IKIMANYILO 18
Muno Tubaghile Ukubamanyila Abakristu Babwanaloli
Abandu bingi bikwiyoba ukuti Bakristu. Loli abene batikufumusya isi bikusubila kangi batikukonga ifundo isi bikumanyila. Ngimba tubaghile ukubamanya bulebule Abakristu babwanaloli?
1. Ngimba Abakristu bo banani?
Abakristu bo bafundiwa pamo bo aba bikunkonga Yesu Kristu. (Belenga Imbombo sya Batumiwa 11:26.) Ngimba findu fiki ifi fikubasimikisyila abene ukuti bafundiwa ba Yesu? Umwene ayobile ukuti: “Linga mukuya mu mmasyu ghangu, bo muli bafundiwa bangu naloli.” (Yohani 8:31) Isi sikusanusya ukuti Abakristu babwanaloli bikukonga isi Yesu amanyisyagha. Panongwa yakuti akabalilo kosa Yesu abombelagha Ibaibolo linga ikumanyisya, Abakristu babwanaloli bope bikubomba mwakufwana itolo.—Belenga Luka 24:27.
2. Ngimba Abakristu babwanaloli bikunangisya bulebule ulughano?
Yesu ababulile aba bankongagha ukuti: “Amughananeghe bo papo nanine mbaghanile umwe.” (Yohani 15:12) Ngimba Yesu anangisyagha bulebule ukuti abaghanile abafundiwa bake? Ayagha na kabalilo kakwangala nabo ukubakasya nu kubatula. Umwene abikile ubumi bwake panongwa yabo. (1 Yohani 3:16) Mwakufwana itolo, Abakristu babwanaloli batikuyoba itolo isya lughano, loli abene bikulunangisya ukwendela mu isi bikuyoba nu kubomba.
3. Ngimba Abakristu babwanaloli bikwiyipa ukubomba imbombo yiliku?
Yesu abapele abafundiwa bake imbombo isyakubomba. Umwene, “Alinkubatuma pakufumusya Ubunyafyale bwa Kyala.” (Luka 9:2) Abakristu babwandilo bakafumusyagha ku malo ghene agha biputilangako loli na kuno baghiwagha abandu bingi kangi na kunyumba sya bandu. (Belenga Imbombo sya Batumiwa 5:42; 17:17.) Amasiku agha, bope Abakristu babwanaloli bikufumusya ubwanaloli bwa mu Baibolo kulikosa kuno kukwaghiwa abandu. Panongwa yakuti babaghanile abandu, abene bikubombela akabalilo na maka ghabo pakufumusya amasyu amanunu aghakupa ulusubilo na ghakusubisya.—Marko 12:31.
MANYILA NYINGI
Keta ifindu ifi fikubapangisya Abakristu babwanaloli ukukindana na bandu aba batikukonga isi Yesu amanyisyagha kangi ni kifwanikisyo kyake.
4. Abene bikufufuza ubwanaloli bwa mu Baibolo
Abakristu babwandilo baghaketagha Amasyu gha Kyala ukuya ghakulondiwa fiyo
Bakaya bosa aba bikuyobiwa ukuti Bakristu bikubughindika ubwanaloli bwa mu Baibolo. Ketelela IVIDIYO, ukufuma apo muyobesanie ilalusyo ili.
-
Ngimba amatchalichi ghamo agha ghikukoleliwa ukuti gha Bakristu ghabombile isyafiki ukuti ghabatolesye abandu ukukonga isi Yesu amanyisyagha?
Yesu amanyisyagha ubwanaloli ubwakufuma mu Baibolo. Belenga Yohani 18:37, ukufuma apo muyobesanie ilalusyo ili:
-
Mwakufwana na Yesu, ngimba tubaghile ukubamanya bulebule Abakristu aba “bikubusisimikisya ubwanaloli”?
5. Abene bikufumusya ubwanaloli ubwa mu Baibolo
Abakristu bakwanda babafumukisyagha abangi
Bo Yesu akali ukubuka kumwanya, umwene abapele abandu aba bankongagha imbombo iyi yikukindilila ukubombiwa amasiku agha. Belenga Matai 28:19, 20 na Imbombo sya Batumiwa 1:8, ukufuma apo muyobesanie ilalusyo ili:
-
Ngimba imbombo yakufumusya yikuya pakubombiwa mpaka ndili kangi mpaka kughu?
6. Abene bikubomba ukufwana na isi bikufumusya
Ngimba findu fiki ifi fyalinsimikisyile Tom ukuti abwaghile ubwanaloli? Ketelela IVIDIYO, ukufuma apo muyobesanie amalalusyo agha.
-
Mu vidiyo iyi, ngimba findu fiki ifi fyalimpangisye Tom ukuleka ukubuka kutchalichi lililyosa?
-
Ngimba findu fiki fyalinsimikisyile ukuti abwaghile ubwanaloli?
Ifi umundu ikubomba fyo fyakulondiwa ukukinda ifi ikuyoba. Belenga Matai 7:21, ukufuma apo muyobesanie ilalusyo ili:
-
Ngimba ikyakulondiwa fiyo kwa Yesu kyo kiliku, ukuyoba itolo ukuti tukusubila mmyake pamo isi tukubomba?
7. Abene bikughanana
Abakristu babwandilo banangisaniagha ulughano
Ngimba Abakristu bikubika ubumi bwabo pangozi panongwa ya babombi abinabo? Ketelela IVIDIYO, ukufuma apo muyobesanie amalalusyo agha.
-
Ukufwana ni vidiyo iyi, ngimba findu fiki fyalimpangisye Lloyd ukubika ubumi bwake pa ngozi panongwa ya Nkamu Johansson?
-
Ngimba mukuketa ukuti umwene abombile bo Unkristu wa naloli?
Belenga Yohani 13:34, 35, ukufuma apo muyobesanie amalalusyo aghakukongapo agha:
-
Ngimba abamanyili ba Yesu (Abakristu babwanaloli), babombagha bulebule ifindu na bandu aba fikolo ifingi?
-
Ngimba abene bayagha pakubomba bulebule bo ulu pa kabalilo ka bwite?
ABANDU BAMO BIKUYOBA UKUTI: “Abakristu babombile ifindu ifibibi fiyo, polelo ngimba babaghile ukuya bulebule kipanga kya bwanaloli?”
-
Ngimba lemba liliku ili mubaghile ukumbelengela umundu ili likunangisya muno tubaghile ukubamanyila Abakristu babwanaloli?
IFUNDO INYWAMU
Abakristu babwanaloli bikukonga isi Ibaibolo likumanyisya, bikunangisya ulughano lwakufuma pasi pa ndumbula nu kufumusya ubwanaloli.
Ukughomokelamo
-
Ngimba isi Abakristu babwanaloli bikusubila sitotike pa fiki?
-
Ngimba tuyilo tuliku utu tukunangisya ukuti aba Bakristu babwanaloli?
-
Ngimba mbombo yiliku iyi Abakristu babwanaloli bikubomba?
KETA KANGI IFINGI
Manyila nyingi isyakufwana ni gulu lya bandu aba bikughelaghela ukukonga ikifwanikisyo kya Yesu na isi amanyisyagha.
Keta isi syalintulile umundu uyu pa bwandilo ali mu tchalichi ilingi ukuti ayaghe “imbumba ya bwanaloli ya mwambepo.”
“Ŵakanizgora Kufuma mu Baibolo!” (Gongwe la Mulinda, Epulelo 1, 2014)
Keta muno Abakristu babwanaloli bikunangisyila ulughano ku Bakristu abinabo linga bikulondiwa ubutuli.
Ukubatula Abakamu Bitu Linga Kubombiwe Ingozi Isyakipeliwa—Akavidiyo Akapimba 3:57
Keta muno aba bikunkonga naloli Yesu m’masiku agha bikubombela mwakufwana itolo na muno Abakristu bakwanda babombelagha, kangi Yesu atile isi sikuya pakubapangisya abandu ukumanya ukuti bikunkonga naloli.
“Kasi Ŵakhristu Ŵaunenesko Ŵakumanyikwa Wuli?” (Gongwe la Mulinda, Malichi 1, 2012)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
