IKIMANYILO 34
Ngimba Tubaghile Ukunangisya Bulebule Ulughano Lwitu kwa Yehova?
Ngimba lino munganile fiyo Yehova ukukinda apa mwandagha itolo ukumanyila Ibaibolo? Ngimba mukulonda ukuti mukindilile ukukusya ubumanyani bwinu nu mwene? Linga sili bo ulu, mukulondiwa ukukumbuka ukuti apa ikubaketa ukuti ulughano lwinu kumyake lukukula, umwene ikuya pakubaghana fiyo nu kubatula. Ngimba mubaghile ukunangisya bulebule ukuti munganile?
1. Ngimba tukunangisya bulebule ukuti tunganile Yehova?
Tukunangisya ulughano lwitu kwa Yehova mwakumpilikila. (Belenga 1 Yohani 5:3.) Umwene atikumfimbilisya aliwesa ukuti ampilikileghe. M’malo mwake umwene ampele aliwesa ulusako ulwakusala ukumpilikila pamo hayi. Nongwa yafiki? Yehova ikulonda ukuti tuyeghe “bakupilikila nindumbula yosa.” (Baroma 6:17) Isi sikusanusya ukuti umwene ikulonda ukuti tumpilikileghe panongwa yakuti tunganile komma ukuti tufwanisyeghe itolo ululaghilo. Ifighaba 3 na 4 ifya mu buku ili fipangiwe ukuti fibatule ukuti munangisyeghe ulughano lwinu kwa Yehova mwakubomba isi sikunhobosya kangi nu kuleka ukubomba isi umwene asibengile.
2. Nongwa yafiki kubaghile ukuya kukafu ukunangisya ulughano lwitu kwa Yehova?
“Nyingi itolo isi ungolofu ikukubilwa nasyo.” (Salimo 34:19) Twesa tukutamiwa nu busita bugholofu bwitu. Tukwaghana kangi nindamyo ya ndalama, ifindu ifisita bugholofu ni ndamyo isingi. Linga tukwaghana ni ndamyo, utubalilo tumo kubaghile ukuya kukafu ukubomba isi Yehova ikutusuma ukuti tubombeghe. Isi sibaghile ukupangisya ukuti kuyeghe kupepe ukuleka ukumpilikila. Loli linga muli basubiliwa nu kubomba isi Yehova ikubabula ukuti mubombeghe, ko kuti mukunangisya ukuti munganile umwene ukukinda kilikyosa. Kangi mukunangisya ukuti muli basubiliwa kumyake. Umwene yope isakuya nsubiliwa kumyinu. Atisakubalekamo siku.—Belenga Salimo 4:3
MANYILA NYINGI
Keta muno ukupilikila kwinu kuyilile kwakulondiwa kwa Yehova, kangi manyila isi sibaghile ukubatula ukuti mukindilile ukuya basubiliwa ku myake.
3. Inkhani iyi yikubapalamasya umwe
Ukufwana ni buku lya mu Baibolo lya Yobu, Setano akansusyagha mwene Yobu loli na bandu bosa aba bikulonda ukumbombela Yehova. Belenga Jobu 1:1,6–2:10, kangi muyobesanie amalalusyo aghakukongapo agha:
-
Mwakufwana na isi Setano ayobile, nongwa yafiki Yobu alimpilikile Yehova?—Keta Jobu 1:9-11.
-
Ngimba Setano ikuyoba isyafiki isyakufwana na bandu bosa ukongelelapo na umwe?—Keta Jobu 2:4.
Belenga Jobu 27:5b, kangi muyobesanie ilalusyo ili:
-
Ngimba Yobu anangisye bulebule ukuti alinganile naloli Yehova?
Yobu asimikisye ukuti anganile Yehova mwakukindilila ukuya nsubiliwa kumyake
Tukusimikisya ukuti tunganile Yehova mwakukindilila ukuya basubiliwa kumyake
4. Muyihobosyeghe Indumbula ya Yehova
Belenga Isya Mbupingamu 27:11, kangi muyobesanie amalalusyo agha:
-
Ngimba Yehova ikwipilika bulebule linga muli na mahala kangi mukumpilikila? Nongwa yafiki mukuyoba bo ulu?
5. Mubaghile ukuya basubiliwa kwa Yehova
Ulughano lwitu kwa Yehova lukutupangisya ukuti tubabulengeko abangi isyakufwana nu mwene. Ubusubiliwa bwitu bukutupangisya ukuti tubombeghe isi nalinga ukuti kubaghile ukuya kukafu. Ketelela IVIDIYO, kangi muyobesanie amalalusyo agha.
-
Ngimba mukuketa ukuya kukafu ukubabulako abangi isya Yehova?
-
Ukufwana ni vidiyo iyi, ngimba findu fiki fyalintulile Grayson ukuti amalane nu bogha?
Kupepe fiyo ukungana Yehova linga tusighanile isi umwene asighanile nu kusibenga isi asibengile. Belenga Salimo 97:10, kangi muyobesanie amalusyo agha:
-
Ukufwana na isi mumanyile, ngimba findu fiki ifi Yehova afighanile? Ngimba findu fiki ifi umwene afibengile?
-
Ngimba mubaghile ukumanyila bulebule ukusighana inunu nu kusibenga imbibi?
6. Tukusayiwa linga tukumpilikila Yehova
Ukumpilikila Yehova akabalilo kosa kwakutula. Belenga Yesaya 48:17, 18, kangi muyobesanie amalalusyo agha:
-
Ngimba mukwinong’ona ukuti tubaghile ukusubila ukuti Yehova utubalilo tosa ikumanya isi syakulondiwa fiyo kumyitu? Nongwa yafiki?
-
Ngimba musayiwe bulebule panongwa yakumanyila Ibaibolo nu kum’manya Kyala wa bwanaloli, Yehova?
ABANDU BAMO BIKUYOBA UKUTI: “Isi ngubomba sitikumpalamasya Yehova.”
-
Ngimba ilemba liliku ili mubaghile ukulibombela ukunangisya ukuti isi tukubomba sikumpalamasya Yehova?
IFUNDO INYWAMU
Mubaghile ukunangisya ulughano lwinu kwa Yehova mwa kumpilikila nu kukindilila ukuya basubiliwa kumyake nalinga mukwaghana ni ndamyo
Ukughomokelamo
-
Ngimba mumanyile isyafiki ukufuma nkifwanikisyo kya Yobu?
-
Ngimba mubaghile ukusimikisya bulebule kuti munganile Yehova?
-
Ngimba findu fiki fibaghile ukubatula ukuti muyeghe basubiliwa kwa Yehova?
KETA KANGI IFINGI
Keta muno mubaghile ukuyila basubiliwa kwa Yehova ni kipanga.
Manyila nyingi isyakufwana na muno Setano ikubombela ukuti abayobeleghe imbibi abandu.
“Yobu Akindilile Ukuya Nsubiliwa” (Kasi mu Baibolo—Muli Uthenga Wuli? Chigaŵa 6)
Keta muno abana bope babaghile ukunangisyila ulughano lwabo kwa Yehova.
Ngimba umwana abaghile ukubomba bulebule ifindu mbusubiliwa nalinga abinake bikumfimbilisya ukubomba ifibibi?
Mukaneghe Linga Abininu Bikubafimbilisya Ukubomba Imbibi (3:59)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
