Abaketi ba Yehova bikughaghindika amaboma kangi ifimanyikilo fyake. Tusimenye ukuti bamo babaghile ukusala ukuyoba ukuti bikuya pakusubiliwa ku kisu kyabo, ukwinamila indembela pamo ukwimba ulwimbo lwakwimila ikisu kyabo.

 Loli, twe Baketi ba Yehova tukusala ukuti tungabombako ifindu ifi panongwa yakuti tukusubila ukuti fitikukolelana ni fundo sya mu Baibolo. Tukundaghisya fiyo linga abandu bikughindika isi tukusubila bo muno nanuswe tukusighindika isi abene bikusubila.

Isi sili mu nkhani iyi

•  Ngimba fundo siliku isya mu Baibolo isi sikupalamasya inkhani iyi?

•  Bule linga lulaghilo ukuti tukulondiwa ukubombako ifindu ifi?

•  Ngimba Abaketi ba Yehova bikuya kukighaba kimo kya kisu pamo ikipani?

 Ifundo sibili isya mu Baibolo isyakukongapo isi syo tukwinong’onela fiyo pakubomba ifyakusala fyitu:

•   Kyala mwene yo tukulondiwa ukumwiputa. Ibaibolo likuyoba ukuti: “Umbungulukileghe Yehova Kyala wako, yo umbombeleghe yuyo mwene.” (Luka 4:8) Isi abandu bikufinga ukuti bikuya pakusubiliwa ku kisu kyabo ni nyimbo isyakukighindika ikisu kyabo isi bikwimba utubalilo twingi sikuya na masyu aghakunangisya ukuti umundu wakwiyipa ku kisu kyake ukukinda kwa aliwesa. Yonongwa yake Abaketi ba Yehova bikuketa ukuti kukaya kwakulondiwa ukubombako ifindu ifi.

   Abaketi ba Yehova bikuketa kangi ukuti ukwinamila indembela kukufwana itolo nu kwiputa kufifwani, ikindu iki Ibaibolo likukanisya. (1 Bakorinti 10:14) Kangi abandu bamo abakufufuza isyambukulu bitikisye ifundo iyakuti indembela sya kisu syope fimanyikilo fya matchalichi. Uwakufufuza yumo uyu ingamu yake yo Carlton J. H. Hayes atile, “Ukukighana fiyo ikisu kyako kuli bo itchalichi kangi ikimanyikilo kyake ikinywamu yo ndembela.” a Pakuyoba isya Bakristu abakunyuma, Daniel P. Mannix ayobile ukuti: “Abakristu bakanile. . . ukubika ikemo ku mbepo wa mwalafyale [Waroma], ifi amasiku agha fibaghile ukufwana itolo nukukana ukwinamila indembela.” b

  Nalinga Abaketi ba Yehova bikukana ukwinamila indembela, loli batikuyonanga, batikuyokya pamo ukuyibombela ifindu ifi fikabaghilila nalinga kibaghile ukuya kimanyikilo kilikyosa ikya kisu.

•   Abandu bosa bafwene itolo pamaso pa Kyala. (Imbombo sya Batumiwa 10:34, 35) Ibaibolo likuyoba ukuti Kyala “afipelile ifikolo fyosa fya bandu ukufuma mmundu yumoywene.” (Imbombo sya Batumiwa 17:26) Pakifukwa iki, Abaketi ba Yehova bikuketa ukuti kukaya kwakulondiwa ukuliketa igulu limo ilya bandu ukuya lyapamwanya fiyo pamo ikisu ukuya kyapamwanya fiyo ukukinda ikingi. Tukubaghindika abandu bosa, fikaya nimbombo ukuti bikufuma kughu, pamo bikwikala kughu.—1 Peteri 2:17.

 Abaketi ba Yehova batikulimbana ni boma. Tukusubila ukuti amaboma kighaba kya “mbatiko ya Kyala” iyi umwene itikisye. (Baroma 13:1-7) Kangi tukusubila ukuti Abakristu bikulondiwa ukubapilikila abalaghili ba boma.—Luka 20:25.

 Loli bule linga indaghilo sya kisu sikuyoba ukuti tubombe ikindu iki indaghilo sya Kyala sikukana? Utubalilo tumo, kwakulondiwa ukusuma ku boma ukuti lichenje indaghilo simo. c Linga iboma likabaghila ukuchenja, mwalughindiko Abaketi ba Yehova bikusala ukuti “bantileghe Kyala ukukinda abandu.”—Imbombo sya Batumiwa 5:29.

 Hayi. Abaketi ba Yehova batikwingililapo mfya nkisu nalinga fiye fya ndyali. Linga tukanile ukubomba ifindu ifyakuti tukuya pakuya basubiliwa ku kisu kyitu, ukwinamila indembela, pamo ukwimba ulwimbo lwa kisu kyitu, kikaya kifukwa kyakuti tuli bakusambukila pamo tuli kukighaba kimo. Mmalo mwake, tukukonga ifundo sya mu Baibolo isi tukusubila pafyakubombiwa bo ifi.