IKIMANYILO 07
Ngimba Yehova Ikuboneka Bulebule?
Linga mukwinong’onela isya Yehova, ngimba findu fiki fikwisa m’minong’ono ghinu? Ngimba mukwinong’ona ukuti umwene ali kubutali fiyo kangi mukabaghila ukuya nawe pabumanyani. Pamo ngimba mukwinong’ona ukuti umwene wamaka fiyo kangi akaya nu bundu bo ikitayataya? Ngimba Yehova ikuboneka bulebule? Ukufuma mu Baibolo Yehova ikufumbula utuyilo utu ali nato.
1. Nongwa yafiki tukabaghila ukumbona Kyala?
“Kyala Mbepo.” (Yohani 4:24) Yehova akaya numbili bo muno tuyilile uswe. Umwene mbepo kangi ikwikala kumwanya amalo agha tukabaghila ukuketako.
2. Ngimba utuyilo tumo twa Yehova to tuliku?
Nalinga ukuti tukabaghila ukunketa Yehova, loli tubaghile ukum’manya nu kungana panongwa yakuti umwene ikunangisya utuyilo utununu. Ibaibolo likuyoba ukuti: ‘Yehova abughanile ubwanaloli kangi atisakubataghamo abikemo bake.’ (Salimo 37:28) Umwene “wakibabilisi ikikulumba kangi walupakisyo,” fiyofiyo linga ikubaketa abandu bikutamiwa. (Yakobu 5:11) ‘Yehova alipipi itolo na aba indumbula syabo sisulumenie kangi ikubapoka aba indumbula syabo silikisiwe.’ (Salimo 34:18) Ngimba musimenye ukuti Yehova ikupalamasiwa namuno tukubombela ifindu? Umundu uyu asalile ukubomba ifindu ifibibi, ikunkalalisya umwene kangi ikumpangisya ukuti aleke ukuhoboka. (Salimo 78:40, 41) Loli umundu uyu ikubomba ifindu ifinunu ikumpangisya umwene ukuya walusekelo.—Belenga Isya Mbupingamu 27:11.
3. Ngimba Yehova ikunangisya bulebule ukuti atughanile?
Akayilo ka pamwanya aka Yehova alinako lo lughano. Ukuyoba ubwanaloli, “Kyala lughano.” (1 Yohani 4:8 NWT) Yehova ikufumbula ulughano lwake komma ukwendela mu Baibolo mwene loli na mfindu ifi apelile. (Belenga Imbombo sya Batumiwa 14:17.) Mwakifwanikisyo, inong’onela muno atupelile uswe. Yehova atupele uluso ulwa kuketa uluko ulununu, ukupilikisya inyimbo inunu kangi ukughela ifyakulya ifinunu. Umwene ikulonda ukuti tuhobokeghe nu bumi.
MANYILA NYINGI
Keta isi Yehova ikubomba ukuti afwanisye ukubomba ifindu ifyakuswighisya. Kangi keta muno Yehova ikunangisyila utuyilo twake utununu.
4. Mbepo mwikemo gho maka agha Kyala ikubombela imbombo
Bo muno tukubombela amaboko ukubomba imbombo, Yehova ikubombela mbepo wake mwikemo. Ibaibolo likuyoba ukuti mbepo mwikemo akaya mundu loli gho maka agha Kyala ikubombela ukuti afwanisye isi ikulonda. Belenga Luka 11:13 na Imbombo sya Batumiwa 2:17, ukufuma apo muyobesanie amalalusyo agha:
-
Kyala ikuya ‘pakubapako’ mbepo mwikemo abandu bosa aba bikunsuma. Ngimba mukwinong’ona ukuti mbepo mwikemo mundu pamo maka agha Kyala ikubombela imbombo? Nongwa yafiki mukuyoba bo ulu?
Yehova ikubombela mbepo mwikemo ukuti afwanisye isi ikulonda. Belenga Salimo 33:6 na 2 Peteri 1:20, 21, ukufuma apo muyobesanie ilalusyo ili:
-
Ngimba njila siliku isingi isi Yehova abombile mbepo wake mwikemo?
5. Yehova ali na kayilo akanunu
Mose ali mbombi wa Kyala unsubiliwa loli alondagha ukum’manya kanunu Umpeli wake. Mose alimbulile Kyala ukuti: ‘Nasumagha ukuti unangisye ubununu une injila iyi mbaghile ukwendamo ukuti ngumanye uwe.’ (Ukusoka 33:13) Yehova alimbulile Mose muno umwene ayilile. Belenga Ukusoka 34:4-6, ukufuma apo muyobesanie amalalusyo agha:
-
Ngimba tuyilo tuliku utu Yehova afumbwile kwa Mose?
-
Ngimba tuyilo tuliku utu Yehova alinato utu tukubahobosya?
6. Yehova ikubapasikisya abandu
Ababombi ba Kyala, Abahiburi, bali batumwa ku Egiputi. Ngimba Yehova ipilikagha bulebule bo ikubaketa abandu bake bikutamiwa? Pilikisya IVIDIYO YA MASYU GHENE kangi mwendeleghe pampene pamo belenga pa Ukusoka 3:1-10. Ukufuma apo muyobesanie amalalusyo agha.
-
Ngimba inkhani iyi yikubamanyisya isyafiki ukufwana namuno Yehova ikwipilikila linga abandu bikutamiwa?—Keta amavesi 7 kangi 8.
-
Ngimba mukwinong’ona ukuti Yehova ikulonda ukubatula abandu kangi ukuti abaghile ukufwanisya ukusibomba? Nongwa yafiki mukuyoba bo ulu?
7. Tubaghile ukumanyila isya Yehova ukwendela nkipeliwa
Yehova ikufumbula utuyilo twake ukwendela mfindu ifi apelile. Ketelela IVIDIYO. Ukufuma apo belenga Baroma 1:20, kangi muyobesanie ilalusyo ili.
-
Ngimba tuyilo tuliku utwa Yehova utu mukuketa mfindu ifi apelile?
ABANDU BAMO BIKUYOBA UKUTI: “Kyala akaya mundu, umwene maka agha ghali paliposa.”
-
Ngimba mukwinong’ona isyafiki?
-
Nongwa yafiki mukwinong’ona isi?
IFUNDO INYWAMU
Yehova Mundu uyu tukabaghila ukunketa, umwene ali nutuyilo twingi utununu, fiyofiyo ulughano.
Ukughomokelamo
-
Nongwa yafiki tukabaghila ukunketa Yehova?
-
Ngimba mbepo mwikemo findu fiki?
-
Ngimba utuyilo tumo utwa Yehova to tuliku?
KETA KANGI IFINGI
Manyila nyingi isyakufwana nutuyilo 4 utwa pamwanya utu Yehova ali nato.
“Kasi Tingamulongosora Wuli Chiuta?” (Gongwe la Mulinda Na. 1 2019)
Keta ubuketi ubwakuti Yehova atikwaghiwa paliposa.
Keta inongwa iyi Ibaibolo likufwanikisya mbepo mwikemo na maboko gha Kyala.
Umundu uyu atikuketa akasubilagha ukuti Yehova ikumpasikisya. Keta isi syachenjile aminong’ono ghake.
“Sono Nkhuwona Kuti Ningawovwira Ŵanji” (Gongwe la Mulinda, Okutobala 1, 2015)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
