MUTU 8
Nongwa Yafiki Kyala Itikisye Indamyo pa Kisu Kyapasi?
1. Ngimba indamyo syalyandile bulebule?
Akabalilo kosa aka Kyala abapele abandu ukuti balaghile ikisu, batoliwe usosyapo indamyo sya bandu
Indamyo syalyandile pa kisu akabalilo aka Setano ayobile ubutungulu. Pabwandilo Setano ali wandumi wa Kyala loli “atikwimamo mbwanaloli.” (Yohani 8:44) Umwene alondagha ukuti abandu bamwiputeghe. Setano ayobile ubutungulu kwa Eva, kangi alondagha ukuti Eva ampilikileghe umwene. Adamu na Eva batoliwe ukumpilikila Kyala. Isi Adamu abombile syo sitwele indamyo pamopene nifwa.—Belenga Ubwandilo 3:1-6, 19.
Akabalilo aka Setano ayobagha na Eva ukuti aleke ukumpilikila Kyala, umwene akanagha ukuti Kyala akabaghila ukulaghila kanunu. Abandu bingi bali kulubafu lwa Setano. Bokana ukulongosiwa na Kyala. Yo nongwa Setano ‘nkulumba wa kisu.’—Belenga Yohani 14:30; 1 Yohani 5:19.
2. Ngimba ifi Kyala apelile fyali ni ndamyo?
Fyosa ifi Kyala apelile fyali finunu. Abandu pamopene na bandumi bosa babaghile ukumpilikila Kyala papo bosa bali bagholofu. (Ukukumbusya Indaghilo 32:4, 5) Kyala atupelile nu bwabuke bwa kubomba inunu pamo imbibi. Ubwabuke ubu bukutupa ulusako lwakuti tunangisye ukuti tuli nu lughano kwa Kyala.—Belenga Yakobu 1:13-15; 1 Yohani 5:3.
3. Nongwa yafiki Kyala itikisye indamyo pakabalilo kalino?
Akabalilo kosa aka Yehova olonda ukuti twebandu pamopene na bandumi tusalepo twibene ukuleka ukumpilikila. Nongwa yafiki? Umwene abombile isi ukuti abandu bakete bene ukuti Kyala yomwene abaghile usosyapo indamyo sya bandu. (Undumbilili 7:29; 8:9) Lino ifinja fikindilepo 6,000 abandu bakwilongosya bene. Ubulaghili bwa bandu butoliwe usosyapo ubwite, usita kukonga indaghilo nububine.—Belenga Yeremiya 10:23; Baroma 9:17.
Aba bakwitika ubulaghili bwa Kyala botuliwa. (Yesaya 48:17, 18) Kasyele akabalilo kanandi ukuti Yehova asosyepo amaboma gha bandu. Abandu bene aba bosala ubulaghili bwa Kyala bisa kwikala pa kisu.—Yesaya 11:9.—Belenga Danieli 2:44.
Ketelela ividiyo Nongwa Yafiki Kyala Itikisye Indamyo ya Kisu Kyapasi?
4. Ngimba ubufisa lyoyo bwa Kyala bututula bulebule?
Setano ayobile ukuti abandu bomubombela Kyala nongwa yakuti bolonda ubutuli bwake. Ngimba mubaghile unangisya ukuti ubu butungulu? Ee! Ubufisa lyoyo bwa Kyala bukutupa ulusako lwakuti tunangisye ukuti tuli kulubafu lwa Kyala pamo lwa bandu. Ulubafu ulu tusalile luboneka ukwendela mu mbombo syitu.—Belenga Jobu 1:8-12; Isya Mbupingamu 27:11.
5. Muno tubaghile usalila Kyala ukuya Mulongosi witu
Imbombo syitu sinangisya linga tulonda ukulongosiwa na Kyala
Tubaghile usala Kyala ukuya Mulongosi witu linga tumanyila nukukonga isi iBaibolo liyoba. (Yohani 4:23) Tubaghile ukana ulongosiwa na Setano linga tukana ukwingililapo pa ndyali nu bwite, momuno Yesu abombile.—Belenga Yohani 17:14.
Setano osanusya utuyilo utubibi ukuya tununu. Linga tukana utuyilo twa Setano tubaghile ubengana nabamanyani bitu na bakamu. (1 Peteri 4:3, 4) Aka kabalilo kakuti tusale. Ngimba tukuya pokindilila ukuya pamopene na babombi ba Kyala? Linga tubombile isi, kokuti tunangisya ukuti Setano mutungulu. Setano atile umundu aliwesa akabaghila ukumbombela Kyala linga aghene nindamyo.—Belenga 1 Bakorinti 6:9, 10; 15:33.
Nongwa ya lughano lwake umwene olonda usosyapo imbibi ni ndamyo syosa. Bosa aba bosubila mwa Kyala bakwisa pohoboka bwila na bwila pa kisu apa.—Belenga Yohani 3:16.
