MUTU 7
Ngimba Ubunyafyale bwa Kyala Findu Fiki?
1. Ngimba Ubunyafyale bwa Kyala findu fiki?
Nongwa yafiki Yesu yo ali kanunu ukuya Malafyale?—MARKO 1:40-42.
Ubunyafyale bwa Kyala, boma lyakumwanya. Iboma ili likwisa pososyapo amaboma ghosa agha ghalipo lino. Kyala akwisa pobombela iboma lyake ukuti ubwighane bwake bubombiwe kumwanya na pasi apa. Iboma ili linunu. Iboma ili likwisa pobomba fyosa ifi fikulondiwa pa bumi bwa mundu. Abandu bosa bakwisa pakuya batengamoyo.—Belenga Danieli 2:44; Matai 6:9, 10; 24:14.
Yehova asalile Yesu Kristu ukuya Malafyale wa Bunyafyale bwake.—Belenga Ubusetuli 11:15.
Ketelela ividiyo Ngimba Ubunyafyale bwa Kyala Findu Fiki?
2. Nongwa yafiki Yesu yo ali kanunu ukuya Malafyale?
Yesu yo ali kanunu ukuya Malafyale papo umwene walughano ku bandu kangi okonga fiyo indaghilo sya Kyala ubomba isi nunu. (Yohani 1:14) Umwene ali namaka ubatula abandu nongwa yakuti akwisa pakulaghila ikisu kyapasi ufuma kumwanya. Bo asyusiwe ukufuma ku bufwe, abukile kumwanya, atughele kukiboko ikilyelo kya Kyala. (Bahiburi 10:12, 13) Popapo Kyala alimpele amaka ghakuti andeko ulaghila.—Belenga Danieli 7:13, 14.
3. Ngimba Yesu akwisa kuya nani pakabalilo kake akakulaghila?
Yesu akwisa kulaghila pamopene na bandu aba Kyala abasalile. (Danieli 7:27) Abandu abakwanda ukusaliwa bali bafundiwa ba Yesu. Yehova akali osala abandu aba mpaka lino, abanyambala na banakasi. Muno syayilile na Yesu, bope linga bafwile bosyusiwa nu mbili wa mbepo.—Belenga Yohani 14:1-3; 1 Bakorinti 15:42-44.
Ngimba aba bobuka kumwanya balipo balinga? Yesu atile abene “katimo kanandi.” (Luka 12:32) Bosa pamopene balipo 144,000. Bakwisa kulaghila ikisu kyapasi pamopene na Yesu.—Belenga Ubusetuli 14:1.
4. Findu fiki fyabombiwe bo Yesu andileko ukulaghila?
Ubunyafyale bwa Kyala bwalyandile ulaghila mu 1914. * Bo ikele ukuya Malafyale, Yesu asosisye Setano na bandumi bake kumwanya. Setano akalele fiyo yo nongwa umwene obomba imbibi pa kisu iki. (Ubusetuli 12:7-10, 12) Ukwanda pakabalilo aka indamyo sya bandu syongelilepo pa kisu. Ubwite, injala, ububine pamopene nutusenyenda fyosa ifi kimanyilo kyakuti Ubunyafyale bwa Kyala buli pipi ukwanda ulaghila ikisu kyapasi kyosa.—Belenga Luka 21:7, 10, 11, 31.
5. Findu fiki ifi Ubunyafyale bwa Kyala bubombilepo lino?
Ukwendela mu mbombo ya kufumusya pa kisu kyosa, Ubunyafyale bwa Kyala bwandileko ubungania abandu bafikolo fyosa ukuya balutengano. Abandu bingi bamwitike Yesu ukuya Malafyale wabo. Ubunyafyale bwa Kyala bukwisa kubapoka aba bali kulubafu lwake pakabalilo kakonanga ababombambibi. Aliwesa uyu linga olonda Ubunyafyale bwa Kyala olondiwa ukumwitika Yesu.—Belenga Ubusetuli 7:9, 14, 16, 17.
Pakabalilo ka finja 1,000 Ubunyafyale ubu bukwisa pofwanisya ubwighane bwa Kyala ku bandu. Paladaiso akwisa pakuya pa kisu kyosa. Pabumalilo, Yesu akwisa poghomosya Ubunyafyale bwake kwa Tata wake. (1 Bakorinti 15:24-26) Ngimba alipo yumo uyu mubaghile ukumbula isya Bunyafyale bwa Kyala? —Belenga Salimo 37:10, 11, 29.
^ ipal.6 Ukuti mumanye isya busololi ubu bwakwanilisiwe mu 1914, keta peji 215-218 mu buku lya Kasi Baibolo Likusambizgachi Chomenechomene?
