IKIMANYILO 08
Mubaghile Ukuya M’manyani wa Yehova
Yehova ikulonda ukuti mum’manye kanunu. Nongwa yafiki? Umwene ikusubila ukuti linga mukumanyila isya tuyilo twake, injila syake kangi nubwighane bwake, mukuya pakulonda ukuya m’manyani wake. Ngimba mubaghile ukusubila ukuti mubaghile ukuya pabumanyani na Kyala? (Belenga Salimo 25:14.) Ngimba mubaghile ukubomba isyafiki ukuti muye m’manyani wake? Ibaibolo likwamula amalalusyo agha kangi likuyoba inongwa iyi ukuya pabumanyani na Yehova kwakulondiwa fiyo ukukinda ikindu kilikyosa.
1. Ngimba Yehova ikulonda ukuti mubombe isyafiki?
“Amusegheleleghe kwa Kyala, po yope isakuseghelelagha kumyinu.” (Yakobu 4:8) Ngimba isi sikusanusya isyafiki? Yehova ikulonda ukuti muye nawe pabumanyani. Abandu bamo bikuketa ukuti kukafu ukuya pabumanyani na Kyala panongwa yakuti batikunketa. Loli Amasyu ghake Ibaibolo liyobile syosa isi tukulondiwa ukubomba ukuti tuseghelele kumyake. Linga tukubelenga Ibaibolo, ubumanyani bwitu nu mwene bukukula nalinga tukanketamo.
2. Nongwa yafiki Yehova M’manyani nnunu fiyo uyu tubaghile ukuya nawe?
Akayapo umundu uyu abaghanile fiyo ukukinda Yehova. Umwene ikulonda ukuti muhobokeghe kangi munsumeghe akabalilo kosa aka mukulonda ubutuli. “Syosa isi mukwiyaya nasyo syo muntaghileghe yuyo, namanga umwene ikubiyayila umwe.” (1 Peteri 5:7) Yehova itendekisye akabalilo kosa ukubatula, ukubasubisya nu kubapilikisya abamanyani bake.—Belenga Salimo 94:18, 19.
3. Ngimba Yehova ikulonda ukuti abamanyani bake babombeghe isyafiki?
Yehova abaghanile abandu bosa, “loli abagholofu bo Kyala ikwikyela nabo.” (Isya Mbupingamu 3:32) Yehova ikughulila ukuti abamanyani bake bikuya pakughelaghela ukubomba inunu nu kusibenga imbibi. Abandu bamo bikwipilika ukuti bakabaghila ukubomba syosa isi Yehova ikulonda ukuti babombeghe nu kwepuka ku mbibi. Nalinga sili bo ulu Yehova ikubapilikisya. Umwene ikwikyela na aliwesa uyu anganile naloli kangi uyu ikughelaghela ukubomba kilikyosa ukuti anhobosye Umwene.—Salimo 147:11; Imbombo sya Batumiwa 10:34, 35.
MANYILA NYINGI
Keta muno mubaghile ukuyila pabumanyani na Yehova kangi keta inongwa iyi umwene M’manyani nnunu fiyo uyu tubaghile ukuya nawe.
4. Abrahamu ali m’manyani wa Yehova
Inkhani ya mu Baibolo ya Abrahamu (uyu ikukoleliwa kangi ukuti Abramu) yikututula ukupilikisya isi sikusanusya ukuya m’manyani wa Kyala. Belenga isya Abrahamu pa Ubwandilo 12:1-4. Ukufuma apo muyobesanie amalalusyo agha:
-
Ngimba Yehova alimbulile Abrahamu ukuti abombe isyafiki?
-
Ngimba Yehova afingile isyafiki ku mwene?
-
Ngimba Abrahamu abombile isyafiki na isi Yehova alimbulile ukuti abombe?
5. Isi Yehova ikughulila ku bamanyani bake
Akabalilo kosa tukughulila ifindu fimo ukufuma ku bamanyani bitu.
-
Ngimba findu fiki ifi mukulonda ukuti abamanyani binu bababombeleghe?
Belenga 1 Yohani 5:3, ukufuma apo muyobesanie ilalusyo ili:
-
Ngimba Yehova ikulonda ukuti abamanyani bake babombeghe isyafiki?
Ukuti tumpilikile Yehova, tukulondiwa ukuchenja akayilo kitu namuno tukubombela ifindu. Belenga Yesaya 48:17, 18, ukufuma apo muyobesanie ilalusyo ili:
-
Nongwa yafiki Yehova ikubasuma abamanyani bake ukuti bachenje utuyilo twabo?
Um’manyani unnunu ikutubula muno tubaghile ukubombela ifindu ifi fibaghile ukutufighilila nu kusayiwa nafyo. Syo isi Yehova ikubomba ku bamanyani bake
6. Ngimba Yehova ikubomba isyafiki ukuti abatule abamanyani bake?
Yehova ikubatula abamanyani bake ukwifimbilisya ku ndamyo. Ketelela IVIDIYO, ukufuma apo muyobesanie ilalusyo ili.
-
Ngimba Yehova alintulile bulebule unkikulu wa mu vidiyo ukuti amalane ni ndamyo yakutamiwa aminong’ono?
Belenga Yesaya 41:10, 13, ukufuma apo muyobesanie amalalusyo agha:
-
Ngimba Yehova afingile ukuti ikuya pakubabombela isyafiki abamanyani bake bosa?
-
Ngimba mukwinong’ona ukuti Yehova abaghile ukuya m’manyani nnunu? Nongwa yafiki mukuyoba bo ulu?
Um’manyani wanaloli ikututula linga tukulondiwa ubutuli. Yope Yehova ikuya pakubatula
7. Ubumanyani bwitu na Yehova bukongelelapo ukuyobesania
Ukuyobesania kukukasya ubumanyani. Belenga Salimo 86:6, 11, ukufuma apo muyobesanie amalalusyo agha:
-
Ngimba tubaghile ukuyobesania bulebule na Yehova?
-
Ngimba Yehova ikuyoba bulebule nanuswe?
Tukuyobesania na Yehova ukwendela ndwiputo, umwene ikuyobesania nanuswe ukwendela mu Baibolo
ABANDU BAMO BIKUYOBA UKUTI: “Sikabaghila ukubombiwa ukuya pabumanyani na Kyala.”
-
Ngimba lemba liliku ili mubaghile ukubombela ukunangisya ukuti mubaghile ukuya pabumanyani na Yehova?
IFUNDO INYWAMU
Yehova ikulonda ukuya pabumanyani nanumwe kangi umwene ikuya pakubatula ukuti musegheleleghe kumyake.
Ukughomokelamo
-
Ngimba Yehova ikubatula bulebule abamanyani bake?
-
Nongwa yafiki Yehova ikubabula abamanyani bake ukuti bachenje utuyilo twabo?
-
Ngimba mukwinong’ona ukuti kukafu ukuya m’manyani wa Yehova? Nongwa yafiki mukuyoba bo ulu?
KETA KANGI IFINGI
Ngimba ubumanyani bwinu na Yehova bubaghile ukupalamasya bulebule ubumi bwinu?
“Yehova Ndiye Mulungu Wofunika Kum’dziŵa” (Nsanja ya Olonda, Febuluwale 15, 2003)
Keta muno mubaghile ukuyila m’manyani wa Kyala.
Keta inongwa iyi unkikulu yumo ipilikilagha muno ubumanyani bwake na Yehova bwalimpokile
“Nkhawopanga Chomene Nyifwa!” (Gongwe la Mulinda Na. 1 2017)
Pilikisya ku balumyana na balindwana muno bikunketela Yehova.
Ngimba Sikusanusya Isyafiki Ukuya M’manyani wa Kyala? (1:46)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
