Yesu amanyisye ukuti Abakristu bikulondiwa ukosiwa. (Belenga Matai 28:19, 20.) Loli ngimba ulosyo findu fiki? Kangi ngimba umundu abaghile ukubomba isyafiki ukuti afwanisye ubwighane ubu?

1. Ngimba ulosyo findu fiki?

Amasyu aghakuti “ulosyo” ghafumile ku lisyu ilya Chigiriki ili likusanusya “ukwibila” m’misi. Pakabalilo aka Yesu osiwagha, umwene balimwibisye Ndusoko lwa Yordani kangi ukufuma apo “alinkufyuka m’misi.” (Marko 1:9, 10) Mwakufwana itolo na Yesu, Abakristu ba bwanaloli bope bikosiwa mwakuyubikiwa m’misi.

2. Ngimba ulosyo lukunangisya isyafiki?

Linga umundu osiwe, bo ikunangisya pabwelu ukuti iyipile mwene kwa Yehova Kyala. Ngimba umundu ikwiyipa bulebule? Bo mundu akali ukosiwa, ikwiputa tasi pamwene, ikumbula Yehova ukuti ikulonda ukumbombela kwa bwila na bwila. Umwene ikufinga ukuti ikuya pakumwiputagha Yehova mwene kangi ikuya pakuketagha ukuti ukumbombela Yehova kyo kindu kyakulondiwa fiyo pa bumi bwake. Umwene ikusala “ukwikana mwene kangi . . . nu kukonga” ifimanyisyo ni kifwanikisyo kya Yesu. (Matai 16:24) Ukwiyipa nu kosiwa, fyo ifi fikumpangisya umwene ukuti aye pabumanyani bwa maka na Yehova kangi na babombi abinake.

3. Ngimba umundu ikulondiwa ukubomba isyafiki bo akali ukosiwa?

Bo mukali ukosiwa, kwakulondiwa fiyo ukumanyila isyakufwana na Yehova kangi nu kukusya ulwitiko m’myake. (Belenga Bahiburi 11:6.) Linga ubumanyi nu lwitiko lwinu fikulile, mukuya pakwanda ukungana Yehova. Ukufuma apo, mukuya pakuya nikinyonywa ikya kufumusya isyakufwana nu mwene nu kukonga ifundo syake. (2 Timoti 4:2; 1 Yohani 5:3) Linga umundu “ulwendo lwake luli mwa Yehova nu kunkyela yuyo muli syosa,” umwene ikuya pakwiyipa kwa Kyala nu kosiwa.​—Bakolosi 1:9, 10. a

 MANYILA NYINGI

4. Isi tubaghile ukumanyilako ku losyo lwa Yesu

Belenga Matai 3:13-17 ukuti mumanyile nyingi isyakufwana nu losyo lwa Yesu. Ukufuma apo muyobesanie amalalusyo agha:

• Ngimba Yesu alyosiwe pa kabalilo aka ali yo bonda?

• Ngimba umwene alyosiwe bulebule? Ngimba umwene balim’misile itolo amisi

Yesu alyandile ukubomba imbombo yakulondiwa fiyo iyi Kyala alimpele ukuti abombe pa kisu bo osiwe. Belenga Luka 3:21-23 na Yohani 6:38, ukufuma apo muyobesanie ilalusyo ili:

• Bo Yesu osiwe itolo, ngimba mbombo yiliku iyi ayibikagha pa malo aghakwanda?

5. Ulosyo bo bwighane ubu mukulondiwa ukubufwanisya

Pabwandilo umundu abaghile ukuketa ukuti kukafu fiyo ukwiyipa nu kosiwa. Loli abaghile ukukusya ulusubilo lwake mwakusala ifindu ifyakulondiwa fiyo. Ukuti tukete muno abandu bamo babombilepo isi, ketelela IVIDIYO.

Belenga Yohani 17:3 na Yakobu 1:5, ukufuma apo muyobesanie ilalusyo ili:

• Ngimba findu fiki fibaghile ukuntula umundu ukuti itendekesye ukosiwa?

1. Tukwiyipa kwa Yehova mwakumbula ukuti tukulonda ukumbombela kwa bwila na bwila

2. Pakabalilo aka tukosiwa, tukubanangisya abandu ukuti twiyipile kwa Kyala

 6. Linga tosiwe tukuya mumbumba ya Yehova

Linga tosiwe tukuya mumbumba iyi yikukolelana pa kisu kyosa. Abaketi ba Yehova bosa aba bosiwe, bikufumusya isyakufwana itolo kangi bosa bikukonga ifundo sya Yehova isyakufwana itolo kisita kweghela kuno bafumile pamo inyiho syabo. Belenga Salimo 25:14 na 1 Peteri 2:17, ukufuma apo muyobesanie amalalusyo agha:

• Ngimba ulosyo lukupalamasya bulebule ubumanyani bwa mundu na Yehova kangi na bandu abangi aba bikumwiputa?

 IFUNDO INYWAMU

Yesu amanyisye ukuti Abakristu bosa bikulondiwa ukosiwa. Ukuti umundu afwanisye ubwighane ubu, ikulondiwa ukukusya ulwitiko lwake mwa Yehova, ukukonga ifundo syake kangi ikulondiwa ukwiyipa Kumyake.

Ukughomokelamo

• Ngimba ulosyo findu fiki, kangi nongwa yafiki lwakulondiwa?

• Ngimba ukwiyipa nu kosiwa sikunangisya isyafiki?

• Ngimba umundu ikulondiwa ukubomba isyafiki bo akali ukwiyipa nu kosiwa?