IKIMANYILO 19
Ngimba Abaketi ba Yehova Bakristu Banaloli?
Pakuya Baketi ba Yehova, tukusubila ukuti tuli Bakristu babwanaloli. Nongwa yafiki? Panongwa ya isi tukusubila, ingamu iyi tukumanyiwa nayo kangi ulughano ulu tukunangisania.
1. Ngimba isi Abaketi ba Yehova bikusubila sitotike pa findu fiki?
Yesu ayobile ukuti: “Amasyu gha Kyala bwanaloli.” (Yohani 17:17) Mwakufwana itolo na Yesu, isi Abaketi ba Yehova bikusubila sitotike M’masyu gha Kyala. Mwakifwanikisyo, keta muno tubombile isi ukufuma itolo kubwandilo bwa masiku ghitu agha. Ifyinja fya m’ma 1870, igulu lya bandu lyalyandile ukumanyila Ibaibolo pampene ukuti bakete linga syabwanaloli. Ulusubilo lwabo lwalitotike pa findu ifi Ibaibolo lyayobagha nalinga ukuti isi basubilagha syakindene nifimanyisyo fya matchalichi. Ukufuma apo balyandile ukubabulako abandu ubwanaloli bwa mu Baibolo ubu bamanyilagha. a
2. Nongwa yafiki tukukoleliwa ukuti Baketi ba Yehova?
Yehova ikubayoba ababombi bake ukuti baketi panongwa yakuti bikuyoba ubwanaloli ubwakufwana nu mwene. (Bahiburi 11:4–12:1) Mwakifwanikisyo, nkabalilo kakunyuma Kyala ababulile abandu bake ukuti: “Yo umwe baketi bangu.” (Belenga Yesaya 43:10.) Yesu ikuyobiwa ukuti “Unketi Unsubiliwa.” (Ubusetuli 1:5) Yonongwa yake ukwanda mu 1931 twalyandile ukumanyiwa ni ngamu yakuti Baketi ba Yehova. Tuli balusekelo fiyo panongwa yakumanyiwa ningamu iyi.
3. Ngimba Abaketi ba Yehova, bikukonga bulebule ulughano lwa Yesu?
Yesu abaghanile fiyo abafundiwa bake panongwa yakuti bafwene itolo ukuti bali mbumba yimoyene. (Belenga Marko 3:35.) Mwakufwana itolo, Abaketi ba Yehova bikufwana mbumba yimoyene pa kisu kyosa. Yonongwa yake tukukolelana ukuti nkamu nu mulumbu. (Filemoni 1, 2) Kangi tukupilikila ululaghilo ulwakuti: “Amubaghaneghe abitiki abininu.” (1 Peteri 2:17) Abaketi ba Yehova bikunangisania ulughano ulu munjila isyakukindanakindana bo ukubatula ababombi abinabo pa kisu kyosa linga pikulondiwa ubutuli.
MANYILA NYINGI
Mughele ukufufuza inkhani isyakufwana na Baketi ba Yehova ukuti muye nu buketi ubwakuti abene Bakristu babwanaloli.
Ulwitiko lwa Bakristu babwanaloli lwitotike mu Baibolo kangi bikubabulako abangi
4. Isi tukusubila sikufuma mu Baibolo
Yehova ayobile ukuti ubwanaloli bwa mu Baibolo bukuya pakumanyiwa. Belenga Danieli 12:4 ukufuma apo muyobesanie ilalusyo ili:
-
Ngimba findu fiki “fikuya pakuya fingi” nkati mbandu ba Kyala linga bikukindilila ukumanyila Ibaibolo?
Keta igulu lya bamanyili ba Baibolo ukongelelapo Charles Russell muno bamanyililagha Amasyu gha Kyala. Ketelela IVIDIYO, ukufuma apo muyobesanie ilalusyo ili.
-
Ukufwana ni vidiyo iyi, ngimba Charles na bamanyili abinake ba Baibolo bamanyile bulebule Ibaibolo?
Ngimba Musimenye?
Utubalilo tumo tukuchenja isi tukusubila. Nongwa yafiki? Bo muno isuba likubalila panandipanandi likunangisya muno amalo ghikubonekela. Kyala ikututula ukupilikisya amasyu ghake panandi na panandi. (Belenga Isya Mbupingamu 4:18.) Nalinga ukuti Ibaibolo litikuchenja, loli uswe linga tulipilikisye kanunu, tukuchenja isi tukumanyisya.
5. Tukubomba ifindu ukufwana na isi ingamu yitu yikuyoba
Nongwa yafiki twalyandile ukukoleliwa ukuti Baketi ba Yehova? Ketelela IVIDIYO, ukufuma apo muyobesanie ilalusyo ili.
-
Nongwa yafiki ingamu yakuti Baketi ba Yehova yapadela fiyo?
Nongwa yafiki Yehova abasalile abandu ukuya Baketi bake? Abene bikuya pakummanyikisya ukuya Kyala wa naloli, panongwa yakuti abandu bingi bikunjobela ubutungulu. Keta ubutungulu bubili ubu bikuntungulupila.
Amatchalichi ghamo ghikubamanyisya abandu babo ukuti Kyala ikulonda ukuti abene babombeleghe ififwani linga bikwiputa. Belenga Abanyalevi 26:1, ukufuma apo muyobesanie ilalusyo ili:
-
Ngimba ubwanaloli findu fiki? Ngimba Yehova ikwipilika bulebule ni fifwani?
Abalongosi bamo ba matchalichi bikumanyisya ukuti Yesu yo Kyala. Loli, Belenga Yohani 20:17, kangi muyobesanie amalalusyo agha:
-
Ngimba ubwanaloli findu fiki? Ngimba Kyala na Yesu mundu yumoywene?
-
Ngimba mukwipilika bulebule ukumanya ukuti Yehova abatumile Abaketi bake ukufumusya isyakufwana nu mwene nu Mwanake?
6. Tughanene fiyo
Ibaibolo likuyoba ukuti Abakristu bikulondiwa ukuya bakukolelana fiyo bo muno tuyilile utumbakasya twa mu mbili. Belenga 1 Bakorinti 12:25, 26, kangi muyobesanie amalalusyo agha:
-
Ngimba Abakristu babwanaloli bikubomba isyafiki linga Abakristu abangi bikutamiwa?
-
Ngimba muketile isyafiki pakuyoba isya lughano ulu lukuyapo pakati pa Baketi ba Yehova?
Linga ku kighaba kimo Abaketi ba Yehova bikutamiwa, pa kisu kyosa Abaketi abangi bikughelaghela ukutulapo. Keta ikifwanikisyo kimo, ketelela IVIDIYO. Ukufuma apo muyobesanie ilalusyo ili.
-
Ngimba ubutuli bwa pakabalilo ka ngozi syakipeliwa bukutusimikisyila bulebule ukuti Abaketi ba Yehova baghanene fiyo?
Abakristu babwanaloli bikubanangisya ulughano aba bikutamiwa
ABANDU BAMO BIKUYOBA UKUTI: “Abaketi ba Yehova lyo tchalichi ilipya itolo.”
-
Ngimba Yehova alyandile ndili ukubakolela ababombi bake ukuti baketi?
IFUNDO INYWAMU
Abaketi ba Yehova bo Bakristu babwanaloli. Tuli mbumba ya pa kisu kyosa kangi ulwitiko lwitu lwitotike mu Baibolo. Tukubatula kangi abandu ukumanya ubwanaloli ubwakufwana na Yehova.
Ukughomokelamo
-
Nongwa yafiki tukukoleliwa ukuti Baketi ba Yehova?
-
Ngimba tukubomba bulebule ifindu na bangi?
-
Ngimba mukwinong’ona ukuti Abaketi ba Yehova Bakristu babwanaloli?
KETA KANGI IFINGI
Manyila nyingi isyakufwana na Baketi ba Yehova.
Abaketi ba Yehova—Banangisye Ulwitiko, Ikighaba 1: Ukusoka mu Ngisi 1:00:53
Keta ikifwanikisyo kya muno Abaketi ba Yehova bafumbulile ifimanyisyo fyabutungulu.
Mughaghe amaansala gha malalusyo agha mubaghile ukuya nagho pakuyoba isya Baketi ba Yehova.
Isi Abandu Bighanile Ukulalusya Isya Baketi ba Yehova” (ipeji lya pawebusayiti)
Stephen ababengagha abandu ba fikolo ifingi kangi alyandile ukubanyoza. Keta isi umwene asibwene pakati pa babombi ba Yehova, isi syalintulile ukuchenja.
“Umoyo Wane Ukafika Paheni Chomene” (Gongwe la Mulinda, Julayi 1, 2015)
a Ukufuma mu 1879, ababombi ba Yehova bikusosya amagazini gha Ingasya ya Ndindilili agha ghikulingania isi Ibaibolo likuyoba
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
