MUTU 5
Ngimba ubwighane bwa Kyala ku kisu Iki bo buliku?
1. Nongwa yafiki Kyala apelile ikisu?
Yehova apelile ikisu ukuti abandu bikalemo. Akaya ka bandu po pakisu apa. Kyala apelile abandu bakwanda Adamu na Eva ukuti bikale pakisu papo kumwanya apelileko abandumi. (Jobu 38:4, 7) Adamu apeliwe ungunda unnunu uwa Edeni. (Ubwandilo 2:15-17) Ubwighane bwa Kyala bwali bwakuti Adamu na bana bake bikale nu bumi bwa bwila na bwila pa kisu.—Belenga Salimo 37:29; 115:16.
Pabwandilo ungunda wa Edeni wene gho wali paladaiso. Adamu na Eva babuliwe ukuti bapape nukwisusya ikisu. Ikisu kyosa kyayagha pakuya paladaiso. (Ubwandilo 1:28) Ikisu kitabaghila ukonangika. Ko kaya ka bandu bwila na bwila.—Belenga Salimo 104:5.
Ketelela ividiyo Nongwa Yafiki Kyala Apelile Ikisu?
2. Nongwa yafiki lino ikisu kikaya paladaiso?
Nongwa yakuti bakalimpilikile Kyala, Adamu na Eva basosiwemo mu Edeni. Nayumo umundu uyu abaghile ughomokesyapo ungunda wa paladaiso. IBaibolo liyoba ukuti “Ikisu kyosa Kyala akibikile m’maboko gha baniongafu.”—Jobu 9:24.—Belenga Ubwandilo 3:23, 24.
Ngimba kokuti ubwighane bwa Kyala butoliwe? Ayi! Umwene wamaka ghosa. Ubwighane bwake bukabaghila utoliwa. (Yesaya 45:18) Kyala akwisa kubapa ubumi bwa bwila na bwila muno umwene alondelagha pabwandilo.—Belenga Salimo 37:11, 34.
3. Ngimba paladaiso akwisa ndili?
Paladaiso akwisa pa kisu linga Yesu andile ulaghila ukuya Malafyale. Pa bwite bwa Aramagedoni Yesu akwisa kubalongosya abandumi ukuti bonange ababombambibi bosa. Yesu akwisa kumpinya Setano ifinja 1000. Bosa aba bobomba inunu bakwisa kupona, papo Yesu akwisa kubalongosya nukubapoka. Abene bakwisa pohoboka mu Paladaiso.—Belenga Ubusetuli 20:1-3; 21:3, 4.
4. Ngimba indamyo sikwisa kumalika ndili?
Ngimba Kyala akwisa kusosyapo ndili indamyo? Yesu ayobile “ikimanyilo” kya kumalika kwa ndamyo. Indamyo isi silipo lino sikutubula ukuti ‘ubumalikisyo’ buli pipi.—Belenga Matai 24:3, 7-14, 21, 22.
Indamyo syosa sikwisa kumalika mu kabalilo ka finja 1000 aka Yesu akwisa kulaghila. (Yesaya 9:6, 7; 11:9) Umwene yo Malafyale, Mputi Mkulumba kangi akwisa kubahobokela abandu imbibi syabo. Ukwendela mwa Yesu, Kyala akwisa pososyapo ububine, ubukangale pamopene nifwa.—Belenga Yesaya 25:8; 33:24.
5. Yonani akwisa kwikala mu Paladaiso?
Ku Nyumba ya Bunyafyale ya Baketi ba Yehova abandu bomanyila ukuya balughano nu kunhobosya Kyala.
Aba bakumpilikila Kyala bakwisa kwikala mu Paladaiso. (1 Yohani 2:17) Yesu abatumile abafundiwa bake ukuti balonde abandu abatengamoyo nukubamanyisya ukuya pabumanyani na Kyala. Lino, Yehova olonda abandu bingi bingile mu Paladaiso. (Zefaniya 2:3) Ku Nyumba ya Bunyafyale ya Baketi ba Yehova abandu bomanyila ukuya bapapi balughano. Abapapi na bana bomanyila inkhani inunu isi pamopene.—Belenga Mika 4:1-4.
