IKIMANYILO 10
Ngimba Ingomano sya Baketi ba Yehova Sibaghile Ukubatula Bulebule?
Ngimba mwisilemo ku ngomano sya Baketi ba Yehova? Linga mukabukamo ku ngomano isi, mubaghile ukupasya pakabalilo akakwanda. Mubaghile ukwinong’ona ukuti: ‘Ngimba findu fiki fikubombiwa pangomano isi? Nongwa yafiki syakulondiwa? Nongwa yafiki ngulondiwa ukwaghiwapo?’ Nkimanyilo iki, mukuya pakumanyila muno ukubungana pampene na bininu kubaghile ukubatulila ukuti museghelele kwa Kyala kangi sikuya pakubatula pamwibene.
1. Nongwa yafiki Abaketi ba Yehova bikubungana pampene?
Keta muno uyu alembile Ibaibolo ayobile ukulondiwa kwa kubungana na bangi. Umwene atile: “Nikuntufyagha Yehova bo ndi nkati ndukomano ulukulumba.” (Salimo 26:12) Abaketi ba Yehova bikulwagha ulusekelo ulunywamu linga babungene pampene na binabo. Pa kisu kyosa, abene bikubungana sabata aliwesa ukuti bantufye Kyala, bikwimba inyimbo nu kwiputa. Utubalilo tumo pa kyinja, abene bikuya ningomano inywamu ukuti bamwipute Kyala.
2. Ngimba mukuya pakumanyila isyafiki pangomano syitu?
Pangomano syitu, tukumanyila ukufuma M’masyu gha Kyala Ibaibolo, “ukubalingania abandu munjobelo yabo ukuti basyaghanie.” (Belenga Nehemiya 8:8.) Pangomano syitu, mukuya pakumanyila isyakufwana na Yehova kangi nutuyilo twake utununu. Linga mumanyile nyingi isyakufwana nulughano lwake, mukuya pakuseghelela fiyo kumyake. Mukuya pakumanyila kangi muno umwene abaghile ukubatulila ukuti muye nu bumi ubwakuhobosya.—Yesaya 48:17, 18.
3. Ngimba mubaghile ukusayiwa bulebule linga mukwangala na bangi pangomano syitu?
Yehova ikutubula ukuti ‘twinong’onelaneghe twe babo batupu nukukasania ukuti tunangisyeghe ulughano nukubomba imbombo inunu, tungalekagha ukwaghanila pampene.’ (Bahiburi 10:24, 25) Ku ngomano syitu, mukuya pakubagha abandu aba baghanene naloli kangi bope bikuhoboka ukumanyila isya Kyala. Kangi mukuya pakuketa ukuti bikukasania ukufuma mu Baibolo. (Belenga Baroma 1:11, 12.) Kangi mwisakubamanya abandu abangi, aba bali pabweghi na aba bakaya pabweghi aba balusekelo nalinga ukuti bikwaghana ni ndamyo. Iki kyo kifukwa kimo iki Yehova ikulonda ukuti tubunganeghe pampene akabalilo kosa.
MANYILA NYINGI
Keta isi sikubombiwa pangomano sya Baketi ba Yehova kangi inongwa iyi bikwiyipila ukuti baghiwengepo pangomano isi.
4. Ingomano sya Baketi ba Yehova
Nkabalilo kakunyuma, Abakristu biyipagha ukuti babunganeghe pampene nu kumwiputa Yehova. (Baroma 16:3-5) Belenga Bakolosi 3:16, kangi muyobesanie ilalusyo ili:
-
Ngimba Abakristu bakunyuma bamwiputagha bulebule Yehova?
Amasiku agha, Abaketi ba Yehova bikubungana pampene ku Nyumba ya Bunyafyale. Keta muno ingomano syabo sikuyila, ketelela IVIDIYO. Ukufuma apo, keta ikithuzi iki kikunangisya ingomano sya kipanga kangi muyobesanie amalalusyo agha.
-
Ngimba kukolelana kuliku uku muketile pa isi sikubombiwa ku Nyumba ya Bunyafyale kangi na isi mubelengile pa Bakolosi 3:16?
-
Ukufwana ni vidiyo pamo ikithuzi iki muketile, ngimba muketile findu fiki ifingi ifi fibahobwisye?
Belenga 2 Bakorinti 9:7, kangi muyobesanie ilalusyo ili:
-
Nongwa yafiki Abaketi ba Yehova batikwendesya imbale ya fyabupe pangomano syabo?
Pampene nu mmanyisi winu muyobesanie isi mukwisa pakumanyila pangomano isyakukongapo.
-
Ngimba mukwinong’ona ukuti kighaba kiliku pangomano iki kisakubahobosya fiyo?
Ngimba musimenye?
Pa jw.org, mubaghile ukughagha amalo na kabalilo kuno ingomano sikubombiwa pa kisu kyosa.
-
Ingomano syitu sikongelelapo inkhani, ififwanikisyo kangi na mavidiyo. Ingomano sikwanda kangi nu kumalika nu lwiputo
-
Ifighaba fimo fya ngomano syitu, abakamu na balumbu bikuya nulusako lwa kwamulapo
-
Aliwesa ikwambililiwa, imbumba, aba bakaya pabweghi abakangale na bana
-
Tutikulipilisya indalama pangomano syitu. Abaketi ba Yehova batikumbula aliwesa ukuti abike indalama pamo ukwendesya imbale ya fyabupe.
5. Tukulondiwa ukwiyipa ukuti twaghiwengepo pangomano
Keta ikifwanikisyo kya mbumba iyi Yesu apapiwemo. Ukuti bafwanisye ukwaghiwapo pangomano isi syabombiwagha ikyinja kilikyosa, abene bendagha ubulendo ubutali ubu bwali bwa mamayilo 60 pamo ukuti amakilomita 100, kangi abene bendagha mfyamba ukufuma ku Nazareti ukubuka ku Yerusalemu kuno kwali itempile. Belenga Luka 2:39-42, kangi muyobesanie amalalusyo agha:
-
Ngimba mukwinong’ona ukuti ubulendo bwakubuka ku Yerusalemu ubu bwalondiwagha ukwiyipa?
-
Nongwa yafiki mukulondiwa ukughelaghela fiyo ukuti mwaghiwengepo pangomano?
-
Ngimba mukwinong’ona ukuti kununu ukwaghiwapo pangomano nalinga kukafu ukubomba isi? Nongwa yafiki mukuyoba bo ulu?
Ibaibolo likuti ukwaghiwapo pangomano nu kumwiputa Yehova kwakulondiwa fiyo. Belenga Bahiburi 10:24, 25, ukufuma apo muyobesanie ilalusyo ili:
-
Nongwa yafiki tukulondiwa ukwaghiwapo pangomano akabalilo kosa?
ABANDU BAMO BIKUYOBA UKUTI: “Tutikulondiwa ukubungana pampene na bangi. Kangi ukumanyila Ibaibolo pakaya syakufwana.”
-
Ngimba lemba pamo kifwanikisyo kiliku ikya mu Baibolo iki kikunangisya isi Yehova ikulonda?
IFUNDO INYWAMU
Ukwaghiwapo pangomano kukuya pakubatula ukumanyila nyingi isya Yehova, ukukasya ubumanyani nu mwene nu kumwiputa.
Ukughomokelamo
-
Nongwa yafiki Yehova ikutukasya ukuti tubunganeghe pampene?
-
Ngimba mukuya pakumanyila isyafiki pangomano sya Baketi ba Yehova?
-
Ngimba mukwinong’ona ukuti ukwaghiwapo pangomano kubaghile ukubatula kangi munjila isingi?
KETA KANGI IFINGI
Bule linga mukupasya ukubuka ku ngomano? Keta umundu uyu pabwandilo ipilikagha bo ulu loli lino andile ikusighana ingomano.
Keta muno undumyana yumo ahobokelagha ni ngomano kangi isi abombile ukuti aghiwengepo akabalilo kosa.
Keta muno abandu bamo bikwipilikila linga bikubuka ku ngomano.
“Chifukwa Wuli Mukwenera Kuluta ku Nyumba ya Ufumu?” (Inkhani ya pawebusayiti)
Keta muno aba babombagha ifya bwite bachenjile panongwa yakwaghiwapo pangomano sya Baketi ba Yehova.
“Palipose Nkhaŵanga na Futi Yane” (Gongwe la Mulinda, Julayi 1, 2014)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
