IKIMANYILO 39
Muno Kyala Ikuliketela Ilopa
Ilopa lyapamwanya fiyo. Kisita ilopa nayumo uyu ayagha pakuya mumi. Pakuya Mpeli witu, Yehova yo ikulondiwa ukutubula muno tukulondiwa ukubombela ni lopa. Ngimba umwene ayobile isyafiki isyakufwana ni lopa? Ngimba umundu abaghile ukulya pamo ukubikiwa ilopa? Ngimba mubaghile ukusala bulebule kanunu ikyakubomba pa nkhani iyi?
1. Ngimba Yehova ikuliketa bulebule ilopa?
Nkabalilo aka Ibaibolo lyalembiwagha Kyala ababulile ababombi bake ukuti: “Ilopa bo bumi bwa kipeliwa kyosa.” (Abanyalevi 17:14) Kwa Yehova, ilopa likwimila ubumi. Panongwa yakuti ubumi bwa padela fiyo pamo ukuti kyabupe kya pamwanya ikyakufuma kwa Yehova, ilopa lyope lyapadela fiyo.
2. Ngimba mo munjila yiliku iyi Yehova ikukanisya ukulibombela ilopa?
Yehova ababulile ababombi bake abakunyuma ukuti bangalyagha ilopa. (Belenga Ubwandilo 9:4 na Abanyalevi 17:10.) Umwene asimikisye isi apa akabughatila kakakulongosya kababulile Abakristu bakwanda ukuti “mwepukengeko . . . kwilopa.”—Belenga Imbombo sya Batumiwa 15:28, 29.
Ngimba sikusanusya isyafiki ukwepukako kwilopa? Linga dokotala ababulile ukuti mwepukeko ku bwalwa, mukabaghila ukunwa ubwalwa. Loli ngimba mubaghila ukulya ifyakulya ifi fili nu bwalwa pamo ukubikiwa ubwalwa mu ngole? Mukabaghila ukubomba isi. Mwakufwana itolo, ululaghilo lwa Kyala pakuyoba isya ilopa lukusanusya ukuti tutikulondiwa ukunwa ilopa pamo ukulya inyama iyi ilopa lyake likasokamo, nalinga ko kulya ifyakulya ifi bongelileko ilopa.
Bule pakubombela ilopa ukuya nkota? Injila simo sitikukolelana ni ndaghilo sya Kyala. Ukubikiwa ifighaba ifinywamu fya ilopa bo amaselo makesefu, amaselo amelu, amapulatileti na pulazima. Injila simo isi abakipatala bikubombela sitikonanga indaghilo sya Kyala bo ukwegha ifighaba ifinandinandi fya ilopa. Injila yimo ko kumbika umundu ilopa lyake. Linga umundu ikuketesya injila isi, aliwesa ikulondiwa ukusala mwene ikyakubomba. a—Bagalatia 6:5.
MANYILA NYINGI
Keta muno mubaghile ukusalila ubutuli bwa kipatala pa nkhani ya ilopa.
3. Musaleghe ubutuli bwa nkota ubu bukunhobosya Yehova
Ngimba mubaghile ukusala bulebule ubutuli bwa kipatala ubu bukolelana na muno Kyala ikuketela ilopa? Ketelela IVIDIYO, kangi muyobesanie ubununu bwakukonga injila isyakukongapo isi.
-
Amusumeghe amahala.—Yakobu 1:5.
-
Mufufuzeghe ifundo sya mu Baibolo na muno mubaghile ukusibombela imbombo.—Isya Mbupingamu 13:16.
-
Keta amasakisyo aghangi ukufwana na kuno mukwikala.
-
Keta isakisyo ili likuboneka ukuti likaya linunu kumyinu.
-
Muketesyeghe ukuti isi musalile sikuya pakubapangisya ukuti muye na mabyebye amanunu.—Imbombo sya Batumiwa 24:16. b
-
Mukulondiwa ukumanya ukuti akayapo umundu nayumo nalinga yo mwininu wa mbweghi, abakulumba, pamo m’manyisi winu wa Baibolo uyu abaghile ukubasalila ikyakubomba pa nkhani iyi yikukolelana na mabyebye gha aliwesa pa mwene.—Baroma 14:12.
-
Mukulondiwa ukulemba isi musalile ukuti abininu basimanyeghe.
4. Abaketi ba Yehova bikwambilila ubutuli ubununu ubwa mikota
Sibaghile ukubombiwa ukukonga indaghilo sya Kyala pa nkhani ya ilopa nu kwambilila ubutuli ubu ilopa likingisiwamo. Ketelela IVIDIYO.
Belenga Titi 3:2, kangi muyobesanie ilalusyo ili:
-
Nongwa yafiki tukulondiwa ukuya nu lughindiko fiyo linga tukuyobesania na badokotala?
|
Ifi fikaya fyakwitikisiwa |
Ifi unkristu aliwesa ikusala pamwene |
|---|---|
|
A. Amapulazima |
Ifighaba ifinandinandi ifi fifumile ku pulazima |
|
B. Amaselo amelu |
Ifighaba ifinandinandi ifi fifumile ku maselo amelu |
|
C. Amapulatileti |
Ifighaba ifinandinandi ifi fifumile ku mapulatileti |
|
D. Amaselo amakesefu |
Ifighaba finandinandi fya Maselo amakesefu |
5. Linga ifighaba ifinandinandi fya ilopa fingisiwepo
Ilopa lili ni fighaba ifinywamu 4. Ifighaba ifi fikongelelapo amaselo amakesefu, amaselo amelu, amapulatileti na mapulazima. Ifighaba ifi fili nu tufighaghaba twingi utunandinandi, utu tukukoleliwa ukuti ifighaba ifya ilopa. c Utufighaba tumo bikupangila imikota iyi yikutula pa mbungo kangi utungi tukutula ukuti ilopa lileke ukoneka.
Pankhani ya tufighaba tunandinandi twa ilopa, Unkristu aliwesa ikulondiwa ukusala mwene ikyakubomba ukufwana na mabyebye agha ghamanyisiwe ifundo isya mu Baibolo. Bamo babaghile ukuleka ukwambilila ubutuli bwa fighaba ifinandinandi fya ilopa. Bamo babaghile ukwipilika ukuti amabyebye ghabo ghikubitikisya ukwambilila ubutuli ubu.
Linga mukusala ikyakubomba, inong’onela ilalusyo ili:
-
Ngimba mbaghile ukulingania bulebule kwa dokotala inongwa iyi ngukana pamo ukwitika ukwambilila ifighaba ifinandinandi fya ilopa?
UMUNDU YUMO ABAGHILE UKULALUSYA UKUTI: “Ngimba bubibi buliku ubu bukuyapo linga mundu ambilile ilopa?
-
Ngimba mukwinong’ona isyafiki?
IFUNDO INYWAMU
Yehova atikulonda ukuti tubombeleghe ububibi ilopa.
Ukughomokelamo
-
Nongwa yafiki Yehova ikuliketa ilopa ukuya lya padela fiyo?
-
Ngimba tukumanya bulebule ukuti ululaghilo lwa Kyala pa nkhani yakuleka ukulya ilopa, lukubomba na pa nkhani yakubikiwa ilopa?
-
Ngimba mubaghile ukusala bulebule kanunu ikyakubomba pa nkhani sya kipatala isi sikukolelana ni lopa?
KETA KANGI IFINGI
Ngimba findu fiki ifi tukulondiwa ukwinong’onelapo linga tukusala ukwambilila unkota ughu ghukongelelapo ilopa litu?
“Mafunso Ochokera kwa Oŵerenga” (Nsanja ya Olonda, October 15, 2000)
Ngimba findu fiki ifi mukulondiwa ukuketesya linga mukusala ukuti mwambilile ifighaba ifinandinandi fya ilopa?
“Mafunso Ochokera kwa Oŵerenga” (Nsanja ya Olonda, June 15, 2004)
Ngimba findu fiki ifi fyalimpangisye dokotala ukusubila ukuti muno Yehova ikufiketela ifindu pa nkhani ya ilopa kwakupilikiwa fiyo?
“Nkhuwona Ndopa nga Umo Chiuta Wakuziwonera” (Wukani!, December 8, 2003)
Keta muno abakulumba aba bali mu Komiti Iyakuyobesania ni Kipatala bikubatulila abakamu na balumbu babo.
a Keta Ikimayilo 35, kyamutu wakuti, “Muno Mubaghile Ukubombela Ukuti Musaleghe Kanunu Ifyakubomba.”
b Keta ifundo ya nambala 5 iyakuti “Linga Fingisiwemo Ifighaba Ifya Ilopa” na Amasyu gha Bumalilo 3, “Injila Sya Butuli Bwa Nkota isi Sikongelelapo Ilopa.”
c Abadokotala bamo bikufiketa ifighaba ifinywamu fya ilopa ukuti tufwene itolo nu tufighaba utunandinandi. Polelo mukulondiwa ukundingania kanunu dokotala pa isi musalile ukuti muleke ukwambilila ilopa ili lyo maselo amakesefu, amaselo amelu, amapulateleti na mapulazima.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
