Pakuya Baketi ba Yehova, tukuhoboka ukuyobesania na bandu ba fipanga fyosa isya masyu gha Kyala, loli tutikwiputa nabo pampene. Ibaibolo likuyoba ukuti Abakristu ba bwanaloli ‘bilungisenie,’ pampene panongwa yakuya nu lwitiko lumolwene. (Baefesi 4:​16; 1 Bakorinti 1:​10; Bafilipi 2:2) Ukwilungisania pampene uku kukuyapo panongwa ya kughanana, ukunangisyana ikibabilisi pamo ukuhobokelana. Loli ulwitiko lwitu lulipo panongwa yakuti tukwendela ifundo isyakufuma mu Baibolo. Kisita ifundo isi, ulwitiko lwitu lukabaghila ukuya nimbombo​—Baroma 10:​2, 3.

 Ibaibolo likufwanikisya ukonganikana pampene na bandu aba bali nulwitiko ulungi nukufwala uyoko nu mundu uyu mukafwana nayo isayizi, uku kubaghile ukonanga ulwitiko lwa Nkristu. (2 Bakorinti 6:​14-​17) Yonongwa Yesu akabitikisye abamanyili bake ukuti bonganikaneghe na balwitiko ulungi. (Matai 12:30; Yo 14:6) Mu ndaghilo isi Kyala abapele Abaisraeli ukwendela mwa Mose, Kyala abakanisye Abaisraeli ukuti baleke ukonganikana na ba mfisu ifingi pakumwiputa. (Ukusoka 34:11-​14) Panyuma Abaisraeli abasubiliwa bakanile ubutuli bulibosa ukufuma ku bandu balwitiko ulungi panongwa yakuti fyayagha pakwighula ulusako lwakuti bande ukwiputila pampene.​—Ezra 4:​1-3.

 Ena. Nkyinja kya 2023 twamalile amaawala 1,791,490,713 bo tukuyobesania na bandu ba mfipanga ifingi pa nkhani ya masyu gha Kyala. Ukufwana nu ntumiwa Pauli, nuswe twe Baketi ba Yehova tukulonda ukwangala na ‘bandu bingi’ ukuti tumanye isi bikwinong’ona na isi bikusubila. (1 Bakorinti 9:​19-​22) Linga tukuyobesania na bandu, tukukonga ubulongosi ubwa mu Baibolo ubwakuti tuyeghe balughindiko ku bandu bosa aba tukubafumukisya.​—1 Peteri 3:​15.