Yehova yo Kyala wa lubatiko. (1 Bakorinti 14:33) Yonongwa yake tukughulila ukuti abandu bake bikuya pakubomba ifindu ndubatiko. Ngimba ifindu fikwenda bulebule nkipanga kya Bukristu? Ngimba uswe tubaghile ukubombapo isyafiki ukuti ifindu nkipanga fikindilileghe ukwenda kanunu?

1. Ngimba yo nani uyu ikulongosya ikipanga?

“Kristu yo ntu wa kipanga.” (Baefesi 5:23) Nalinga ukuti ali kumwanya loli umwene ikulongosya imbombo sya babombi ba Yehova pa kisu kyosa kyapasi. Yesu amwimike “umbombi unsubiliwa uwa mahala” aka ko kagulu ka bakulumba banandi itolo aka kikukoleliwa ukuti Akabughatila Kakulongosya. (Belenga Matai 24:45-47.) Mwakufwana itolo na bafundiwa kangi na bakulumba ba ku Yerusalemu ba nkabalilo ka iyolo, aba Nkabughatila Kakulongosya bope bikubika ubulongosi ubwakulondiwa ku fipanga. (Imbombo sya Batumiwa 15:2) Loli abanyambala aba bakaya balaghili ba gulu litu. Abene bikunsubila Yehova kangi na Masyu ghake ukuti babwaghe ubulongosi.

2. Ngimba imbombo ya bakulumba yo yiliku?

Abakulumba bo Bakristu aba bambombile Yehova mbusubiliwa kwa kabalilo akatali, abene bikubamanyisya ababombi ba Yehova ifundo sya mu Baibolo nu kubakasya. Abene batikulipiliwa pambombo iyi bikubomba. Kangi, ‘batikufimbilisiwa loli bikwighana bene bo muno Kyala ikulondela, ubutimi bwabo butikuya bwakukabilamo simo.’ (1 Peteri 5:1, 2) Abakulumba bikutulana na batuli ba kipanga aba linga akabalilo kakindilepo bikwimikiwa ukuya bakulumba.

Akabughatila Kakulongosya kikwimika abakulumba bamo ukuti baye bakwendela idela. Abene bikwendela ifipanga ifyakukindanakindana ukubapa ubulongosi nu kubakasya abakamu na balumbu. Abakwendela idela bikubombela ifundo sya M’malemba isi sikubatula linga bikulonda ukwimika unkulumba pamo untuli nkipanga.​—1 Timoti 3:1-10, 12; Titi 1:5-9.

3. Ngimba Unketi aliwesa ali nu budindo buliku?

Aliwesa nkipanga “ikuyipala ingamu ya Yehova” mwakwamulapo pangomano nu kubomba imbombo yakufumusya mwakufwana na muno ifindu fiyilile pa bumi bwake.​—Belenga Salimo 148:12, 13.

 MANYILA NYINGI

4. Yesu yo ndongosi uyu ikubapa abandu ubutusyo

Yesu ikutusuma ukuti tunkongeghe. Belenga Matai 11:28-30, kangi muyobesanie amalalusyo agha:

• Ngimba Yesu ikulonda ukuti twipilikeghe bulebule na muno ikutulongosyela?

5. Abakulumba bikumanyisya ukwendela mfyakubomba fyabo

1. Abakulumba bikukusya ubumanyani bwabo na Yehova kangi bikusitula imbumba syabo ukubomba mwakufwana itolo

2. Abakulumba bikubapasikisya abakamu na balumbu nkipanga

3.   Abakulumba bikufumusya akabalilo kosa

4. Abakulumba bamanyisi. Bope bikutulapo pa mbombo ya kutendekesya pa Nyumba ya Bunyafyale kangi ni mbombo isingi

6. Tubaghile ukukolelana na bakulumba

Ibaibolo likutupa ikifukwa ikyakulondiwa fiyo kya muno tubaghile ukukolelana na bakulumba. Belenga Bahiburi 13:17, kangi muyobesanie amalalusyo agha:

• Nongwa yafiki Ibaibolo likuyoba ukuti tukulondiwa ukubapilikila aba bikutulongosya? Ngimba tukwipilika bulebule ukufwana na isi?

Belenga Luka 16:10, kangi muyobesanie ilalusyo ili:

• Nongwa yafiki kwakulondiwa ukubapilikila abakulumba nalinga po pa nkhani inandi?

 IFUNDO INYWAMU

Yesu yo ntu wa kipanga. Tukuhoboka fiyo ukukolelana na bakulumba aba bikutupapo ubutusyo kangi abene kifwanikisyo kinunu.

Ukughomokelamo

• Ngimba untu wa kipanga yo nani?

• Ngimba abakulumba bikukitula bulebule ikipanga?

• Ngimba umbombi aliwesa wa Yehova ali nu budindo buliku?