IKIMANYILO 15
Ngimba Yesu yo Nani?
Yesu yo mundu yumo uyu afumwike fiyo. Abandu bingi bayimenye ingamu ya Yesu loli bakamanya nyingi isyakufwana nu mwene, kangi bingi bali naminong’ono aghakukindanakindana pakuyoba isya Yesu. Ngimba Ibaibolo likuyoba isyafiki isyakufwana na Yesu?
1. Ngimba Yesu yo Nani?
Yesu yo wandumi wamaka fiyo uyu ikwikala kumwanya. Umwene kipeliwa kyakwanda kya Yehova. Yonongwa yake ikukoleliwa ukuti “wakipanda kufipeliwa fyosa.” (Bakolosi 1:15) Ibaibolo likunjoba Yesu ukuya Mwana wa Kyala “yumoywene ntigha” panongwa yakuti yo mwene uyu apeliwe mwapadela na Yehova. (Yohani 3:16) Yesu abombelagha pampene na Tata wake Yehova pakuntula ukupela ifindu fyosa. (Belenga Isya Mbupingamu 8:30.) Yesu ikukindilila ukuhoboka pakuya pabumanyani na Yehova. Umwene ikubomba mbusubiliwa pakuya njobi wa Yehova, papo yo “Isyu,” uyu abikagha amasyu nu bulongosi bwa Yehova.—Yohani 1:14.
2. Nongwa yafiki Yesu alisile pa kisu?
Kwa fyinja 2,000 ifi fikindile, mwakuswighisya Yehova abombile mbepo wake mwikemo ukubusamisya ubumi bwa Yesu kumwanya nu kubika nndwanda lwa ndindwana uyu ingamu yake ali yo Maria. Munjila iyi, Yesu apapiwe bo mundu. (Belenga Luka 1:34, 35.) Yesu alisile pa kisu ukuya Mesiya uyu Kyala afingile pamo Kristu ukuti abapoke abandu. a Ubusololi bosa ubwakuyoba isya Mesiya bwafwanisiwe nu mwene, isi syabatulile abandu ukumanya ukuti Yesu yo “Kristu Umwana wa Kyala umumi.”—Matai 16:16.
3. Ngimba lino Yesu alikughu?
Bo Yesu afwile, Kyala alinsyusisye ukuya wandumi kangi aghomokile kumwanya. Kuno, “Kyala alinkumfyusya alinkwenda nu kumpa ingamu iyi yili pamwanya pa ngamu syosa.” (Bafilipi 2:9) Lino Yesu ali nu budindo bwa pamwanya fiyo kangi umwene wabubili kwa Yehova.
MANYILA NYINGI
Mumanye nyingi isyakufwana na muno Yesu ayilile kangi na muno kuyilile kwakulondiwa ukumanyila isyakufwana nu mwene.
4. Yesu akaya yo Kyala Umwenemaka Ghosa
Ibaibolo likumanyisya ukuti nalinga Yesu kyo kipeliwa kya mwambepo kya maka kumwanya, umwene ikwilambika kwa Tata wake Yehova. Nongwa yafiki tubaghile ukuyoba bo ulu? Ketelela IVIDIYO nu kuketa isi Ibaibolo likumanyisya isyakufwana na maka gha Yesu pakughafwanikisya na gha Kyala umwenemaka ghosa.
Amalemba aghakukongapo agha ghikuya pakututula ukupilikisya ubumanyani ubu bulipo pakati pa Yehova na Yesu. Mubelenge ilemba lililyosa, ukufuma apo muyobesanie amalalusyo agha:
Belenga Luka 1:30-32.
-
Ngimba uwandumi alingenie bulebule ubumanyani ubu bulipo pakati pa Yesu na Yehova Kyala “Unkinde”?
Belenga Matai 3:16, 17.
-
Ngimba amasyu agha ghafumile kumwanya pakabalilo aka Yesu osiwagha ghatile fiki?
-
Ngimba mukwinong’ona ukuti ghali masyu ghanani?
Belenga Yohani 14:28.
-
Ngimba yo nani uyu nkulumba kangi ali nu budindo bwa pamwanya fiyo? Tata pamo umwana?
-
Ngimba Yesu asanusyagha isyafiki apa ankolelagha Yehova ukuti Tata?
Belenga Yohani 12:49.
-
Ngimba Yesu ikwinong’ona ukuti umwene na Tata wake mundu yumoywene? Ngimba mukwinong’ona isyafiki?
5. Ngimba findu fiki fikunangisya ukuti Yesu ali yo Mesiya?
Ibaibolo lili na mabusololi agha ghabaghile ukututula ukum’manya Mesiya uyu Kyala ansalile ukuti abapoke abandu. Ketelela IVIDIYO ukuti mumanye ghamo mwa mabusololi agha Yesu afwanisye bo ali pa kisu.
Belenga amabusololi gha mu Baibolo ukufuma apo muyobesanie amalalusyo agha:
Belenga Mika 5:2 ukuti mumanye kuno Mesiya ayagha pakupapiliwa. b
-
Ngimba ukupapiwa kwa Yesu kwafwanisye ubusololi ubu?—Matai 2:1.
Belenga Salimo 34:20 na Zekariya 12:10 ukuti mumanye isi Ibaibolo lyayobile ngani isyakufwana nu bufwe bwa Mesiya.
-
Ngimba amabusololi agha ghafwanisiwe naloli?—Yohani 19:33-37.
-
Ngimba mukwinong’ona ukuti yo Yesu uyu apangisye ukuti amabusololi agha ghafwanisiwe naloli?
-
Ngimba isi sikubasimikisyila isyafiki isyakufwana na Yesu?
6. Tukukasiwa linga tukumanyila isyakufwana na Yesu
Ibaibolo likuyoba ukulondiwa kwakumanyila isyakufwana na Yesu na isi Kyala ikulonda ukuti umwene abombe. Belenga Yohani 14:6 na 17:3, ukufuma apo muyobesanie ilalusyo ili:
-
Nongwa yafiki kwakulondiwa fiyo ukumanyila isya Yesu?
Yesu aliwile Injila iyakuti tuye pabumanyani na Kyala. Umwene amanyisye ubwanaloli bwa Yehova kangi ukwendela mwa Yesu tubaghile ukubwagha ubumi bwa bwila na bwila
ABANDU BAMO BIKUYOBA UKUTI: “Abaketi ba Yehova batikusubila mwa Yesu.”
-
Ngimba mubaghile ukwamula bulebule?
IFUNDO INYWAMU
Yesu yo kipeliwa kya maka fiyo kya mwambepo. Umwene Mwana wa Kyala kangi yo Mesiya.
Ukughomokelamo
-
Nongwa yafiki Yesu ikukoleliwa ukuti “wakipanda ku fipeliwa fyosa”?
-
Ngimba Yesu abombile isyafiki bo akali ukwisa pa kisu?
-
Ngimba tukumanya bulebule ukuti Yesu yo Mesiya?
KETA KANGI IFINGI
Manyila nyingi isyakufwana nu budindo bwa Yesu pakuya Mesiya.
Keta linga Ibaibolo likumanyisya ukuti Yehova alimpapile Yesu bo muno abandu bikubombela.
“Nongwa Yafiki Ibaibolo Likuti Yesu Mwana wa Kyala?” (Inkhani ya pawebusayiti)
Keta inongwa iyi ikimanyisyo ikyakuti kuli ba kyala batatu mwa Kyala yumoywene kikaya kya mu Baibolo.
“Kodi Yesu Ndi Mulungu?” (Nsanja ya Olonda, Epulelo 1, 2009)
Belenga muno ubumi bwa nkikulu yumo bwachenjile bo aketile isi Ibaibolo likuyoba isyakufwana na Yesu.
“Mzimayi Wachiyuda Anafufuzanso Mozama Zimene Ankakhulupirira” (Galamukani!, Meyi 2013)
a Nkimanyilo 26 na 27 tukuya pakuketa inongwa iyi abandu bikulondiwa ukupokiwa kangi na muno Yesu ikutupokela.
b Keta Amasyu gha Pabumalilo 2 ukuti mukete ubusololi ubu bwayobile kanunu akabalilo aka Yesu ayagha pakwisa pa kisu.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
