IKIMANYILO 24
Ngimba Bwanaloli Buliku Pakuyoba Isya Bandumi?
Yehova ikulonda ukuti tumanyile isyakufwana ni mbumba yake iya kumwanya. Imbumba iyi yikongelelapo abandumi, aba bikukoleliwa ukuti “bana ba Kyala.” (Jobu 1:6) Ngimba Ibaibolo likuyoba isyafiki isyakufwana na bandumi? Ngimba bikupalamasiwa bulebule na bandu? Ngimba abandumi bosa bali mumbumba ya Kyala?
1. Ngimba abandumi bo banani?
Yehova apelile abandumi bo akali ukupela ikisu. Mwakufwana itolo nu mwene, abene fipeliwa fya mwambepo ifi fitikuboneka ifi fikwikala kumwanya. (Bahiburi 1:14) Kumwanya baliko abandumi bingi kangi aliwesa wapadela fiyo. (Ubusetuli 5:11) Kangi abene ‘Bikutufya amasyu gha [Yehova] mwakubomba isi alaghile.’ (Salimo 103:20) Nkabalilo ka kunyuma, utubalilo tumo Yehova abatumagha abandumi ukubatula nu kubapoka abandu bake. Amasiku agha, abandumi bikubalongosya Abakristu ku bandu aba bikulonda ukumanyila isya Kyala.
2. Ngimba Setano ni mbepo inyali findu fiki?
Abandumi bamo bakakindilile ukuya basubiliwa kwa Yehova. Uwandumi uwakwanda uyu asambukile “yo ikuyobiwa iya Mohesi niya Setano uyu ikukisyoba ikisu kyosa.” (Ubusetuli 12:9) Setano alondagha ukuti alaghileghe abandu yonongwa yake apangisye imbumba yakwanda Adamu na Eva kangi na bandumi abangi ukuti baleke ukumpilikila Yehova. Abandumi bosa aba balinsambukile Kyala bikukoleliwa ukuti mbepo inyali. Yehova abasosisyeko kumwanya kangi mwalululu bikuya pakonangiwa.—Belenga Ubusetuli 12:9, 12.
3. Ngimba Setano ni mbepo syake inyali sikughela ukutusofania bulebule?
Setano kangi ni mbepo inyali sisofenie abandu bingi ukwendela mu findu ifi fikukolelana nimbepo inyali. Mwakifwanikisyo, abandu bamo bikulalusya ku ndondwa, ku balaghusi na ku aba bikuti bikumanya isya nkyeni. Abandu bamo bikulonda imikota iyi yikukolelana ni mbepo inyali. Abandu bingi bikusofanisiwa mwakusubila ukuti babaghile ukuyoba na bandu aba bafwile. Loli Yehova ikutusoka ukuti: “Komma ukwinyasya mwibene mwakubuka pakulalusya ku balaghusi naba bikubomba isya bulosi.” (Abanyalevi 19:31) Umwene ikutusoka ukuti twifighilileghe kwa Setano ni mbepo inyali. Abene balughu ba Yehova kangi bikulonda ukutufulasya.
MANYILA NYINGI
Keta ifindu ifinunu ifi abandumi bikubomba, nu bubibi bwakubomba ifya bulaghusi, kangi namuno tubaghile ukwifighilila kwa Setano ni mbepo syake inyali.
4. Abandumi bikubatula abandu ukumanyila isya Yehova
Abandumi ba Kyala batikufumusya maso na maso ku bandu. M’malo mwake, abene bikubalongosya abandu ba Kyala ku bandu aba bikulonda ukumanyila isya Yehova. Belenga Ubusetuli 14:6, 7, ukufuma apo muyobesanie amalalusyo agha:
-
Nongwa yafiki tukulondiwa ubutuli bwa bandumi ukuti tufumusyeghe kanunu?
-
Ngimba sikaya syakukasya ukumanya ukuti abandumi bikubalongosyela ku bandu aba bikulonda ukupilika isya mu Baibolo? Nongwa yafiki mukuyoba bo ulu?
5. Mufikaneghe ifya bulaghusi
Setano ni mbepo inyali balughu ba Yehova. Kangi nuswe balughu bitu. Belenga Luka 9:38-42, ukufuma apo muyobesanie ilalusyo ili:
-
Ngimba imbepo inyali sikubabombela isyafiki abandu?
Tutikulondiwa ukwitikisya imbepo inyali ukuti syonange ubumi bwitu. Belenga Ukukumbusya Indaghilo 18:10-12, ukufuma apo muyobesanie amalalusyo agha:
-
Ngimba mo munjila siliku isi imbepo inyali sibaghile ukutusofania kangi ukuyobesania nanuswe? Ngimba tuyilo tuliku utu tukubombiwa utwakukolelana ni mbepo inyali kuno mukwikala?
-
Ngimba mukuketa ukuya syakupilikiwa ukuti Yehova ikukanisya ukubomba ifi fikukolelana ni mbepo inyali? Nongwa yafiki mukuyoba bo ulu?
Ketelela IVIDIYO, ukufuma apo muyobesanie amalalusyo agha.
-
Ngimba mukwinong’ona ukuti akabangili aka Palesa alimfwalike umwanake kali kabibi? Nongwa yafiki mukuyoba bo ulu?
-
Ngimba Palesa alondiwagha ukubomba isyafiki ukuti ifighilile ku mbepo inyali?
Abakristu babwanaloli akabalilo kosa bikulondiwa ukwimikana ni mbepo inyali. Belenga Imbombo sya Batumiwa 19:19 na 1 Bakorinti 10:21, ukufuma apo muyobesanie ilalusyo ili:
-
Nongwa yafiki kwakulondiwa ukonanga kilikyosa iki kikukolelana ni mbepo inyali?
6. Ukutola ubwite ubwakulimbana na Setano ni mbepo inyali
Imbepo inyali sikulongosiwa na Setano. Loli abandumi abasubiliwa bikulongosiwa nu ndaghili wa bandumi Mikaeli, uyu ingamu iyingi yo Yesu. Ngimba amaka gha Mikaeli ghali bulebule? Belenga Ubusetuli 12:7-9, ukufuma apo muyobesanie amalalusyo agha:
-
Ngimba yo nani uyu ali na maka fiyo? Mikaeli na bandumi bake pamo Setano ni mbepo syake inyali?
-
Ngimba mukwinong’ona ukuti aba bikunkonga Yesu bikulondiwa ukuntila Setano ni mbepo syake inyali?
Mubaghile ukuntola Setano ni mbepo syake inyali. Belenga Yakobu 4:7, ukufuma apo muyobesanie ilalusyo ili:
-
Ngimba mubaghile ukwifighilila bulebule kwa Setano ni mbepo syake inyali?
ABANDU BAMO BIKUYOBA UKUTI: “Bukayapo ububibi nabumo ukukoma amagemu pamo ukuketelela amafilimu agha ghikuyoba isya bulosi. Ghakuhobosya itolo.”
-
Nongwa yafiki ukwinong’ona isi kubaghile ukutubika pa ngozi?
IFUNDO INYWAMU
Abandumi abasubiliwa bikututula fiyo. Setano na bandumi bake balughu ba Yehova, kangi abene bikubombela ifindu ifi fikukolelana ni mbepo inyali ukubasofania abandu.
Ukughomokelamo
-
Ngimba abandumi ba Yehova bikubatula bulebule abandu ukumanya isya Yehova?
-
Ngimba Setano ni mbepo syake inyali findu fiki?
-
Nongwa yafiki tutikulondiwa ukubomba kilikyosa iki kikukolelana ni mbepo inyali?
KETA KANGI IFINGI
Keta inongwa iyi Yesu yo Mikaeli uwandumi unkulumba.
“Kasi Mikayeli, Mungelo Mulara, Ni Njani?” (Inkhani ya pawebusayiti)
Mumanyeghe ukuti Mohesi mundu wa bwanaloli.
Keta muno unkikulu alyabukile ku mbepo inyali.
Keta muno Setano ikubombela ifya mbepo inyali ukubasofania abandu.
“Unenesko Pakuyowoya za Mayere na Ufwiti” (Ntowa Yakuya ku Umoyo Wamuyirayira, chigaŵa 5)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
