IKIMANYILO 22
Ngimba Mubaghile Ukufumusya Bulebule Amasyu Amanunu?
Bo mukumanyila ubwanaloli ubwa mu Baibolo, mubaghile ukwinong’ona ukuti, ‘Aliwesa ikulondiwa ukumanya isi.’ Naloli aliwesa ikulondiwa ukumanya isi. Loli utubalilo tumo mubaghile ukupasya ukubabulako abandu isi mumanyile. Isagha tuyobesanie muno tubaghile ukumalanilana ni ndamyo iyi kangi muno tubaghile ukuyila balusekelo pakufumusya amasyu amanunu agha mu Baibolo.
1. Ngimba mubaghile ukubafumukisyila bulebule abandu aba mubamenye isi mumanyile?
Abafundiwa ba Yesu bayobile ukuti: “Uswe tukabaghile ukuleka ukusiyoba isi tusibwene nisi tusipilike.” (Imbombo sya Batumiwa 4:20) Abene babughanile fiyo ubwanaloli ubu babumanyile ukufuma kwa Yesu kangi balondagha ukubabulako abandu pa isi bamanyile. Ngimba mo muno nanumwe mukwipilikila? Linga mo muno mukwipilikila, mukulondiwa ukulwagha ulusako ulwakubabulako aba mumbumba na bamanyani binu isi mukumanyila loli ndughindiko.—Belenga Bakolosi 4:6.
Injila simo isi sibaghile ukubatula muno mubaghile ukwandila
-
Linga mukuyobesania na ba mumbumba yinu, mubaghile ukulingania inkhani iya mu Baibolo mwakuyoba ukuti: “Sabata uyu m’manyile inkhani yimo iyakuhobosya fiyo.”
-
Mun’nangisye ilemba ili libaghile ukunkasya umwininu uyu abinile pamo ikutamiwa aminong’ono.
-
Mumbule uyu mukumanyila nawe isukulu isi mukumanyila mu Baibolo pamo ku ngomano syakipanga linga ikubaponia.
-
Mubanangisyeghe abininu iwebusayiti iya jw.org.
-
Mubakolele abininu ukuti basayepo linga mukumanyila Ibaibolo pamo ukubatula muno babaghile ukusumila ukumanyila Ibaibolo pa jw.org.
2. Nongwa yafiki ukufumukisya pampene nikipanga kwakulondiwa fiyo?
Abafundiwa ba Yesu babombile nyingi ukukinda itolo ukubafumukisya abandu aba babamenye. Yesu “alinkubatuma babilibabili ukulongolapo mosa ntwaya” ukufumusya. (Luka 10:1) Imbatiko yakufumusya iyi, yabapele abandu bingi ulusako ulwakupilika amasyu amanunu. Ukufumukisya pampene kwabapele kangi ulusekelo abafundiwa. (Luka 10:17) Ngimba mwinong’onilepo isyakuya nu bwighane ubwakufumukisya pampene nikipanga?
MANYILA NYINGI
Keta isi mubaghile ukubomba ukuti mumalane nu bogha kangi muno mubaghile ukulwaghila ulusekelo linga mukufumusya amasyu amanunu.
3. Yehova ikuya pakuya nanumwe
Abandu bamo aba bikulonda ukufumusya babaghile ukuya bogha muno babaghile ukuyobela kangi muno abandu babaghile ukubamulila.
-
Ngimba mukutila ukufumusya isi mumanyile? Nongwa yafiki mukuyoba bo ulu?
Ketelela IVIDIYO, ukufuma apo muyobesanie ilalusyo ili.
-
Ngimba Abaketi ba Yehova abakilumyana aba, bamalene bulebule ni ndamyo iyakutila?
Belenga Yesaya 41:10, kangi ukufuma apo muyobesanie ilalusyo ili:
-
Linga muli bogha pakufumusya amasyu amanunu, nongwa yafiki mukulondiwa ukwiputa?
Ngimba musimenye?
Abaketi ba Yehova bamo binong’onagha ukuti bakabaghila ukufwanisya ukufumusya amasyu amanunu ku bangi. Ikifwanikisyo yo Sergey uyu ipilikagha ukuti akabaghila ukubafumukisya abangi amasyu amanunu. Loli bo andile ukumanyila Ibaibolo, Sergey ayobile ukuti: “Nalinga natilagha loli nalyandile ukuyobesania na bangi ukufwana na isi namanyilagha. Nahobokagha fiyo ukuyobesania na bangi isyakufwana na isi namanyilagha mu Baibolo papo kwalimbangisye ukuti nipilikeghe ukuya nu lusubilo. Kangi ukuyobesania na bangi isi nasubilagha kwakasisye ulwitiko lwangu.”
4. Muyeghe balughindiko
Linga tukulonda ukumfumukisya umundu yumo amasyu amanunu, tutikulondiwa ukwinong’onela syene isi tukuyoba loli na muno tukuyobela. Belenga 2 Timoti 2:24 na 1 Peteri 3:15, ukufuma apo muyobesanie amalalusyo agha:
-
Ngimba mubaghile ukubombela bulebule amavesi agha linga mukuyobesania na bangi isyakufwana ni Baibolo?
-
Lumo aba mumbumba pamo abamanyani binu bakabaghila ukukolelana nanumwe. Ngimba mukulondiwa ukubomba isyafiki? Ngimba findu fiki ifi mutikulondiwa ukubomba?
-
Nongwa yafiki kununu ukubombela amalalusyo agha ghabaghile ukubapangisya ukuti binong’onelengepo ukukinda ukubafimbilisya abandu ukusala ikyakubomba?
5. Ukufumusya amasyu amanunu kukutwala ulusekelo
Yehova alimpele Yesu imbombo iyakufumusya amasyu amanunu. Ngimba Yesu ayiketagha bulebule imbombo iyi? Belenga Yohani 4:34, ukufuma apo muyobesanie amalalusyo agha:
-
Ukulya ifyakulya ifinunu kukutula ubumi bwitu ukuya bununu kangi bwakuhobosya. Nongwa yafiki Yesu atile ukubomba ubwighane bwa Kyala bo ukufumusya amasyu amanunu kufwene itolo nu kulya ifyakulya?
-
Ngimba mukwinong’ona ukuti lusekelo luliku ulu lukwisa linga tukufumusya amasyu amanunu?
Ubulongosi
-
Linga muli pangomano sya nkati mwa sabata, keta injila isi sibaghile ukubatula muno mubaghile ukwandila ukuyobesania na bandu.
-
Yobesania nu m’manyisi winu muno mubaghile ukwingila musukulu ya ngomano sya nkati mwa sabata. Ifi um’manyili ikupeliwa fibaghile ukubatula ukupilika kanunu muno mubaghile ukwitendekesyela ukubabulako abangi isi mukumanyila.
-
Bombela ifighaba ifyakuti “Abandu Bamo Bikuyoba Ukuti” pamo “Abandu Bamo Babaghile Ukulalusya Ukuti” ifi fili mu buku ili ukuti mughele muno mubaghile ukwamulila amalalusyo agha abandu bighanile ukulalusya pamo aba bikukana.
ABANDU BAMO BABAGHILE UKULALUSYA UKUTI: “Ngimba nkhani yiliku imbya iyi muyipilikepo?”
-
Ngimba mubaghile ukubombela bulebule ulusako ulu mwa kubabulako abandu isi mukumanyila?
IFUNDO INYWAMU
Ukubafumukisyila abangi amasyu amanunu kukutwala ulusekelo kangi kupepe ukukinda muno umwe mukwinong’onela.
Ukughomokelamo
-
Nongwa yafiki tukufumusya amasyu amanunu ku bangi?
-
Ngimba tubaghile ukufumusya bulebule munjila iyalughindiko?
-
Ngimba mubaghile ukumalana bulebule nu bogha linga muli mubufumusi?
KETA KANGI IFINGI
Inong’onela injila sitatu isya muno mubaghile ukufumukisyila amasyu amanunu mwakubombela ikhadi lya jw.org.
Muno Tubaghile Ukufumukisya Ukubombela Ikhadi lya JW.ORG (1:43)
Keta utuyilo 4 utu tubaghile ukubatula ukufumusya amasyu amanunu.
“Ngimba Mwitendekisye Ukuya Balobi ba Bandu?” (Ingasya ya Ndindilili, Seputembala 2020)
Ketelela ikifwanikisyo kya mu Baibolo iki kibaghile ukututula ukuya bakifu pakufumusya amasyu amanunu nalinga ukuti tuli bana.
Keta muno mubaghile ukuyobela na ba mumbumba yinu aba bakamanyilapo isya Yehova.
“Umo Mungachonthera Mtima wa Ŵabali Ŵinu Ŵambura Kugomezga” (Gongwe la Mulinda, Malichi 15, 2014)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
