IKIMANYILO 16
Ngimba Yesu Abombile Isyafiki bo ali pa Kisu Kyapasi?
Linga abandu bingi bikwinong’ona isya Yesu bikuketa ukuti yo bonda uyu akafighililiwa, nsololi wamahala, pamo umundu uyu asyele panandi ukufwa. Loli ngimba tukumanyila isyafiki linga tukwinong’onela isya bumi bwake bwa pa kisu? Nkimanyilo iki, tukuya pakuketa ifindu fimo ifyakulondiwa fiyo ifi Yesu abombile kangi namuno fibaghile ukututulila.
1. Ngimba imbombo yakulondiwa kwa Yesu yali yo yiliku?
Imbombo yakulondiwa kwa Yesu yali ya ‘kufumusya amasyu amanunu agha Bunyafyale bwa Kyala.’ (Belenga Luka 4:43.) Umwene afumusyagha amasyu amanunu aghakuti Kyala ikuya pakwimika ubunyafyale pamo iboma ili likuya pakusosyapo indamyo isi abandu bwikwaghana nasyo. a Kwa fyinja fitatu na hafu, Yesu iyipagha fiyo ukubabula abandu amasyu aghakukasya agha.—Matai 9:35.
2. Ngimba ifika ifi Yesu abombile ubwighane bwake bwali bo buliku?
Ibaibolo likuyoba nyingi isya “maka nifiswighu ni fika ifi Kyala afipelelagha mwa [Yesu].” (Imbombo sya Batumiwa 2:22) Kyala alimpele Yesu amaka aghakukilaghila ikipeliwa, ukulyesya abandu bingi, ukubabumbulusya ababine nu kubasyusya abafwe. (Matai. 8:23-27; 14:15-21; Marko 6:56; Luka 7:11-17) Ifika ifi Yesu abombagha fyanangisyagha ukuti Kyala yo uyu alintumile. Kangi fyanangisyagha ukuti Yehova ali na maka aghakumasyila indamyo.
3. Ngimba tubaghile ukumanyilako isyafiki ukufwana namuno Yesu abombelagha ifindu?
Yesu ampilikilagha Yehova nkyakubombiwa kilikyosa. (Belenga Yohani 8:29.) Nalinga ukuti asusiwagha, Yesu abombile mbusubiliwa kilikyosa iki Tata wake alimbulile ukubomba ukufika pakabalilo aka afwilile. Isi Yesu abombile, syanangisyagha ukuti abandu bope babaghile ukumbombela Kyala nalinga bikwaghana ni ndamyo. Yonongwa yake Yesu atulekile “akakuketelamo ukuti [nuswe] tukongeghe m’makato ghake.”—1 Peteri 2:21.
MANYILA NYINGI
Keta muno Yesu afumukisyilagha amasyu amanunu nu kupela ifika.
4. Yesu afumusyagha amasyu amanunu
Yesu endagha ubulendo ubutali mu nsebo wa lufumbi ukufumusya amasyu amanunu. Belenga Luka 8:1, ukufuma apo muyobesanie amalalusyo agha:
-
Ngimba Yesu abafumukisyilagha abandu bene aba babunganagha ukuti bapilikisye kumyake?
-
Ngimba Yesu abombagha isyafiki ukuti abaghe abandu?
Kyala ayobile ngani ukuti Mesiya isakufumusyagha amasyu amanunu. Belenga Yesaya 61:1, 2, ukufuma apo muyobesanie amalalusyo agha:
-
Ngimba Yesu afwanisye bulebule ubusololi ubu?
-
Ngimba mukwinong’ona ukuti abandu amasiku agha bikulonda ukupilika amasyu amanunu?
5. Yesu amanyisyagha ubwanaloli bwakulondiwa fiyo
Ukongelelapo pakufumusya amasyu amanunu aghakuyoba isya Bunyafyale bwa Kyala, Yesu amanyisyagha ifimanyisyo ifyakutula fiyo. Keta ififwanikisyo finandi itolo ifi amanyisye Pabufumusi Bwake bwa Pakyamba. Belenga Matai 6:14, 34, na 7:12, ukufuma apo muyobesanie amalalusyo agha:
-
Ngimba bulongosi buliku ubwakutula ubu Yesu ikutupa mu mavesi agha?
-
Ngimba mukwinong’ona ukuti ubulongosi ubu bubaghile ukubatula abandu amasiku agha?
6. Yesu apelagha ifika
Yehova alimpele Yesu amaka aghakupelela ifika fingi. Ukuti mukete ikifwanikisyo kimokyene, belenga Marko 5:25-34 pamo ketelela IVIDIYO. Ukufuma apo muyobesanie amalalusyo aghakukongapo agha.
-
Mu vidiyo iyi, ngimba unkikulu uyu ali mbine asubilagha isyafiki?
-
Ngimba findu fiki fikubahobosya ukufwana nikyakuswighisya iki?
Belenga Yohani 5:36, ukufuma apo muyobesanie ilalusyo ili:
-
Ngimba ifika fya Yesu fikutupa “ubuketi buliku” pamo fikutusimikisyila isyafiki isyakufwana nu mwene?
Ngimba musimenye?
Ifindu fyosa ifi tufimenye ifyakufwana na Yesu fifumile mu mabuku 4 agha mu Baibolo bo ibuku lya Matai, Marko, Luka na Yohani. Aliwesa uyu alembile amabuku agha, alembile ifyakukindanakindana ifyakufwana na Yesu. Loli linga tukubelenga amabuku ghosa 4 agha tukumanya muno ubumi bwa Yesu bwayilile.
-
MATAI
yo uyu alembile ibuku lyake ilyakwanda. Ibuku ili, likutubula nyingi isyakufwana na isi Yesu amanyisyagha, fiyofiyo isyakufwana nu Bunyafyale bwa Kyala.
-
MARKO
yo uyu alembile akabuku akanandi. Ikutubula nyingi isya findu ifyakuhobosya ifi fyabombiwe pa bumi bwa Yesu.
-
LUKA
ikutubula muno Yesu aketelagha ukwiputa ukuya kwakulondiwa fiyo kangi ikulingania muno Yesu abombelagha ifindu mwa kisa na bakikulu
-
YOHANI
ikutubula nyingi isyakufwana nu bundu bwa Yesu mwakulingania ifindu fingi ifi Yesu ayobesaniagha na bamanyani bake ba pandumbula kangi na bangi, isisikututula ukumanya muno Yesu ayilile.
ABANDU BAMO BIKUYOBA UKUTI: “Yesu ali mundu nnunu itolo loli akali yo Mesiya.”
-
Ngimba umwe mukwinong’ona isyafiki?
IFUNDO INYWAMU
Yesu afumusyagha isya Bunyafyale bwa Kyala, apelagha ifika kangi ampilikilagha Yehova nkyakubombiwa kilikyosa.
Ukughomokelamo
-
Ngimba mbombo yiliku iyakulondiwa iyi Yesu abombagha bo ali pa kisu?
-
Ngimba ifika ifi Yesu apelagha fikutusimikisyila isyafiki?
-
Ngimba fimanyisyo filiku ifyakutula ifi Yesu amanyisyagha?
KETA KANGI IFINGI
Ngimba nkhani yiliku iyi Yesu ayobagha akabalilo kingi?
Keta inongwa iyi tukulondiwa ukusubila ukuti ifika ifi Yesu apelagha fyabombiwe naloli.
“Kodi pa Zozizwitsa za Yesu—Mungaphunzirepo Chiyani?” (Nsanja ya Olonda, Julayi 15, 2004)
Belenga muno umundu yumo achenjile ubumi bwake bo amanyile muno Yesu abapasikisyilagha abangi.
“Nkhaŵa Wakujighanaghanira Nekha” (Gongwe la Mulinda, Okutobala 1, 2014)
Keta imbatiko ya findu fyakulondiwa ifi Yesu abombile namuno afibombile mu mbatiko yake.
a Mfimanyilo 31-33 tukuya pakuyobesania nyingi isyakufwana nu Bunyafyale bwa Kyala.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
