IKIMANYILO 33
Isi Ubunyafyale bwa Kyala Bwisakubomba
Ubunyafyale bwa Kyala lino bukulaghila kumwanya. Mwalululu bukuya pakuchenja ifindu fingi fiyo pa kisu kyapasi. Isagha tukete ifindu fimo ifyakuhobosya ifi tukughulila linga Ubunyafyale bwa Kyala bwandile ukulaghila pa kisu.
1. Ngimba Ubunyafyale bwa Kyala bukuya pakutwala bulebule ulutengano nu bugholofu pa kisu?
Yesu, Mwalafyale wa Bunyafyale bwa Kyala, isakubonanga abandu bosa ababibi pampene na maboma pa bwite bwa Armagedoni. (Ubusetuli 16:14, 16) Pakabalilo ako, ifindu fyakukongapo ifi Ibaibolo lifingile fisakuya ukuti fifwanisiwe: “Pasyele panandi itolo apa umbibi atisakuyako.” (Salimo 37:10) Mu Bunyafyale bwake, Yesu isakuketesya ukuti pa kisu kyosa pali ulutengano nu bugholofu.—Belenga Yesaya 11:4.
2. Ngimba ubumi bwisakuya bulebule linga ubwighane bwa Kyala bufwanisiwe pa kisu?
Mu Bunyafyale bwa Kyala, “abagholofu bo bisakukikabagha ikisu kangi bisakwitughalagha mumo bwila na bwila.” (Salimo 37:29) Inong’onela muno ifindu fisakuyila pa kisu apa aliwesa isakuya ngolofu kangi aliwesa anganile Yehova nu mwinake. Ububine bwisakumalika kangi aliwesa isakwikala kwa bwila na bwila.
3. Ngimba Ubunyafyale bwa Kyala bwisakubomba isyafiki linga abandu ababibi bapyutiwe?
Linga abandu ababibi bapyutiwe, Yesu isakulaghila pakuya Mwalafyale kwa fyinja 1,000. Pakabalilo ako, umwene na ba 144,000 aba isakulaghila nabo pampene, bisakubatula abandu ukuya bagholofu. Ku bumalilo bwa fyinja ifi, ikisu kisakuya paladaiso uyu isakwisula na bandu balusekelo aba basayiwe panongwa yakupilikila indaghilo sya Yehova. Linga ifyinja ifi fimalike, Yesu isakughomokesya Ubunyafyale ubu kwa Tata wake Yehova. Pakabalilo aka ‘Ingamu ya Yehova yisakukemesiwa.’ ukukinda kunyuma kosa. (Matai 6:9, 10) Isi sisakunangisya ukuti Yehova yo Ndaghili unnunu uyu ikubapasikisya abandu bake. Ukufuma apo, Yehova isakumpyuta Setano ni mbepo syake inyali kangi na bandu aba basalile ukusambukila ubulaghili bwake. (Ubusetuli 20:7-10) Ifyakubombiwa ifinunu ifi Ubunyafyale bwa Kyala bwisakutwala, fisakuyako kwa bwila na bwila.
MANYILA NYINGI
Keta inongwa iyi tukulondiwa ukusubila ukuti Kyala ikuya pakubombela Ubunyafyale bwake ukufwanisya isi Ibaibolo lyafingile isya nkyeni.
4. Ubunyafyale bwa Kyala bukuya pakumasya amaboma gha bandu
‘Umundu ikundaghila umwinake nu kumfulasya.’ (Undumbilili 8:9) Yehova ikuya pakubombela Ubunyafyale bwake ukumasya ubusitabugholofu ubu.
Belenga Danieli 2:44 na 2 Batesalonike 1:6-8, ukufuma apo muyobesanie amalalusyo agha:
-
Ngimba Yehova nu Mwanake Yesu bikuya pakubomba isyafiki nu bulaghili bwa bandu kangi na bosa aba bikukolelana nabo?
-
Ngimba isi mumanyile isyakufwana na Yehova na Yesu sikubasimikisyila ukuti ifyakubomba fyabo fyabugholofu kangi fyabwanaloli?
5. Yesu yo Mwalafyale unnunu fiyo
Pakuya Mwalafyale wa Bunyafyale bwa Kyala, Yesu isakubatula abandu pa kisu mu njila isyakukindanakindana. Ketelela IVIDIYO ukuti mukete muno Yesu ikunangisya ukuti ikulonda ukubatula abandu kangi ukuti Kyala ampele amaka aghakubombela isi.
Ifindu fingi ifi Yesu abombile bo ali pa kisu kyali kifwanikisyo kya ifi Ubunyafyale bwa Kyala bwisakubomba. Ngimba lusayo luliku ulu mukulughulila nkyeni? Belenga amalemba agha ghikututula ukuti tumanye nyingi isyakufwana na isi.
|
PAKABALILO AKA YESU ALI PA KISU . . . |
UKUFUMA KUMWANYA YESU IKUYA . . . |
|---|---|
|
|
|
|
|
|
|
|
6. Ubunyafyale bwa Kyala bwisakutwala ifindu fyakuhobosya fiyo
Ubunyafyale bwa Kyala bwisakubapa abandu ubumi ubwakuhobosya fiyo ubu Yehova akabalilo kosa alondagha ukuti baye nabo. Abene bisakwikala kwa bwila na bwila mu paladaiso pa kisu. Ketelela IVIDIYO ukuti mukete muno Yehova ikubombela Umwanake Yesu ukufwanisya ubwighane bwake.
Belenga Salimo 145:16, ukufuma apo muyobesanie ilalusyo ili:
-
Ngimba findu fiki fikubahobosya ukumanya ukuti Yehova “isakukapa akabumi kosa ifi kikulonda”?
ABANDU BAMO BIKUYOBA UKUTI: “Linga twesa tukukolelana ukubomba ifindu, tubaghile ukamasya indamyo sya nkisu.”
-
Ngimba ndamyo siliku isi Ubunyafyale bwa Kyala bwisakumasya isi amaboma gha bandu ghatoliwe ukumasya?
IFUNDO INYWAMU
Ubunyafyale bwa Kyala bwisakubomba isi Kyala ikulonda. Bwisakupangisya ikisu kya pasi ukuya paladaiso umu mwisakwisula abandu aba bisakumbombelagha Yehova kwa bwila na bwila.
Ukughomokelamo
-
Ngimba Ubunyafyale bwa Kyala bwisakuyikemesya bulebule ingamu ya Kyala?
-
Ngimba tubaghile ukusubila bulebule ukuti Ubunyafyale bwa Kyala bwisakufwanisya isi Ibaibolo lyafingile?
-
Pa findu ifinunu fyosa ifi Ubunyafyale bwa Kyala bwisakutwala, ngimba findu fiki ifi mukulonda ukuti musakete?
KETA KANGI IFINGI
Keta isi amasyu aghakuti Armagedoni ghikusanusya.
“Kodi Nkhondo ya Aramagedo Idzakhala Yotani?” (Inkhani ya pawebusayiti)
Keta isi sisakubombiwa pakabalilo aka Yesu ikukakolela ukuti “ubutolwe ubukulumba”—Matai 24:21
Keta muno imbumba sikwinong’onela ukuti sili pampene mu paladaiso.
Mu nkhani iyakuti “Nkhajifumbanga Mafumbo Ghanandi,” keta isyakufwana nu mundu uyu abombagha isya ndyali alyamuliliwe amalalusyo agha alinagho.
“Baibolo Likusintha Umoyo wa Ŵanthu” (Gongwe la Mulinda, Januwale 1, 2012
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
