IKIMANYILO 31
Ngimba Ubunyafyale bwa Kyala Findu Fiki?
Inkhani yakulondiwa fiyo ya mu Baibolo yo iyi yikuyoba isya Bunyafyale bwa Kyala. Yehova ikuya pakubombela Ubunyafyale ubu pakufwanisya ubwighane bwake ubwakuti ikisu kiye Paladaiso. Ngimba Ubunyafyale findu fiki? Ngimba tukumanya bulebule ukuti bukulaghila lino? Ngimba findu fiki ifi Ubunyafyale ubu bufwanisye? Kangi ngimba findu fiki ifi bwisakufwanisya nkyeni? Ikimanyilo iki ni fimanyilo fibili ifya pa nkyeni fikuya pakwamula amalalusyo agha.
1. Ngimba Ubunyafyale bwa Kyala findu fiki, kangi ngimba Mwalafyale wa Bunyafyale ubu yo nani?
Ubunyafyale ubu lyo boma ili limikiwe na Yehova Kyala. Umwalafyale wake, Yesu Kristu ikulaghila kumwanya. (Matai 4:17; Yohani 18:36) Pakuyoba isya Yesu Ibaibolo likuti: “yo isakuyagha ndaghili . . . bope nu Bunyafyale bwake butisakuyagha na pabumalikilo napamo.” (Luka 1:32, 33) Pakuya Mwalafyale wa Bunyafyale bwa Kyala, Yesu isakundongosyagha aliwesa pa kisu.
2. Ngimba bo banani aba bikulaghila pampene na Yesu Kristu?
Yesu atikulaghila mwene. Abandu abakufuma “mfikolo fyosa, munjobelo syosa, mbandu bosa na mfisu . . . abene bo bisakulaghilagha ikisu.” (Ubusetuli 5:9, 10) Ngimba bandu balinga aba bisakulaghilagha na Kristu? Panongwa yakuti Yesu alisile pa kisu, Abakristu mamiliyoni mingi bikunkonga mwene. Loli abandu 144,000 bene mwa bandu aba bo bisakulaghila na Yesu. (Belenga Ubusetuli 14:1-4.) Abakristu abangi bosa bisakuya benekisu Mbunyafyale ubu.—Salimo 37:29.
3. Ngimba Ubunyafyale bwa Kyala bwapamwanya bulebule ukughakinda amaboma gha bandu?
Nalinga ukuti abandu aba bikulaghila bikughelaghela ukubomba ifindu ifinunu, bakaya na maka ghakubomba kilikyosa iki bikulonda. Pabumalilo abandu bamo bikwingila m’malo mwabo kangi abene bikuya bakwighana bene kangi batikulonda ukubatula abandu. Yesu pakuya Ndaghili wa Bunyafyale bwa Kyala, akayapo nayumo uyu isakwingilapo m’malo ghake. Kyala “isakwimikagha ubunyafyale ubu butisa kumalikamo siku.” (Danieli 2:44) Yesu isakulaghilagha ikisu kyosa kangi umwene atisakubombagha ifindu mwakubaketa abangi ukuya bapamwanya ukubakinda abangi. Umwene walughano, wakisa, wabwanaloli kangi isakubamanyisyagha abandu ukuti bababombeleghe abinabo mwakufwana itolo ukubanangisya ulughano, ikisa nu bwanaloli.—Belenga Yesaya 11:9.
MANYILA NYINGI
Keta inongwa iyi Ubunyafyale bwa Kyala buyilile bwa pamwanya ukughakinda amaboma gha bandu.
4. Iboma lya maka lisakulaghilagha pa kisu kyosa
Yesu ali na maka mingi fiyo aghakulaghila ukukinda abalaghili bosa aba baliko kunyuma. Belenga Matai 28:18, kangi muyobesanie ilalusyo ili
-
Ngimba mo munjila yiliku iyi ubulaghili bwa Yesu buyilile bwa pamwanya ukughakinda amaboma gha bandu?
Amaboma gha bandu ghikuchenjachenja, kangi aliwesa ikulaghila ikighaba kinandi itolo kya kisu. Bule pakuyoba isya Bunyafyale bwa Kyala? Belenga Danieli 7:14, kangi muyobesanie amalalusyo agha:
-
Nongwa yafiki syakuhobosya ukuti Ubunyafyale bwa Kyala “butisapakupyutiwa”?
-
Nongwa yafiki syakuhobosya ukuti bwisakulaghila ikisu kyosa?
5. Amaboma gha bandu ghikulondiwa ukusosiwapo
Nongwa yafiki Ubunyafyale bwa Kyala bwisakughasosyapo amaboma gha bandu? Ketelela IVIDIYO, kangi muyobesanie amalalusyo agha.
-
Ngimba findu fiki fibombiwe panongwa ya bulaghili bwa bandu?
Belenga Undumbilili 8:9, kangi muyobesanie ilalusyo ili:
-
Nongwa yafiki mukulonda ukuti Ubunyafyale bwa Kyala busasosyepo amaboma gha bandu? Nongwa yafiki mukuyoba bo ulu?
6. Ubunyafyale bwa Kyala buli na balaghili aba bikutupilikisya kanunu
Panongwa yakuti Umwalafyale witu Yesu alikelepo pa kisu kya pasi bo umundu, umwene “ikutupakisya mbonywa bwitu.” (Bahiburi 4:15) Abandu 144,000 abasubiliwa abanyambala na bakikulu aba bisakulaghila pampene na Yesu basaliwe na Yehova ukufuma “mfikolo fyosa, munjobelo syosa, mbandu bosa na mfisu fyosa.”—Ubusetuli 5:9.
-
Nongwa yafiki mukuketa ukuti syakukasya ukuti Yesu na aba isakulaghilagha nabo bamenye muno ubumi bukuyila?
Yehova abasalile abanyambala na bakikulu abakufuma mfikolo ifyakukindanakindana ukuti balaghileghe pampene na Yesu
7. Ubunyafyale bwa Kyala buli ni ndaghilo isyapamwanya fiyo
Amaboma gha bandu ghikupanga indaghilo isi ghikwinong’ona ukuti sibaghile ukubafighilila abandu bake. Ubunyafyale bwa Kyala bope buli ni ndaghilo isi abandu bake bikulondiwa ukusikonga. Belenga 1 Bakorinti 6:9-11, kangi muyobesanie amalalusyo agha:
-
Ngimba mukwinong’ona ukuti ikisu kisakuya bulebule linga aliwesa isakukongagha indaghilo sya Kyala? a
-
Nongwa yafiki mukwinong’ona ukuti syakupilikiwa kwa Yehova ukughulila ukuti abandu bake basighindikeghe indaghilo isi?
-
Ngimba findu fiki ifi fikunangisya ukuti abandu aba batikupilikila indaghilo isi babaghile ukuchenja?—Keta vesi 11.
Amaboma ghikupanga indaghilo ukuti sibafighilileghe nu kubatula abandu ba nkisu kyabo. Ubunyafyale bwa Kyala buli ni ndaghilo sya pamwanya fiyo isi sikubafighilila nu kubatula abandu bake
UMUNDU YUMO ABAGHILE UKULALUSYA UKUTI: “Ngimba Ubunyafyale bwa Kyala findu fiki?”
-
Ngimba mubaghile ukwamula bulebule?
IFUNDO INYWAMU
Ubunyafyale bwa Kyala lyo boma lyabwanaloli ili lili kumwanya kangi lisakulaghila ikisu kyosa.
Ukughomokelamo
-
Ngimba abalaghili ba Bunyafyale bwa Kyala bo banani?
-
Ngimba Ubunyafyale bwa Kyala bwapamwanya bulebule ukughakinda amaboma gha bandu?
-
Ngimba findu fimo filiku ifi Yehova ikulonda ukuti ababombi bake babombeghe?
KETA KANGI IFINGI
Keta isi Yesu amanyisye isyakufwana na malo gha Bunyafyale.
“Kasi Ufumu wa Chiuta Wuli mu Mtima Winu?” (Inkhani ya pawebusayiti)
Nongwa yafiki Abaketi ba Yehova bikusala ukuya basubiliwa ku Bunyafyale bwa Kyala ukukinda ukuya basubiliwa ku bulaghili bwa bandu?
Keta isi Ibaibolo likulingania isyakufwana na ba 144,000 aba Yehova abasalile ukuti bakalaghileghe pampene na Yesu.
“Kasi Mbanjani Ŵakuluta Kuchanya?” (Inkhani ya pawebusayiti)
Ngimba findu fiki ifi fyalinkasisye unkikulu yumo uyu ali mu jele ukumanya ukuti Kyala mwene yo ikuya pakutwala ikisu ikinunu?
“Kumene Ndinadziwira Yemwe Adzathetse Kupanda Chilungamo” (Galamukani!, November 2011)
a Indaghilo simo isyatuyilo utu tukwisa pakumanyila Nkighaba 3.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
