IKIMANYILO 04
Ngimba Kyala yo Nani?
Ukufuma pakabalilo aka abandu bapeliwe, bikwiputa ku ba kyala abakukindanakindana. Loli Ibaibolo likuyoba isya Kyala yumo uyu “nkulumba ukubakinda aba kyala bosa.” (2 Syambukulu 2:5) Ngimba Kyala uyu yo nani? Ngimba findu fiki fikumpangisya ukuya nkulumba ukubakinda aba kyala bosa aba abandu bikubiputa? Nkimanyilo iki, tukuya pakumanyila muno Kyala uyu ikulondela ukuti tum’manye.
1. Ngimba Kyala ingamu yake yo nani kangi syafiki sikunangisya ukuti umwene ikulonda ukuti tum’manye?
Mu Baibolo Kyala ikwiyoba mwene ukuti: ‘Yo une Yehova. Ingamu yangu yo yiyiyi.’ (Belenga Yesaya 42:5, 8. NWT) Nkihiburi ingamu yakuti “Yehova” yikusanusya ukuti “Ikupangisya Ukuyako.” Yehova ikulonda ukuti tuyimanye ingamu yake. (Ukusoka 3:15) Ngimba tukumanya bulebule isi? Mu Baibolo, ingamu yakuti Yehova yikwaghiwa mu malo aghakukinda 7,000. a Ingamu yakuti Yehova ya “Kyala wakumwanya na pa kisu kya pasi.”—Ukukumbusya Indaghilo 4:39.
2. Ngimba Ibaibolo likutubula isyafiki isya Yehova?
Ibaibolo likuyoba ukuti pa ba kyala bosa aba abandu bikubiputa, Yehova yo Kyala wa bwanaloli. Nongwa yafiki? Filipo ififukwa fingi. Yehova yo ndaghili unkulumba kangi umwene “yo Nkinde nkisu kyosa.” (Belenga Salimo 83:18.) Umwene “Wamaka,” isi sikusanusya ukuti ali namaka aghakubombela kilikyosa iki asalile ukubomba. Umwene “apelile ifindu fyosa” ifi fili nkisu na kumwanya. (Ubusetuli 4:8, 11) Mwakukindana na aliwesa, Yehova mwene yo aliko kangi ikuya pakuyako kwa bwila na bwila.—Salimo 90:2.
MANYILA NYINGI
Keta ukukindana uku kulipo pakati pangamu sya kungindika Kyala ni ngamu yake iyakuti Yehova. Kangi tukuya pakumanyila inongwa iyi afumbulile ingamu iyi kumyinu.
3. Kyala ali ni ngamu nyingi isyakungindika loli ali ni ngamu yake yimoyene
Ngimba yilipo indamyo yiliyosa linga tukubombela ingamu yakungindika umundu pamo ingamu yake? Ukuti mumwaghe ansala, Ketelela IVIDIYO, kangi muyobesanie ilalusyo ili.
-
Ngimba pali kukindana kuliku pakati pa ngamu iyakungindika bo “Mwalafyale,” ni ngamu yeneko?
Ibaibolo likuyoba ukuti abandu bikwiputa aba kyala na banyafyale bingi. Belenga Salimo 136:1-3, kangi muyobesanie ilalusyo ili:
-
Ngimba “Kyala wa ba kyala” na ‘Mwalafyale wa banyafyale’ yo nani?
4. Yehova ikulonda ukuti muyimanye ingamu yake nu kuyibombela
Ngimba findu fiki fikunangisya ukuti Yehova ikulonda ukuti tuyimanye ingamu yake? Ketelela IVIDIYO, kangi muyobesanie ilalusyo ili.
-
Nongwa yafiki mukwinong’ona ukuti Yehova ikulonda ukuti ingamu yake yimanyiwe?
Yehova ikulonda ukuti abandu babombeleghe ingamu yake. Belenga Baroma 10:13 NWT kangi ukufuma apo muyobesanie amalalusyo agha:
-
Nongwa yafiki kwakulondiwa ukuti tubombeleghe ingamu ya Kyala iyakuti Yehova?
-
Ngimba mukwipilika bulebule linga yumo ikukumbukila ingamu yinu nu kuyibombela imbombo?
-
Ngimba mukwinong’ona ukuti Yehova ikwipilika bulebule linga tukubombela ingamu yake?
5. Yehova ikulonda ukuti muyeghe nawe pabumanyani
Unkikulu uwakufuma ku Cambodia uyu ingamu yake yo Soten ayobile ukuti, ukuyimanya ingamu ya Kyala kwalimpangisye ukuya walusekelo “ukukinda akabalilo kosa.” Ketelela IVIDIYO, kangi muyobesanie ilalusyo ili.
-
Mu vidiyo iyi, ngimba ukuyimanya ingamu ya Kyala kwalimpalamasisye bulebule Soten?
Bo mukali ukuya pabumanyani nu mundu yumo, ikyakwanda mukuyimanya tasi ingamu yake. Belenga Yakobu 4:8a, kangi muyobesanie amalalusyo agha:
-
Ngimba Yehova ikubasuma ukuti mubombe isyafiki?
-
Ngimba ukuyimanya nu kuyibombela ingamu ya Kyala, kubaghile ukubatula bulebule ukuti muye nawe pabumanyani?
ABANDU BAMO BIKUYOBA UKUTI: “Alipo Kyala yumoywene, sikaya nimbombo muno tubaghile ukuyiyobela ingamu yake.”
-
Ngimba mukusubila ukuti ingamu ya Kyala yo Yehova?
-
Ngimba mubaghile ukulingania bulebule ukuti Kyala ikulonda ukuti tubombeleghe ingamu yake?
IFUNDO INYWAMU
Yehova yo ngamu ya Kyala wa bwanaloli. Umwene ikulonda ukuti tuyimanye kangi tuyibombeleghe ingamu yake ukuti tuye nawe pabumanyani.
Ukughomokelamo
-
Ngimba Kyala akindene bulebule na ba kyala abangi aba abandu bikubiputa?
-
Nongwa yafiki tukulondiwa ukubombela ingamu ya Kyala?
-
Ngimba findu fiki fikunangisya ukuti Yehova ikulonda ukuti tusegheleleghe kumyake?
KETA KANGI IFINGI
Keta ifindu 5 ifi fikutupako ubuketi ubwakuti Kyala aliko.
Keta inongwa iyi akabalilo kosa tukulondiwa ukusubila ukuti Kyala aliko.
“Kasi Ninjani Wakalenga Chiuta?” (Gongwe la Mulinda, Ogasiti 1, 2014)
Nongwa yafiki tukulondiwa ukubombela ingamu ya Kyala nalinga ukuti tukamanya muno abandu ba iyolo bayiyobelagha?
Ngimba yilipo indamyo yiliyosa ukunkolela Kyala ni ngamu yiliyosa iyi tukulonda? Keta inongwa iyi tukuyobela ukuti umwene ali ni ngamu yimoyene.
“Kasi Chiuta Wali na Mazina Ghalinga?” (Inkhani ya pawebusayiti)
a Ukuti mumanye nyingi isi ingamu ya Kyala yikusanusya kangi inongwa iyi abandu bamo bayisosisyemo mu Baibolo, keta Vyakusazgirapo A4 (Malemba Ghakupatulika mu Mang’anamuliro gha Charu Chiphya)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
