IKIMANYILO 29
Ngimba Findu Fiki Fikubombiwa Linga Umundu Afwile?
Ngimba alipo umundu yumo uyu mwalinganile fiyo afwile? Ngimba abakamu bitu aba bafwile twisakubaketa kangi? Nkimanyilo iki kangi nikyakukongapo, tukuya pakuketa amaansala aghakusubisya aghakufuma mu Baibolo.
1. Ngimba findu fiki fikubombiwa linga tufwile?
Yesu afwanikisye inifwa nu tulo. Umundu uyu ali ntulo, akabaghila ukumanya isi sikubombiwa. Ngimba inifwa yikufwana bulebule nu tulo? Linga umundu afwile, umwene atikupilika ifyakubaba filifyosa. Umwene atikusulumania, nalinga ukuti abaghanile fiyo abamanyani bake ni mbumba yake. Ibaibolo likuyoba ukuti, “Abafwe bo bakamanya nasimo.”—Belenga Undumbilili 9:5.
2. Ngimba tukusayiwa bulebule ukumanya ubwanaloli ubwakufwana ni nifwa?
Abandu bingi bikutila inifwa kangi bikubatila na bandu aba bafwile. Loli umwe mubaghile ukusubisiwa na isi Ibaibolo likuyoba pa nkhani ya nifwa. Yesu ayobile ukuti: “Ubwanaloli bwisakubapelagha umwe ukuya babuke.” (Yohani 8:32) Amatchalichi ghamo ghikumanyisya ukuti ikindu kimo kitikufwa linga umundu afwile loli isi sikaya syo isi Ibaibolo likumanyisya. Akayapo umundu nayumo uyu ikutamiwa linga afwile. Po tutikulondiwa ukwiputa ku bandu aba bafwile pamo ukubomba ifindu mwakwinong’ona ukuti abene babaghile ukutukalalila, kangi tutikulondiwa ukubiputila.
Abandu bamo bikuyoba ukuti abene babaghile ukuyobesania na bandu aba bafwile. Loli isi sikabaghila ukubombiwa. Bo muno tumanyilile, abafwe “bakamanya nasimo.” Abandu bosa aba bikwinong’ona ukuti bikuyobesania na baghaniwa babo aba bafwile, abene babaghile ukuti bikuyobesania na bandumi ababibi aba bikufwala ubundu bwa bandu aba bafwile. Ukumanya ubwanaloli ubwakufwana ni nifwa kukutufighilila ku mbepo inyali. Yehova ikutusoka ukuti tuleke ukuyobesania na bandu aba bafwile panongwa yakuti asimenye ukuti ukuyobesania ni mbepo inyali kubaghile ukutufulasya.—Belenga Ukukumbusya Indaghilo 18:10-12.
MANYILA NYINGI
Keta nyingi isyakufwana na isi Ibaibolo likumanyisya pa nkhani ya bufwe, kangi na muno mubaghile ukukasyila ulwitiko lwinu mwa Kyala wa lughano uyu atikunyoza abandu aba bafwile.
3. Manyila ubwanaloli ubwakufwana na isi sikubombiwa linga umundu afwile
Pa kisu kyosa, abandu bali na minong’ono aghakukindanakindana aghakufwana na isi sikubombiwa linga umundu afwile. Nalinga sili bo ulu, loli sikaya syosa isi abandu bikusubila sikuya syabwanaloli.
-
Ngimba nkaya aka mukwikala abandu bingi bikusubila isyafiki isyakufwana na bandu aba bafwile?
Ukuti tukete isi Ibaibolo likumanyisya, ketelela IVIDIYO.
Belenga Undumbilili 3:20, ukufuma apo muyobesanie amalalusyo agha:
-
Ukufwana ni vesi ili, ngimba findu fiki fikubombiwa linga umundu afwile?
-
Ngimba kilipo ikighaba kimo iki kitikufwa linga umundu afwile?
Ibaibolo likutubula isyakufwana ni nifwa ya Lazaro um’manyani wa Yesu. Bo mukubelenga Yohani 11:11-14, keta isi Yesu ayobile isyakufwana na isi syalimbonekile Lazaro. Ukufuma apo muyobesanie amalalusyo agha:
-
Ngimba Yesu afwanikisye inifwa ni findu fiki?
-
Ngimba ikifwanikisyo iki kikutubula isyafiki isyakufwana na isi sikubombiwa linga umundu afwile?
-
Ngimba mukwipilika bulebule ukufwana na isi Ibaibolo likuyoba pa nkhani ya bufwe?
4. Ubwanaloli pakuyoba isya nifwa bukututula fiyo
Ukumanya ubwanaloli ubwakufwana ni nifwa kukututula ukuti tuleke ukubatila abandu aba bafwile. Belenga Undumbilili 9:10, ukufuma apo muyobesanie ilalusyo ili:
-
Ngimba abandu aba bafwile babaghile ukutufulasya?
Linga tukusubila ubwanaloli ubwakufuma mu Baibolo, tukabaghila ukusubila ukuti abandu aba bafwile babaghile ukutuhobosya pamo ukuti tubiputeghe. Belenga Yesaya 8:19 na Ubusetuli 4:11, ukufuma apo muyobesanie ilalusyo ili:
-
Ngimba mukwinong’ona ukuti Yehova ikwipilika bulebule nu mundu uyu ikwiputa pamo ikusuma ubutuli ku mundu uyu afwile?
Ubwanaloli ubwakuyoba isya bufwe bukutwabula ku nyiho isi sitikunhobosya Yehova
5. Ubwanaloli ubwakuyoba isya nifwa bukutusubisya
Abandu bingi bamanyisiwe ukuti linga umundu afwile, ikuya pakutamiwa ukufwana na isi abombagha. Loli syakusubisya ukumanya ukuti akayapo umundu nayumo uyu ikutamiwa linga afwile nalinga abombagha ifindu ifibibi fiyo. Belenga Baroma 6:7, ukufuma apo muyobesanie ilalusyo ili:
-
Ibaibolo likuyoba ukuti linga umundu afwile, Kyala atikwinong’onelako isya butulanongwa ubu abombagha. Po ngimba mukwinong’ona ukuti umundu aliwesa uyu afwile ikutamiwa panongwa ya butulanongwa ubu abombile pabwandilo?
Syosa isi tumenye isyakufwana na Yehova, syo syakuti umwene akabaghila ukwitikisya ukuti abandu aba bafwile batamiweghe. Belenga Ukukumbusya Indaghilo 32:4 na 1 Yohani 4:8, ukufuma apo muyobesanie amalalusyo agha:
-
Ngimba Kyala uyu ali nutuyilo utu tuyobiwe mu mavesi agha, abaghile ukwitikisya ukuti abandu aba bafwile batamiweghe?
-
Ngimba ubwanaloli ubwakuyoba isya bandu aba bafwile bukutukasya bulebule? Nongwa yafiki mukuyoba bo ulu?
ABANDU BAMO BIKUYOBA UKUTI: “Ngutila isi sisakumbonekela linga mfwile.”
-
Ngimba mavesi ghaliku aghakusubisya agha mu Baibolo agha mubaghile ukumbelengela?
IFUNDO INYWAMU
Linga mundu afwile, ubumi bwake bukumalika. Abandu aba bafwile batikutamiwa, kangi bakabaghila ukubafulasya abandu aba bali nu bumi.
Ukughomokelamo
-
Ngimba findu fiki fikubombiwa linga umundu afwile?
-
Ngimba tukukasiwa bulebule ukumanya ubwanaloli ubwakuyoba isya nifwa?
-
Ngimba ubwanaloli ubwakuyoba isya nifwa bukutusubisya bulebule?
KETA KANGI IFINGI
Keta isi amasyu aghakuti “moyo” ghikusanusya mu Baibolo.
Keta linga Kyala ikubombela naloli umoto wa helo ukubafunda abandu ababibi.
Ngimba tukulondiwa ukubatila abandu aba bafwile?
Mizimu ya Ŵakufwa—Kasi Yingamovwirani Panji Kumupwetekani? Kasi Yiliko Nadi? (Ibulosha)
Keta muno umundu yumo akasiwe bo amanyile ubwanaloli bwa isi sikubombiwa linga umundu afwile.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
