IKIMANYILO 17
Ngimba Yesu Ikuboneka Bulebule
Bo tukumanyila isyakufwana na isi Yesu ayobagha nu kubomba bo ali pa kisu, tukutwagha utuyilo utununu fiyo utu tukutupangisya ukuya nawe pabumanyani kangi na Tata wake Yehova. Ngimba utuyilo tumo utununu utu to tuliku? Ngimba tubaghile ukunkonga bulebule Yesu pa bumi bwitu?
1. Ngimba mo munjila siliku isi Yesu afwene na Tata wake?
Bo akali ukwisa pa kisu kyapasi, Yesu anketagha Tata wake walughano kangi kwa fyinja mabiliyoni mingi umwene amanyilagha ukufuma kumyake. Panongwa ya isi, umwene ikwinong’ona, ikwipilika nu kubomba bo muno Tata wake ikubombela. (Belenga Yohani 5:19.) Ukuyoba ubwanaloli, Yesu ikunangisya kanunu fiyo utuyilo twa Tata wake Yehova kangi umwene atile: “Uyu linga ambwene une, bo ambwene na Tata.” (Yohani 14:9) Bo mukumanyila isya tuyilo twa Yesu, mukuya pakum’manya kanunu Yehova. Mwakifwanikisyo, muno Yesu abapasikisyilagha abandu sikunangisya muno ikubapasikisyila umwe.
2. Ngimba Yesu anangisye bulebule ukuti anganile Yehova?
Yesu ayobile ukuti: “Kokuti ikisu kimanyeghe ukuti une nunganile Tata, nu kuti nikubomba bo muno andaghilile Tata.” (Yohani 14:31) Bo ali pa kisu kyapasi, Yesu anangisye ulughano ulunywamu fiyo kwa Tata wake mwakumpilikila nalinga kwali kwakutamya fiyo ukubomba bo ulu. Yesu alighanile fiyo ukuyoba isya Tata wake panongwa yakuti alinganile kangi umwene abatulagha abangi ukukusya ubumanyani bwabo na Yehova.—Yohani 14:23.
3. Ngimba Yesu anangisye bulebule ukuti abaghanile abandu?
Ibaibolo likuyoba ukuti Yesu “ikwikyela na bandu ba nkisu.” (Isya Mbupingamu 8:31) Umwene anangisye ulughano lwake mwakubakasya nu kwiyipa ukubatula abandu. Umwene apelagha ifika ifi fikanangisyagha ghene amaka ghake loli fyanangisyagha kangi ikisa kyake. (Marko 1:40-42) Umwene ababombelagha ifindu abandu bosa mwakufwana itolo kisita kusala. Amasyu ghake ghabakasyagha nu kubapa ulusubilo bosa aba bapilikisyagha ni ndumbula yosa. Yesu alitikisye ukuti atamiwe nu kufwa panongwa ya lughano lwake ku bandu bosa. Nalinga sili bo ulu, umwene abaghanile fiyo aba bikukonga isi bikumanyila.—Belenga Yohani 15:13, 14.
MANYILA NYINGI
Manyila nyingi isyakufwana nu tuyilo twa Yesu. Kangi inong’onela muno mubaghile ukunangisyila ulughano nu kwiyipa ukubatula abangi bo muno umwene abombelagha.
4. Yesu anganile Tata wake
Ikifwanikisyo kya Yesu kikutumanyisya muno tubaghile ukunangisyila ulughano lwitu kwa Kyala. Belenga Luka 6:12 na Yohani 15:10; 17:26. Bo mubelengile ilemba lililyosa, muyobesanie ilalusyo ili:
-
Ngimba tubaghile ukunkonga bulebule Yesu nu kunangisya ukuti tunganile Yehova?
Yesu alinganile fiyo Tata wake wa kumwanya bo ali pa kisu kyapasi kangi utubalilo twingi ayobesaniagha nawe ukwendela ndwiputo
5. Yesu ikubapasikisya abandu aba bikulondiwa ubutuli
Yesu ikubapasikisya fiyo abandu ukukinda muno ikwipasikisyila mwene. Nalinga pa kabalilo aka akatele, umwene abombile akabalilo na maka ghake ukubatula abandu. Belenga Marko 6:30-44, ukufuma apo muyobesanie amalalusyo agha:
-
Ukufwana ni kyakubombiwa kya mu lemba ili, ngimba njila siliku isi Yesu anangisye ukuti ikubinong’onela abangi?—amavesi 31, 34, 41, na 42.
-
Ngimba findu fiki fyalimpangisye Yesu ukubatula abangi?—Keta ivesi 34.
-
Panongwa yakuti Yesu ikukonga utuyilo twa Yehova, ngimba isi sikubamanyisya isyafiki pakuyoba isya Yehova?
-
Ngimba njila siliku isi tubaghile ukunkonga Yesu ukunangisya ukuti tukubinong’onela abangi?
6. Yesu wakupa
Nalinga ukuti Yesu akali ni findu fingi, loli abayabilangako abangi ifi ali nafyo kangi umwene ikutubula ukuti na nuswe tukulondiwa ukuya bakupa. Belenga Imbombo sya Batumiwa 20:35, kangi muyobesanie ilalusyo ili:
-
Ukufwana na isi Yesu ayobile, ngimba mo munjila yiliku iyi tubaghile ukuyila balusekelo?
Ketelela IVIDIYO, ukufuma apo muyobesanie ilalusyo ili.
-
Ngimba njila siliku isi tubaghile ukupa nalinga ukuti tukaya ni findu fingi ifyakumbili?
Ngimba musimenye?
Ibaibolo likutumanyisya ukuti twiputeghe kwa Yehova ukwendela mu ngamu ya Yesu. (Belenga Yohani 16:23, 24.) Linga tukwiputa munjila iyi, tukunangisya ukuti tukundaghisya isi Yesu abombile pakututula ukuti tuye pabumanyani na Yehova.
ABANDU BAMO BIKUYOBA UKUTI: “Sitikumpalamasya Yehova linga tukutamiwa.”
-
Panongwa yakuti Yesu ikukonga utuyilo twa Tata wake, ngimba isi ikubomba sikutusimikisyila bulebule ukuti Yehova ikutupasikisya?
IFUNDO INYWAMU
Yesu anganile Yehova na bandu. Panongwa yakuti Yesu ikunangisya utuyilo twakufwana na Tata wake, nyingi isi mukuya pakumanyila isyakufwana nu mwene sikuya pakubatula ukum’manya kanunu Yehova.
Ukughomokelamo
-
Ngimba tubaghile ukunangisya bulebule ulughano kwa Yehova bo muno Yesu abombile?
-
Ngimba tubaghile ukunangisya bulebule ulughano ku bandu bo muno Yesu abombile?
-
Ngimba kayilo kaliku ka Yesu aka kikubahobosya fiyo?
KETA KANGI IFINGI
Inong’onela tumo mwa tuyilo twa Yesu utu tubaghile ukukonga.
“Kuti Muyezge Yesu, Muŵe . . .” (Yesu Ni Nthowa, Unenesko, na Umoyo, peji 317)
Manyila inongwa iyi tukulondiwa ukwiputa ukwendela mu ngamu ya Yesu.
“Chifukwa Wuli Tikwenera Kulomba Kwizira mu Zina la Yesu?” (Gongwe la Mulinda, Febuluwale 1, 2008)
Ngimba Ibaibolo likuyobapo simo isyakufwana namuno Yesu ikubonekela?
Ngimba tubaghile ukumanyilako isyafiki ukufwana namuno Yesu abombelagha ifindu na bakikulu?
“Mbakuzirwa na Ŵakuchindikika kwa Chiuta” (Gongwe la Mulinda, Seputembala 1, 2012)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
