Hayi. Akabalilo kosa tukubuka pakufumusya ku nyumba ni nyumba, loli tutikusubila ukuti tukukaba ubupoki pa mbombo iyi tukubomba. (Baefesi 2:8) Nongwa yafiki?

 Inong’onelapo pakifwanikisyo iki: Umundu uwakisa afingile ukuti ikuya pakumpako ikyabupe ikyapamwanya aliwesa uyu ikuya pakwaghiwa pamalo ni siku ili ayobile. Linga naloli mukusubila isi umundu uyu afingile, ngimba mubaghile ukukonga isi ayobile? Kisita kukayika! Mubaghile ukubabula abamanyani binu naba mumbumba yinu isya lusako ulu, ukuti bope basakabe. Nalinga mo siyilile, fitikusanusya ukuti mukuya pakwambilila ikyabupe panongwa yakwaghiwa pamalo ni siku ili ayobile. Loli mukuya pakwambilila panongwa yakuti umundu uyu ikulonda usobapako ikyabupe.

 Momuno siyilile, Abaketi ba Yehova bikusubila ukuti ulufingo lwa Kyala ulwa bumi bwa bwila na bwila lwa bene aba bikumpilikila. (Baroma 6:23)Tukwiyula pakufumusya ku bandu isya lwitiko lwitu, tukusubila ukuti babaghile ukukaba isi Kyala afingile. Loli tutikusubila ukuti tukukaba ubupoki pambombo yitu iya kufumusya. (Baroma 1:17; 3:28) Momumo ukuti, akayapo umundu uyu abaghile ukubomba inunu syene ukuti asakabe ulusayo ukufuma kwa Kyala. “Popapo alinkwenda nukutupoka panongwa ya kisa kyake; mukali mo mumbombo syitu isya bugholofu isi twabombagha.”—Titi 3:5.