene. Abaketi ba Yehova bingi basalile ukwambilila katemela.
Linga tubinile tukubuka ku kipatala kangi tukubandaghisya fiyo abasayansi panongwa yakwiyula pakuyagha imikota iyi yikututula twe bandu ukuti tuleke ukutamiwa fiyo ni mbungo. Tukubandaghisya fiyo aba fyakipatala, fiyofiyo linga twaghene ni ndamyo.
Abaketi ba Yehova bikupilikila isi abakuketesya isya bumi bikuyoba. Mwakifwanikisyo, ukwanda pakabalilo aka imbungo ya COVID-19 yalyandile, Abaketi ba Yehova bikukindilila ukubakumbusya abandu muno babaghile ukwifighilila ku mbungo ukwendela pa webusayiti iyi munjobelo isyakukindanakindana. Isi sikongelelapo ukulondiwa kwa kwikala pabutali na bangi, nu kukonga indaghilo isi sibikiwe pa nkhani yakwaghanila abandu bingi pampene, ukwikala kwa twibene linga tukoliwe ni mbungo, ukusughusula m’maboko, ukufwala masiki ni fingi ifi abalaghili bikuyoba ukuti tubombeghe.—Baroma 13:1, 2.
Kwa fyinja fingi, amabuku gha Baketi ba Yehova ghikuyoba fiyo isya fundo isyakukongapo isi:
Inkhani yakusala ubutuli bwa kukipatala ya mundu aliwesa pamwene.—Bagalatia 6:5.
“[Magazini iyi] yitikukasya abandu ukuti bambilileghe unkota ghumo ukukinda ughungi pamo ubutuli ubwa kukipatala bulibosa ukukinda ubungi kangi magazini iyi yitikubika ubulongosi bulibosa ubwa kufwana nu nkota. Yikulingania itolo ifundo kangi umundu yo ikusala mwene isi abaghile ukukonga.”—Galamukani! ya February 8, 1987.
“Inkhani iyakuti umwe pamo abaninu bambilile katemela, budindo bwakuti musale mwibene.”—Awake! ya August 22, 1965.
Linga tubinile tukubuka kukipatala panongwa yakuti tukubuketa ubumi ukuya bwa pamwanya fiyo.—Imbombo sya Batumiwa 17:28.
“Abaketi ba Yehova bikubuka kukipatala linga babinile panongwa yakuti bikulonda ubutuli. Abene babughanile fiyo ubumi kangi bikubomba kilikyosa iki kikukolelana na Malemba ukuti bafighilile ubumi bwabo.”—The Watchtower, ya July 1, 1975.
“Abaketi ba Yehova bikuhoboka fiyo ukwambilila ubutuli ubwakufuma kukipatala. Abene bikulonda ukuya nu bumi ubununu kangi ukuti bakindilile ukuya bumi. Kangi ukufwana na muno ayilile Luka nkabalilo kakunyuma, Abaketi ba Yehova bamo bo badokotala. . . . Abaketi ba Yehova bikundaghisya fiyo ukwiyipa nu kwiyula uku aba fyakipatala bikubomba. Abene bikubandaghisya kangi aba fyakipatala linga babatulile ukuti baye kanunu.”—Nsanja ya Olonda, February 1, 2011.