IKIMANYILO 28
Tunangisyeghe Ukundaghisya pa isi Yehova na Yesu Batubombile
Ngimba mukwipilika bulebule linga um’manyani winu abapele ikyabupe kyapamwanya fiyo? Mukwipilika kanunu fiyo kangi mukunnangisya um’manyani winu ukuti mukundaghisya. Yehova na Yesu batupele ikyabupe kyapamwanya fiyo. Ngimba ikyabupe iki kyo kiliku? Ngimba tubaghile ukunangisya bulebule ukuti tukundaghisya ikyabupe iki?
1. Ngimba injila yimo iyi tubaghile ukunangisyila ukuti tukundaghisya Kyala na Yesu pa isi batubombile yo yiliku?
Ibaibolo lifingile ukuti “Bosa aba bikumwitika [Yesu]” babaghile ukuya nu bumi bwa bwila na bwila. (Yohani 3:16) Isi sikusanusya nyingi ukukinda ukuya nu lwitiko itolo mwa Yesu. Tukulondiwa kangi ukunangisya ukuti tuli nu lwitiko mu findu ifi tukusala nu kubomba. (Yakobu 2:17) Linga tukunangisya ulwitiko lwitu mu isi tukubomba nu kuyoba, tukukasya ubumanyani bwitu na Yesu na Tata witu Yehova.—Belenga Yohani 14:21.
2. Ngimba kyakubombiwa kiliku ikya padela iki kikututula ukunangisya ukundaghisya pa isi Yehova na Yesu batubombile?
Ikilo ikyakuti kilabo ikuya pakufwa, Yesu ababulile aba bikunkonga injila iyingi yakunangisyila ukundaghisya ikemo ili umwene abikile. Umwene alyandisye ikyakubombiwa ikya padela iki Ibaibolo likuyoba ukuti “Ifyakulya fya Namayolo Ifya Mwalafyale,” kikumanyiwa kangi ukuti Ukukumbukila Inifwa ya Yesu. (1 Bakorinti 11:20) Yesu alyandisye ikyakubombiwa iki ukuti abatumiwa bake na Bakristu abangi babwanaloli basakumbukileghe ukuti Yesu abikile ubumi bwake panongwa ya uswe. Ukufwana ni kyakubombiwa iki, Yesu alaghile ukuti: “Bo mubombeghe bunobuno ukungumbukilamo une.” (Luka 22:19) Linga mukwaghiwapo Pakukumbukila Inifwa ya Yesu, mukunangisya ukuti mukundaghisya fiyo ulughano lwa pamwanya ulu Yehova na Yesu bikutunangisya.
MANYILA NYINGI
Manyila injila isya muno mubaghile ukunangisyila ukuti mukundaghisya ulughano ulu Yehova na Yesu batunangisye. Keta inongwa iyi kwakulondiwa Ukukumbukila Inifwa ya Yesu.
3. Ukundaghisya kukutupangisya ukuti tubombepo simo
Inong’onela ukuti umundu yumo abapokile apa mwalibile m’misi. Ngimba mubaghile ukwibwa mwanakalinga isi ababombile? Pamo mubaghile ukulonda injila syakunangisya ukuti mukundaghisya pa isi ababombile?
Ubumi ubu tuli nabo bwa Yehova. Belenga 1 Yohani 4:8-10, ukufuma apo muyobesanie amalalusyo agha:
-
Nongwa yafiki ikemo lya Yesu kyabupe kya padela fiyo?
-
Ngimba mukwipilika bulebule na isi Yehova na Yesu bababombile umwe?
Ngimba tubaghile ukunangisya bulebule ukundaghisya pa isi Yehova na Yesu batubombile? Belenga 2 Bakorinti 5:15 na 1 Yohani 4:11; 5:3. Linga mubelengile ilemba lililyosa, muyobesanie ilalusyo ili:
-
Ukufwana ni lemba ili, ngimba tubaghile ukubomba isyafiki ukunangisya ukuti tukundaghisya?
4. Munkongeghe Yesu
Injila iyingi iyi tukunangisyila ukundaghisya ko kunkonga Yesu. Belenga 1 Peteri 2:21, ukufuma apo muyobesanie ilalusyo ili:
-
Ngimba njila siliku isi mubaghile ukukonga amakato gha Yesu?
Yesu aghaghanile Amasyu gha Kyala, afumusyagha amasyu amanunu kangi abatulagha abangi
5. Mwaghiwengepo pa Kyakubombiwa kya Kukumbukila Inifwa ya Yesu
Ukuti mukete isi sikubombiwa pakabalilo ka kyakubombiwa kya Ifyakulya fya Namayolo Ifya Mwalafyale, belenga Luka 22:14, 19, 20. Ukufuma apo muyobesanie amalalusyo agha:
-
Ngimba findu fiki fikubombiwa pa Ifyakulya fya Namayolo Ifya Mwalafyale?
-
Ngimba ikisyesye ni kinwelo fikwimila ifindu fiki?—Keta amavesi 19 na 20.
Yesu ababulile abafundiwa bake ukuti bakumbukileghe inifwa yake kamokene ikyinja kilikyosa. Pakabalilo aka Abaketi ba Yehova bikwaghanila pampene ikyinja kilikyosa ukuti bakumbukile inifwa ya Yesu munjila iyi umwene alaghile. Ukuti mumanyile isyakufwana ni kyakubombiwa kya padela iki, ketelela IVIDIYO. Ukufuma apo muyobesanie ilalusyo ili.
-
Ngimba findu fiki fikubombiwa Pakukumbukila Inifwa ya Yesu?
Ikisyesye ni kinwelo fikwimila ifindu fimo. Ikisyesye kikwimila umbili wa Yesu ungolofu kangi ikinwelo kikwimila ilopa lyake
ABANDU BAMO BIKUYOBA UKUTI: “Tukulondiwa ukusubila itolo mwa Yesu ukuti tusapokiwe.”
-
Ngimba mubaghile ukulibombela bulebule ilemba lya Yohani 3:16 na Yakobu 2:17 ukunangisya ukuti pikulondiwa ukubombapo nyingi?
IFUNDO INYWAMU
Tukunangisya ukuti tukundaghisya pa isi Yesu atubombile mwakuya nu lwitiko myake nu kwaghiwapo Pakukumbukila Inifwa ya Yesu.
Ukughomokelamo
-
Ngimba sikusanusya isyafiki ukuya nu lwitiko mwa Yesu?
-
Ngimba mubaghile ukunangisya bulebule ukuti mukundaghisya isi Yehova na Yesu bababombile?
-
Nongwa yafiki kwakulondiwa fiyo ukwaghiwapo Pakukumbukila Inifwa ya Yesu?
KETA KANGI IFINGI
Ngimba inifwa ya Yesu yikutukasya ukubomba isyafiki?
Manyila nyingi isyakufwana nu lwitiko na muno tubaghile ukulunangisyila.
Wani na Chipulikano mu Malayizgo gha Yehova” (Gongwe la Mulinda, Okutobala 2016)
Mu nkhani iyakuti “Nkhujiwonaso Kuti Ndine Wakufipirwa Yayi, Wakufwa, Nesi Wakukwenyelera,” keta muno unkikulu yumo asayiliwe bo apilikisye ukulondiwa kwa ikemo lya Yesu.
“Baibolo Likusintha Umoyo wa Ŵanthu” (Gongwe la Mulinda, Ogasiti 1, 2011)
Keta inongwa iyi abandu banandi itolo bo bikulya ifimanyikilo ifya Pakukumbukila Inifwa ya Yesu.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
